Nangandoy Ka ba ug Usa ka Kalibotan nga Wala Nay Kahadlok?

“Kita ‘kanunayng nagmabinantayon pag-ayo ug . . . mibating walay mahimo,’ tungod sa ‘wala-hisayri. . . nga kapeligrohan nga mahimong kalit nga moatake sa bisan unsang oras sa bisan unsang dagway.’”

KINING mga pulonga, nga gikutlo sa Newsweek nga magasin sa miaging tuig, nagbanaag sa gibati sa daghang tawo nga nagkinabuhi niining gubot nga kalibotan karon. Gipakita ni Jesu-Kristo nga kining maong mga pagbati mosamot pa sa dili madugay. Iyang gitagna ang panahon diin ang mga nasod mobatig tumang kasakit nga maglibog sila kon unsaon paglingkawas gikan niini ug ang mga tawo panguyapan sa kahadlok ug sa pagpaabot sa mga butang nga mahitabo sa yuta. Apan, dili kita kinahanglang mobati ug kahadlok o kawalay-mahimo, tungod kay si Jesus nagkanayon: “Inigsugod pagkahitabo niining mga butanga, tindog nga tul-id ug ihangad ang inyong mga ulo, tungod kay ang inyong kaluwasan nagakaduol na.”—Lucas 21:25-28.

Sa paghubit sa kahimtang sa iyang katawhan sa yuta human sila maluwas, si Jehova nga Diyos miingon: “Ang akong katawhan magapuyo sa malinawong puloy-anang dapit ug sa mga pinuy-anan sa bug-os nga pagsalig ug sa walay-pagkatugaw nga mga dapit-pahulayan.” (Isaias 32:18) Pinaagi sa iyang manalagna nga si Miqueas, si Jehova miingon: “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila; kay ang baba ni Jehova sa mga panon nagsulti niini.”—Miqueas 4:4.

Pagkalahi nianang kahimtanga kon itandi sa kinabuhi karon! Ang wala-hisayri nga kapeligrohan dili na unya maghulga sa katawhan. Imbes nga magmabinantayon kanunay ug mobating walay mahimo, aduna unyay dumalayong kalinaw ug kalipay.