Nahiusa Pinaagi sa Gugma sa Diyos

SA DIHANG natukod ang Kristohanong kongregasyon sa unang siglo sa atong Komong Panahon, usa sa talagsaong mga kinaiyahan niini—bisan pag nagkalainlain ang mga membro niini—mao ang panaghiusa. Ang maong mga magsisimba sa matuod nga Diyos naggikan sa mga nasod sa Asia, Uropa, ug Aprika. Nagkalainlain ang ilang mga kagikan—mga saserdote, sundalo, ulipon, kagiw, artesano, propesyonal, ug mga negosyante. Ang uban mga Hudiyo, ug ang uban, mga Hentil. Daghan kanila mga mananapaw, homoseksuwal, palahubog, kawatan, o mangingilkil kanhi. Bisan pa niana, sa dihang nahimo silang mga Kristohanon, ilang gitalikdan ang ilang daotang mga binuhatan ug nahimong suod nga nagkahiusa diha sa pagtuo.

Unsay nakapaarang sa unang-siglong Kristiyanidad sa paghiusa niining tanang katawhan? Nganong sila adunay pakigdait sa usag usa ug sa katawhan sa katibuk-an? Nganong sila wala moapil sa mga rebelyon ug mga panag-away? Nganong ang unang Kristiyanidad lahi man kaayo sa dagkong mga relihiyon karon?

Unsay Nakapahiusa sa mga Membro sa Kongregasyon?

Ang pangunang hinungdan nga nagkahiusa ang mga isigkamagsisimba sa unang siglo mao ang ilang gugma sa Diyos. Giila sa maong mga Kristohanon ang ilang pangunang obligasyon sa paghigugma sa matuod nga Diyos, si Jehova, uban sa tibuok nilang kasingkasing, kalag, ug hunahuna. Pananglitan, gisugo si apostol Pedro, nga usa ka Hudiyo, sa pagduaw sa panimalay sa usa ka  langyaw, usa ka tawo nga sagad dili siya makigsuod. Sa panguna, ang nagtukmod kaniya sa pagsugot mao ang gugma kang Jehova. Si Pedro ug ang uban pang unang mga Kristohanon nagtagamtam ug suod nga relasyon uban sa Diyos nga gipasukad sa tukmang kahibalo sa Iyang personalidad, mga gusto, ug mga dili gusto. Sa ngadtongadto, nasabtan sa tanang magsisimba nga kabubut-on ni Jehova nga sila “magkahiusa sa samang kaisipan ug sa samang panghunahuna.”—1 Corinto 1:10; Mateo 22:37; Buhat 10:1-35.

Ang mga magtutuo nagkahiusa pa gayod pinaagi sa ilang pagtuo kang Jesu-Kristo. Buot nilang sundon pag-ayo ang iyang mga lakang. Siya nagsugo kanila: “Maghigugmaay [kamo] sa usag usa; ingon sa akong paghigugma kaninyo . . . Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:34, 35) Kini angayng usa ka nagasakripisyo-sa-kaugalingon nga gugma, dili lumalabay lamang nga emosyon. Unsay mahimong resulta niini? Si Jesus nag-ampo mahitungod niadtong nagbaton ug pagtuo kaniya: “Naghangyo ako . . . nga silang tanan mahimong usa, ingon nga ikaw, Amahan, nahiusa kanako ug ako nahiusa kanimo, nga sila usab mahiusa unta kanato.”—Juan 17:20, 21; 1 Pedro 2:21.

Gibubo ni Jehova ang iyang balaang espiritu, o aktibong puwersa, nganha sa iyang tinuod nga mga alagad. Pinaagi ning maong espiritu milambo ang panaghiusa sa ilang taliwala. Pinaagi niini nasabtan nila ang mga pagtulon-an sa Bibliya nga gidawat sa tanang kongregasyon. Ang mga magsisimba ni Jehova nagwali usab sa mao gihapong mensahe—ang pagbalaan sa ngalan ni Jehova pinaagi sa Mesiyanikong Gingharian sa Diyos, nga usa ka langitnong kagamhanan nga momando ibabaw sa tanang katawhan. Nasabtan sa unang mga Kristohanon ang ilang obligasyon nga mahimong “dili bahin niining kalibotana.” Busa, kon adunay motunghang mga sibil nga pag-alsa o militaryong panag-away, ang mga Kristohanon nagpabiling neyutral. Gitinguha nila nga makigdait sa tanang tawo.—Juan 14:26; 18:36; Mateo 6:9, 10; Buhat 2:1-4; Roma 12:17-21.

Gidawat sa tanang magtutuo ang ilang responsabilidad sa pagpalambo sa panaghiusa. Sa unsang paagi? Pinaagi sa pagseguro nga ang ilang panggawi nahiuyon sa Bibliya. Busa, si apostol Pablo nagsulat ngadto sa mga Kristohanon: “[Hukasa] ang daan nga pagkatawo nga nahiuyon sa kanhi ninyong paagi sa panggawi,” ug “[isul-ob ang] bag-ong pagkatawo.”—Efeso 4:22-32.

Nahuptan ang Panaghiusa

Siyempre, ang mga magtutuo sa unang siglo dili hingpit, ug dihay mga kahimtang nga nagpameligro sa ilang panaghiusa. Pananglitan, gihubit sa Buhat 6:1-6 nga mitungha ang panagbangi tali sa Hudiyong mga Kristohanon nga nagsultig Grego ug sa nagsultig Hebreohanon. Kadtong nagsultig Grego nagtuo nga sila gipihig. Apan, sa dihang gipahibalo ang mga apostoles bahin niini, kini gihusay gilayon ug sa makataronganong paagi. Sa ulahi, ang usa ka isyu labot sa doktrina misangpot sa panaglantugi mahitungod sa mga obligasyon sa mga dili-Hudiyo diha sa Kristohanong kongregasyon. Nakab-ot ang usa ka desisyon nga gipasukad sa mga prinsipyo sa Bibliya, ug ang maong desisyon gidawat sa tanan.—Buhat 15:1-29.

Kining maong mga pananglitan nagpakita nga ang mga dili-pagsinabtanay wala moresulta sa etnikong pagkabahinbahin o kawalay-panaghiusa tungod sa estriktong pagsunod sa pipila ka doktrinal nga panglantaw diha sa unang-siglo nga Kristohanong kongregasyon. Nganong wala man? Tungod kay ang makapahiusang mga hinungdan—gugma alang kang Jehova, pagtuo kang Jesu-Kristo, nagasakripisyo-sa-kaugalingong gugma alang sa usag usa, pagdawat sa giya sa balaang espiritu, gikauyonang pagsabot sa mga pagtulon-an  sa Bibliya, ug ang pagkaandam sa pagbag-o sa panggawi sa usa—kusganon kaayo mao nga ang unang kongregasyon nagkahiusa ug malinawon.

Nagkahiusa sa Pagsimba sa Modernong mga Panahon

Makab-ot ba ang samang panaghiusa karon? Ang mao gihapong mga hinungdan makapahiusa ba gihapon sa mga membro sa samang relihiyon ug makapaarang ba gihapon kanila nga makigdait sa tanang rasa sa tibuok kalibotan? Oo! Ang mga Saksi ni Jehova nagkahiusa diha sa tibuok-kalibotang panag-igsoonay nga milukop sa kapin sa 230 ka kayutaan, mga isla, ug mga teritoryo. Ug sila nagkahiusa tungod sa mao ra gihapong mga hinungdan nga nakapahiusa sa mga Kristohanon sa unang siglo.

Ang pangunang makapahiusang hinungdan nga naeksperyensiyahan sa mga Saksi ni Jehova mao ang ilang debosyon ngadto kang Jehova nga Diyos. Nagkahulogan kini nga sila naningkamot nga magmaunongon kaniya ilalom sa tanang kahimtang. Ang mga Saksi ni Jehova nagbaton usab ug pagtuo kang Jesu-Kristo ug sa iyang mga pagtulon-an. Kining maong mga Kristohanon nagpakitag nagasakripisyo-sa-kaugalingong gugma alang sa mga isigkamagtutuo ug nagwali sa mao ra gihapong maayong balita sa Gingharian sa Diyos diha sa tanang kanasoran diin sila aktibong nagasangyaw. Malipay sila nga makig-estorya bahin niining Ginghariana uban sa mga tawo sa tanang relihiyon, rasa, nasyonalidad, ug sa tanang hut-ong sa katilingban. Ang mga Saksi ni Jehova nagpabilin usab nga neyutral sa mga kalihokan sa kalibotan, nga mitabang kanila nga masuklan ang politikal, kultural, sosyal, ug komersiyal nga mga pagpit-os nga nakapabahin pag-ayo sa katawhan. Gidawat sa tanang Saksi ang ilang obligasyon sa pagpalambo sa panaghiusa pinaagi sa paggawi mismo nga nahiuyon sa mga sukdanan sa Bibliya.

Ang Panaghiusa Makadani sa Uban

Kini nga panaghiusa subsob nga nakapukaw sa interes sa mga tawo nga dili mga Saksi. Pananglitan, si Ilse a maoy usa ka Katolikong madre kanhi sa usa ka kombento sa Alemanya. Unsay nakapadani kaniya sa mga Saksi ni Jehova? Si Ilse miingon: “Sila mao ang kinamaayohang mga tawo nga akong nahimamat sukad. Sila dili makiggubat; sila dili gayod mohimog kadaot kang bisan kinsa. Buot nilang tabangan ang mga tawo nga magkinabuhing malipayon diha sa usa ka paraisong yuta ilalom sa Gingharian sa Diyos.”

Ang laing pananglitan mao si Günther, kinsa usa ka sundalong Aleman kanhi nga gipadala ngadto sa Pransiya panahon sa ikaduhang gubat sa kalibotan. Usa ka adlaw niana dihay Protestanteng pari nga nagmisa para sa mga sundalo sa grupo ni Günther. Ang maong pari nag-ampo alang sa tabang, panalipod, ug kadaogan. Human sa maong misa, giasayn si Günther ingong tigbantay. Pinaagi sa iyang teleskopyo, iyang nakita ang kaaway nga mga tropa sa laing kiliran sa panggubatan nga mitambong usab sa misa nga gidumala sa usa ka pari. Sa ulahi si Günther miingon: “Lagmit kadtong paria nag-ampo usab alang sa tabang, panalipod, ug kadaogan. Naglibog ko kon nganong ang Kristohanong mga iglesya maggubatay man sa usag usa.” Kining maong mga panghunahuna natisok pag-ayo sa panumdoman ni Günther. Sa ulahi, sa dihang iyang nahibalag ang mga Saksi ni Jehova, kinsa dili makigbahin sa gubat, si Günther nahimong bahin sa ilang tibuok-kalibotang panag-igsoonay.

Si Ashok ug Feema parehong membro sa usa ka relihiyon sa Sidlakan. Sa ilang balay, sila adunay altar alang sa usa ka diyos. Sa dihang ang ilang pamilya nag-antos sa usa ka grabeng sakit, ilang gisusi pag-usab ang ilang relihiyon. Sa ilang pagpakig-estorya sa mga Saksi ni Jehova, nakadayeg si Ashok ug Feema sa mga pagtulon-an sa Bibliya ug sa gugma nga naglungtad taliwala sa mga Saksi. Sila karon masiboton nang mga magmamantala sa maayong balita sa Gingharian ni Jehova.

Sila si Ilse, Günther, Ashok, ug Feema nahiusa uban sa milyonmilyong mga Saksi ni Jehova diha sa tibuok-kalibotang panag-igsoonay. Sila nagtuo sa saad sa Bibliya nga ang samang mga hinungdan nga nakapahiusa kanila sa pagsimba karon sa dili madugay makapahiusa sa tanang masinugtanong katawhan. Unya, wala nay makalilisang nga mga buhat, pagkabahinbahin, ug kalainan sa ngalan sa relihiyon. Ang tibuok kalibotan mahiusa na unya sa pagsimba sa matuod nga Diyos, si Jehova.—Pinadayag 21:4, 5.

[Footnote]

[Mga hulagway sa panid 4, 5]

Bisan pag lainlain ug mga kagikan, ang unang mga Kristohanon nagkahiusa