Matagamtam ba Gayod Nato ang Tinuod nga Kasegurohan?

MGA bata nga malipayong nakigdula sa ilang mahigugmaong mga ginikanan—kinsay dili malipayng magtan-aw niini nga talan-awon? Ang mga bata mobati ug bug-os nga kasegurohan tungod kay kauban nila ang ilang mahingawaong mga ginikanan. Apan, daghang bata ang wala makasinati nianang mga gutlo sa kalipay. Hinunoa, ang ubang mga bata mabalaka adlaw-adlaw kon asa sila matulog magabii. May paglaom pa ba kining mga bataa nga walay puy-anan ug ang ubang nagkinabuhi nga walay kasegurohan?

Bisan tuod morag madulom ang umaabot, ang Pulong sa Diyos naghatag ug paglaom. Si manalagnang Isaias mitagna nga moabot unya ang adlaw diin ang tanan magkinabuhi sa bug-os nga kasegurohan. Siya misulat: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon.”—Isaias 65:21, 22.

Apan duna bay lig-ong basehanan kining maong paglaom? Kon buot hunahunaon, ang pulong “paglaom” wala kanunayng magkahulogan ug kasegurohan. Pananglitan, sa Brazil, kanunayng madungog ang ekspresyong: “A esperança é a última que morre.” Kini literal nga nagkahulogan nga “Ang paglaom maoy kataposang mamatay.” Kini nagpasabot nga daghang tawo ang molaom gihapon bisan pag walay tinuod nga basehanan sa paglaom. Apan, lahi ang paglaom nga gihatag kanato sa buhi nga Diyos. Si apostol Pablo misulat: “Walay usa nga magbutang sa iyang pagtuo [sa Diyos] ang mahigawad.” (Roma 10:11) Ang mga tagna sa Bibliya nga nangatuman na naghatag kanatog pagsalig nga ang tanang ubang mga saad ni Jehova nga Diyos mangatuman usab. Sa dihang matuman na kanang mga saara, ang mga kahimtang nga maoy nakatukmod sa mga bata sa pagpuyo diha sa kadalanan mawala na.

Bisan karon, ang praktikal nga mga tambag nga makita diha sa Bibliya makatabang sa mga tawong walay paglaom sa pagpauswag sa ilang kinabuhi ug sa pagkaplag ug tinuod nga kasegurohan. Sa unsang paagi? Ang mga Saksi ni Jehova sa imong komunidad malipayng motabang kanimo aron makaplagan ang tubag niining pangutanaha.