Dawaton ba Nimo ang Tabang ni Jehova?

“Si Jehova ang akong magtatabang; dili ako mahadlok.”—HEBREOHANON 13:6.

1, 2. Nganong hinungdanon nga atong dawaton ang tabang ug giya ni Jehova sa kinabuhi?

 HUNAHUNAA nga ikaw nagbaktas subay sa usa ka dalandalan sa bukid. Hinuon, wala ka mag-inusara tungod kay usa ka tiggiya ang mitanyag nga mouban kanimo, ug siya ang labing maayong tiggiya. Siya mas daghag kasinatian ug mas taas ug resistensiya kay kanimo, apan siya mapailobong nag-abay kanimo. Namatikdan niya nga mapandol ka usahay. Tungod kay nabalaka bahin sa imong kahilwas, iya kang gunitan aron tabangan ka ilabina diha sa peligrosong lugar. Balibaran ba nimo ang iyang tabang? Dili gayod! Ikaw nameligro.

² Ingong mga Kristohanon, kita adunay malisod nga dalan nga subayon. Kinahanglan ba kitang molakaw diha sa hagip-ot nga dalan nga mag-inusara? (Mateo 7:14) Dili, tungod kay gipakita sa Bibliya nga ang labing maayong Tiggiya nga atong makaplagan, si Jehova nga Diyos, nagtugot sa mga tawo sa paglakaw uban kaniya. (Genesis 5:24; 6:9) Tabangan ba ni Jehova ang iyang mga alagad samtang maglakaw sila? Siya nag-ingon: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’” (Isaias 41:13) Sama sa tiggiya sa atong ilustrasyon, si Jehova malulotong naghatag sa iyang tabang ug nakighigala niadtong nagtinguha sa paglakaw uban kaniya. Segurado nga walay usa kanato nga mobalibad sa iyang tabang!

3. Atong konsiderahon ang unsang mga pangutana niini nga panaghisgot?

 ³ Sa nag-unang artikulo, atong gihisgotan ang upat ka paagi diin gitabangan ni Jehova ang iyang katawhan sa karaang mga panahon. Tabangan ba niya ang iyang katawhan sa samang mga paagi karon? Ug unsaon nato pagseguro nga atong madawat ang bisan hain sa maong tabang? Atong konsiderahon kining mga pangutanaha. Pinaagi sa pagkonsiderar niini, kita mahimong mas masaligon nga si Jehova mao gayod ang atong Magtatabang.—Hebreohanon 13:6.

Tabang Gikan sa mga Manulonda

4. Nganong ang mga alagad sa Diyos karon makasalig nga paluyohan sila sa mga manulonda?

⁴ Motabang ba ang mga manulonda sa mga alagad ni Jehova karon? Oo. Tinuod, sila dili magpakita aron luwason ang matuod nga mga magsisimba gikan sa kapeligrohan. Bisan sa kapanahonan sa Bibliya, ang mga manulonda talagsa rang magpakita aron sa pagluwas. Kadaghanan sa ilang gihimo wala makita sa mga tawo, sama sa atong panahon karon. Bisan pa niana, nadasig gayod ang mga alagad sa Diyos sa dihang ilang nahibaloan nga ang mga manulonda andam nga mopaluyo kanila. (2 Hari 6:14-17) Kita adunay maayong katarongan nga mobati ug susama niana.

5. Giunsa pagpakita sa Bibliya nga ang mga manulonda nalangkit sa buluhatong pagwali karon?

⁵ Ang mga manulonda ni Jehova ilabinang interesado sa linaing buluhaton nga naglangkit kanato. Unsa kanang buluhatona? Atong makaplagan ang tubag diha sa Pinadayag 14:6: “Nakita ko ang laing manulonda nga naglupad sa kinatung-an sa langit, ug siya adunay walay kataposang maayong balita nga ipahayag ingong makapalipay nga balita ngadto sa nanagpuyo sa yuta, ug ngadto sa matag nasod ug tribo ug pinulongan ug katawhan.” Kining “walay kataposang maayong balita” dayag nga nalangkit sa “maayong balita sa gingharian,” nga sumala sa gitagna ni Jesus, “igawali sa tibuok gipuy-ang yuta ingon nga pagpamatuod ngadto sa tanang kanasoran” sa dili pa moabot ang kataposan niining sistema sa mga butang. (Mateo 24:14) Siyempre, ang mga manulonda dili direktang nagwali. Ang mga tawo maoy gisugo ni Jesus niining hinungdanong buluhaton. (Mateo 28:19, 20) Dili ba kita madasig sa pagkahibalo nga samtang atong gituman ang maong sugo, kita tabangan sa balaang mga manulonda, nga maoy maalamon ug gamhanan nga espiritung mga linalang?

6, 7. (a) Unsay nagpaila nga gipaluyohan sa mga manulonda ang atong buluhatong pagwali? (b) Sa unsang paagi makaseguro kita nga makadawat sa pagpaluyo sa mga manulonda ni Jehova?

⁶ Adunay daghang ebidensiya nga gipaluyohan sa mga manulonda ang atong buluhaton. Pananglitan, subsob kitang makadungog nga samtang nakigbahin sa ilang ministeryo, ang mga Saksi ni Jehova makahibalag ug usa ka tawo nga bag-o lang nag-ampo sa Diyos nga tabangan siya sa pagkakaplag sa kamatuoran. Ang maong mga kasinatian subsob ra kaayo aron isipong naatol lamang. Tungod sa tabang sa mga manulonda, mas daghang tawo ang nakakat-on sa pagbuhat sa gipahayag sa “manulonda nga naglupad sa kinatung-an sa langit”: “Kahadloki ninyo ang Diyos ug ihatag kaniya ang himaya.”—Pinadayag 14:7.

⁷ Gipangandoy ba nimo nga paluyohan ka sa  gamhanang mga manulonda ni Jehova? Nan buhata ang kutob sa imong maarangan diha sa imong ministeryo. (1 Corinto 15:58) Samtang makugihon kitang nagatuman niining espesyal nga asaynment gikan kang Jehova, kita makalaom nga tabangan sa iyang mga manulonda.

Tabang Gikan sa Pangulo sa mga Manulonda

8. Gihuptan ni Jesus ang unsang hataas nga katungdanan didto sa langit, ug nganong madasig kita niana?

⁸ Si Jehova naghatag usab kanato ug laing matang sa tabang gikan sa mga manulonda. Ang Pinadayag 10:1 naghubit sa usa ka talagsaon nga “kusgang manulonda” kansang “nawong ingon sa adlaw.” Kining manulonda nga nakita diha sa panan-awon lagmit naghulagway sa hinimayang Jesu-Kristo diha sa langitnong gahom. (Pinadayag 1:13, 16) Usa ba gayod ka manulonda si Jesus? Sa usa ka diwa, oo, tungod kay siya usa ka arkanghel. (1 Tesalonica 4:16) Unsa may arkanghel? Kanang pulonga nagkahulogang “pangunang manulonda,” o “pangulong manulonda.” Si Jesus mao ang labing gamhanan sa tanang espiritung mga anak ni Jehova. Gitudlo siya ni Jehova nga maoy manguna sa tanan Niyang mga manulonda. Kining maong arkanghel maoy gamhanan gayod nga tuboran sa tabang. Sa unsang mga paagi?

9, 10. (a) Sa unsang paagi si Jesus nagsilbing atong “magtatabang” sa dihang kita makasala? (b) Unsang tabang ang atong mabatonan diha sa panig-ingnan ni Jesus?

⁹ Ang tigulang nga si apostol Juan misulat: “Kon adunay makasala, kita adunay usa ka magtatabang ngadto sa Amahan, si Jesu-Kristo, usa nga matarong.” (1 Juan 2:1) Nganong misugyot man si Juan nga si Jesus mao ang atong “magtatabang” ilabina kon kita “makasala”? Aw, kita makasala adlaw-adlaw, ug ang sala moresulta ngadto sa kamatayon. (Ecclesiastes 7:20; Roma 6:23) Apan, gitugyan ni Jesus ang iyang kinabuhi ingong halad para sa atong mga sala. Ug siya anaa sa kiliran sa atong maluluy-ong Amahan aron mangamuyo alang kanato. Kitang tanan nagkinahanglan sa maong tabang. Sa unsang paagi madawat nato kana? Kinahanglang kita maghinulsol sa atong mga sala ug mangayog kapasayloan pinasukad sa halad ni Jesus. Kinahanglang dili usab nato sublion ang atong mga sala.

¹⁰ Gawas nga siya namatay alang kanato, si Jesus naghatag ug hingpit nga panig-ingnan para kanato. (1 Pedro 2:21) Ang iyang panig-ingnan mogiya kanato, motabang kanato sa paglaraw sa atong dalan aron atong malikayan ang grabeng sala ug mapahimut-an si Jehova nga Diyos. Dili ba kita malipay nga makabaton sa maong tabang? Gisaaran ni Jesus ang iyang mga sumusunod nga hatagan sila ug lain pang magtatabang.

Ang Tabang sa Balaang Espiritu

11, 12. Unsa ang espiritu ni Jehova, unsa ka gamhanan kini, ug nganong gikinahanglan nato kini karon?

¹¹ Si Jesus misaad: “Hangyoon ko ang Amahan ug hatagan kamo niya ug laing magtatabang nga magauban kaninyo hangtod sa kahangtoran, ang espiritu sa kamatuoran, nga dili madawat sa kalibotan.” (Juan 14:16, 17) Kini nga “espiritu sa kamatuoran,” o balaang espiritu, dili usa ka persona kondili usa ka puwersa—ang aktibong puwersa ni Jehova mismo. Kini gamhanan kaayo. Kini ang puwersa nga gigamit ni Jehova sa paglalang sa uniberso, sa paghimog talagsaong mga milagro, ug sa paghatag ug mga panan-awon nga nagbutyag sa iyang kabubut-on. Sanglit wala na gamita ni Jehova ang iyang espiritu nianang espesipikong mga paagi karon, nagpasabot ba kana nga wala na kita magkinahanglan niana?

¹² Wala gayod! Niining “makuyaw nga mga panahong lisod sagubangon,” kita labawng nagkinahanglan sa espiritu ni Jehova kay sukad masukad. (2 Timoteo 3:1) Kini magpalig-on kanato sa pag-antos sa mga pagsulay. Kini motabang kanato sa pag-ugmad ug maayong mga hiyas nga mas makapasuod kanato kang Jehova ug sa atong espirituwal nga mga kaigsoonan. (Galacia 5:22, 23) Nan, sa unsang paagi kita makabenepisyo gikan niining kahibulongang tabang gikan kang Jehova?

13, 14. (a) Nganong makaseguro kita nga si Jehova andam nga mohatag sa iyang balaang espiritu ngadto sa iyang katawhan? (b) Unsang matanga sa binuhatan ang magpakita nga wala gayod nato dawata ang gasa nga balaang espiritu?

¹³ Una, kita kinahanglang moampo alang sa balaang espiritu. Si Jesus miingon: “Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” (Lucas 11:13) Oo, si Jehova mao ang kinamaayohang Amahan. Kon pinasukad sa pagtuo sinsero natong pangayoon kaniya ang balaang espiritu, iya gayong ihatag kini kanato ingong gasa. Busa, ang pangutana mao, Gipangayo ba nato kini? Kita adunay maayong katarongan nga mangayo niana diha sa atong mga pag-ampo kada adlaw.

¹⁴ Ikaduha, atong dawaton ang maong gasa pinaagi sa paglihok nga kaharmonya niana. Sa pag-ilustrar: Pananglit ang usa ka Kristohanon nakigbisog sa kiling nga motan-aw ug pornograpiya. Nag-ampo na siya nga tabangan siya sa balaang espiritu nga mapakigbisogan kining dili-hinlo nga batasan. Nagpatambag na siya sa Kristohanong mga ansiyano, ug ilang gitambagan siya nga magmadeterminado, nga maglikay bisan sa pagpaduol sa maong malaw-ay nga talan-awon. (Mateo 5:29) Komosta kon dili niya panumbalingon ang ilang tambag ug magpadayon sa pagtan-aw ug pornograpiya sa dihang matental siya? Milihok ba siya nga kaharmonya sa iyang pag-ampo nga tabangan siya sa balaang espiritu? O siya ba nameligro hinuon nga mapaguol ang espiritu sa Diyos ug dili na makadawat sa maong gasa? (Efeso 4:30) Sa pagkatinuod, kitang tanan kinahanglang mobuhat kutob sa atong maarangan sa pagseguro nga padayon natong madawat kining kahibulongang tabang gikan kang Jehova.

 Tabang Gikan sa Pulong sa Diyos

15. Sa unsang paagi atong ikapakita nga wala nato isipang ordinaryo lang ang Bibliya?

¹⁵ Ang Bibliya maoy usa ka tuboran sa tabang sa matinumanong mga alagad ni Jehova sa daghang siglo. Hinunoa, imbes isipong ordinaryo lang ang Balaang Kasulatan, kinahanglan natong hinumdoman nga kini usa ka gamhanang tuboran sa tabang. Ang pagdawat sa maong tabang nagkinahanglag paningkamot. Kinahanglan natong himoon ang pagbasa sa Bibliya nga bahin sa atong regular nga rutina.

16, 17. (a) Sa unsang paagi gihubit sa Salmo 1:2, 3 ang mga balos sa pagbasa sa balaod sa Diyos? (b) Sa unsang paagi ang Salmo 1:3 naghisgot bahin sa makugihong pagtrabaho?

¹⁶ Ang Salmo 1:2, 3 nag-ingon bahin sa usa ka tawong diyosnon: “Ang iyang kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii. Ug siya mahisama gayod sa usa ka kahoy nga natanom sa daplin sa kasapaan sa tubig, nga mobunga sa iyang panahon ug ang iyang mga dahon dili malaya, ug ang tanan nga ginabuhat niya magmalamposon.” Nasabtan ba nimo ang punto nianang tekstoha? Sayon lang basahon kanang mga pulonga ug mohinapos nga kini naghubit lamang sa usa ka malinawon nga kahimtang—usa ka kahoy nga naghatag ug landong nga mitubo sa daplin sa suba. Pagkanindot motagpilaw nianang dapita inigkahapon! Apan kining salmoha wala magpahunahuna kanato bahin sa pagpahulay. Kini naghisgot bahin sa makugihong pagtrabaho. Sa unsang paagi nahimong ingon niana?

¹⁷ Matikdi nga ang kahoy dinhi dili lamang usa ka kahoy nga naghatag ug landong nga sulagmang mitubo sa daplin sa suba. Kini maoy usa ka kahoy nga mamunga, nga gituyo ‘pagtanom’ sa pinili nga dapit—“sa daplin sa kasapaan sa tubig.” Sa unsang paagi ang usa ka kahoy motubo duol sa daghang sapa? Buweno, diha sa mga prutasan, ang tag-iya lagmit magkalot ug mga kanal sa irigasyon aron ang mga gamot sa iyang bililhong mga kahoy makasuhop ug tubig. Busa, tin-aw na karon ang punto! Kon sa espirituwal nga diwa kita molambo sama nianang kahoya, tungod kini kay dunay naghago para kanato. Kita nakig-uban sa usa ka organisasyon nga nagdalag lunsay nga tubig sa kamatuoran nganhi gayod kanato, apan kinahanglang buhaton nato ang atong  bahin. Kinahanglang ibutang nato ang atong kaugalingon sa dapit diin makasuhop kita niining bililhong tubig, nga mohimo sa gikinahanglang pagpamalandong ug pagpanukiduki aron matisok ang mga kamatuoran sa Pulong sa Diyos diha sa atong mga hunahuna ug kasingkasing. Pinaagi niana, kita usab makapatunghag maayong mga bunga.

18. Unsay gikinahanglan aron makaplagan ang mga tubag sa Bibliya sa atong mga pangutana?

¹⁸ Ang Bibliya dili makahatag kanato ug benepisyo kon kini anaa lang sa butanganan. Dili usab kini anting-anting—nga mahimo lang natong piyongon ang atong mga mata, ug dayon pasagdan ang Bibliya nga mabuksan ngadto sa panid diin makita ang tubag sa atong pangutana. Sa dihang mohimo kitag mga desisyon, kinahanglan natong kaloton ang “kahibalo sa Diyos” sama sa atong buhaton sa nalubong nga bahandi. (Proverbio 2:1-5) Kasagaran gikinahanglan ang makugihon ug mainampingon nga pagpanukiduki aron makaplagan ang Kasulatanhong tambag nga naghisgot sa atong espesipikong mga panginahanglan. Daghan kitag mga publikasyon nga binase sa Bibliya nga motabang kanato sa atong pagpanukiduki. Samtang atong gamiton kini aron maikagong makalot ang bililhong kaalam sa Pulong sa Diyos, kita nagpahimulos gayod sa tabang ni Jehova.

Tabang Pinaagi sa mga Isigkamagtutuo

19. (a) Nganong ang mga artikulo diha sa Ang Bantayanang Torre ug Pagmata! maisip ingong tabang nga gitagana pinaagi sa mga isigkamagtutuo? (b) Sa unsang paagi ikaw natabangan sa usa ka artikulo diha sa usa sa atong mga magasin?

¹⁹ Ang tawhanong mga alagad ni Jehova maoy makanunayong mga tuboran sa tabang alang sa usag usa. Nausab ba si Jehova niining bahina? Wala gayod. Walay duhaduha nga kitang tanan makahunahuna ug mga higayon diin kita nakadawat sa tabang nga ato gayong gikinahanglan sa hustong panahon gikan sa atong mga isigkamagtutuo. Pananglitan, makahinumdom ka ba ug artikulo diha sa Ang Bantayanang Torre o Pagmata! nga nakahupay kanimo sa dihang gikinahanglan nimo kini o nakatabang kanimo sa pagsulbad sa usa ka problema o sa pagsagubang sa usa ka hagit sa imong pagtuo? Gihatagan ka ni Jehova sa maong tabang pinaagi sa “matinumanon ug maalamong ulipon” nga gitudlo sa pagtagana ug “pagkaon sa hustong panahon.”—Mateo 24:45-47.

20. Sa unsang mga paagi mapamatud-an sa Kristohanong mga ansiyano nga sila “mga gasa nga mga lalaki”?

²⁰ Apan, kasagarang mas direkta ang tabang nga atong madawat gikan sa mga isigkamagtutuo. Tingali ang usa ka Kristohanong ansiyano mohatag ug pakigpulong nga makatandog sa atong kasingkasing, o moduaw isip magbalantay nga makatabang kanato sa pagsagubang sa usa ka kalisdanan, o mohatag kanato ug malulotong tambag nga makatabang kanato sa pagkakita ug pagbuntog sa usa ka kahuyangan. Misulat ang usa ka mapasalamatong Kristohanon bahin sa tabang nga iyang nadawat gikan sa usa ka ansiyano: “Sa pag-alagad sa kanataran, siya migahin ug panahon aron dasigon ako sa pagpahayag sa akong hunahuna. Sa gabii una pa niana, nag-ampo ako kang Jehova, nga naghangyo kaniya nga aduna untay akong  mapakigsultihan. Pagkasunod adlaw, kining igsoona nakigsulti kanako sa mabinationg paagi. Gitabangan ko niya nga makasabot kon sa unsang paagi si Jehova kanunayng nagtabang kanako sulod sa daghang katuigan. Mapasalamaton ako kang Jehova tungod sa pagpadala sa maong ansiyano ngari kanako.” Nianang tanang paagi, ikapakita sa Kristohanong mga ansiyano nga sila “mga gasa nga mga lalaki,” nga gitagana ni Jehova pinaagi kang Jesu-Kristo aron sa pagtabang kanato nga makalahutay diha sa dalan paingon sa kinabuhi.—Efeso 4:8.

21, 22. (a) Unsay moresulta sa dihang kadtong anaa sa kongregasyon magpadapat sa tambag nga makita diha sa Filipos 2:4? (b) Nganong hinungdanon bisan ang ginagmayng mga buhat sa kalulot?

²¹ Gawas pa sa mga ansiyano, ang matag matinumanong Kristohanon buot mopadapat sa inspiradong sugo nga ‘magtan-aw, dili lamang sa personal nga interes sa mga butang labot sa iyang kaugalingon, kondili sa personal nga interes usab sa uban.’ (Filipos 2:4) Kon ang mga membro sa Kristohanong kongregasyon magpadapat nianang tambaga, moresulta kinig maayo kaayong mga buhat sa kalulot. Pananglitan, ang usa ka pamilya nakaagom ug kalit, sunodsunod nga trahedya. Gikuyog sa amahan ang iyang batang babaye ngadto sa tindahan. Sa ilang pagpauli, naaksidente ang ilang sakyanan. Namatay ang batang babaye, ug grabe ang pagkaangol sa amahan. Sa iyang paggawas sa ospital, sa sinugdan hilabihan ang iyang pagkabaldado nga wala gani siyay mahimo para sa iyang kaugalingon. Ang iyang asawa nahugno pag-ayo nga tungod niana dili siya makaatiman sa iyang bana. Busa ang usa ka magtiayon diha sa kongregasyon nagdala niining nagbangotang magtiayon ngadto sa ilang panimalay ug nag-atiman kanila sulod sa daghang semana.

²² Siyempre, dili tanang buhat sa kalulot naglangkit ug sama nianang trahedya ug personal nga sakripisyo. Ang ubang tabang nga atong madawat ginagmay ra. Apan bisan unsa pa ka gamay ang maong kalulot, atong pabilhan kana, dili ba? Makahunahuna ka bag mga panahon sa dihang ang usa ka malulotong pulong o mahunahunaong buhat sa usa ka igsoon nakahatag sa tabang nga imo gayong gikinahanglan? Si Jehova subsob nga moatiman kanato nianang mga paagiha.—Proverbio 17:17; 18:24.

23. Sa unsang paagi lantawon kini ni Jehova sa dihang maningkamot kita sa pagtabang sa usag usa?

²³ Buot ba nimong gamiton ka ni Jehova sa pagtabang sa uban? Kanang pribilehiyoa bukas alang kanimo. Sa pagkatinuod, pabilhan ni Jehova ang imong paningkamot. Ang iyang Pulong nag-ingon: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.” (Proverbio 19:17) Ang dakong kalipay modangat gumikan sa paggamit sa atong kaugalingon alang sa atong mga kaigsoonan. (Buhat 20:35) Ang kalipay sa paghatag sa maong tabang o ang kadasig nga bation gumikan sa pagkadawat sa maong tabang dili gayod masinatian niadtong tinuyong nagalain sa ilang kaugalingon. (Proverbio 18:1) Busa, hinaot nga matinumanon kitang motambong sa Kristohanong mga tigom aron atong madasig ang usag usa.—Hebreohanon 10:24, 25.

24. Nganong dili kita angayng mobati nga nahikawan tungod kay wala kita makasaksi sa kahibulongang milagro ni Jehova kaniadto?

²⁴ Dili ba makapalipay ang pagpamalandong sa mga paagi diin si Jehova nagatabang kanato? Bisan tuod kita wala magkinabuhi sa panahon nga si Jehova naghimog kahibulongang mga milagro aron matuman ang iyang mga katuyoan, kita dili angayng mobating nahikawan. Ang labing hinungdanon mao nga si Jehova naghatag kanato sa tanang tabang nga atong gikinahanglan aron kita magpabiling matinumanon. Ug kon kita molahutay nga magkahiusa diha sa pagtuo, kita makakita sa labing talagsaon ug mahimayaon nga mga buhat sa tibuok kasaysayan! Magmadeterminado kita nga dawaton ug pahimuslan sa bug-os ang mahigugmaong tabang ni Jehova aron kita usab makaingon sama sa mga pulong sa atong teksto para sa tuig 2005: “Ang akong tabang nagagikan kang Jehova.”—Salmo 121:2.

Unsay Imong Hunahuna?

Sa unsang paagi si Jehova nagahatag sa tabang nga atong gikinahanglan karon—

• pinaagi sa mga manulonda?

• pinaagi sa iyang balaang espiritu?

• pinaagi sa iyang inspiradong Pulong?

• pinaagi sa mga isigkamagtutuo?

[Mga Pangutana sa Pagtuon]

[Hulagway sa panid 18]

Makapadasig ang pagkahibalo nga ang mga manulonda nagpaluyo sa buluhatong pagsangyaw

[Hulagway sa panid 21]

Mahimong gamiton ni Jehova ang usa sa atong mga isigkamagtutuo sa paghatag sa paghupay nga atong gikinahanglan