Kinsay Mopakaon sa Kalibotan?

SUMALA sa mga banabana sa World Food Programme, usa ka ahensiya sa Hiniusang Kanasoran nga ang tuyo mao ang pagsanta sa kagutom, 800 ka milyong tawo—kadaghanan kanila mga bata—ang hapit nang malunosan. Di pa dugay, ang maong ahensiya nag-ingon nga ang mga kahinguhaan ug ang pagtagad nga angay untang ipadapat sa daghang dato nga kanasoran ngadto sa maong kahimtang gimonopoliya na hinuon sa ubang mga problema, sama sa terorismo. Misamot pa gayod ang maong problema tungod sa pagkaylap sa mananakod nga mga sakit. Ang Global School Feeding Report sa maong ahensiya nag-ingon bahin sa mga kanasoran sa Aprika diin kaylap ang AIDS: “Ang enterong kaliwatan sa mga ginikanan nangamatay. Ang mga bata nga ilang gibiyaan kasagarang mao na lay mosuportar sa kaugalingon, nga kadaghanan kulang sa paninugdang kahibalo bahin sa pagpanguma ug sa adlaw-adlaw nga pagkinabuhi nga kasagarang ipasa unta sa usa ka kaliwatan ngadto sa sunod nga kaliwatan.”

Ang World Food Programme nagpasiugda ug usa ka programa nga ang tumong mao ang pagdalit ug labing menos usa ka kan-anan matag adlaw diha sa mga eskuylahan. Kining programaha dili lang mopamenos sa suliran sa kagutom kondili mopalihok usab sa ubang mga programa nga ang tuyo mao ang pagsanta sa HIV/AIDS taliwala sa mga batan-on pinaagig makanunayong edukasyon.

Sa mga dapit diin gipatuman ang maong programa, ang mga bata nakadawat ug pagkaon, pagbansay maylabot sa personal nga kahinlo, ug uban pang mga tabang. Namatikdan usab nga sa dihang usbon sa mga tawo ang ilang batasan, mous-os ang gidaghanon sa matakdan sa HIV/AIDS.

Ikasubo, ang mga resulta sa tawhanong mga paningkamot sagad limitado lang ug dili dumalayon. Apan ang Bibliya naghatag ug makapahupayng saad maylabot sa permanenteng solusyon sa problema bahin sa kagutom. “Aduna unyay dagayang lugas sa ibabaw sa yuta,” nag-ingon ang Salmo 72:16. Ubos sa Gingharian sa Diyos, ang mga tawo makaarang sa pag-ingon bahin kang Jehova nga Diyos: “Giliso mo ang imong pagtagad sa yuta, aron kahatagan mo kini ug kadagaya . . . Giandam mo ang ilang mga lugas, kay ingon niana ang imong pag-andam sa yuta.”—Salmo 65:9.

[Picture Credit Line sa panid 32]

WFP/Y. Yuge