Malipayong mga Alagad ni Jehova
Malipayong mga Alagad ni Jehova
“Malipayon kadtong mahunahunaon sa ilang espirituwal nga panginahanglan.”—MATEO 5:3.
1. Unsa ang tinuod nga kalipay, ug unsay gibanaag niini?
GIPABILHAN gayod sa katawhan ni Jehova ang ilang malipayong kahimtang. Ang salmistang si David miingon: “Malipayon ang katawhan kansang Diyos mao si Jehova!” (Salmo 144:15) Ang kalipay maoy maayong pagbati. Ang hilabihang kalipay—nga modulot sa atong kahiladman—nagsumikad sa pagkaamgo nga kita gipanalanginan ni Jehova. (Proverbio 10:22) Ang maong kalipay nagbanaag ug suod nga relasyon uban sa atong langitnong Amahan ug sa kahibalo nga kita nagatuman sa iyang kabubut-on. (Salmo 112:1; 119:1, 2) Makaiikag, gihisgotan ni Jesus ang siyam ka hinungdan nga niana kita magmalipayon. Ang pagsusi sa gitawag ug mga kalipay niining artikuloha ug sa sunod nga artikulo motabang kanato sa pagkaamgo kon unsa ka dako ang kalipay nga atong bation kon kita matinumanong nagaalagad “sa malipayong Diyos,” si Jehova.—1 Timoteo 1:11.
Pagkaamgo sa Atong Espirituwal nga Panginahanglan
2. Kanus-a naghisgot si Jesus bahin sa kalipay, ug unsa ang iyang pangbukas nga pahayag?
2 Sa 31 K.P., gipahayag ni Jesus ang usa sa labing bantog nga mga pakigpulong sa tanang panahon. Kini gitawag ug Wali sa Bukid tungod kay gipahayag kini ni Jesus sa bakilid nga nag-umbaw sa Dagat sa Galilea. Ang Ebanghelyo ni Mateo nag-asoy: “Sa nakita [ni Jesus] ang mga panon sa katawhan mitungas siya sa bukid; ug human siya makalingkod ang iyang mga tinun-an miduol kaniya; ug siya mibungat sa iyang baba ug misugod sa pagtudlo kanila, nga nag-ingon: ‘Malipayon kadtong mahunahunaon sa ilang espirituwal nga panginahanglan, sanglit ila ang gingharian sa mga langit.’” Kon hubaron sa literal nga paagi, ang pangbukas nga mga pulong ni Jesus mabasa nga ingon niini: “Malipayon ang mga kabos (labot) sa espiritu,” o “Malipayon kadtong kinsa mga makililimos sa espiritu.” (Mateo 5:1-3; Kingdom Interlinear; potnot) Sa Today’s English Version: “Malipayon kadtong nahibalo nga sila kabos sa espirituwal.”
3. Sa unsang paagi ang mapainubsanong tinamdan makatampo sa atong kalipay?
3 Sa iyang wali sa bukid, gipunting ni Jesus nga ang usa ka tawo mas malipayon kon siya nakaamgo nga siya nanginahanglan sa espirituwal nga paagi. Ang mapainubsanong mga Kristohanon, kay bug-os nga nakaamgo sa ilang makasasalang kahimtang, nangaliyupo kang Jehova alang sa kapasayloan pinasukad sa halad lukat ni Kristo. (1 Juan 1:9) Busa sila nakakaplag ug kalinaw sa hunahuna ug tinuod nga kalipay. “Malipayon siya kansang kalapasan gipasaylo, kansang sala gitabonan.”—Salmo 32:1; 119:165.
4. (a) Sa unsang mga paagi ikapakita nato nga kita nakaamgo sa atong espirituwal nga panginahanglan ug nianang sa uban? (b) Unsay makadugang sa atong kalipay sa dihang kita mahunahunaon sa atong espirituwal nga panginahanglan?
4 Ang pagkaamgo sa atong espirituwal nga panginahanglan magpalihok kanato sa pagbasa sa Bibliya sa adlaw-adlaw, sa pagpahimulos sa espirituwal nga pagkaon nga gitagana sa “hustong panahon” sa “matinumanon ug maalamong ulipon,” ug sa pagtambong kanunay sa Kristohanong mga tigom. (Mateo 24:45; Salmo 1:1, 2; 119:111; Hebreohanon 10:25) Ang gugma alang sa silingan makapaamgo kanato sa espirituwal nga panginahanglan sa uban ug magtukmod kanato nga magmasiboton sa pagsangyaw ug pagtudlo sa maayong balita sa Gingharian. (Marcos 13:10; Roma 1:14-16) Ang pagpaambit sa mga kamatuoran sa Bibliya ngadto sa uban makahatag kanato ug kalipay. (Buhat 20:20, 35) Ang atong kalipay mosamot pa sa dihang kita mamalandong bahin sa kahibulongang paglaom sa Gingharian ug sa mga panalangin nga dad-on nianang maong Gingharian. Alang sa “gamayng panon” sa dinihogang mga Kristohanon, ang paglaom sa Gingharian nagpasabot ug imortal nga kinabuhi sa langit ingong bahin sa Ginghariang kagamhanan ni Kristo. (Lucas 12:32; 1 Corinto 15:50, 54) Alang sa “ubang mga karnero,” kini nagpasabot ug walay-kataposang kinabuhi sa paraisong yuta ilalom nianang Ginghariang kagamhanan.—Juan 10:16; Salmo 37:11; Mateo 25:34, 46.
Kon sa Unsang Paagi Magmalipayon ang Nagbangotan
5. (a) Unsay kahulogan sa ekspresyong “kadtong nagbangotan”? (b) Sa unsang paagi mahupay ang nagbangotan?
5 Ang mga pulong sa sunod nga kalipay nga gihisgotan ni Jesus morag magkasumpaki. Siya miingon: “Malipayon kadtong nagbangotan, sanglit sila pagahupayon.” (Mateo 5:4) Sa unsang paagi ang usa ka tawo magbangotan ug sa samang panahon magmalipayon? Aron masabtan ang kahulogan sa gipamulong ni Jesus, kinahanglang tagdon nato kon unsang matanga sa pagbangotan ang iyang gihisgotan. Ang disipulong si Santiago nagpatin-aw nga ang atong makasasalang kahimtang angay nga mahimong hinungdan sa pagbangotan. Siya misulat: “Hinloi ang inyong mga kamot, kamong mga makasasala, ug lunsaya ang inyong mga kasingkasing, kamong mga maduhaduhaon. Pagkaguol ug pagbangotan ug panghilak kamo. Himoa ang inyong katawa nga pagbangotan, ug ang inyong kalipay nga kasubo. Ipaubos ninyo ang inyong kaugalingon sa mga mata ni Jehova, ug kamo iyang pagabayawon.” (Santiago 4:8-10) Kadtong tinuod nga nasubo tungod sa ilang makasasalang kahimtang nahupayan sa dihang ilang nahibaloan nga ang ilang mga sala mapasaylo kon sila magpasundayag ug pagtuo sa halad lukat ni Kristo ug magpakita ug tinuod nga paghinulsol pinaagi sa pagtuman sa kabubut-on ni Jehova. (Juan 3:16; 2 Corinto 7:9, 10) Sa ingon mabatonan nila ang bililhong relasyon uban kang Jehova ug mabatonan ang paglaom nga mabuhing walay kataposan aron sa pag-alagad ug pagdayeg kaniya. Kini makahatag kanila ug dulot nga kalipay sa kahiladman.—Roma 4:7, 8.
6. Sa unsang diwa nga ang uban nagbangotan, ug sa unsang paagi sila nahupayan?
6 Ang pamulong ni Jesus naglakip usab niadtong nagbangotan tungod sa dulumtanang mga kahimtang nga naglungtad sa yuta. Gipadapat ni Jesus sa iyang kaugalingon ang tagna sa Isaias 61:1, 2, nga nag-ingon: “Ang espiritu sa Soberanong Ginoong Jehova ania kanako, tungod kay si Jehova nagdihog kanako sa pagsulti sa maayong balita ngadto sa mga maaghop. Siya nagpadala kanako aron sa pagbugkos sa mga may gun-ob nga kasingkasing, . . . sa paghupay sa tanang nagbangotan.” Ang maong sugo mapadapat usab sa dinihogang mga Kristohanon nga ania pa sa yuta, kinsa nagtuman niana uban sa tabang sa ilang mga kauban, ang “ubang mga karnero.” Ang tanan nakigbahin sa buluhaton sa simbolikong pagmarka sa mga agtang sa “mga tawo nga nagapanghupaw ug nagaagulo tungod sa tanang dulumtanang mga butang nga ginahimo sa taliwala niini [apostatang Jerusalem, nga naghulagway sa Kakristiyanohan].” (Ezequiel 9:4) Ang maong mga tawo nga nagbangotan gihupay sa “maayong balita sa gingharian.” (Mateo 24:14) Sila malipay nga mahibalo nga ang daotang sistema sa mga butang ni Satanas sa dili madugay pulihan sa matarong nga bag-ong kalibotan ni Jehova.
Malipayon ang mga Malumog-Buot
7. Unsay dili kahulogan sa terminong “malumog-buot”?
7 Gipadayon ni Jesus ang iyang Wali sa Bukid pinaagi sa pag-ingon: “Malipayon ang mga malumog-buot, sanglit sila magapanunod sa yuta.” (Mateo 5:5) Ang kalumo sa buot usahay gihunahuna nga nagpasabot ug pagkahuyang sa kinaiya. Apan, dili kana tinuod. Nagpatin-aw sa diwa sa pulong nga gihubad ug “malumog-buot,” usa ka eskolar sa Bibliya misulat: “Ang kinamaayohang kinaiya sa tawo nga [malumog-buot] mao nga siya hingpit nga makakontrolar sa iyang kaugalingon. Kana dili huyang nga kaaghop, sentimental nga kahinangop, pagkakalmado tungod kay wala malangkit sa usa ka kalihokan. Kini maoy kontrolado nga kalig-on.” Si Jesus nag-ingon bahin sa iyang kaugalingon: “Ako malumog-buot ug mapainubsanon sa kasingkasing.” (Mateo 11:29) Bisan pa niana, si Jesus maisogong nagdepensa sa matarong nga mga prinsipyo.—Mateo 21:12, 13; 23:13-33.
8. Sa unsa nalangkit pag-ayo ang kalumo sa buot, ug nganong gikinahanglan nato kining hiyasa diha sa atong relasyon sa uban?
8 Nan, ang kalumo sa buot nalangkit pag-ayo sa pagpugong-sa-kaugalingon. Sa pagkatinuod, ang kalumo ug pagpugong-sa-kaugalingon parehong gilakip ni apostol Pablo sa dihang iyang gihisgotan “ang bunga sa espiritu.” (Galacia 5:22, 23) Ang kalumo sa buot kinahanglang ugmaron uban sa tabang sa balaang espiritu. Kini usa ka Kristohanong hiyas nga makapalambo sa pakigdait uban sa mga taga-gawas ug niadtong anaa sa kongregasyon. Si Pablo misulat: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa.”—Colosas 3:12, 13.
9. (a) Nganong ang pagkamalumog-buot dili lamang mapadapat sa atong relasyon sa ubang mga tawo? (b) Sa unsang paagi ang mga malumog-buot “magapanunod sa yuta”?
9 Apan, ang kalumo sa buot dili lamang mapadapat sa atong relasyon sa ubang mga tawo. Pinaagi sa kinabubut-ong pagpasakop nato sa pagkasoberano ni Jehova, atong gipasundayag nga kita malumog-buot. Ang pangunang panig-ingnan niining bahina mao si Jesu-Kristo, kinsa samtang dinhi sa yuta nagpasundayag ug kalumo sa buot ug bug-os nga pagpasakop sa kabubut-on sa iyang Amahan. (Juan 5:19, 30) Sa panguna si Jesus maoy nakapanunod sa yuta, kay siya mao ang tinudlong Magmamando niini. (Salmo 2:6-8; Daniel 7:13, 14) Gipaambit niya kining maong panulondon sa 144,000 ka “kaubang mga manununod,” nga gipili gikan “sa katawhan” aron “magamando ingong mga hari ibabaw sa yuta.” (Roma 8:17; Pinadayag 5:9, 10; 14:1, 3, 4; Daniel 7:27) Si Kristo ug ang iyang kaubang mga magmamando magahari ibabaw sa milyonmilyong karnerohon nga mga lalaki ug babaye nga kanila malipayong matuman ang matagnaong salmo: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:11; Mateo 25:33, 34, 46.
Malipayon Kadtong Gigutom sa Pagkamatarong
10. Unsa ang usa ka paagi diin kadtong “gigutom ug giuhaw sa pagkamatarong” matagbaw?
10 Ang sunod nga kalipay nga gihisgotan ni Jesus sa dihang siya nagsulti nianang bakilid sa Galilea mao: “Malipayon kadtong gigutom ug giuhaw sa pagkamatarong, sanglit sila pagabusgon.” (Mateo 5:6) Alang sa mga Kristohanon, si Jehova maoy naghatag ug sukdanan sa pagkamatarong. Busa, kadtong gigutom ug giuhaw sa pagkamatarong sa pagkatinuod gigutom ug giuhaw sa giya sa Diyos. Kanang mga tawhana nakaamgo gayod sa ilang sala ug pagkadili-hingpit ug nangandoy sa usa ka inuyonan nga baroganan atubangan kang Jehova. Pagkamalipayon nila sa dihang ilang nahibaloan gikan sa Pulong sa Diyos nga kon sila maghinulsol ug mangayog kapasayloan pinasukad sa halad lukat ni Kristo, sila mahilakip niadtong makadangat sa matarong nga baroganan atubangan sa Diyos!—Buhat 2:38; 10:43; 13:38, 39; Roma 5:19.
11, 12. (a) Sa unsang paagi ang dinihogang mga Kristohanon makadangat sa pagkamatarong? (b) Sa unsang paagi matagbaw ang kauhaw sa pagkamatarong niadtong mga kauban sa mga dinihogan?
11 Si Jesus nag-ingon nga kanang mga tawhana magmalipayon tungod kay sila “pagatagbawon.” (Mateo 5:6, Kingdom Interlinear) Ang dinihogang mga Kristohanon nga gitawag aron “magmando ingong mga hari” uban kang Kristo sa langit gipahayag nga “matarong alang sa kinabuhi.” (Roma 5:1, 9, 16-18) Si Jehova nagsagop kanila ingong espirituwal nga mga anak. Sila nahimong kaubang mga manununod ni Kristo, nga gitawag aron mahimong mga hari ug mga saserdote sa iyang langitnong Ginghariang kagamhanan.—Juan 3:3; 1 Pedro 2:9.
12 Ang mga kauban sa mga dinihogan wala pa ipahayag nga matarong alang sa kinabuhi. Apan, sila giisip ni Jehova nga matarong sa usa ka sukod pinaagi sa ilang pagtuo sa giula nga dugo ni Kristo. (Santiago 2:22-25; Pinadayag 7:9, 10) Sila giisip nga matarong ingong mga higala ni Jehova nga apil sa pagaluwason panahon sa “dakong kasakitan.” (Pinadayag 7:14) Ang ilang kauhaw sa pagkamatarong pagatagbawon pa sa dihang, ilalom sa “bag-ong mga langit,” sila mahimong bahin sa bag-ong yuta diin “magpuyo ang pagkamatarong.”—2 Pedro 3:13; Salmo 37:29.
Malipayon ang mga Maluluy-on
13, 14. Sa unsang praktikal nga mga paagi nga kita makapakitag kaluoy, ug unsay benepisyo niini alang kanato?
13 Nagpadayon sa iyang Wali sa Bukid, si Jesus miingon: “Malipayon ang mga maluluy-on, sanglit sila pakitaan ug kaluoy.” (Mateo 5:7) Sa legal nga diwa, ang kaluoy gisabot nga nagtumong sa kaluoy nga gipakita sa usa ka maghuhukom nga naglikay sa pagpahamtang sa usa ka makasasala sa bug-os nga silot nga gitugot ilalom sa balaod. Apan, sumala sa paggamit diha sa Bibliya, ang orihinal nga mga pulong nga gihubad ug “kaluoy” kasagarang nagtumong sa pagpakita ug malulotong konsiderasyon o simpatiya nga maghatag ug kahupayan niadtong nadisbentahaan. Busa, kadtong mga maluluy-on nagpasundayag ug pagkamabination. Ang ilustrasyon ni Jesus bahin sa buotan nga Samarianhon maoy maayong panig-ingnan sa usa ka tawo nga “giabot ug kaluoy” sa usa ka tawo nga nanginahanglan.—Lucas 10:29-37.
14 Aron maeksperyensiyahan ang kalipay nga moresulta gumikan sa pagkamaluluy-on, kita kinahanglang mohimo ug positibong mga buhat sa kalulot ngadto sa nanginahanglan. (Galacia 6:10) Si Jesus naluoy sa mga tawo nga iyang nakita. “Siya giabot ug kaluoy kanila, tungod kay sila nahisama sa mga karnero nga walay magbalantay. Ug siya misugod sa pagtudlo kanila ug daghang butang.” (Marcos 6:34) Naamgohan ni Jesus nga ang kinadak-ang panginahanglan sa mga tawo mao ang espirituwal nga mga butang. Kita usab makapakita nga kita mabination ug maluluy-on pinaagi sa pagpaambit sa uban sa labaw nilang gikinahanglan—ang “maayong balita sa gingharian.” (Mateo 24:14) Makahatag usab kita ug praktikal nga tabang ngadto sa tigulang nga mga isigka-Kristohanon, biyuda, ug mga ilo ug ‘makahupay sa magul-anong mga kalag.’ (1 Tesalonica 5:14; Proverbio 12:25; Santiago 1:27) Tungod niini, dili lamang kita magmalipayon kondili madawat usab nato ang kaluoy ni Jehova.—Buhat 20:35; Santiago 2:13.
Putli sa Kasingkasing ug Makigdaiton
15. Sa unsang paagi kita mahimong putli sa kasingkasing ug makigdaiton?
15 Gihisgotan ni Jesus ang ikaunom ug ikapito nga mga kalipay sumala sa mosunod: “Malipayon ang mga putli sa kasingkasing, sanglit sila makakita sa Diyos. Malipayon ang mga makigdaiton, sanglit sila pagatawgon nga ‘mga anak sa Diyos.’” (Mateo 5:8, 9) Ang putli nga kasingkasing maoy kasingkasing nga dili lang hinlo sa moral kondili wala usab mahugawi sa espirituwal ug bug-os sa debosyon niini kang Jehova. (1 Cronicas 28:9; Salmo 86:11) Ang orihinal nga pinulongan nga gihubad ug “makigdaiton” sa literal nagpasabot ug “tigpasiugda sa pakigdait.” Ang mga makigdaiton nagkinabuhing malinawon uban sa ilang Kristohanong mga igsoon ug, kutob sa mahimo, uban sa ilang mga silingan. (Roma 12:17-21) Ilang ‘pangitaon ang pakigdait ug sundon kini.’—1 Pedro 3:11.
16, 17. (a) Nganong ang mga dinihogan gitawag nga “mga anak sa Diyos,” ug sa unsang paagi sila “makakita sa Diyos”? (b) Sa unsang paagi ang “ubang mga karnero” “makakita sa Diyos”? (c) Sa unsang paagi ug kanus-a, sa bug-os nga diwa, nga ang “ubang mga karnero” mahimong “mga anak sa Diyos”?
16 Ang mga makigdaiton nga putli sa kasingkasing, gisaaran nga sila “pagatawgon nga ‘mga anak sa Diyos’” ug “makakita sa Diyos.” Ang dinihogang mga Kristohanon inanak sa espiritu ug gisagop ingong “mga anak” ni Jehova samtang dinhi pa sa yuta. (Roma 8:14-17) Sa dihang sila banhawon aron makauban ni Kristo sa langit, sila mag-alagad sa atubangan ni Jehova ug aktuwal nga makakita Kaniya.—1 Juan 3:1, 2; Pinadayag 4:9-11.
17 Ang makigdaitong “ubang mga karnero” nag-alagad kang Jehova ilalom sa Maayong Magbalantay, si Kristo Jesus, kinsa mahimong ilang “Amahang Walay Kataposan.” (Juan 10:14, 16; Isaias 9:6) Kadtong makalabang sa kataposang pagsulay human sa Usa ka Libo ka Tuig nga Pagmando ni Kristo pagasagopon ingong yutan-ong mga anak ni Jehova ug “makabaton sa mahimayaong kagawasan sa mga anak sa Diyos.” (Roma 8:21; Pinadayag 20:7, 9) Samtang nagpaabot niini, ilang tawgon si Jehova ingong ilang Amahan, tungod kay ilang gipahinungod ang ilang kinabuhi ngadto kaniya, nga nag-ila kaniya ingong ilang Maghahatag ug Kinabuhi. (Isaias 64:8) Sama kang Job ug Moises sa kakaraanan, sila “makakita sa Diyos” pinaagi sa mga mata sa pagtuo. (Job 42:5; Hebreohanon 11:27) Pinaagi sa ‘mga mata sa ilang kasingkasing’ ug pinaagi sa tukmang kahibalo sa Diyos, ilang naila ang kahibulongang mga hiyas ni Jehova ug gipaningkamotan nga masundog siya pinaagi sa pagtuman sa iyang kabubut-on.—Efeso 1:18; Roma 1:19, 20; 3 Juan 11.
18. Sumala sa unang pito ka kalipay nga gihisgotan ni Jesus, kinsay nakakaplag ug tinuod nga kalipay karon?
18 Atong nasabtan nga kadtong mahunahunaon sa ilang espirituwal nga panginahanglan, kadtong nagbangotan, mga malumog-buot, kadtong gigutom ug giuhaw sa pagkamatarong, ang maluluy-on, ang putli sa kasingkasing, ug ang makigdaiton makakaplag ug tinuod nga kalipay diha sa pag-alagad kang Jehova. Bisan pa niana, kanang mga tawhana kanunayng makasagubang sa pagsupak, paglutos pa gani. Nakaiban ba kini sa ilang kalipay? Kanang pangutanaha tubagon sa sunod nga artikulo.
Agig Repaso
• Unsang kalipay ang bation niadtong mahunahunaon sa ilang espirituwal nga panginahanglan?
• Sa unsang mga paagi kadtong nagbangotan pagahupayon?
• Sa unsang paagi ikapakita nato ang kalumo sa buot?
• Nganong angay kitang magmaluluy-on, magmaputli sa kasingkasing, ug magmakigdaiton?
[Mga Pangutana sa Pagtuon]
[Hulagway sa panid 10]
“Malipayon kadtong mahunahunaon sa ilang espirituwal nga panginahanglan”
[Mga hulagway sa panid 10]
“Malipayon kadtong gigutom ug giuhaw sa pagkamatarong”
[Hulagway sa panid 10]
“Malipayon ang mga maluluy-on”