Usa ka Panulondon nga Imong Masaligan

“KON makadawat kag sulat gikan sa usa ka tawo nga nag-ingon nga dunay wala kuhaa nga panulondon nga nagpaabot kanimo, pagbantay. Lagmit nga gipuntirya ka sa usa ka tuso nga mangingilad.”

Kana maoy pasidaan sa United States Postal Inspection Service nga gipaskin diha sa Web site niini. Ngano man? Tungod kay libolibong tawo ang nakadawat ug sulat nga nag-ingong, ‘Ang imong paryente namatay ug nagbilin kanimog panulondon.’ Tungod niana, daghan ang nagpadalag $30 dolyares o kapin pa ngadto sa maong tawo agig bayad sa impormasyon nga magpatin-aw kono bahin sa nahimutangan sa maong panulondon ug kon sa unsang paagi kini makuha. Nahigawad lang gayod sila. Ang tanang misanong nakadawat sa mao ra gihapong impormasyon—ug wala gayod silay kalaoman nga makadawat ug bisan unsang panulondon.

Ang maong mga pamaagi makadani sa kinaiyanhong tinguha sa mga tawo nga makadawat ug panulondon. Bisan pa niana, ang Bibliya naghisgot nga may pag-uyon niadtong mohatag ug panulondon sa dihang kini nag-ingon: “Ang maayong tawo magbilin ug usa ka panulondon alang sa mga anak sa mga anak.” (Proverbio 13:22) Gani, si Jesu-Kristo mismo maoy nagsulti niining gibantog ug gimahal pag-ayong pamulong diha sa iyang Wali sa Bukid: “Bulahan ang mga maaghop; tungod kay sila magapanunod sa yuta.”—Mateo 5:5, King James Version.

Ang mga pulong ni Jesus magpahinumdom kanato kang Haring David sa karaang Israel nga giinspirar sa pagsulat kasiglohan una pa niana: “Ang mga maaghop magapanunod sa yuta; ug sila magmalipayon sa kadagaya sa pakigdait.”—Salmo 37:11, KJ.

“Magapanunod sa yuta”—pagkaanindot nga palaaboton! Apan makaseguro ba kita nga kini dili laing malipotong pamaagi aron hikawan ang mga tawo ug usa ka butang? Oo, makaseguro kita. Sanglit ang yuta maoy bahin sa kahibulongang kalalangan ni Jehova, siya ingong Magbubuhat ug Tag-iya adunay legal nga katungod sa paghatag niini ngadto kang bisan kinsa nga iyang pilion. Pinaagi kang Haring David, si Jehova mihimo niining matagnaong saad ngadto sa Iyang hinigugmang Anak, si Jesu-Kristo: “Pangayo kanako, aron ikahatag ko ang mga nasod ingong imong panulondon ug ang mga kinatumyan sa yuta ingong imong gipanag-iya.” (Salmo 2:8) Tungod niini, si apostol Pablo naghubit kang Jesus ingong usa ‘kinsa gitudlo sa Diyos nga manununod sa tanang butang.’ (Hebreohanon 1:2) Busa, kita makasalig sa bug-os nga sa dihang miingon si Jesus nga ang mga maaghop “magapanunod sa yuta,” matinud-anon niyang gisulti kadto, ug siya adunay igong gahom sa pagtuman sa iyang saad.—Mateo 28:18.

Busa, ang hinungdanong pangutana mao, Sa unsang paagi matuman ang maong saad? Bisan asa kita motan-aw karon, morag ang mabangis ug mapahitas-on nga mga tawo mao ang labing malamposon ug nagakuha sa tanan nilang gusto. Unsa na lay panundon sa mga maaghop?  Dugang pa, ang yuta naapektahan sa grabeng mga problema sa polusyon, ug ang mga kahinguhaan niini ginapahimuslan sa hakog ug mubog-panglantaw nga mga tawo. Aduna pa bay takos panundon niining yutaa? Giawhag namo kamo sa pagbasa sa sunod nga artikulo aron mahibaloan ang tubag niini ug sa uban pang hinungdanong mga pangutana.

[Hulagway sa panid 3]

Madawat kaha nimo ang tinuod nga panulondon?