Mga Pangutana Gikan sa mga Magbabasa

Ngano man nga gidid-an sa gibanhawng Jesus si Maria Magdalena sa paghikap kaniya apan sa ulahi giagda si Tomas sa pagbuhat niana?

Ang ubang karaang mga hubad sa Bibliya naghatag sa ideya nga gidid-an ni Jesus si Maria Magdalena sa paghikap kaniya. Pananglitan, ang Maayong Balita Biblia naghubad sa mga pulong ni Jesus niining paagiha: “Ayaw akog hikapa kay wala pa ako mahibalik sa Amahan.” (Juan 20:17) Apan, ang orihinal nga Gregong berbo, nga kasagarang gihubad nga “hikap,” nagkahulogan usab ug “pagkapot, pagkapyot, pagkubot, paghawid, paggunit.” Makataronganon nga wala mosupak si Jesus sa basta lang paghikap ni Maria Magdalena kaniya, sanglit pagkahuman dayon niadto gitugotan niya ang ubang mga babaye nga atua sa lubnganan sa ‘paggunit sa iyang mga tiil.’—Mateo 28:9.

Daghang modernog-pinulongan nga mga hubad, sama sa Bag-ong Kalibotang Hubad sa Balaang Kasulatan, The New Jerusalem Bible, ug The New English Bible, motabang kanato sa pagsabot sa tinuod nga kahulogan sa mga pulong ni Jesus pinaagi sa paghubad niini nga: “Ayaw ako pagkupti.” Nganong gisulti man kini ni Jesus kang Maria Magdalena, nga usa niya ka suod nga kauban?—Lucas 8:1-3.

Malagmit, nahadlok si Maria Magdalena nga si Jesus hapit nang mobiya ug mokayab sa langit. Kay gitukmod sa iyang dakong tinguha nga makauban ang iyang Ginoo, iyang gihawiran si Jesus, nga dili siya gustong buhian. Agig pasalig kang Maria nga dili pa siya mobiya, gisugo ni Jesus si Maria nga mohunong na sa pagkupot kaniya ug gipaadto siya sa iyang mga tinun-an aron balitaan sila bahin sa iyang pagkabanhaw.—Juan 20:17.

Lahi ang kabildohay ni Jesus ug Tomas. Sa dihang nagpakita si Jesus ngadto sa pipila niya ka mga tinun-an, wala didto si Tomas. Sa ulahi, gipahungaw ni Tomas ang iyang mga pagduhaduha bahin sa pagkabanhaw ni Jesus, nga miingon nga dili siya motuo niana gawas kon makita niya ang mga samad ni Jesus nga inagian sa lansang ug mahikap ang kilid ni Jesus nga giduslak sa bangkaw. Walo ka adlaw sa ulahi, nagpakita na usab si Jesus sa iyang mga tinun-an. Nianang higayona, anaa na si Tomas, ug giagda siya ni Jesus sa paghikap sa iyang mga samad.—Juan 20:24-27.

Busa, sa kahimtang ni Maria Magdalena, gitul-id ni Jesus ang iyang sayop nga tinguha sa pagpugong kang Jesus sa pagbiya; sa kahimtang ni Tomas, giwala ni Jesus ang iyang pagduhaduha. May lig-ong katarongan si Jesus kon nganong lainlain ang iyang gisulti nianang duha ka kahimtang.