“Unsay Imong Sekreto?”

KINI nga pangutana sa usa ka edarang tawo diha sa fast-food nga restawran nakapakurat kang Muriel, nga usa ka inahang may tulo ka anak. Napuliki si Muriel sa pagpahiling sa iyang mga anak sa doktor, ug nahutdan na siyag panahon. Wala na silay panahon aron mopauli ug manihapon una pa motambong sa ilang Kristohanong tigom. Busa iyang gidala ang mga bata ngadto sa restawran sa duol aron sila makakaon.

Sa hapit na silang mahuman ug kaon, usa ka lalaki ang miduol kang Muriel ug miingon: “Naniid ko ninyo sukad sa inyong pagsulod dinhi. Ug akong namatikdan nga lahi kaayo ang imong mga anak kay sa mga bata nga akong kasagarang makita. Makurat ka kon unsay ilang himoon sa mga lamesa ug mga silya. Ang ilang tiil ilang ipatong sa lamesa. Ang mga lingkoranan ilambalamba. Pero ang imong mga anak hilom kaayo ug buotan. Unsay imong sekreto?”

Si Muriel mitubag: “Ako ug ang akong bana regular nga nagtuon sa Bibliya uban sa among mga anak, ug among gipaningkamotan nga mapadapat sa among kinabuhi ang among nakat-onan. Kami mga Saksi ni Jehova.” Dayon, miingon ang lalaki: “Ako usa ka Hudiyo ug nakalabang-buhi sa Holocaust. Nahinumdom ko nga nakakita ug mga Saksi ni Jehova nga gilutos sa Alemanya. Bisan niadtong panahona mamatikdan gayod nga lahi sila. Nakadayeg gayod ako sa panggawi sa imong mga anak. Kinahanglang susihon nako ang inyong relihiyon.”

Ang Bibliya maoy usa ka maayo kaayong giya sa pagmatuto sa mga anak. Ang mga Saksi ni Jehova interesado kaayo sa pagtabang sa uban nga makabenepisyo gikan sa giya nga makita diha sa Kasulatan. Mainiton ka namong gidapit sa pagdawat sa tanyag sa ubos.