‘Nalipay Ako sa Akong Pagbansay’

WALA makatingog ang batan-on nga si Kazuna sa dihang giingnan siya sa iyang maestro nga paapilon siya sa bangga diin siya mopakigpulong sa Iningles. Ang maong bangga mahimong apilan sa tanang hayskul diha sa dakong amihanang isla sa Hokkaido, sa Japan, apan ang iyang eskuylahan wala pa sukad makapadala ug estudyante. Sa adlaw sa bangga, gikulbaan si Kazuna tungod kay makig-indigay man siya sa mga 50 ka uban pang mga estudyante. Misamot pa gayod ang iyang kakulba sa dihang iyang namatikdan ang duha ka huwes kansang lumad nga pinulongan mao ang Iningles.

Gipahibalo ang mga mananaog, nga nagsugod sa nakadaog sa kinaubsang ganti. Sa dihang sa kataposan ang ngalan ni Kazuna gitawag, hilabihan niyang kurata. Sa kahingangha, nagtinutokay siya ug ang iyang maestro nga naglingkod tupad niya. Nahingangha pa gihapon, miadto si Kazuna sa entablado ug gidawat ang iyang tropeyo—para sa unang ganti!

“Naposible lamang kini tungod sa pagbansay nga gihatag sa organisasyon ni Jehova pinaagi sa Teokratikanhong Tunghaan sa Ministeryo,” malipayong miingon si Kazuna. “Nalipay kaayo ako nga nakadawat sa maong pagbansay.” Ang maong eskuylahan, nga gisudlan ni Kazuna sukad pa sa iyang pagkabata, mao ang usa sa mga tigom sa kongregasyon sa mga Saksi ni Jehova. Sa pagpangandam sa maong bangga, gihatagan ni Kazuna ug linaing pagtagad ang paggamit sa mikropono, pagsulti nga may kainit ug kadasig, pagkompas, pagtan-aw sa mamiminaw, ug uban pang mga ulohan nga gitudlo sa Teokratikanhong Tunghaan sa Ministeryo.

Palihog dawata ang among imbitasyon sa pagtambong aron maobserbahan kining maong tunghaan nga gidumala matag semana diha sa lokal nga Kingdom Hall sa mga Saksi ni Jehova. Susiha mismo kon sa unsang paagi nakabenepisyo ang mga batan-on ug mga tigulang. Bukas ang maong tigom para sa publiko. Alang sa dugang impormasyon bahin sa kinadul-ang tunghaan sa imong balay, palihog kontaka ang mga Saksi ni Jehova sa imong dapit.