Natagamtam Mo na ba ang Kalipay sa Paghatag?

NAKAGUGOL na siya ug duolan sa 50 ka tuig sa aktibo nga Kristohanong pag-alagad. Bisan pag luya na tungod sa katigulangon, determinado siya nga makaadto sa bag-ong gitukod nga Kingdom Hall. Nanghawid sa bukton sa matinabangon nga Kristohanong brader, siya misulod sa tigomanan ug hinayhinayng milakaw paingon sa iyang tumong—ang kahon sa amot. Iyang gihulog dinhi ang kasarangang kantidad nga iyang natigom alang niini nga katuyoan. Bisan pag dili siya makaabag sa pisikal nga paagi sa pagtukod sa tigomanan, gusto niyang motabang.

Kining Kristohanon nga babaye tingali nakapahinumdom kanimo sa laing matinumanong babaye—ang “kabos nga babayeng balo” nga nakita ni Jesus nga mihulog ug duha ka gagmayng sensilyo ngadto sa panudlanag bahandi sa templo. Wala kita suginli bahin sa iyang kahimtang, apan ang usa ka babaye kaniadto nga walay bana lagmit nga maglisod gayod sa panalapi. Seguradong naluoy si Jesus kaniya, kay nakasabot gayod siya sa kahimtang sa babayeng balo. Sa paghimo kaniya nga usa ka panig-ingnan sa iyang mga tinun-an, si Jesus miingon nga ang gamayng gasa sa babayeng balo naghawas sa “tanan niyang nabatonan, ang iyang tibuok nga panginabuhian.”—Marcos 12:41-44.

Ngano man nga himoon sa usa ka pobreng babaye sama niining kabos nga babayeng balo ang maong sakripisyo? Tin-aw nga tungod kini sa iyang lalom nga debosyon kang Jehova nga Diyos, kansang pagsimba nasentro sa templo sa Jerusalem. Bisan pag limitado ang iyang mahimo, buot niya nga makatabang sa pagpalambo sa sagradong pag-alagad. Ug seguradong nalipay kaayo siya sa paghatag sa iyang maarangan.

Paghatag Agig Pagpaluyo sa Buluhaton ni Jehova

Ang paghatag ug materyal ug pinansiyal nga mga amot maoy usa gayod ka hinungdanong bahin sa putli nga pagsimba, ug kini kanunayng nakahatag ug dakong kalipay. (1 Cronicas 29:9) Sa karaang Israel, ang mga amot gigamit dili lang sa pagpatahom sa templo kondili sa tuyo nga makapadayon ang tanang kalihokan didto adlaw-adlaw alang sa pagsimba kang Jehova. Ang Balaod espesipikong nag-ingon nga ang mga anak nga lalaki sa Israel moamot ug ikanapulo sa ilang abot aron sa pagsuportar sa mga Levihanon, nga maoy nag-alagad sa templo. Apan ang mga Levihanon kinahanglan usab nga moamot ug ikanapulo sa mga produkto nga ilang nadawat ngadto kang Jehova.—Numeros 18:21-29.

Bisan tuod ang mga Kristohanon dili na ilalom sa pakigsaad sa Balaod, ang prinsipyo sa paghatag  sa mga alagad sa Diyos ug materyal nga amot agig pagsuporta sa matuod nga pagsimba wala mausab. (Galacia 5:1) Dugang pa, ang unang-siglo nga mga Kristohanon nalipay sa pag-amot aron matagan-an ang panginahanglan sa ilang mga igsoon. (Buhat 2:45, 46) Gipahinumdoman ni apostol Pablo ang mga Kristohanon nga maingon nga ang Diyos dagayang naghatag kanila ug maayong mga butang, sila usab kinahanglang magmahinatagon sa uban. Siya misulat: “Sugoa ang mga dato niini nga sistema sa mga butang nga dili magmapahitas-on sa kaisipan, ug magbutang sa ilang paglaom, dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan; nga magbuhat sa maayo, nga magmadato sa maayong mga buhat, nga magmahinatagon, andam sa pagpaambit, nga maampingong magtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.” (1 Timoteo 6:17-19; 2 Corinto 9:11) Sa pagkatinuod, base sa iyang personal nga kasinatian, gipamatud-an ni Pablo ang mga pulong ni Jesus: “Adunay labaw nga kalipay sa paghatag kay sa pagdawat.”—Buhat 20:35.

Kristohanong Paghatag Karon

Karon, ang mga alagad ni Jehova nagapadayon sa paggamit sa ilang materyal nga mga bahandi sa pagtabang sa usag usa ug sa pag-abag sa buluhaton sa Diyos. Bisan kadtong mga kabos mohatag sa ilang maarangan. Gibati sa “matinumanon ug maalamong ulipon” nga tulubagon nila kang Jehova ang paggamit sa tanang giamot nga salapi sa labing maayong paagi. (Mateo 24:45) Ang mga pondo gigamit sa pagsuportar sa buluhaton sa mga sangang buhatan, paghubad ug paggamag mga Bibliya ug literatura sa Bibliya, paghikay ug dagkong Kristohanon nga mga panagkatigom, pagbansay ug pagpadalag nagapanawng mga magtatan-aw ug mga misyonaryo, paghatag ug mga hinabang panahon sa mga katalagman, maingon man alang sa uban pang hinungdanon nga mga katuyoan. Atong hisgotan ang usa sa maong mga katuyoan—ang pagtabang aron makatukod ug mga dapit sa pagsimba.

Ang mga Saksi ni Jehova daghang beses nga magtigom sa ilang mga Kingdom Hall kada semana aron makabenepisyo sa espirituwal nga edukasyon ug maayong pagpakig-uban. Apan, sa daghang kayutaan, tungod sa kakabos ang lokal nga mga Saksi maglisod sa pagpatukod ug Kingdom Hall nga walay pinansiyal nga tabang. Busa, niadtong 1999 gisugdan sa mga Saksi ni Jehova ang usa ka programa nga naggamit ug mga pondo gikan sa adunahang mga nasod sa pagtabang nga makatukod ug mga Kingdom Hall sa kabos nga mga nasod. Dugang pa, libolibo ka boluntaryo  ang naghatag sa ilang panahon ug naggamit sa ilang abilidad, nga kasagaran nagtrabaho sa hilit nga mga lugar niining mga nasora. Panahon sa konstruksiyon, ang lokal nga mga Saksi nakakat-on ug mga katakos sa pagpanukod ug pagmentinar ug mga tinukod, ug tungod sa Kingdom Hall Fund napalit ang gikinahanglang mga himan ug materyales. Ang mga Saksi nga naggamit na karon niining maong mga tigomanan mapasalamaton kaayo nga ang ilang mga isigkamagtutuo naghatag ug panahon ug salapi. Ang lokal nga mga Saksi moamot usab kada bulan sa pagmentinar sa bag-ong Kingdom Hall ug sa pagtabang nga mahulipan ang gastos sa pagtukod, sa ingon nakatabang sa pagtukod ug daghan pang mga Kingdom Hall.

Ang mga Kingdom Hall gitukod ginamit ang lokal nga mga pamaagi ug materyales. Bisan tuod kining maong mga tigomanan dili maartehon, kini nindot, praktikal, ug komportable. Sa pagsugod sa programa sa pagpanukod niadtong 1999, mga 40 ka pobreng mga nasod ang apil niini. Sukad niadto, gipadak-an ang programa sa pagpanukod sa paglakip ug 116 ka pobreng kayutaan, nga naglangkit ug kapin sa katunga sa mga kongregasyon sa mga Saksi ni Jehova sa tibuok kalibotan. Sa milabayng lima ka tuig, kapin sa 9,000 ka Kingdom Hall ang natukod ilalom niini nga kahikayan, sa aberids nga kapin sa 5 ka bag-ong mga tigomanan kada adlaw! Bisan pa niana, niining 116 ka kayutaan, 14,500 pa ka bag-ong mga Kingdom Hall ang gikinahanglan. Uban sa panalangin ni Jehova ug pinaagi sa pagkaandam ug pagkamahinatagon sa mga Saksi sa tibuok kalibotan, gilaoman nga makabaton ug igong pondo aron matagan-an kini nga panginahanglan.—Salmo 127:1.

Ang mga Kingdom Hall Makatabang sa Pag-uswag

Unsay epekto niining dako kaayong paningkamot diha sa lokal nga mga Saksi ug sa buluhatong pagsangyaw sa Gingharian? Sa daghang dapit, kusog kaayo ang pagdaghan sa mga tumatambong sa mga tigom human matukod ang usa ka bag-ong Kingdom Hall. Usa ka komon nga pananglitan mao kining gihisgotan sa taho gikan sa Burundi: “Sa dihang matapos na ang pagtukod sa Kingdom Hall, kini mapuno. Pananglitan, dihay Kingdom Hall nga gitukod alang sa usa ka kongregasyon diin 100 ang aberids nga motambong sa ilang mga tigom. Ang ilang bag-ong Kingdom Hall komportableng makapalingkod ug 150. Sa dihang natapos kini, 250 na ang nagtambongan sa mga tigom.”

Nganong ingon man niana ang pag-uswag? Ang usa ka rason mao nga ang mga grupo sa mga magmamantala sa Gingharian nga walay pormal nga tigomanan ug magtigom lang ilalom sa  kahoy o sa hawan usahay dudahan. Sa usa ka nasod, ang kapintasan batok sa minoriyang mga grupo kanunayng ipasangil sa gagmayng mga grupo sa relihiyon, ug gibaod nga ang tanang relihiyosong mga tigom kinahanglang himoon sa sulod sa usa ka simbahan.

Ang pagbaton ug kaugalingong mga tigomanan nakatabang usab sa mga Saksi ni Jehova sa pagpakita sa komunidad nga dili sila mga tinun-an sa usa ka pastor. Ang sangang buhatan sa mga Saksi ni Jehova sa Zimbabwe misulat: “Kaniadto, ang mga igsoon niining dapita magtigom diha sa mga balay, ug tawgon sa mga tawo niining mga dapita ang kongregasyon sumala sa ngalan sa tag-iya sa balay nga ilang gitigoman. Giisip nila ang mga igsoon ingong mga sakop sa simbahan ni Ginoong Pulano. Kining kahimtanga nagakausab na karon kay makita na sa mga tawo ang mga karatula nga klarong nagpaila sa matag tigomanan ingong ‘Kingdom Hall of Jehovah’s Witnesses.’”

Malipayong mga Maghahatag

“Gihigugma sa Diyos ang malipayong maghahatag,” misulat si apostol Pablo. (2 Corinto 9:7) Siyempre, makatabang kaayo ang dagkong mga donasyon. Apan ang dakong bahin sa mga pondo nga giamot alang sa buluhaton sa mga Saksi  ni Jehova naggikan sa mga kahon sa amot diha sa Kingdom Hall. Dako man o gamay, ang tanang amot hinungdanon ug gipabilhan. Hinumdomi nga milingkod si Jesus sa dapit diin iyang makita ang kabos nga babayeng balo nga mihulog sa iyang duha ka gagmayng mga sensilyo. Ang mga manulonda ug si Jehova nakakita usab kaniya. Wala gani kita masayod sa ngalan sa babayeng balo, apan giseguro ni Jehova nga ang iyang pagkamahinatagon gitala nga permanente diha sa Bibliya.

Gawas sa pagtukod ug Kingdom Hall, ang atong mga amot nagsuportar sa tanang ubang mga bahin sa hinungdanong buluhaton sa Gingharian. Ang pagtabang niining paagiha naghatag kanatog hinungdan sa pagkalipay ug ‘sa paghatag ug mga pasalamat ngadto sa Diyos.’ (2 Corinto 9:12) Ang atong Kristohanong mga igsoon sa Benin mitaho: “Kada adlaw daghang pag-ampo sa pasalamat ang gipadangat ngadto kang Jehova tungod sa pinansiyal nga tabang nga nadawat gikan sa internasyonal nga panag-igsoonay.” Sa samang higayon, kitang tanan nga nakigbahin sa pagsuportar sa pinansiyal nga paagi sa buluhaton sa Gingharian nagtagamtam sa kalipay sa Kristohanong paghatag!

[Kahon/Hulagway sa panid 22, 23]

Mga Paagi sa Paghatag nga Gipili sa Uban

MGA AMOT ALANG SA TIBUOK-KALIBOTANG BULUHATON

Daghan ang naggahin, o nagbadyet, ug salapi nga ilang ihulog diha sa mga kahon sa kontribusyon nga gimarkahan ug “Contributions for the Worldwide Work—Matthew 24:14.”

Matag bulan, ipadala sa mga kongregasyon kining maong salapi ngadto sa sangang buhatan sa mga Saksi ni Jehova nga nag-alagad sa ilang nasod. Ang kinabubut-on nga mga donasyong salapi mahimong ipadala usab nga direkta sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang buhatan nga nag-alagad sa imong nasod. Ang mga tseke himoong payable to “Watch Tower.” Ang alahas o ubang mahalong mga butang mahimong idonar usab. Ang mubong sulat nga nagpahayag nga kana maoy direkta nga gasa angayng ilakip sa maong mga amot.

KONDISYONAL-DONASYON NGA KAHIKAYAN

Ang salapi mahimong ibutang nga in trust alang sa Watch Tower. Apan, kon ang nagdonar mohangyo niana, ang salapi ibalik kaniya. Alang sa dugang impormasyon, palihog kontaka ang Treasurer’s Office sa adres nga gitala sa itaas.

PAGPLANO ALANG SA BUHAT SA KALUOY

Gawas pa sa direkta nga mga gasang salapi, adunay ubang mga paagi sa paghatag aron makatabang sa buluhaton sa Gingharian sa tibuok kalibotan. Kini nag-apil sa:

Insyurans: Ang Watch Tower mahimong himoon nga benepisyaryo sa usa ka polisa sa life insurance o sa pagretiro/pensiyon nga programa.

Mga Pondo sa Bangko: Ang mga pondo sa bangko, mga sertipiko sa deposito, o indibiduwal nga mga pondo sa pagretiro mahimong ibutang nga in trust for o himoong payable on death ngadto sa Watch Tower, nga nahiuyon sa mga kinahanglanon sa lokal nga bangko.

Stocks and Bonds: Ang mga stock o aksiyones ug mga bond ikadonar ngadto sa Watch Tower ingong direkta nga gasa.

Balay ug Yuta: Ang ikabaligya nga balay ug yuta mahimong idonar pinaagi kaha sa deretsong paghatag isip gasa o, sa kahimtang sa residensiyal nga propiedad, pinaagi sa pagreserba sa balay o yuta samtang buhi pa ang nagdonar, kinsa mahimong magpadayon sa pagpuyo diha niana samtang siya buhi. Kontaka ang sangang buhatan sa imong nasod sa dili pa buhatag papeles ang bisan unsang balay o yuta.

Gift Annuity: Ang gift annuity maoy usa ka kahikayan diin ibalhin sa usa ang iyang salapi o mga deposito sa korporasyon sa Watch Tower. Sa baylo, ang nagdonar, o usa nga gitudlo sa nagdonar, modawat ug usa ka tino nga bayad matag tuig sa tibuok niyang kinabuhi. Ang buhis sa nagdonar kunhoran sa tuig nga gisugdan ang gift annuity.

Wills and Trusts: Ang propiedad o salapi mahimong ikabilin ngadto sa Watch Tower pinaagi sa usa ka legal nga testamento, o ang Watch Tower mahimong nganlan nga benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ingon sa gipasabot sa terminong “pagplano alang sa buhat sa kaluoy,” kining matanga sa donasyon kasagaran nga kinahanglang planohon sa nagdonar. Aron makaabag sa mga indibiduwal nga buot motabang sa tibuok-kalibotang buluhaton sa mga Saksi ni Jehova pinaagi sa usa ka matang sa pagplano alang sa buhat sa kaluoy, gihimo ang Iningles ug Kinatsila nga brosyur nga nag-ulohang Charitable Planning to Benefit Kingdom Service Worldwide. Gisulat ang brosyur sa paghatag ug impormasyon bahin sa nagkalainlaing mga paagi nga ihatag ang mga gasa karon o pinaagi sa pagbilin ug panulondon inigkamatay. Human mabasa ang brosyur ug makonsulta ang ilang magtatambag bahin sa legal nga mga butang o sa buhis, daghan ang nakatabang sa pagsuportar sa buluhaton sa mga Saksi ni Jehova sa tibuok kalibotan ug namenosan ang ilang bayranan sa buhis samtang nagbuhat niini. Kining brosyura mahimong mabatonan pinaagi sa paghangyo ug kopya nga direkta gikan sa Charitable Planning Office.

Alang sa dugang impormasyon, mahimong kontakon nimo ang Charitable Planning Office, pinaagi kaha sa sulat o sa telepono, diha sa adres nga gilista sa ubos o sa opisina sa mga Saksi ni Jehova nga nag-alagad sa imong nasod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue San Francisco del Monte 1105 Quezon City

Telepono: (02) 411-6090

[Mga hulagway sa panid 20, 21]

Daan ug bag-ong mga tigomanan sa mga Saksi ni Jehova

Zambia

Republika sa Sentral Aprika