Mga Pangutana Gikan sa mga Magbabasa

Sa dihang gitudloan ni Jesus ang iyang mga sumusunod “sa pagpahulam nga walay tubo, nga dili maglaom ug bisan unsang balos,” gipasabot ba niya nga dili na nila angayng paninglon bisan ang puhonan?

Angay natong tagdon ang Moisesnong Balaod aron masabtan ang mga pulong ni Jesus nga narekord sa Lucas 6:35. Diha sa maong Balaod, ang Diyos nagsugo sa mga Israelinhon sa pagpautang nga walay tubo ngadto sa ilang isigka-Israelinhon kinsa naglisod sa panalapi ug nanginahanglan ug tabang. (Exodo 22:25; Levitico 25:35-37; Mateo 5:42) Ang maong utang wala hangyoa aron gamiton sa negosyo. Hinunoa, ang maong walay-tubo nga utang motabang kanila nga makalingkawas sa kawalad-on o kalisod. Kon buot hunahunaon, dili gayod mahigugmaon ang pagpaganansiya gikan sa tawo nga naglisod sa panalapi. Bisan pa niana, ang nagpautang may katungod sa pagsingil sa puhonan, nga mokuha pa gani usahay ug garantiya alang sa iyang gipahulam nga salapi.—Deuteronomio 15:7, 8.

Samtang nagtuboy sa Balaod, si Jesus naghatag niana ug mas sangkad nga kapadapatan, nga nag-ingon nga ang usa nga motabang dili angay nga molaom “ug bisan unsang balos.” Sama sa mga Israelinhon, ang mga Kristohanon makaagom usahay ug pinansiyal nga kalisdanan o ubang mga kakulian nga basin magbanlod pa gani kanila sa tumang kakabos. Kon ang Kristohanong igsoon nga anaa nianang lisod kaayo nga kahimtang mangayo ug tabang, dili ba maayo nga tabangan nato siya? Sa pagkatinuod, ang tiunay nga gugma magtukmod sa usa ka Kristohanon sa pagtabang sa iyang igsoon nga naglisod gayod sa panalapi tungod sa wala-damha nga mga kahimtang. (Proverbio 3:27) Ang usa mahimong makahatag ug gasa sa maong nanginahanglan nga igsoon, bisan tuod mas menos kana sa kantidad nga buot untang hulamon.—Salmo 37:21.

Sa unang siglo K.P., ang apostol nga si Pablo ug si Barnabas gisugo sa pagdala sa mga donasyon nga gikan sa mga Kristohanon sa Asia Minor ngadto sa ilang mga igsoon sa Judea tungod sa kagutmanan. (Buhat 11:28-30) Susama usab karon, sa dihang mohampak ang mga katalagman, ang mga Kristohanon kasagarang mohatag ug mga hinabang ngadto sa ilang mga igsoon nga nanginahanglan. Sa paghimo niana, nagahatag usab sila ug maayong pamatuod ngadto sa uban. (Mateo 5:16) Siyempre, ang tinamdan ug kahimtang sa usa nga nangayog tabang angayng tagdon. Nganong nanginahanglan man siya? Angayng hatagag pagtagad ang giingon ni Pablo: “Kon adunay dili buot magtrabaho, ayaw usab siya pakan-a.”—2 Tesalonica 3:10.

Kon ang usa ka igsoon nga gustong mangutang wala mag-ilaid sa kakabos apan nanginahanglan lang ug temporaryo nga tabang aron makalingkawas siya sa pinansiyal nga kalisod, daw nahiangay ang pagpautang kaniya nga walay tubo. Sa maong kahimtang, ang pagpautang uban sa tinguha nga bug-os nga mabayran dili supak sa mga pulong ni Jesus sa Lucas 6:35. Angayng isulat ang usa ka espesipiko nga kasabotan, ug ang nangutang angayng mohimo sa tanan niyang maarangan sa pagbayad niana sumala sa mga kondisyon nga gikauyonan. Sa pagkatinuod, ang Kristohanong gugma angayng magpalihok sa nangutang sa pagbayad sa iyang utang sama nga gipalihok niana ang nagpautang sa pagpautang.

Ang usa nga naghunahuna sa pagpautang (o paghatag ug gasa) angay usab mosusi sa kahimtang sa iyang kaugalingong pamilya. Pananglitan, dili kaha kana makabalda sa iyang katakos sa pagtagana sa mga panginahanglan sa mga membro sa iyang pamilya, nga maoy panguna niyang obligasyon sumala sa Kasulatan? (2 Corinto 8:12; 1 Timoteo 5:8) Bisan pa niana, ang mga Kristohanon angayng mangitag mga kahigayonan sa pagpakitag gugma sa usag usa, nga magpasundayag sa maong gugma diha sa praktikal nga mga paagi nga nahiuyon sa mga prinsipyo sa Bibliya.—Santiago 1:27; 1 Juan 3:18; 4:7-11.