“Ang Akong Tabang Nagagikan Kang Jehova”

Sa Dihang ang Pagkatigulang Mahimong “Usa ka Purongpurong sa Katahom”

“ANG kinamaayohang kinabuhi nga mapahimuslan,” nag-ingon ang 101-anyos nga si Muriel. “Usa gayod ka pribilehiyo!” matod pa sa 70-anyos nga si Theodoros. “Kini ang labing maayong paagi sa paggamit nako sa akong kinabuhi,” nag-ingon si Maria nga nag-edad ug 73 anyos. Silang tanan nakagugol sa tibuok nilang kinabuhi sa pag-alagad kang Jehova nga Diyos.

Ang maong mga tigulang kasagarang makita diha sa daghang aktibong mga magsisimba ni Jehova sa tibuok kalibotan. Bisan pa sa ilang katigulangon, mga sakit, ug uban pang malisod nga mga kahimtang, sila nag-alagad gihapon sa Diyos nga tibuok kalag. Diha sa Kristohanong kongregasyon, ang maong matinumanong mga tigulang maoy tinahod nga mga panig-ingnan sa diyosnong pagkamahinalaron. Gipabilhan pag-ayo ni Jehova ang pag-alagad sa mga tigulang, bisan pag sila gilimitehan na sa ilang mga kahimtang. a—2 Corinto 8:12.

Ang basahon sa Mga Salmo naghatag ug haom nga obserbasyon bahin sa kalidad sa kinabuhi nga madahom sa matinumanong mga tigulang. Sila mahisama sa karaan ug dako nga kahoy nga kanunayng mamunga. Mahitungod sa matinumanong mga tigulang, ang salmista miawit: “Sila magpadayon pa gihapon sa paglipang panahon sa ilang pagkaubanon, sila magpabiling tambok ug lunhaw.”—Salmo 92:14.

Ang uban mahadlok nga basin sila isalikway ug dili na tagdon sa dihang sila maluya na tungod sa pagkatigulang. Si David nangaliyupo sa Diyos: “Ayaw ako isalikway sa panahon sa akong pagkatigulang; sa diha nga ang akong kusog maluya na, ayaw ako pagbiyai.” (Salmo 71:9) Unsay motabang kanato aron molipang panahon sa pagkatigulang inay maluya? Ang diyosnong hiyas sa pagkamatarong. “Ang matarong molambo sama sa kahoyng palma,” miawit ang salmista.—Salmo 92:12.

Kadtong kansang mga kinabuhi gigugol sa matinumanong pag-alagad sa Diyos dakog kalagmitan nga padayong mamunga ug maayong bunga sa dihang sila tigulang na. Sa pagkatinuod, daghan sa mga binhi nga ilang natisok sa kaugalingon nilang kinabuhi o diha sa uban moturok ug mogulang nga mopatunghag dagayang ani. (Galacia 6:7-10; Colosas 1:10) Siyempre, ang mga tawo nga nag-usik-usik sa ilang kinabuhi diha sa hakog nga mga pangagpas nga nagsalikway sa mga dalan sa Diyos sagad diyutay lamang ug bililhong mga butang sa dihang sila matigulang na.

Ang pagkamatarong ingong dayandayan sa pagkatigulang gipasiugda usab diha sa basahon sa Bibliya sa Proverbio. Didto atong mabasa: “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” (Proverbio 16:31) Oo, ang pagkamatarong maoy usa ka pagpasundayag sa pangsulod nga katahom. Maangkon nimo ang pagtahod pinaagi sa pagsubay sa matarong nga dalan panahon sa taas nga kinabuhi. (Levitico 19:32) Ang pagkaubanon sa dihang inubanan sa kaalam ug kaligdong moresulta sa kadungganan.—Job 12:12.

Makapahimuot gayod kang Jehova ang matul-id nga pagkinabuhi nga gigamit sa pag-alagad kaniya. Ang Kasulatan nag-ingon: “Bisan hangtod sa pagkatigulang sa usa ako [si Jehova] mao gihapon Siya; ug hangtod sa pagkaubanon sa usa ako magpadayon sa pagpas-an. Ako molihok gayod, aron ako magdala ug aron ako magpas-an ug maghatag ug kaikyasan.” (Isaias 46:4) Pagkamakapahupay ang pagkahibalo nga ang atong mahigugmaong langitnong Amahan nagsaad  nga palig-onon ug paluyohan ang mga maunongon kaniya panahon sa ilang pagkatigulang!—Salmo 48:14.

Sanglit makapahimuot man kang Jehova ang kinabuhi nga gigamit sa matinumanong pag-alagad kaniya, dili ba kini takos usab sa pagtahod sa uban? Pinaagi sa pagpamalandong sa panglantaw sa Diyos, atong mapabilhan ang tigulang nga mga isigkamagtutuo. (1 Timoteo 5:1, 2) Busa, mangita kitag praktikal nga mga paagi diin atong ikapakita ang atong Kristohanong gugma diha sa pag-atiman sa ilang mga panginahanglan.

Pagsubay sa Dalan sa Pagkamatarong sa Ulahing Bahin sa Kinabuhi

“Diha sa dalan sa pagkamatarong adunay kinabuhi,” gipasaligan kita ni Solomon. (Proverbio 12:28) Ang pagkatigulang dili makapugong sa usa ka tawo sa pagsubay niining dalana sa ulahing bahin sa kinabuhi. Pananglitan, sa Moldova usa ka 99-anyos nga lalaki nagdeboto sa iyang pagkabatan-on sa pagpalambo sa Komunistang mga ideolohiya. Mapasigarbohon siya nga personal niyang nakaestorya ang iladong Komunistang mga lider, sama kang V. I. Lenin. Apan, sa dihang mihuyang ug napukan ang Komunismo, kining maong tigulang nga lalaki nawad-ag katuyoan ug direksiyon sa kinabuhi. Apan sa dihang gipakita kaniya sa mga Saksi ni Jehova nga ang Gingharian sa Diyos mao lamang ang tinuod nga solusyon sa mga suliran sa katawhan, iyang gidawat ang kamatuoran sa Bibliya ug nahimong makugihong estudyante sa Kasulatan. Ikasubo, siya namatay sa wala pa mahimong bawtismadong alagad ni Jehova.

Sa dihang nakat-onan ang moral nga mga kinahanglanon sa Diyos, naamgohan sa usa ka 81-anyos nga babaye nga taga-Hungaria nga kinahanglan niyang pakaslan ang lalaki nga iyang gikapuyo sulod na sa ubay-ubayng katuigan. Ang maong babaye nakabaton ug kaisog ug gipatin-aw niya ang iyang pinasukad-sa-Bibliyang panglantaw ngadto sa iyang kapuyo. Sa iyang dakong katingala ug kalipay, ang lalaki miuyon nga pakaslan siya. Human sa ilang kasal, siya kusog nga miuswag sa espirituwal. Sulod sa walo ka bulan human sa iyang pagsugod ug pagtuon sa Bibliya, siya nahimong dili-bawtismadong magmamantala, ug siya nabawtismohan wala madugay human niana. Tinuod gayod nga ang pagkamatarong makatabang sa mga tigulang sa pagpasundayag ug tinuod nga katahom!

Oo, makaseguro ang matinumanong tigulang nga mga Kristohanon nga ang Diyos interesado kanila. Dili gayod biyaan ni Jehova kadtong magmaunongon kaniya. Hinunoa, siya nagsaad nga sila iyang giyahan, paluyohan, ug palig-onon bisan hangtod sa pagkatigulang. Ug ilang mapamatud-an ang mga pulong sa salmista: “Ang akong tabang nagagikan kang Jehova.”—Salmo 121:2.

[Footnote]

[Blurb sa panid 9]

“Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.”—PROVERBIO 16:31

[Kahon sa panid 8]

SI JEHOVA NAGAATIMAN SA IYANG TIGULANG NGA MGA ALAGAD

“Atubangan sa buhok nga ubanon motindog ka, ug magpakita ka ug pagtamod sa tawong tigulang.”—Levitico 19:32.

“Bisan hangtod sa pagkatigulang sa usa ako mao gihapon Siya; ug hangtod sa pagkaubanon sa usa ako magpadayon sa pagpas-an.”—Isaias 46:4.