Gusto ba Nimong Mabuhi sa Walay Kataposan?

“DILI ko mahadlok nga mamatay,” matod pa sa usa ka tigulang nga babaye sa Japan. “Apan ang nakapaguol nako mao nga kinahanglan nakong biyaan kining mga bulaka.” Nakasabot ang usa ka Kristohanong ministro nga miduaw sa iyang balay kon nganong mibati siya ug ingon niadto, tungod kay ang maong babaye adunay maanindot nga tanaman. Daghang nag-ingon nga sila dili mahadlok nga mamatay nahimuot pag-ayo sa mga katingalahan sa kalalangan ug tingali gusto gayong mabuhi sa walay kataposan.

Mabuhi sa walay kataposan? Daghan ang dili motuo sa maong ideya. Ang uban moingon pa gani nga dili nila gustong mabuhi sa walay kataposan. Nganong ingon man niana ang ilang pagbati?

 Makalaay ba ang Kinabuhing Walay Kataposan?

Naghunahuna ang uban nga makalaay ang pagkinabuhi sa walay kataposan. Ipunting tingali nila ang makapuol nga kinabuhi sa daghang retirado na nga mga tawo nga diyutay na lag mahimo ug magsige na lag tan-aw sa telebisyon. Kon mao kanay imong gibati, tagda ang giingon sa usa ka astronomo nga si Robert Jastrow sa dihang gipangutana siya kon ang kinabuhing walay kataposan usa ba ka panalangin o usa ka tunglo. Si Jastrow mitubag: “Mahimo kining usa ka panalangin alang niadtong may maukitong hunahuna ug walay-kinutobang tinguha nga makakat-on. Ang ideya nga sila mabuhi sa walay kataposan aron makabaton ug kahibalo makapahupay gayod kanila. Apan alang niadtong dili gustong makakat-on ug bag-ong mga butang ug kansang hunahuna dili motuo niana, kini maoy usa ka makahahadlok nga tunglo. Wala sila mahibalo kon unsaon paggamit sa ilang panahon.”

Nag-agad ra gayod kanimo kon makalaay ba o dili ang kinabuhing walay kataposan. Kon ikaw ‘adunay maukitong hunahuna ug walay-kinutobang tinguha sa pagkakat-on,’ hunahunaa lang kon unsay imong mahimo diha sa natad sa arte, musika, arkitektura, pag-atiman sa hardin, o bisan unsang maayong buluhaton nga makapainteres kanimo. Ang kinabuhing walay kataposan sa yuta mohatag ug kahibulongang mga kahigayonan sa pag-ugmad sa imong mga katakos diha sa nagkalainlaing mga natad sa kalihokan.

Ang pagkaadunay katakos sa pagpakita ug pagsinati ug gugma hangtod sa hangtod makapahimo sa kinabuhing walay kataposan nga makapatagbaw gayod. Kita gilalang nga may kapasidad sa pagpakitag gugma, ug kita mouswag kon bation natong kita gihigugma. Ang pagpaambit ug tinuod nga gugma makahatag ug dulot nga katagbawan nga dili molubad sa paglabay sa panahon. Ang pagkinabuhi sa walay kataposan maghatag ug walay-kinutobang kahigayonan sa pag-ugmad ug gugma dili lang para sa isigkatawo kondili ilabina para sa Diyos. “Kon ang usa ka tawo nahigugma sa Diyos,” matod pa ni apostol Pablo, “kini siya nailhan niya.” (1 Corinto 8:3) Pagkaanindot nga palaaboton—nga makaila ug pagailhon sa Soberano sa uniberso! Dugang pa, walay kataposan ang pagkat-on mahitungod sa atong mahigugmaong Maglalalang. Nan, sa unsang paagi makalaay ug dili makapatagbaw ang kinabuhing walay kataposan?

Ang Kinabuhi—Lumalabay ug Bililhon

Nagtuo ang uban nga bililhon ang kinabuhi tungod sa kamubo niini. Ila tingaling itandi ang kinabuhi ngadto sa bulawan, nga limitado lamang ang gidaghanon. Kon ang bulawan makita pa bisan asa, matod nila, mous-os ang bili niini. Bisan pa niana, maanindot gihapon ang bulawan. Ingon gayod usab niana ang kinabuhi.

Ato tingaling ikatandi ang kalipay nga mabuhi sa walay kataposan sa pagkabaton ug dagayang  hangin. Ang mga tripulante sa nadaot nga submarino mag-isip sa hangin nga bililhon kaayo. Human sila maluwas, naghunahuna ka ba nga sila walay pagpabiling magreklamo nga nakahanggap pag-usab ug daghang hangin? Dili gayod!

Sama sa maong mga tripulante, kita mahimong maluwas apan uban sa mas dakong kahigayonan nga mabuhing walay kataposan. “Ang suhol nga ginabayad sa sala mao ang kamatayon,” misulat si apostol Pablo, “apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.” (Roma 6:23) Pinaagi sa halad lukat ni Jesus, wagtangon sa Diyos ang pagkadili-hingpit sa tawo ug ang kamatayon ug hatagan ang masinugtanong katawhan ug gasa nga kinabuhing walay kataposan. Pagkamapasalamaton gayod nato tungod sa maong mahigugmaong kahikayan!

Komosta ang Imong mga Minahal?

Naghunahuna tingali ang uban: ‘Komosta na man ang akong mga minahal? Walay kapuslanan ang kinabuhing walay kataposan kon dili sila mahiuban kanako.’ Tingali aduna ka nay kahibalo bahin sa Bibliya ug imong nakat-onan ang bahin sa kahigayonan sa pagtagamtam sa kinabuhing walay kataposan sa yutan-ong paraiso. (Lucas 23:43; Juan 3:16; 17:3) Natural na lang nga buot nimo nga ang imong suod nga kabanay, uban pang mga minahal, ug suod nga mga higala maatua didto, nga magtagamtam sa samang kalipay nga gilaoman nimong matagamtam sa gisaad sa Diyos nga bag-ong kalibotan sa pagkamatarong.—2 Pedro 3:13.

Apan komosta na man kon ang imong mga higala ug mga minahal dili gustong mabuhi sa walay kataposan sa paraisong yuta? Ayawg kaluya tungod niana. Padayon sa pagkuhag tukmang kahibalo sa Kasulatan, ug lihok nga kaharmonya niana. Si apostol Pablo misulat: “Unsaon god nimo pagkahibalo, asawa, nga maluwas mo ang imong bana? O, unsaon god nimo pagkahibalo, bana, nga maluwas mo ang imong asawa?” (1 Corinto 7:16) Mahimong mausab ang mga tawo. Pananglitan, usa ka lalaki nga supak kanhi sa Kristiyanidad ang nausab ug sa ulahi nahimong ansiyano sa Kristohanong kongregasyon. Siya miingon: “Nalipay kaayo ako nga ang akong minahal nga pamilya maunongong mibarog sa ilang mga prinsipyo sa Bibliya bisan pa sa tanan nakong pagsupak.”

Ang Diyos nahingawa gayod sa imong kinabuhi ug sa kinabuhi sa imong mga minahal. Sa pagkatinuod, “Si Jehova . . . wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Buot ni Jehova nga Diyos nga ikaw ug ang imong mga minahal mabuhi sa walay kataposan. Ang iyang gugma labaw pa kay nianang iya sa dili-hingpit nga mga tawo. (Isaias 49:15) Busa nganong dili ugmaron ang maayong relasyon uban sa Diyos? Sa ngadtongadto imong matabangan ang imong mga minahal sa paghimo sa samang butang. Bisan pag sa pagkakaron wala pa silay paglaom nga mabuhi sa walay kataposan, ang ilang tinamdan mahimong mausab sa dihang ilang makita nga ikaw milihok nga kaharmonya sa tukmang kahibalo sa Bibliya.

Komosta ang imong mga minahal nga nangamatay? Alang sa milyonmilyon nga nangamatay, ang Bibliya naghatag sa kahibulongang paglaom sa pagkabanhaw—ang pagbangon gikan sa kamatayon ug pagkinabuhi sa Paraiso sa yuta. Si Jesu-Kristo nagsaad: “Ang takna nagsingabot nga ang tanan nga anaa sa handomanang mga lubnganan . . . manggula.” (Juan 5:28, 29) Bisan kadtong nangamatay nga wala mahibalo bahin sa Diyos pagabanhawon, tungod kay ang Bibliya nag-ingon: “Aduna unyay pagkabanhaw sa mga matarong ug sa mga dili matarong.” (Buhat 24:15) Pagkamakalilipay unya ang pag-abiabi sa mga binanhaw!

Kinabuhing Walay Kataposan—Usa ka Malipayong Palaaboton

Kon magmalipayon ug magmakontento ka karon bisan pa sa tanang problema niining kalibotana, seguradong malipay ka sa kinabuhing walay kataposan sa paraisong yuta. Apan, sa dihang gisulti sa usa ka Saksi ni Jehova ang mga panalangin nga ipatungha sa kinabuhing walay kataposan, usa ka babaye miingon: “Dili ko gustong mabuhi sa walay kataposan. Igo na kanako ang 70 o 80 ka tuig.” Gipangutana siya sa  usa ka Kristohanong ansiyano nga didto niadtong higayona: “Nahunahuna ba nimo kon unsa kahay bation sa imong mga anak kon ikaw mamatay?” Midagayday ang mga luha sa iyang mga aping sa dihang gihunahuna niya ang kaguol nga ilang bation kon mamatay ang ilang inahan. “Sa unang higayon, akong naamgohan kon unsa diay ako ka hakog,” siya miangkon, “ug akong nasabtan nga ang kinabuhing walay kataposan dili usa ka hakog nga paglaom kondili kini naglangkit ug pagkinabuhi alang sa uban.”

Bation tingali sa uban nga dili ra hinungdanon kon sila mabuhi man o mamatay. Apan, hinungdanon kana alang sa atong Maghahatag-ug-Kinabuhi, kinsa miingon: “Ingon nga ako buhi, . . . ako malipay, dili sa kamatayon sa tawong daotan, apan nga mobiya ang daotan gikan sa iyang dalan ug mabuhi.” (Ezequiel 33:11) Sanglit ingon niana ang kahingawa sa Diyos bahin sa kinabuhi bisan sa mga tawong daotan, dayag nga siya nahingawa gayod niadtong nahigugma kaniya.

Si Haring David sa karaang Israel may pagsalig sa mahigugmaong pag-atiman ni Jehova. Si David kas-a miingon: “Kon ugaling biyaan ako sa akong amahan ug sa akong inahan, si Jehova mismo magsagop kanako.” (Salmo 27:10) Si David lagmit segurado nga gihigugma siya sa iyang mga ginikanan. Apan bisan pag biyaan siya sa iyang mga ginikanan—ang iyang labing suod nga kabanay—siya nahibalo nga ang Diyos dili gayod mobiya kaniya. Tungod sa gugma ug kahingawa, si Jehova nagtanyag kanato ug kinabuhing walay kataposan ug walay kinutobang pakighigalaay uban kaniya. (Santiago 2:23) Dili ba kita mapasalamaton nga modawat niining kahibulongang mga gasa?

[Hulagway sa panid 7]

Ang gugma alang sa Diyos ug sa isigkatawo maghimo sa pagkinabuhi sa walay kataposan nga mapuslanon kaayo