Mga Pangutana Gikan sa mga Magbabasa

Sa unsang paagi si Samson nagpabiling usa ka Nazareo bisag nakahikap siya sa patayng mga lawas sa iyang gipamatay?

Sa karaang Israel, ang usa ka tawo makaboluntaryo sa paghimog panaad ug mahimong usa ka Nazareo sulod sa usa ka tinong gidugayon. a Ang usa sa mga restriksiyon nga kinahanglang likayan sa usa nga naghimo sa maong panaad nagbaod: “Sa tanang adlaw sa iyang pagpabiling bulag alang kang Jehova siya dili makaduol sa bisan unsang patay nga kalag. Bisan tungod sa iyang amahan o sa iyang inahan o sa iyang igsoong lalaki o sa iyang igsoong babaye siya dili mahimong maghugaw sa iyang kaugalingon sa dihang sila mamatay.” Apan komosta man kon adunay “kalit nga mamatay tupad kaniya”? Madaot ang iyang pagka-Nazareo tungod sa maong dili-tinuyo nga paghikap. Busa, mao kiniy giingon: “Ang unang mga adlaw dili maihap.” Kinahanglan niyang sundon ang seremonyas sa paglunsay ug magsugod na usab sa yugto sa pagka-Nazareo.—Numeros 6:6-12.

Buweno, si Samson maoy usa ka Nazareo sa lahi nga diwa. Sa wala pa matawo si Samson, giingnan sa manulonda ni Jehova ang iyang inahan: “Tan-awa! ikaw magmabdos, ug manganak ug usa ka anak nga lalaki, ug walay labaha nga modapat sa iyang ulo, tungod kay ang bata mahimong usa ka Nazareo sa Diyos iniggula sa tiyan; ug siya ang manguna sa pagluwas sa Israel gikan sa kamot sa mga Filistehanon.” (Maghuhukom 13:5) Si Samson walay gihimong panaad sa pagka-Nazareo. Ang Diyos maoy nagtudlo kaniya nga mahimong usa ka Nazareo, ug siya mahimong Nazareo sa tibuok niyang kinabuhi. Ang restriksiyon batok sa paghikap ug patayng lawas dili mapadapat sa iyang kahimtang. Kay kon mao pa ug siya wala-tuyoang nakahikap ug patayng lawas, sa unsang paagi siya makasugod pag-usab ug tibuok-kinabuhing pagka-Nazareo nga nagsugod sukad sa iyang pagkahimugso? Nan, dayag nga ang mga kinahanglanon para sa tibuok-kinabuhing mga Nazareo lahi sa pipila ka paagi kon itandi niadtong boluntaryong mga Nazareo.

Tagda ang mga sugo ni Jehova ngadto sa tulo ka tibuok-kinabuhing mga Nazareo—si Samson, Samuel, ug Juan Bawtista—nga gihisgotan sa Bibliya. Sama sa nahisgotan na ganina, si Samson gibaoran nga dili niya putlan ang buhok sa iyang ulo. Maylabot sa iyang isamkon pa nga anak—si Samuel—si Ana nanaad: “Akong ihatag siya kang Jehova sa tanang adlaw sa iyang kinabuhi, ug walay labaha nga modapat sa iyang ulo.” (1 Samuel 1:11) Maylabot kang Juan Bawtista, ang manulonda ni Jehova nag-ingon: “Dili gayod siya moinom ug bino ug ilimnong maisog.” (Lucas 1:15) Gawas pa, “si Juan may besti nga balhibo sa kamelyo ug bakos nga panit sa iyang hawak; ang iyang pagkaon usab maoy mga  dulon ug dugos nga ihalas.” (Mateo 3:4) Walay usa kanilang tulo ang gibaoran nga dili paduolon sa usa ka patayng lawas.

Bisan tuod usa ka Nazareo, si Samson maoy usa sa mga maghuhukom nga gipatungha ni Jehova aron sa pagluwas sa mga Israelinhon gikan sa kamot sa mga mangingilog. (Maghuhukom 2:16) Ug sa pagtuman niya sa maong sugo, siya nakahikap ug patayng mga lawas. Sa usa ka higayon, gipatay ni Samson ang 30 ka Filistehanon ug gihukasan sila sa ilang mga besti. Sa ulahi, gipamatay niya ang iyang mga kaaway, nga “gipundok ang mga bitiis ibabaw sa mga paa uban ang dakong pagpamatay.” Mikuha usab siyag basabasa nga apapangig sa laking asno ug gipatay ang usa ka libo ka tawo pinaagi niini. (Maghuhukom 14:19; 15:8, 15) Gihimo ni Samson kanang tanan uban sa pag-uyon ug pagpaluyo ni Jehova. Ang Kasulatan naghisgot kaniya ingong usa ka tawo nga maayog panig-ingnan sa pagtuo.—Hebreohanon 11:32; 12:1.

Ang pahayag ba nga gipikas ni Samson ang usa ka leyon “ingon sa pagpikas sa usa ka tawo sa usa ka laking nating kanding sa duha ka bahin” nagpasabot nga ang pagpikas ug mga nating kanding maoy naandang buhat sa iyang adlaw?

Walay pamatuod nga sa panahon sa mga Maghuhukom sa Israel, naandan na sa mga tawo ang pagpikas ug mga nating kanding. Ang Maghuhukom 14:6 nag-ingon: “Ang espiritu ni Jehova milihok diha [kang Samson], mao nga kini [usa ka may-lambungay nga nating leyon] iyang gipikas sa duha ka bahin, ingon sa pagpikas sa usa ka tawo sa usa ka laking nating kanding sa duha ka bahin, ug walay bisan unsa gayod nga diha sa iyang kamot.” Kining komentoha lagmit usa ka pagtandi lamang.

Ang ekspresyon nga “kini iyang gipikas sa duha ka bahin” mahimong adunay duha ka kahulogan. Mahimong gipikas ni Samson ang mga apapangig sa leyon o gibalibali niya ang mga bukton o tiil sa leyon sa usa ka paagi. Kon ang una mao ang kahulogan, nan ang paghimo niana ngadto sa usa ka nating kanding maoy usa ka butang nga sayon lang himoon sa tawo. Niining kahimtanga, ang maong kasamahan nag-ilustrar nga ang pagpatay ug leyon pinaagi lamang sa iyang mga kamot maoy sama lang ka sayon sa pagpatay ug usa ka nating kanding alang kang Samson. Apan, komosta na man kon gipatay ni Samson ang leyon pinaagig pagbalibali sa mga bukton o tiil niini? Nan ang maong komento angayng sabton ingong usa lamang ka pagtandi. Ang punto sa maong pagtandi mao nga ang espiritu ni Jehova naghatag ug gahom kang Samson aron mahimo ang usa ka buluhaton nga nagkinahanglag talagsaong pisikal nga kusog. Sa bisan haing kahimtang, ang pagtandi nga gihubit diha sa Maghuhukom 14:6 nag-ilustrar nga tungod sa tabang ni Jehova, ang usa ka gamhanang leyon dili mabangis alang kang Samson maingon nga ang usa ka laking nating kanding dili mabangis alang sa usa ka ordinaryong tawo.

[Footnote]