Ang Paghukom ni Jehova Ipahamtang Batok sa mga Daotan
Ang Paghukom ni Jehova Ipahamtang Batok sa mga Daotan
“Pangandam sa pag-atubang sa imong Diyos.”—AMOS 4:12.
1, 2. Nganong makasalig kita nga taposon sa Diyos ang pagkadaotan?
TAPOSON ba gayod ni Jehova ang pagkadaotan ug pag-antos dinhi sa yuta? Sa sinugdanan sa ika-21ng siglo, kanang pangutanaha mas haom kaayo. Morag bisan asa kita motan-aw, atong makita ang pamatuod sa pagkabangis sa tawo ngadto sa isigkatawo. Nangandoy gayod kita ug kalibotan nga wala nay kapintasan, terorismo, ug korapsiyon!
2 Ang maayong balita mao nga kita bug-os nga makasalig nga taposon ni Jehova ang pagkadaotan. Ang mga hiyas sa Diyos nagtino nga siya molihok batok sa mga daotan. Si Jehova matarong ug matul-id. Sa Salmo 33:5, ang iyang Pulong nagtug-an kanato: “Siya nahigugma sa pagkamatarong ug sa hustisya.” Ang laing salmo nag-ingon: ‘Si bisan kinsa nga nahigugma sa kapintasan ginadumtan gayod ni Jehova.’ (Salmo 11:5) Segurado nga si Jehova, ang labing gamhanang Diyos, nga nahigugma sa pagkamatarong ug hustisya, dili motugot nga maglungtad hangtod sa hangtod ang iyang gidumtan.
3. Unsay ipasiugda sa padayong pagkonsiderar sa tagna ni Amos?
3 Tagda ang laing rason kon nganong makaseguro kita nga wagtangon ni Jehova ang pagkadaotan. Ang talaan sa iyang nangaging mga pakiglabot naggarantiya niini. Ang makapahinganghang mga pananglitan sa paagi ni Jehova sa pagpakiglabot sa mga daotan makita diha sa basahon sa Bibliya sa Amos. Ang padayong paghisgot sa tagna ni Amos magpasiugda ug tulo ka butang bahin sa paghukom sa Diyos. Una, kini kanunayng nahiangay. Ikaduha, kini dili kalikayan. Ug ikatulo, kini mapilion, kay si Jehova nagpahamtang ug paghukom sa mga mamumuhat ug daotan apan nagpakitag kaluoy sa mga tawong mahinulsolon ug mahiligon sa pagkamatarong.—Roma 9:17-26.
Ang Paghukom sa Diyos Kanunayng Nahiangay
4. Diin gipadala ni Jehova si Amos, ug sa unsang katuyoan?
4 Sa mga adlaw ni Amos, ang mga Israelinhon nabahin na sa duha ka gingharian. Ang usa mao ang duha-ka-tribong gingharian sa Juda sa habagatan. Ang lain mao ang napulo-ka-tribong gingharian sa Israel sa amihanan. Gisugo ni Jehova si Amos sa pag-alagad ingong manalagna, nga nagpadala kaniya gikan sa iyang lungsod nga natawhan sa Juda ngadto sa Israel. Didto gamiton sa Diyos si Amos sa pagmantala sa Iyang paghukom.
5. Batok sa unsang mga nasod nga si Amos unang nagtagna, ug unsa ang usa ka rason kon nganong takos sila sa grabeng paghukom sa Diyos?
5 Wala sugdi ni Amos ang iyang buluhaton pinaagi sa pagpahayag sa paghukom ni Jehova batok sa malinapason nga amihanang gingharian sa Israel. Hinunoa, nagsugod siya pinaagi sa pagpahayag ug grabeng paghukom sa Diyos batok sa unom ka sikbit nga mga nasod. Kining mga nasora mao ang Sirya, Pilistia, Tiro, Edom, Ammon, ug Moab. Apan takos ba gayod silang makaagom sa grabeng paghukom sa Diyos? Oo. Ang usa ka rason mao, sila maoy higpit nga mga kaaway sa katawhan ni Jehova.
6. Nganong nagpadangat ang Diyos ug kalamidad ngadto sa Sirya, Pilistia, ug Tiro?
6 Pananglitan, gihukman ni Jehova ang mga Siryanhon “tungod sa ilang paggiok sa Gilead.” (Amos 1:3) Ang mga Siryanhon nangilog ug teritoryo gikan sa Gilead—usa ka dapit sa Israel nga sidlakan sa Suba sa Jordan—ug nagpahamtang ug grabeng kadaot sa katawhan sa Diyos didto. Komosta ang Pilistia ug Tiro? Ang mga Filistehanon sad-an tungod sa pagbihag sa mga Israelinhon ug pagbaligya kanila ngadto sa mga Edomihanon, ug ang ubang mga Israelinhon nahulog sa mga kamot sa magpapatigayon ug ulipon sa Tiro. (Amos 1:6, 9) Tiaw mo kana—nagbaligya sa katawhan sa Diyos ngadto sa pagkaulipon! Dili ikatingala nga si Jehova nagpadangat ug kalamidad ngadto sa Sirya, Pilistia, ug Tiro.
7. Unsay gikausahan sa Edom, Ammon, ug Moab sa Israel, apan giunsa nila pagtratar ang mga Israelinhon?
7 Ang Edom, Ammon, ug Moab adunay butang nga gikausahan sa Israel ug sa usag usa. Kanang tulo ka nasod paryente sa mga Israelinhon. Ang mga Edomihanon naggikan kang Abraham pinaagi sa kaluha ni Jacob nga si Esau. Busa, sa usa ka diwa sila mga igsoon sa Israel. Ang mga Ammonhanon ug mga Moabihanon mga kaliwat sa pag-umangkon ni Abraham nga si Lot. Apan gitratar ba sa Edom, Ammon, ug Moab ang ilang paryente nga mga Israelinhon sa inigsoong paagi? Wala gayod! Ang Edom walay-kokaluoy nga nagbakyaw ug espada batok sa “kaugalingon niyang igsoon,” ug ang mga Ammonhanon mapintas sa ilang pagtratar sa Israelinhong mga bihag. (Amos 1:11, 13) Bisan tuod si Amos dili direktang naghisgot sa pagmaltratar sa Moab sa katawhan sa Diyos, ang mga Moabihanon dugay nang nagsupak sa Israel. Ang silot alang niadtong tulo ka paryente nga mga nasod grabe gayod. Si Jehova magpadala ug kalayonhong kalaglagan nganha kanila.
Ang Paghukom sa Diyos Dili Kalikayan
8. Nganong ang mga paghukom sa Diyos batok sa unom ka nasod nga sikbit sa Israel dili kalikayan?
8 Sa walay duhaduha, ang unom ka nasod nga gihisgotan sa unang bahin sa tagna ni Amos takos sa grabeng paghukom sa Diyos. Dugang pa, walay paagi nga makaikyas niana. Gikan sa Amos kapitulo 1, bersikulo 3, hangtod sa kapitulo 2, bersikulo 1, kaunom miingon si Jehova: “Dili ko kini isibog.” Sumala sa iyang giingon, wala niya isibog ang iyang pagpahamtang ug paghukom batok niadtong mga nasora. Ang nasulat nga kasaysayan nagpamatuod nga ang matag usa kanila sa ulahi nakaagom sa kalamidad. Aw, labing menos upat kanila—ang Pilistia, Moab, Ammon, ug Edom—ang sa ngadtongadto wala na maglungtad!
9. Takos sa unsa ang mga molupyo sa Juda, ug ngano?
9 Dayon ang tagna ni Amos nagsentro sa pagtagad diha sa ikapitong nasod—ang iyang teritoryo sa Juda. Ang iyang mga mamiminaw sa amihanang gingharian sa Israel nahibulong tingali nga makadungog sa pagmantala ni Amos ug paghukom batok sa gingharian sa Juda. Nganong ang mga molupyo sa Juda takos sa grabeng paghukom? “Tungod sa ilang pagsalikway sa balaod ni Jehova,” nag-ingon ang Amos 2:4. Wala palabya ni Jehova kanang tinuyo nga pagsalikway sa iyang Balaod. Sumala sa Amos 2:5, siya nagtagna: “Ako magpadalag kalayo ngadto sa Juda, ug lamyon niini ang mga puloy-anang torre sa Jerusalem.”
10. Nganong ang Juda dili makaikyas sa kaalaotan?
10 Ang dili-matinumanong Juda dili makaikyas sa taliabot nga kaalaotan. Sa ikapitong higayon, si Jehova miingon: “Dili ko kini isibog.” (Amos 2:4) Ang Juda nakadawat sa gitagnang silot sa dihang kini gihimong awaaw sa mga Babilonyanhon niadtong 607 W.K.P. Sa makausa pa atong nahibaloan nga ang mga daotan dili makaikyas sa paghukom sa Diyos.
11-13. Si Amos sa panguna nanagna batok sa unsang nasod, ug unsang matanga sa pagdaogdaog ang naglungtad didto?
11 Mao pay pagpahayag ni manalagnang Amos sa paghukom ni Jehova batok sa pito ka nasod. Apan, si bisan kinsa nga naghunahuna nga natapos na niya ang iyang pagpanagna, nasayop. Wala pa mahuman si Amos! Sa panguna gisugo siya sa pagmantala ug masakit nga mensahe sa paghukom batok sa amihanang gingharian sa Israel. Ug ang Israel takos sa grabeng paghukom sa Diyos tungod kay hilabihan kaayo ang moral ug espirituwal nga kadunotan nianang nasora.
12 Ang pagpanagna ni Amos nagyagyag sa pagdaogdaog nga nahimong komon na kaayo diha sa gingharian sa Israel. Bahin niini, ang Amos 2:6, 7 nag-ingon: “Mao kini ang giingon ni Jehova, ‘Tungod sa tulo ka pag-alsa sa Israel, ug tungod sa upat, dili ko kini isibog, tungod kay gibaligya nila ang matarong alang lamang sa plata, ug ang kabos alang sa bili sa usa ka paris nga sandalyas. Ilang gitinguha uyamot ang abog sa yuta ibabaw sa ulo sa mga timawa; ug ang dalan sa mga tawong maaghop ilang gisalikway.’”
13 Ang mga matarong gibaligya “alang lamang sa plata o salapi,” lagmit nagpasabot nga ang mga maghuhukom nga midawat ug salapi ingong hiphip nagsentensiya sa mga walay sala. Ang mga tigpautang nagbaligya sa mga kabos ngadto sa pagkaulipon alang sa bili sa “usa ka paris nga sandalyas,” tingali tungod sa gamayng utang. Ang walay-kasingkasing nga mga tawo ‘nagtinguha,’ o naghinamhinam nga ang “mga timawa” inudnod ngadto sa maong kahimtang nga kining maong mga kabos magsabwag ug abog sa ilang mga ulo ingong timaan sa kagul-anan, pagbangotan, o kaulawan. Kaylap kaayo ang korapsiyon nga ang “mga maaghop” dili makadahom nga makakaplag pa ug hustisya.
14. Kinsa ang gimaltratar diha sa napulo-ka-tribo nga gingharian sa Israel?
14 Matikdi kon kinsay gimaltratar. Sila mao ang matarong, kabos, timawa, ug maaghop nga mga molupyo sa nasod. Ang Balaod sa pakigtugon ni Jehova uban sa mga Israelinhon nagbaod nga ipakita ang kaluoy ngadto sa walay panalipod ug kabos. Apan, alang nianang mga tawhana sa dominyo sa napulo-ka-tribo nga gingharian sa Israel, ang mga kahimtang daotan kaayo.
“Pangandam sa Pag-atubang sa Imong Diyos”
15, 16. (a) Nganong gipasidan-an ang mga Israelinhon: “Pangandam sa pag-atubang sa imong Diyos”? (b) Sa unsang paagi ang Amos 9:1, 2 nagpakita nga ang mga daotan dili makalikay sa pagpahamtang sa paghukom sa Diyos? (c) Unsay nahitabo sa napulo-ka-tribo nga gingharian sa Israel sa 740 W.K.P.?
15 Tungod kay ang imoralidad ug ang ubang mga sala kaylap didto sa Israel, makataronganon nga gipasidan-an sa manalagnang si Amos ang rebelyosong nasod: “Pangandam sa pag-atubang sa imong Diyos.” (Amos 4:12) Ang dili-matinumanong Israel dili makaikyas sa nagsingabot nga pagpahamtang sa paghukom sa Diyos tungod kay sa ikawalong higayon, si Jehova miingon: “Dili ko kini isibog.” (Amos 2:6) Mahitungod sa mga daotan nga mosulay tingali sa pagtago, ang Diyos miingon: “Walay usa kanila nga mokalagiw nga molampos sa iyang pagkalagiw, ug walay usa kanila nga moikyas nga makaikyas. Kon sila magkalot ngadto sa Sheol, gikan didto kuhaon sila sa akong kamot; ug kon sila mosaka ngadto sa kalangitan, gikan didto yudyoron ko sila.”—Amos 9:1, 2.
16 Ang mga daotan dili makalikay sa pagpahamtang sa paghukom ni Jehova nganha kanila pinaagi sa pagkalot “ngadto sa Sheol,” nga mahulagwayong nagpasabot sa mga paningkamot sa pagtago diha sa kinailadmang mga bahin sa yuta. Ni makaikyas sila sa paghukom sa Diyos pinaagi sa pagsaka “ngadto sa kalangitan,” sa ato pa, maningkamot sa pagdangop sa tag-as nga kabukiran. Klaro ang pasidaan ni Jehova: Walay tagoanan nga dili niya maabot. Ang hustisya sa Diyos nagkinahanglan nga ang gingharian sa Israel manubag sa daotang mga buhat niini. Ug miabot kanang panahona. Sa 740 W.K.P—mga 60 ka tuig human isulat ni Amos ang iyang tagna—ang gingharian sa Israel giparot sa nanulong nga mga Asiryanhon.
Ang Paghukom sa Diyos Mapilion
17, 18. Unsay gipadayag sa Amos kapitulo 9 bahin sa kaluoy sa Diyos?
17 Ang tagna ni Amos nakatabang kanato sa pagkahibalo nga ang paghukom sa Diyos kanunayng nahiangay ug dili kalikayan. Apan ang basahon sa Amos nagpaila usab nga ang paghukom ni Jehova mapilion. Makita sa Diyos ang mga daotan ug makapahamtang siya kanila ug paghukom bisan asa sila magtago. Makakita usab siya sa mahinulsolon ug matul-id nga mga tawo—kadtong iyang pilion nga pakitaan ug kaluoy. Sa matahom nga paagi gipasiugda kini diha sa kataposang kapitulo sa basahon sa Amos.
18 Sumala sa Amos kapitulo 9, bersikulo 8, si Jehova miingon: “Dili ko laglagon sa bug-os ang balay ni Jacob.” Sumala sa giingon sa mga bersikulo 13 hangtod sa 15, si Jehova nagsaad nga iyang “tigomon pagbalik ang mga binihag” sa iyang katawhan. Sila pakitaan ug kaluoy ug makatagamtam ug kasegurohan ug kadagaya. “Ang magdadaro makaapas sa mag-aani,” misaad si Jehova. Tiaw mo kana—daghan kaayo ang abot nga ang uban niana dili pa maani sa dihang moabot ang sunod nga panahon sa pagdaro ug pagpugas ug binhi!
19. Unsay nahitabo sa nahibilin gikan sa Israel ug Juda?
19 Ikaingon nga ang paghukom ni Jehova batok sa mga daotan sa Juda ug Israel mapilion sa pagkaagi nga ang mga tawo nga mahinulsolon ug mahiligon sa pagkamatarong gipakitaan ug kaluoy. Ingong katumanan sa tagna bahin sa pagpasig-uli nga gisulat diha sa Amos kapitulo 9, ang mahinulsolong nahibilin sa Israel ug Juda namalik gikan sa pagkabihag sa Babilonya sa 537 W.K.P. Didto sa ilang minahal nga yutang natawhan, ilang gipasig-uli ang putling pagsimba. Sa kasegurohan, sila nagtukod pag-usab sa ilang mga balay ug nananom ug mga parasan ug mga tanaman.
Ang Grabeng Paghukom ni Jehova Moabot!
20. Ang atong pagkonsiderar sa mga mensahe sa paghukom nga gipahayag ni Amos magpasalig kanato sa unsa?
20 Ang atong paghisgot sa mga mensahe sa paghukom sa Diyos nga gimantala ni Amos angayng magpasalig kanato nga taposon ni Jehova ang pagkadaotan sa atong adlaw. Nganong makatuo kita niini? Una, kining maong mga pananglitan sa nangaging mga pakiglabot sa Diyos sa mga daotan nagpaila kon sa unsang paagi siya molihok sa atong adlaw. Ikaduha, ang pagpahamtang sa paghukom sa Diyos batok sa apostatang gingharian sa Israel magtino nga ipahinabo sa Diyos ang kalaglagan nganha sa Kakristiyanohan, ang labing dakog tulubagon nga bahin sa “Dakong Babilonya,” ang tibuok kalibotang imperyo sa bakak nga relihiyon.—Pinadayag 18:2.
21. Nganong ang Kakristiyanohan takos sa grabeng paghukom sa Diyos?
21 Walay duhaduha nga ang Kakristiyanohan takos sa grabeng paghukom sa Diyos. Ang iyang daotan nga relihiyoso ug moral nga kahimtang dayag kaayo. Ang paghukom ni Jehova batok sa Kakristiyanohan—ug sa ubang bahin sa kalibotan ni Satanas—nahiangay gayod. Kini dili usab kalikayan, kay kon panahon na sa pagpahamtang ug paghukom, ang giingon sa Amos kapitulo 9, bersikulo 1, mapadapat: “Walay usa kanila nga mokalagiw nga molampos sa iyang pagkalagiw, ug walay usa kanila nga moikyas nga makaikyas.” Oo, bisan asa pa magtago ang mga daotan, makita sila ni Jehova.
22. Unsang mga punto mahitungod sa paghukom sa Diyos ang giklaro diha sa 2 Tesalonica 1:6-8?
22 Ang paghukom sa Diyos kanunayng nahiangay, dili kalikayan, ug mapilion. Mahibaloan kini gikan sa giingon ni apostol Pablo: “Matarong sa bahin sa Diyos nga mobalos ug kasakitan niadtong nagsakit kaninyo, apan, kaninyo nga nag-antos ug kasakitan, kahupayan uban kanamo inigpadayag na sa Ginoong Jesus gikan sa langit uban sa iyang gamhanang mga manulonda sa nagdilaab nga kalayo, sa dihang siya manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.” (2 Tesalonica 1:6-8) “Matarong sa bahin sa Diyos” ang pagpanimalos niadtong angay sa grabeng paghukom tungod sa pagpahinabog kasakitan sa iyang mga dinihogan. Kanang maong paghukom dili kalikayan, kay ang mga daotan dili makalabang-buhi sa ‘pagpadayag ni Jesus uban sa iyang gamhanang mga manulonda sa nagdilaab nga kalayo.’ Ang langitnong paghukom mapilion usab sa pagkaagi nga si Jesus manimalos “kanilang wala makaila sa Diyos ug kanilang wala magsunod sa maayong balita.” Ug ang pagpahamtang sa paghukom sa Diyos maghatag ug kahupayan sa mga tawong diyosnon nga nag-antos sa kasakitan.
Paglaom Alang sa mga Matul-id
23. Unsang paglaom ug kahupayan ang makuha nato gikan sa basahon sa Amos?
23 Ang tagna ni Amos adunay maanindot nga mensahe sa paglaom ug kahupayan alang sa mga tawo nga mahiligon sa pagkamatarong. Sumala sa gitagna diha sa basahon sa Amos, wala laglaga ni Jehova sa bug-os ang iyang katawhan sa karaang mga panahon. Sa ngadtongadto gitigom niya pagbalik ang mga binihag sa Israel ug Juda, nga gipasig-uli sila ngadto sa ilang yutang natawhan ug gipanalanginan sila ug kasegurohan ug kadagaya. Unsay kahulogan niini sa atong adlaw? Tungod niini maseguro nato nga panahon sa pagpahamtang sa paghukom sa Diyos, makita ni Jehova ang mga daotan bisan asa sila magtago ug makita niya ang mga tawo nga iyang giisip nga takos sa iyang kaluoy bisan asa tingali sila magpuyo dinhi sa yuta.
24. Sa unsang mga paagi ang modernong-adlaw nga mga alagad ni Jehova gipanalanginan?
24 Samtang magpaabot kita sa panahon nga ipahamtang ni Jehova ang paghukom batok sa mga daotan, unsay atong masinatian ingong iyang matinumanong mga alagad? Aw, si Jehova magpanalangin kanato ug espirituwal nga kadagaya! Atong matagamtam ang matang sa pagsimba nga walay kabakakan ug mga pagtuis nga miresulta gumikan sa bakak nga mga pagtulon-an sa Kakristiyanohan. Gipanalanginan usab kita ni Jehova ug abundang espirituwal nga pagkaon. Apan, hinumdomi nga uban niining dagayang panalangin gikan kang Jehova aduna usay dakong responsibilidad. Gidahom sa Diyos nga pasidan-an nato ang uban bahin sa umaabot nga paghukom. Nagtinguha kita sa paghimo sa tanan natong maarangan sa pagpangita niadtong “hustong nakiling alang sa kinabuhing walay kataposan.” (Buhat 13:48) Oo, gitinguha nato ang pagtabang sa daghan kutob sa mahimo nga makaambit sa espirituwal nga kauswagan nga atong gitagamtam karon. Ug buot nato nga sila makalabang-buhi sa nagsingabot nga pagpahamtang sa Diyos ug paghukom batok sa mga daotan. Siyempre, aron makapakigbahin niining maong mga panalangin, kinahanglang mahuptan nato ang hustong kahimtang sa kasingkasing. Sa ato unyang makita sa sunod nga artikulo, kini gipasiugda usab diha sa tagna ni Amos.
Unsaon Nimo Pagtubag?
• Sa unsang paagi ang tagna ni Amos nagpakita nga ang grabeng mga paghukom ni Jehova kanunayng nahiangay?
• Unsang pamatuod ang gihatag ni Amos sa pagpakita nga ang paghukom sa Diyos dili kalikayan?
• Sa unsang paagi ang basahon sa Amos nagpakita nga ang pagpahamtang sa paghukom sa Diyos mapilion?
[Mga Pangutana sa Pagtuon]
[Hulagway sa panid 16, 17]
Ang gingharian sa Israel wala makaikyas sa paghukom sa Diyos
[Hulagway sa panid 18]
Sa 537 W.K.P., ang nahibilin sa Israel ug Juda namalik gikan sa pagkabihag sa Babilonya