Kinsa ang Maayong Pangulo Karong Panahona?

Niadtong 1940, dihay krisis bahin sa pagpangulo sa Britanikong Parliamento. Ang setentay-siyete-anyos nga si David Lloyd George, nga naminaw sa lantugi, maoy nangulo sa Britanya sa kadaogan sa Gubat sa Kalibotan I, ug tungod sa iyang daghang tuig sa politika siya nakasusi ug maayo sa mga buhat sa tag-as nga mga opisyales. Sa iyang pakigpulong sa House of Commons niadtong Mayo 8, siya miingon: “Ang nasod andam gayod nga mosakripisyo kon kini adunay maayong pangulo, kon ang Kagamhanan dayag nga magpakita kon unsay ilang mga tumong ug kon ang nasod masaligon nga kadtong mangulo niini nagabuhat sa ilang maarangan.”

ANG mga pulong ni Lloyd George nagpatin-aw nga ang mga tawo nagdahom nga ang ilang mga pangulo may katakos ug tinuod nga maningkamot sa pagpauswag sa mga kahimtang. Ang usa nga nangampanya sa eleksiyon miingon: “Sa dihang ang mga tawo mobotar ug presidente, sila mobotar sa usa ka tawo nga kaniya ilang gisalig ang ilang kinabuhi, kaugmaon, ug mga anak.” Dakong kaakohan nga ampingan ang maong pagsalig. Ngano?

Ang atong kalibotan napuno sa mga problema nga daw lisod sulbaron. Pananglitan, kinsa ba ang pangulo nga nagpamatuod sa iyang kaugalingon nga maalamon ug gamhanan kaayo nga iyang mawagtang ang krimen ug gubat? Kinsa ba sa mga pangulo karon ang may kahinguhaan ug pagkamabination nga makatagana ug pagkaon, hinlong tubig, ug pag-atiman sa panglawas sa matag tawo? Kinsa ba ang may kahibalo ug determinasyon sa pagpanalipod ug pagpasig-uli sa kalikopan? Kinsa ba ang may igong katakos ug kagahom sa pagseguro nga ang tanang tawo makapahimulos sa hataas ug malipayong kinabuhi?

Ang mga Tawo Walay Katakos sa Paghimo sa Maong Buluhaton

Tinuod nga ang pipila ka pangulo may diyutayng kalamposan. Bisan pa niana, sila makaalagad sa labing dugay sulod lamang sa pipila ka dekada—ug dayon kinsay mopuli? Usa sa labing takos nga mga pangulo nga nabuhi sukad, si Haring Solomon sa karaang Israel, namalandong ning pangutanaha. Siya mihinapos: “Ako mismo nagdumot sa tanan kong kahago nga akong gihagoan sa ilalom sa adlaw, nga akong ibilin sa tawo nga moabot sunod kanako. Ug kinsay nasayod kon siya mahimong maalamon o buangbuang? Bisan pa niana siya mogahom ibabaw sa tanan kong kahago nga  akong gihagoan ug nga akong gipakitaan ug kaalam ilalom sa adlaw. Kini usab kakawangan.”—Ecclesiastes 2:18, 19.

Wala mahibalo si Solomon kon ang mopuli kaniya magpadayon sa iyang maayong buhat o magdaot niini. Alang kang Solomon, ang siklo sa pag-ilis-ilis sa daan ug bag-ong mga magmamando maoy “kakawangan.” Ang ubang mga hubad sa Bibliya nagtawag ning maong proseso nga “walay-pulos,” o “walay-tumong.” Usa ka bersiyon nag-ingon: “Binuang.”

Ang kapintasan gamiton usahay aron ipugos ang pag-ilis ug mga pangulo. Ang takos nga mga pangulo gipamatay samtang sila nangatungdanan. Si Abraham Lincoln, ang tinamod gayod nga presidente sa Tinipong Bansa, kas-a miingon sa iyang mamiminaw: “Ako gipili aron dumalahon ang usa ka hinungdanong katungdanan sa mubong panahon, ug ako karon, sa inyong panan-aw, gihatagag impluwensiya nga sa di-madugay mahanaw ra.” Tinuod nga mubo ra ang iyang pangatungdanan. Bisan pa sa tanan niyang gihimo ug sa iyang tinguha sa paghimog dugang alang sa mga tawo, si Presidente Lincoln nangulo sa iyang nasod sulod sa upat lamang ka tuig. Sa sinugdanan sa iyang ikaduhang termino sa katungdanan, siya gipatay sa usa ka tawo nga buot ug bag-ong pangulo.

Bisan ang labing maayong tawhanong mga pangulo dili makagarantiya sa ilang kaugmaon. Nan, makasalig ka ba kanila nga garantiyahan ang imong kinabuhi? Ang Bibliya nag-ingon: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan. Mogula ang iyang espiritu, mobalik siya sa iyang yuta; nianang adlawa mahanaw ang iyang mga hunahuna.” Ang hubad sa Byington nag-ingon sa kataposang bahin sa bersikulo 4: “Nianang adlawa ang iyang kaayo bug-os nga mahanaw.”—Salmo 146:3, 4.

Ang tambag nga dili mosalig sa tawhanong mga pangulo basin lisod dawaton. Bisan pa niana, ang Bibliya wala mag-ingon nga ang mga tawo dili na gayod makabaton ug maayo, dumalayong pangulo. “Tan-awa! Usa ka hari magahari alang sa pagkamatarong,” nag-ingon ang Isaias 32:1. Si Jehova nga Diyos, ang Maglalalang sa tawo, nag-andam ug “usa ka hari,” usa ka Pangulo, nga sa di-madugay bug-os nang magkontrolar sa mga kalihokan sa yuta. Kinsa siya? Ang tagna sa Bibliya nagpaila kaniya.

 Ang Usa nga Kuwalipikado Gayod nga Mangulo

Duha ka libo ka tuig kanhi, usa ka manulonda miingon sa usa ka batan-ong Hudiya nga ginganlag Maria: “Ikaw manamkon sulod sa imong tagoangkan ug manganak ug usa ka anak nga lalaki, ug pagatawgon mo ang iyang ngalan nga Jesus. Kini siya mahimong bantogan ug pagatawgong Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Lucas 1:31-33) Oo, si Jesus nga taga-Nasaret mao ang Hari nga gipaila sa tagna sa Bibliya.

Ang relihiyosong mga dibuho sagad naghulagway kang Jesus ingong usa ka masuso, kulag-kaon nga maluyahong tawo, o ermitanyo nga mosugot na lamang bisan unsay modangat kaniya. Kining mga hulagwaya dili makapadasig sa mga tawo nga mosalig kaniya ingong Magmamando. Apan, ang tinuod nga Jesu-Kristo diha sa Bibliya mitubo nga usa ka mabaskog, hamtong nga lalaki nga puno sa kadasig ug inisyatibo. Ug iyang naangkon ang ubang mga hiyas nga naghimo kaniyang may-katakos nga pangulo. (Lucas 2:52) Ang mosunod maoy pipila ka bahin sa iyang talagsaong personalidad.

Padayong nahuptan ni Jesus ang hingpit nga integridad. Talagsaon ang iyang matinud-anon, tul-id nga panggawi nga atubangan sa publiko iyang gihagit ang iyang mga kaaway sa pagpresentar ug balidong akusasyon batok kaniya. Wala silay gikapresentar. (Juan 8:46) Ang iyang di-salingkapaw nga mga pagtulon-an nakadani sa daghang sinserong mga tawo nga sila nahimong iyang mga sumusunod.—Juan 7:46; 8:28-30; 12:19.

Si Jesus bug-os nga dedikado ngadto sa Diyos. Siya determinado gayod nga humanon ang buluhaton nga gisugo kaniya sa Diyos mao nga walay kaaway—tawo man o demonyo—ang nakapugong kaniya. Wala siya mahadlok sa mapintas nga mga pag-atake. (Lucas 4:28-30) Ang kakapoy ug kagutom wala makahanaw sa iyang kadasig. (Juan 4:5-16, 31-34) Bisan tuod ang iyang mga higala mibiya kaniya, wala gayod siya motipas gikan sa iyang tumong.—Mateo 26:55, 56; Juan 18:3-9.

Si Jesus may tim-os nga kabalaka sa mga tawo. Gipakaon niya ang gigutom. (Juan 6:10, 11) Gihupay niya ang magul-anon. (Lucas 7:11-15) Gipasig-uli niya ang panan-aw, pandungog, ug maayong panglawas niadtong kinahanglan nga ayohon. (Mateo 12:22; Lucas 8:43-48; Juan 9:1-6) Gidasig niya ang iyang kugihang mga apostoles. (Juan, mga kapitulo 13-17) Gipamatud-an niya nga siya “ang maayong magbalantay” nga nag-atiman sa iyang mga karnero.—Juan 10:11-14.

Si Jesus andam motrabaho. Gihugasan niya ang mga tiil sa mga apostoles aron tudloan sila ug hinungdanong leksiyon. (Juan 13:4-15) Ang iyang mga tiil nahugawan samtang siya nagsangyaw sa maayong balita subay sa abogong kadalanan sa Israel. (Lucas 8:1) Bisan sa dihang siya naghunahuna sa pagpahulay sa “usa ka mingaw nga dapit,” siya matinagdanon sa dihang ang dakong panon sa mga tawo nangita kaniya aron mangayog dugang instruksiyon. (Marcos 6:30-34) Sa ingon siya nagpakitag panig-ingnan sa pagkakugihan alang sa tanang Kristohanon.—1 Juan 2:6.

Gitapos ni Jesus ang iyang buluhaton ug mibiya sa yuta. Isip ganti sa iyang pagkamatinumanon, si Jehova nga Diyos naghatag kaniya sa pagkahari ug pagkadi-mamatay didto sa mga langit. Bahin sa nabanhaw nga si Jesus, ang Bibliya nag-ingon: “Si Kristo, karon nga siya gibangon na gikan sa mga patay, dili na mamatay; ang kamatayon dili na agalon ibabaw kaniya.” (Roma 6:9) Ikaw makasalig nga siya mao ang labing maayong Pangulo sa katawhan. Sa dihang si Kristo Jesus bug-os nang magagahom sa yuta, wala na unyay panginahanglan sa paghatag ug gahom kang bisan kinsa, ni may panginahanglan pa nga mag-ilis ug pangulo. Siya dili gayod mapatay samtang mangatungdanan, ug ang iyang nahimong buluhaton dili gub-on o daoton sa usa ka dili-takos nga sumusunod. Apan unsay tino niyang pagabuhaton aron mabenepisyohan ang katawhan?

Kon Unsay Buhaton Niining Bag-ong Pangulo

Ang Salmo 72 mohatag kanato ug pipila ka matagnaong mga detalye kon sa unsang paagi magmando kining hingpit, dili-mamatay nga Hari. Sa mga bersikulo 7 ug 8, atong mabasa: “Sa iyang mga adlaw molambo ang matarong, ug ang kadagaya sa pakigdait hangtod nga ang bulan mahanaw na. Ug aduna unya siyay mga sakop gikan sa usa ka dagat ngadto sa laing dagat ug gikan sa Suba hangtod sa mga kinatumyan sa yuta.” Ilalom sa iyang mapuslanong pagmando, ang mga molupyo sa yuta magpahimulos sa walay-kataposan ug mapinadayonong  kasegurohan. Iyang laglagon ang tanang hinagiban karon ug langkaton bisan ang tinguha sa pagpakiggubat gikan sa kasingkasing sa tawo. Kadtong mga tawo karon nga moatake sa uban samag manunukob nga mga leyon o molihok nga samag bangis nga mga uso sa ilang mga silingan bug-os na nga magbag-o sa ilang kinaiya. (Isaias 11:1-9) Modagaya unya ang pakigdait.

Ang Salmo 72 dugang nag-ingon diha sa mga bersikulo 12 ngadto sa 14: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.” Ang mga timawa, kabos, ug ang mga sinakit mahimo unyang bahin sa usa ka malipayong tawhanong pamilya, nga mahiusa ilalom sa pagpangulo sa Hari nga si Jesu-Kristo. Mahupong unya sa kangaya ang ilang kinabuhi, dili sa kasakit ug kawalay-paglaom.—Isaias 35:10.

Ang bersikulo 16 nagsaad: “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.” Ang kagutom kanunayng nagsakit sa minilyong tawo sa yuta karon. Ang politika ug kadalo sagad maoy makapugong sa angay-angay nga pag-apod-apod sa igong pagkaon, mao nga panonpanon sa mga tawo, ilabina ang mga bata, mangamatay sa gutom. Apan ilalom sa pagmando ni Jesu-Kristo, kining problemaha pagahanawon. Ang yuta panalanginan sa dagayang ani sa lamiang pagkaon. Ang tanang tawo mapakaon ug maayo.

Buot ka bang makatagamtam sa maong mga panalangin ilalom sa maayong pagpangulo? Kon mao, ikaw among dasigon sa pagtuon bahin sa Pangulo nga sa di-madugay bug-os nang magagahom sa tibuok yuta. Ang mga Saksi ni Jehova malipay sa pagtabang kanimo sa pagbuhat niana. Ikaw dili gayod mahigawad, kay si Jehova nga Diyos nag-ingon bahin sa iyang Anak: “Ako, ako mismo, nagpahimutang sa akong hari ibabaw sa Zion, ang akong bukid nga balaan.”—Salmo 2:6.

[Kahon sa panid 5]

KALIT NGA NAWAD-AN UG GAHOM

Ang usa ka magmamando kasagarang makasalig nga siya tahoron ug paluyohan sa iyang mga ginsakpan kon iyang ikahatag kanila ang makataronganong sukod sa kalinaw ug may-kasegurohang mga kahimtang sa kinabuhi. Apan, kon ang mga tawo mawad-ag pagsalig kaniya sa bisan unsang rason, sa dili madugay ang laing tawo mopuli kaniya sa gahom. Ang mosunod maoy pipila ka pananglitan sa mga kahimtang nga sa puwersadong paagi kalit nga nawad-an ug gahom ang gamhanang mga magmamando.

Dili maayong mga kahimtang sa panginabuhi. Sa ulahing bahin sa ika-18ng siglo, daghang Pranses nga lungsoranon napugos sa pagkinabuhi nga may bug-at nga mga buluhisan ug kulang nga pagkaon. Kining mga kahimtanga nahimong pabilo sa Pranses nga Rebolusyon, mao nga niadtong 1793 si Haring Louis XVI gipunggotan ug ulo.

Gubat. Ang Gubat sa Kalibotan I maoy nagtapos sa pagmando sa pipila sa labing gamhanang mga emperador sa kasaysayan. Pananglitan, niadtong 1917 ang kanihit sa pagkaon gumikan sa gubat sa St. Petersburg, Rusya, maoy nagsugnib sa Pebrero (o Ruso) nga Rebolusyon. Kadtong maong pag-alsa maoy nagpakanaog kang Czar Nicholas II gikan sa trono ug misangpot sa Komunista nga pagmando. Niadtong Nobyembre 1918, ang Alemanya buot ug kalinaw, apan ang mga Alyado wala mohunong sa pagpakiggubat hangtod nga nausab ang pagmando. Ingong resulta, ang Aleman nga si Emperador Wilhelm II napugos sa pagkalagiw ngadto sa Netherlands.

Tinguha sa lahi nga mga sistema sa panggamhanan. Sa 1989 ang Iron Curtain nahugno. Ang mga gobyerno nga daw ingon ka lig-on sa bato napukan sa dihang ang ilang mga ginsakpan nagsalikway sa Komunismo ug nagtukod ug nagkalainlaing mga paagi sa pagmando.

[Mga hulagway sa panid 7]

Si Jesus nagpakaon sa gigutom, nag-ayo sa masakiton, ug nagpakitag maayong panig-ingnan alang sa tanang Kristohanon

[Picture Credit Line sa panid 4]

Lloyd George: Photo by Kurt Hutton/Picture Post/Getty Images