Nabansay sa Paghatag ug Bug-os nga Pagpamatuod
Nabansay sa Paghatag ug Bug-os nga Pagpamatuod
“Kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.”—BUHAT 1:8.
1, 2. Unsa ang gisugo kang Pedro, ug kinsay naghatag niana kaniya?
“SI Jesus nga taga-Nasaret . . . nagsugo kanamo nga magwali ngadto sa katawhan ug maghatag ug bug-os nga pamatuod nga kini Siya mao ang gitudlo sa Diyos nga mahimong maghuhukom sa mga buhi ug sa mga patay.” (Buhat 10:38, 42) Pinaagi nianang mga pulonga, gipatin-aw ni apostol Pedro kang Cornelio ug sa iyang pamilya ang sugo nga iyang nadawat ingong tig-ebanghelyo.
2 Kanus-a gihatag ni Jesus ang maong sugo? Lagmit, si Pedro naghunahuna sa giingon ni Jesus sa dayon na niyag saka sa langit. Nianang panahona, giingnan ni Jesus ang iyang matinumanong mga tinun-an: “Kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” (Buhat 1:8) Apan, pipila ka panahon una pa niana, nahibaloan ni Pedro nga ingong tinun-an ni Jesus, siya kinahanglang makigsulti sa uban bahin sa iyang pagtuo kang Jesus.
Tulo ka Tuig nga Pagbansay
3. Unsang milagro ang gihimo ni Jesus, ug unsang pagdapit ang iyang gitanyag kang Pedro ug Andres?
3 Pipila ka bulan human sa iyang bawtismo sa 29 K.P., si Jesus nagsangyaw diin si Pedro ug ang iyang igsoon nga si Andres nangisda diha sa Dagat sa Galilea. Nagbuntag silang nangisda apan walay nakuha. Bisan pa niana, giingnan sila ni Jesus: “Balhin kamo ngadto sa lawom, ug ilagak ninyo ang inyong pukot aron makakuha.” Sa dihang gihimo nila ang gisugo ni Jesus, “nasikop nila ang dakong duot sa isda. Gani, nagisi ang ilang mga pukot.” Sa pagkakita sa milagro, si Pedro giabot ug kahadlok, apan gihupay siya ni Jesus, nga nag-ingon: “Ayaw na kahadlok. Sukad karon mangisda ka na ug mga tawo nga buhi.”—Lucas 5:4-10.
4. (a) Sa unsang paagi giandam ni Jesus ang iyang mga tinun-an sa paghatag ug pamatuod? (b) Unsay kalainan sa ministeryo sa mga tinun-an ni Jesus ug sa iyang ministeryo?
4 Dihadiha, gibiyaan nila ni Pedro ug Andres—maingon man nila ni Santiago ug Juan, nga mga anak ni Zebedeo—ang ilang mga sakayan ug misunod kang Jesus. Sulod sa duolan sa tulo ka tuig, sila miuban kang Jesus sa iyang pagsangyaw ug gibansay aron mahimong mga tig-ebanghelyo. (Mateo 10:7; Marcos 1:16, 18, 20, 38; Lucas 4:43; 10:9) Sa kataposan nianang yugto sa pagbansay, sa Nisan 14, 33 K.P., giingnan sila ni Jesus: “Siya nga magpasundayag ug pagtuo kanako, siya maghimo usab sa mga buhat nga akong ginahimo; ug pagahimoon niya ang mga buhat nga labaw pa niini.” (Juan 14:12) Ang mga tinun-an ni Jesus mohatag ug bug-os nga pagpamatuod sama sa gibuhat ni Jesus apan sa mas dako nga sukod. Sa ilang nahibaloan sa wala madugay, sila ug ang tanang umaabot nga mga tinun-an magpamatuod “sa tanang kanasoran,” hangtod sa “kataposan sa sistema sa mga butang.”—Mateo 28:19, 20.
5. Sa unsang mga paagi makabenepisyo kita sa pagbansay ni Jesus sa iyang mga sumusunod?
5 Nagkinabuhi kita sa “kataposan sa sistema sa mga butang.” (Mateo 24:3) Dili sama niadtong unang mga tinun-an, dili kita makauban kang Jesus ug makapaniid kaniya nga magsangyaw sa mga tawo. Bisan pa niana, makabenepisyo kita gikan sa iyang pagbansay pinaagi sa pagbasa diha sa Bibliya kon sa unsang paagi siya nagsangyaw ug kon unsang mga instruksiyon ang iyang gihatag sa iyang mga sumusunod. (Lucas 10:1-11) Apan, kining artikuloha maghisgot ug laing hinungdanong butang nga gipasundayag ni Jesus sa iyang mga tinun-an—ang hustong tinamdan ngadto sa buluhatong pagsangyaw.
Kahingawa Para sa mga Tawo
6, 7. Unsang hiyas ni Jesus ang naghimo sa iyang ministeryo nga epektibo, ug sa unsang paagi masundog nato siya niining bahina?
6 Nganong epektibo kaayo ang pagpamatuod ni Jesus? Ang usa ka katarongan mao ang iyang dulot nga interes ug kahingawa sa mga tawo. Ang salmista nagtagna nga si Jesus “maluoy . . . sa timawa ug sa kabos.” (Salmo 72:13) Gituman gayod niya kanang tagnaa. Ang Bibliya nag-ingon bahin sa usa ka higayon: “Sa pagkakita sa mga panon sa katawhan siya naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mateo 9:36) Bisan ang grabeng mga makasasala nakamatikod sa iyang kahingawa ug nadani kaniya.—Mateo 9:9-13; Lucas 7:36-38; 19:1-10.
7 Kita karon mahimo usab nga epektibo kon kita magpakita sa samang kahingawa alang sa katawhan. Sa dili pa makig-ambit sa ministeryo, nganong dili mamalandong sa makadiyot kon unsa ka dinalian nga ang mga tawo nagkinahanglan sa impormasyon nga imong gidala kanila? Hunahunaa ang mga problema nga ila tingaling gisagubang nga Gingharian lamang ang makasulbad. Magmadeterminado nga maghupot ug positibong tinamdan sa tanan, tungod kay wala ka mahibalo kon kinsay mosanong sa mensahe. Tingali ang sunod nga tawo nga imong duolon nag-ampo nga dunay tawong sama kanimo nga moabot ug motabang kaniya!
Gipalihok sa Gugma
8. Agig pagsundog kang Jesus, unsa ang nagtukmod sa iyang mga sumusunod sa pagsangyaw sa maayong balita?
8 Ang maayong balita nga gipahayag ni Jesus adunay kalabotan sa katumanan sa kabubut-on ni Jehova, pagbalaan sa Iyang ngalan, ug pagbindikar sa Iyang pagkasoberano—ang labing hinungdanong mga isyu nga giatubang sa mga tawo. (Mateo 6:9, 10) Tungod kay iyang gihigugma ang iyang Amahan, si Jesus natukmod sa paghupot sa iyang integridad hangtod sa kataposan ug sa paghatag ug bug-os nga pagpamatuod bahin sa Gingharian, nga magsulbad nianang maong mga isyu. (Juan 14:31) Tungod kay ang mga sumusunod ni Jesus karon adunay susamang panukmod, sila makugihon samtang sila nakigbahin sa ministeryo. Si apostol Juan miingon: “Kini ang kahulogan sa paghigugma sa Diyos, nga atong bantayan ang iyang mga sugo,” lakip na ang sugo sa pagsangyaw sa maayong balita ug paghimog mga tinun-an.—1 Juan 5:3; Mateo 28:19, 20.
9, 10. Gawas sa gugma sa Diyos, unsang laing gugma ang magpalihok kanato sa paghatag ug bug-os nga pagpamatuod?
9 Giingnan ni Jesus ang iyang mga sumusunod: “Kon kamo nahigugma kanako, pagasundon ninyo ang akong mga sugo. Siya nga nakabaton sa akong mga sugo ug nagsunod niini, siya mao ang nahigugma kanako.” (Juan 14:15, 21) Busa, ang gugma kang Jesus angayng magtukmod kanato sa pagpamatuod bahin sa kamatuoran ug pagtuman sa ubang mga butang nga gisugo ni Jesus. Sa usa sa mga higayon nga siya nagpakita human sa iyang pagkabanhaw, giawhag ni Jesus si Pedro: “Pakan-a ang akong mga nating karnero. . . . Bantayi ang akong gagmayng mga karnero. . . . Pakan-a ang akong gagmayng mga karnero.” Unsay angay nga magtukmod kang Pedro sa pagbuhat niana? Gipakita ni Jesus ang tubag sa dihang sublisubli siyang nangutana kang Pedro: “Gihigugma mo ba ako? . . . Gihigugma mo ba ako? . . . Gimahal mo ba ako?” Oo, ang gugma ni Pedro kang Jesus, ang iyang pagmahal kaniya, magtukmod kaniya sa paghatag ug bug-os nga pagpamatuod, pagpangita sa “gagmayng mga karnero” ni Jesus, ug human niana siya mahimong espirituwal nga magbalantay nila.—Juan 21:15-17.
10 Karon, kita dili personal nga nasinati kang Jesus sama kang Pedro. Bisan pa niana, kita adunay halalom nga pagsabot sa gihimo ni Jesus alang kanato. Ang atong kasingkasing natukmod sa dakong gugma nga mitultol kaniya sa ‘pagtilaw ug kamatayon alang sa matag tawo.’ (Hebreohanon 2:9; Juan 15:13) Gibati usab nato ang gibati ni Pablo sa dihang siya misulat: “Ang gugma nga iya ni Kristo nagatukmod kanamo . . . Siya namatay alang sa tanan aron sila nga nagakinabuhi magkinabuhi dili na alang sa ilang kaugalingon, kondili alang kaniya.” (2 Corinto 5:14, 15) Atong gipasundayag nga gitamod gayod nato ang gugma ni Jesus alang kanato ug nga ato siyang gihigugma usab pinaagi sa kinasingkasing nga pagtuman sa sugo nga maghatag ug bug-os nga pagpamatuod. (1 Juan 2:3-5) Dili gayod nato isipon nga dili hinungdanon ang buluhatong pagsangyaw, nga daw gilantaw nato nga ang halad ni Kristo dili bililhon.—Hebreohanon 10:29.
Pagsentro sa Pagtagad Diha sa Hinungdanong Butang
11, 12. Sa unsang katuyoan nga si Jesus mianhi sa kalibotan, ug sa unsang paagi gisentro niya ang iyang pagtagad sa hinungdanong butang?
11 Sa dihang si Jesus miatubang kang Poncio Pilato, siya miingon: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.” (Juan 18:37) Wala tugoti ni Jesus ang bisan unsa nga makalinga kaniya gikan sa pagpamatuod sa kamatuoran. Mao kana ang kabubut-on sa Diyos alang kaniya.
12 Gisulayan gayod ni Satanas si Jesus niining bahina. Wala madugay human sa bawtismo ni Jesus, gitanyagan siya ni Satanas nga himoong dakong tawo diha sa kalibotan, nga ihatag kaniya ang “tanang gingharian sa kalibotan ug ang ilang himaya.” (Mateo 4:8, 9) Sa ulahi, gusto sa mga Hudiyo nga himoon siyang hari. (Juan 6:15) Ang uban maghunahuna tingali sa posibleng mga benepisyo sa pagdawat ni Jesus sa maong mga tanyag, tingali mangatarongan nga ingong tawhanong hari, dakog mahimo si Jesus alang sa kaayohan sa katawhan. Apan, gisalikway ni Jesus kanang matanga sa panghunahuna. Iyang gisentro ang iyang pagtagad sa pagpamatuod sa kamatuoran.
13, 14. (a) Unsay wala makalinga kang Jesus gikan sa iyang pangunang buluhaton? (b) Bisan tuod si Jesus kabos sa materyal, unsay iyang nalampos?
13 Gawas pa, si Jesus wala malinga sa pagpangagpas ug mga bahandi. Tungod niini, siya dili adunahan. Wala gani siyay balay. Sa usa ka higayon, siya miingon: “Ang mga irong ihalas adunay mga lungib ug ang mga langgam sa langit adunay mga batoganan, apan ang Anak sa tawo walay dapit nga kapahilunaan sa iyang ulo.” (Mateo 8:20) Sa dihang namatay si Jesus, ang bugtong nasulat nga bililhong butang nga iyang gipanag-iya mao ang besti nga giripahan sa Romanong mga sundalo. (Juan 19:23, 24) Nan, pakyas ba ang kinabuhi ni Jesus? Dili gayod!
14 Mas dakog nalampos si Jesus kay sa labing adunahan nga pilantropo. Si Pablo miingon: “Inyong nahibaloan ang dili-takos nga kalulot sa atong Ginoong Jesu-Kristo, nga bisan tuod siya dato siya nahimong kabos tungod kaninyo, aron kamo mahimong dato pinaagi sa iyang kakabos.” (2 Corinto 8:9; Filipos 2:5-8) Bisan tuod kabos sa materyal, gibuksan ni Jesus ang kahigayonan alang sa mapaubsanong mga tawo nga makatagamtam ug kinabuhing walay kataposan diha sa kahingpitan. Pagkamapasalamaton nato kaniya! Ug nagmaya gayod kita sa ganti nga iyang nadawat tungod kay iyang gisentro ang pagtagad nganha sa pagtuman sa kabubut-on sa Diyos!—Salmo 40:8; Buhat 2:32, 33, 36.
15. Unsay mas bililhon pa kay sa bahandi?
15 Ang mga Kristohanon karon nga nanglimbasog sa pagsundog kang Jesus wala usab magpalinga sa pagpangagpas ug bahandi. (1 Timoteo 6:9, 10) Ilang giila nga ang mga bahandi makapaharuhay sa kinabuhi, apan nahibalo sila nga ang bahandi dili makahatag kanila ug walay-kataposang kaugmaon. Inigkamatay sa usa ka Kristohanon, ang iyang materyal nga bahandi wala nay bili kaniya sama ra nga ang besti ni Jesus wala nay bili kaniya sa dihang siya namatay. (Ecclesiastes 2:10, 11, 17-19; 7:12) Sa dihang mamatay ang usa ka Kristohanon, ang iyang naangkon nga tinuod nga bililhon mao lamang ang iyang relasyon kang Jehova ug kang Jesu-Kristo.—Mateo 6:19-21; Lucas 16:9.
Wala Mababagi sa Pagsupak
16. Sa unsang paagi giatubang ni Jesus ang pagsupak?
16 Ang pagsupak wala makalinga kang Jesus gikan sa pagpamatuod sa kamatuoran. Bisan ang pagkahibalo nga ang iyang yutan-ong ministeryo matapos sa usa ka haladnong kamatayon wala magpaluya kaniya. Bahin kang Jesus, si Pablo miingon: “Tungod sa kalipay nga gibutang sa iyang atubangan [giantos niya ang] estaka sa pagsakit, nga wala igsapayan ang kaulaw, ug milingkod sa tuong kamot sa trono sa Diyos.” (Hebreohanon 12:2) Matikdi nga ‘wala igsapayan ni Jesus ang kaulaw.’ Wala siya mabalaka kon unsay hunahuna sa iyang mga kaaway kaniya. Wala siya malinga gikan sa pagtuman sa kabubut-on sa Diyos.
17. Unsay atong makat-onan gikan sa pagkamalahutayon ni Jesus?
17 Sa pagpadapat sa leksiyon bahin sa pagkamalahutayon ni Jesus, gidasig ni Pablo ang mga Kristohanon: “Tagda pag-ayo ang usa nga nakaantos sa mga pagsupak sa mga makasasala batok sa ilang kaayohan, aron dili kamo kapoyon ug mangaluya ang inyong mga kalag.” (Hebreohanon 12:3) Tinuod, makapaluya ang pag-atubang kanunay ug pagsupak o pagbugalbugal. Makapakapoy ang pagsigeg pakigbisog sa mga panghaylo sa kalibotan, tingali makapahigawad sa mga paryente kinsa nagdasig kanato nga mahimong malamposon nga mga tawo. Apan, sama kang Jesus kita mangayog tabang kang Jehova samtang kita determinadong mag-una sa Gingharian diha sa atong kinabuhi.—Mateo 6:33; Roma 15:13; 1 Corinto 2:4.
18. Unsang maayong leksiyon ang atong makat-onan gikan sa giingon ni Jesus kang Pedro?
18 Ang pagdumili ni Jesus nga malinga gipasundayag sa dihang gisuginlan niya ang iyang mga tinun-an bahin sa iyang nagsingabot nga kamatayon. Giawhag ni Pedro si Jesus nga “magmaluloton” sa iyang kaugalingon ug gipasaligan siya nga ‘dili mahitabo kini nga dulnganan.’ Si Jesus wala mamati sa bisan unsa nga makapahuyang sa iyang determinasyon sa pagtuman sa kabubut-on ni Jehova. Siya mitalikod kang Pedro ug miingon: “Magpalikod ka kanako, Satanas! Ikaw maoy kapandolan kanako, tungod kay ikaw naghunahuna, dili sa mga hunahuna sa Diyos, kondili nianang sa mga tawo.” (Mateo 16:21-23) Hinaot magmadeterminado usab kita sa pagsalikway sa mga hunahuna sa mga tawo. Hinunoa, magpagiya kita kanunay sa mga hunahuna sa Diyos.
Magdala ug Tinuod nga mga Benepisyo
19. Bisan tuod naghimo siyag daghang milagro, unsa ang labing hinungdanong bahin sa ministeryo ni Jesus?
19 Si Jesus naghimog daghang milagro sa pagpasundayag nga siya mao ang Mesiyas. Gibanhaw gani niya ang mga patay. Ang maong mga buhat nakadani sa panon sa katawhan, apan si Jesus wala moanhi sa yuta aron lamang mohimog katilingbanong buluhaton. Siya mianhi aron sa pagpamatuod sa kamatuoran. Siya nahibalo nga ang bisan unsang materyal nga mga benepisyo nga iyang gitagana temporaryo lamang. Bisan ang iyang mga gipamanhaw nangamatay pag-usab. Pinaagi lamang sa pagpamatuod sa kamatuoran nga makatabang siya sa pipila nga makabaton ug walay-kataposang kinabuhi.—Lucas 18:28-30.
20, 21. Sa unsang paagi mahuptan sa tinuod nga mga Kristohanon ang ilang pagkatimbang maylabot sa maayong mga buhat?
20 Karon, ang ubang mga tawo misulay sa pagsundog sa maayong mga buhat ni Jesus pinaagi sa pagtukod ug mga ospital o paghimog ubang mga serbisyo alang sa mga kabos sa kalibotan. Sa pipila ka kaso, dako kaayo ang ilang gibugti niini, ug dalayegon ang ilang sinseridad; apan ang bisan unsang kahupayan nga ilang gihatag temporaryo lamang. Ang Gingharian lamang ang magdala ug dumalayong kahupayan. Busa, ang mga Saksi ni Jehova naghatag ug dakong pagtagad sa pagpamatuod sa kamatuoran bahin nianang maong Gingharian, sama sa gibuhat ni Jesus.
21 Siyempre, ang matuod nga mga Kristohanon naghimog maayong mga buhat. Si Pablo misulat: “Samtang kita may kahigayonan alang niini, buhaton nato ang maayo ngadto sa tanan, apan ilabina kanila nga atong kabanay sa pagtuo.” (Galacia 6:10) Sa panahon sa krisis o sa dihang dunay nanginahanglan, dili kita magpanuko sa ‘pagbuhat ug maayo’ sa atong mga silingan o sa atong Kristohanong mga igsoon. Bisan pa niana, atong isentro ang atong pagtagad diha sa pagpamatuod sa kamatuoran.
Pagkat-on Gikan sa Ehemplo ni Jesus
22. Nganong ang mga Kristohanon mosangyaw sa ilang mga silingan?
22 Si Pablo misulat: “Sa pagkatinuod, alaot ako kon dili ko ipahayag ang maayong balita!” (1 Corinto 9:16) Wala niya isipang dili bililhon ang maayong balita tungod kay ang pagwali niini nagpasabot ug kinabuhi alang kaniya ug sa nagpatalinghog kaniya. (1 Timoteo 4:16) Lantawon usab nato ang atong ministeryo sa samang paagi. Gusto natong tabangan ang atong mga silingan. Gusto natong ipakita ang atong gugma kang Jehova. Gusto natong pamatud-an ang atong gugma alang kang Jesus ug ang atong pagpabili sa iyang dakong gugma kanato. Busa, kita magwali sa maayong balita ug sa ingon magkinabuhi “dili na alang sa mga tinguha sa mga tawo, kondili alang sa kabubut-on sa Diyos.”—1 Pedro 4:1, 2.
23, 24. (a) Unsang leksiyon ang atong makat-onan gikan sa milagro labot sa isda? (b) Kinsa karon ang naghatag ug bug-os nga pagpamatuod?
23 Sama kang Jesus, dili kita malinga kon ang uban magbugalbugal kanato o masuk-anong magsalikway sa atong mensahe. Duna kitay makat-onang leksiyon gikan sa milagro nga gihimo ni Jesus sa dihang iyang gitawag sila si Pedro ug Andres aron mosunod kaniya. Atong nasabtan nga kon kita mosugot kang Jesus ug, ingnon ta, motaktak sa atong pukot bisan diha sa morag walay isda nga katubigan, mahimong makakuha kitag isda. Daghang Kristohanon nga mga mangingisda ang nakakuhag dakong duot sa isda human sa daghang tuig nga pagpangisda diha sa morag walay isda nga katubigan. Ang uban nakahimo sa pagbalhin diin mas daghan ang mga isda ug nakakuha ug daghan didto. Bisan unsay atong buhaton, dili gayod kita mohunong sa pagtaktak sa atong mga pukot. Kita nahibalo nga wala pa moingon si Jesus nga natapos na ang buluhatong pagsangyaw sa bisan diing bahin sa yuta.—Mateo 24:14.
24 Kapin sa unom ka milyong Saksi ni Jehova ang puliki karon diha sa kapin sa 230 ka kayutaan. Diha sa Pebrero 1, 2005 nga gula sa Ang Bantayanang Torre ipatik ang tinuig nga tibuok-kalibotang taho sa ilang kalihokan sa 2004 nga tuig sa pag-alagad. Ang maong taho magpasundayag sa dagayang pagpanalangin ni Jehova sa buluhatong pagsangyaw. Sa panahon nga nabilin niining sistemaha sa mga butang, hinaot magpadayon kita sa paghatag ug pagtagad sa makapukaw nga mga pulong ni Pablo: “Iwali ang pulong, magmadali diha niini.” (2 Timoteo 4:2) Hinaot magpadayon kita sa paghatag ug bug-os nga pagpamatuod hangtod moingon si Jehova nga natapos na ang buluhaton.
Sugod niining tuiga, ang Tuig sa Pag-alagad nga Taho sa mga Saksi ni Jehova sa Tibuok Kalibotan dili na makita diha sa Enero 1 nga gula sa Ang Bantayanang Torre. Hinunoa, kini ipatik diha sa Pebrero 1 nga gula.
Makatubag Ka Ba?
• Sa unsang paagi kita makabenepisyo sa pagbansay ni Jesus sa iyang mga tinun-an?
• Unsay tinamdan ni Jesus ngadto sa mga tawo nga iyang gisangyawan?
• Unsay nagpalihok kanato sa paghatag ug bug-os nga pagpamatuod?
• Sa unsang mga paagi ikasentro nato ang atong pagtagad sa pagtuman sa kabubut-on sa Diyos, sama sa gibuhat ni Jesus?
[Mga Pangutana sa Pagtuon]
[Hulagway sa panid 15]
Kita mahimo usab nga epektibo sa atong ministeryo kon kita magpakita ug kahingawa sa mga tawo sama sa gipakita ni Jesus
[Hulagway sa panid 16, 17]
Si Jesus mianhi sa yuta sa panguna aron sa pagpamatuod sa kamatuoran
[Mga hulagway sa panid 17]
Ang mga Saksi ni Jehova nagsentro sa pagtagad diha sa paghatag ug bug-os nga pagpamatuod