Ang Katahom sa Kalalangan ni Jehova

“Pagkadaghan sa Imong mga Buhat, Oh Jehova!”

NAGPUYO man kita sa kabanikanhan o sa siyudad, sa bukid o duol sa baybayon, kita napalibotan sa matahom kaayo nga mga kalalangan. Haom kaayo nga gipasundayag sa 2004 Calendar of Jehovah’s Witnesses ang lainlaing kahibulongan nga mga kalalangan ni Jehova nga Diyos.

Dugay nang naikag ang mapabilhong mga tawo sa mga kalalangan sa Diyos. Pananglitan, tagda si Solomon, kansang kaalam “mas dako pa gayod kay sa kaalam sa tanang taga-Sidlakan.” Ang Bibliya nag-ingon: “Mosulti siya bahin sa mga kahoy, gikan sa sedro nga anaa sa Lebanon ngadto sa hisopo nga moturok sa paril; ug mosulti siya bahin sa mga mananap ug bahin sa naglupad nga mga linalang ug bahin sa nagalihok nga mga linalang ug bahin sa mga isda.” (1 Hari 4:30, 33) Ang amahan ni Solomon, si Haring David, kanunayng namalandong bahin sa mga obra-maestra sa Diyos. Napalihok siya sa pagsulti ngadto sa iyang Magbubuhat: “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga binuhat.”—Salmo 104:24. a

Kita usab angayng maniid ug mamalandong bahin sa kalalangan. Pananglitan, mahimo natong “iyahat ang [atong] mga mata sa itaas” ug mangutana: “Kinsay naglalang niining mga butanga?” Aw, si Jehova nga Diyos, nga ‘dagaya sa dinamikong kusog’ ug tinuod gayod nga “mabaskog sa gahom”!—Isaias 40:26.

Sa unsang paagi kita maapektohan sa dihang mamalandong kita sa mga kalalangan ni Jehova? Adunay tulo ka paagi. Kini (1) magpahinumdom kanato sa pagpabili sa atong kinabuhi, (2) mopalihok kanato sa pagtabang sa uban sa pagkat-on bahin sa kalalangan, ug (3) motukmod kanato sa pagkaila ug pag-apresyar ug dugang sa atong Maglalalang.

Ang atong tawhanong kinabuhi, nga mas labaw kay sa “mga hayop nga walay kabuot,” magpaarang kanato sa pagtuon ug pagpabili sa kahibulongang mga kalalangan. (2 Pedro 2:12) Ang atong mga mata makaapresyar ug nindot nga mga talan-awon. Ang atong mga dalunggan makadungog sa mananoy nga mga awit sa mga langgam. Ug ang atong abilidad sa pagtimaan sa oras ug dapit magpahinumdom kanato sa mga panghitabo nga halandomon kanato. Bisan pag ang atong presenteng kinabuhi dili hingpit, gusto gayod nato nga mabuhi!

Ang mga ginikanan malingawng magtan-aw sa kinaiyanhong kaikag sa ilang mga anak sa kalalangan. Malipay gayod kaayo ang mga bata nga makakita ug mga kabhang sa kinhason diha sa baybayon, mohikap sa hayop, mokatkat sa kahoy! Buot sa mga ginikanan nga tabangan ang ilang gagmayng mga anak nga makasabot kon sa unsang paagi ang kalalangan nalangkit sa usa ka Maglalalang. Ang kahingangha ug pagtahod nga maugmad sa mga bata alang sa kalalangan ni Jehova dili nila malimtan sa tibuok nilang kinabuhi.—Salmo 111:2, 10.

Dili gayod makataronganon kon igo lang natong dayegon ang mga linalang apan mapakyas sa pagdayeg  sa Maglalalang. Ang tagna ni Isaias motabang kanato sa pagpalandong niining puntoha sa dihang kini miingon: “Wala ba ikaw mahibalo o wala ba ikaw makadungog? Si Jehova, ang Maglalalang sa mga kinatumyan sa yuta, maoy Diyos hangtod sa panahong walay tino. Siya dili kapoyon o maluya. Dili arang masusi ang iyang pagsabot.”—Isaias 40:28.

Oo, ang kalalangan ni Jehova naghatag ug pamatuod sa iyang walay-sama nga kaalam, dili-hitupngan nga gahom, ug halalom nga gugma alang kanato. Sa dihang makita nato ang nindot nga mga linalang sa atong palibot ug mahibalo sa mga hiyas sa Usa nga naghimo nianang tanan, matandog unta kita sa pag-ingon sama kang David: “Oh Jehova, walay sama kanimo . . . , ni adunay mga buhat nga sama sa imoha.”—Salmo 86:8.

Makaseguro kita nga ang masinugtanong mga tawo padayong mahingangha sa mga kalalangan ni Jehova. Aduna kitay walay-kataposan nga kahigayonan sa pagkat-on ug dugang bahin kang Jehova. (Ecclesiastes 3:11) Ug sa dihang mokat-on kita ug dugang bahin kaniya, ang atong gugma sa atong Maglalalang mas molalom.

[Footnote]

[Kahon sa panid 9]

Mga Pagdayeg sa Maglalalang

Daghang mapabilhong mga siyentipiko ang miila sa papel sa Diyos diha sa kalalangan. Ang mosunod maoy pipila ka pananglitan:

“Ang labing makaiikag ug makapalipay nga bahin sa akong gitun-an nga siyensiya mao kanang talagsaong mga higayon sa dihang madiskobrehan nako ang usa ka bag-ong butang ug moingon sa akong kaugalingon, ‘Ah, mao diay kini ang paagi sa Diyos sa paghimo niini.’ Gusto nakong masabtan ug diyutay ang mga pamaagi sa Diyos.”—Henry Schaefer, propesor sa kemistriya.

“Kon mahitungod sa hinungdan sa pagsangkad sa Uniberso, ang mga magbabasa na lay mohimo sa ilang konklusyon, apan ang among pagsabot niana dili bug-os kon wala Siya [Diyos].”—Edward Milne, Britanikong kosmologo.

“Nasayod kita nga ang kinaiyahan gihubit pinaagig hataas kaayo nga matang sa matematika tungod kay ang Diyos mao ang naglalang niana.”—Alexander Polyakov, Ruso nga matematisyan.

“Sa dihang kita nagatuon sa kinaiyanhong mga butang kita nagapamalandong sa panghunahuna sa Maglalalang, nagasusi sa iyang mga ideya, nagakat-on sa Iyang mga pamaagi ug dili ang atoa.”—Louis Agassiz, Amerikanong biologo.

[Hulagway sa panid 8, 9]

Mga Gentoo penguin, Antarctic Peninsula

[Hulagway sa panid 9]

Grand Teton National Park, Wyoming, T.B.A.

[Credit Line]

Jack Hoehn/Index Stock Photography