“Magpadayon sa Pagbantay”

SA KARAANG mga panahon, ang mga magbalantay sa ganghaan mopuwesto diha sa mga entrada sa siyudad ug templo ug, sa pipila ka kahimtang, diha sa mga pultahan sa pribadong mga balay. Gawas pa sa pagseguro nga nasirad-an ang mga ganghaan inigkagabii, kining mga tawhana mag-alagad usab ingong mga tigbantay. Usa kini ka bug-at nga buluhaton, tungod kay ang kahilwas sa siyudad nagdepende man sa ilang pagtawag aron sa pagpasidaan sa mga tawo sa nagsingabot nga kapeligrohan.

Sinati si Jesu-Kristo sa buluhaton sa mga magbalantay sa ganghaan, nga gitawag usab nga mga magbalantay sa pultahan. Sa usa ka higayon, iyang gipakasama ang iyang mga tinun-an sa mga magbalantay sa pultahan ug gidasig sila nga magpadayon sa pagbantay maylabot sa kataposan sa Hudiyohanong sistema sa mga butang. Siya miingon: “Magpadayon sa pagtan-aw, magpadayon sa pagtukaw, kay wala kamo mahibalo kon kanus-a ang tinudlong panahon. Sama kini sa usa ka tawo nga nagapanaw sa halayo nga mibiya sa iyang balay ug . . . nagsugo sa magbalantay sa pultahan nga magpadayon sa pagbantay. Busa magpadayon sa pagbantay, kay kamo wala mahibalo kon kanus-a moabot ang agalon sa balay.”—Marcos 13:33-35.

Sa samang paagi, sulod sa kapig 125 ka tuig na karon, kining magasina, Ang Bantayanang Torre, nagpasa sa pagdasig ni Jesus nga “magpadayon sa pagbantay.” Sa unsang paagi? Sumala sa giingon sa panid 2 niining magasina, “Kanunay kining nagbantay sa mga hitabo sa kalibotan samtang ginatuman niini ang tagna sa Bibliya. Kini nagalipay sa tanang katawhan sa maayong balita nga ang Gingharian sa Diyos duol nang maglaglag sa mga naglupig sa ilang isigkatawo ug nga himoon niini ang yuta nga usa ka paraiso.” Nga may tibuok-kalibotang sirkulasyon nga kapin sa 26,000,000 ka kopya diha sa 150 ka pinulongan, Ang Bantayanang Torre mao ang labing kaylap nga giapod-apod nga relihiyosong magasin sa kalibotan. Pinaagi niini, ang mga Saksi ni Jehova, sama sa karaang mga magbalantay sa ganghaan, nagaawhag sa mga tawo bisan asa nga “magpadayon sa pagtukaw” sa espirituwal nga paagi tungod kay ang Agalon, si Jesu-Kristo, hapit nang mobalik ug magpakanaog ug paghukom batok niining sistemaha sa mga butang.—Marcos 13:26, 37.