Kon Unsay Basahon—Ang Maalamong Tambag ni Solomon

“SA PAGHIMOG daghang basahon walay kataposan, ug ang hilabihan nga kasibot alang niini makapabudlay sa unod.” (Ecclesiastes 12:12) Sa dihang gisulat sa maalamon nga Haring Solomon sa Israel kining mga pulonga mga 3,000 ka tuig na kanhi, wala niya ipasabot nga supak siya sa pagbasa. Hinunoa, siya nagkomento nga kinahanglang magmapilion. Nunot gayod sa panahon kining tambaga, tungod kay daghan kaayong mga basahon ang ipatik sa tibuok kalibotan kada tuig!

Dayag nga dili makapadasig o makapalagsik ang “daghang basahon” nga gihisgotan ni Solomon. Busa, siya miingon nga ang paggugol ug dakong panahon sa pagbasa niini “makapabudlay sa unod” imbes makahatag ug malungtarong mga kaayohan.

Apan, buot bang ipasabot ni Solomon nga wala nay mga basahon nga naundan ug maayo, kasaligan nga giya nga makahatag ug kaayohan sa mobasa? Dili, tungod kay siya misulat usab: “Ang mga pulong sa mga maalamon sama sa mga igtutugsok sa baka, ug ingon sa mga lansang nga gipadulot kadtong mga nagtigom sa mga tudling-pulong; kini sila gihatag gikan sa usa ka magbalantay.” (Ecclesiastes 12:11) Sa pagkatinuod, dunay mga sinulat nga “sama sa mga igtutugsok sa baka” makapalihok sa usa sa positibong paagi. Makatukmod kini sa usa sa pagsubay sa hustong dalan. Dugang pa, “ingon sa mga lansang nga gipadulot,” kini makapalig-on sa determinasyon sa usa ug dili siya daling matarog.

Asa nato makaplagan kining maalamong mga pulong? Si Solomon nag-ingon nga ang kinamaayohan niini naggikan sa usa ka Magbalantay, si Jehova. (Salmo 23:1) Busa, ang labing maayong basahon nga mabasa sa usa ka tawo aron makaplagan kining maalamong mga pulong mao ang basahon nga inspirado sa Diyos—ang Bibliya. Ang regular nga pagbasa niining maong inspiradong mga pulong makatabang sa usa nga mahimong “takos gayod, bug-os nga masinangkapan alang sa tanang maayong buhat.”—2 Timoteo 3:16, 17.