Mga Kristohanon—Ipasigarbo Kon Kinsa Kamo!

“Siya nga nagapanghambog, manghambog siya diha kang Jehova.”—1 CORINTO 1:31.

1. Unsang hilig ang nadayag diha sa tinamdan sa mga tawo maylabot sa relihiyon?

 USA ka komentarista sa relihiyosong mga kalihokan di pa dugayng miingon nga daghang tawo ang nawad-ag interes sa ilang relihiyon. Siya miingon: “Ang labing talagsaong kaugmaran sa modernong relihiyon dili usa ka relihiyon kondili ang kawalay-interes sa kaugalingong relihiyon.” Miingon siya nga daghang tawo ang “nagtuo sa Diyos . . . ; apan sila wala magtagad kaniya.”

2. (a) Nganong dili ikatingala nga ang mga tawo nawad-ag interes sa espirituwal nga mga butang? (b) Unsang kapeligrohan ang ipahinabo sa kawalay-pagtagad ngadto sa tinuod nga mga Kristohanon?

² Ang mga estudyante sa Bibliya dili matingala niining maong hilig sa kawalay-interes. (Lucas 18:8) Ug mahitungod sa relihiyon sa katibuk-an, pagadahomon ang maong kawalay-kaikag. Ang bakak nga relihiyon dugay nang nagpahisalaag ug nagpahigawad sa katawhan. (Pinadayag 17:15, 16) Apan, alang sa tinuod nga mga Kristohanon ang kaylap nga espiritu sa pagkataphaw ug kasingkasing ug kakulang sa kasibot kanunayng nagpameligro kanila. Mahiagom kita sa makapasubong mga sangpotanan kon kita dili magpakabana bahin sa atong pagtuo ug mawad-an sa kasibot sa pag-alagad sa Diyos ug alang sa kamatuoran sa Bibliya. Nagpasidaan si Jesus batok nianang maong pagkadagaang sa dihang iyang giingnan ang unang-siglong mga Kristohanon nga nagpuyo sa Laodicea: “Ikaw dili bugnaw ni init. Ako nanghinaot nga ikaw unta bugnaw o kaha init. . . . Ikaw dagaang.”—Pinadayag 3:15-18.

Pagsabot Kon Kinsa Kita

3. Unsang mga bahin sa pagka-Kristohanon ang atong ikapasigarbo?

³ Aron mapakigbisogan ang kawalay-interes sa espirituwal nga mga butang, ang mga Kristohanon kinahanglang makasabot gayod kon kinsa sila, ug sa makataronganong paagi angay nilang ipasigarbo ang ilang pagka-Kristohanon. Ingong mga alagad ni Jehova ug mga tinun-an ni Kristo, makaplagan nato diha sa Bibliya ang mga kahubitan kon kinsa kita. Kita maoy “mga saksi” ni Jehova, “mga isigkamagbubuhat sa Diyos,” samtang kita aktibong nagpaambit sa “maayong balita” ngadto sa uban. (Isaias 43:10; 1 Corinto 3:9; Mateo 24:14) Kita maoy mga tawo nga ‘nahigugma sa usag usa.’ (Juan 13:34) Ang matuod nga mga Kristohanon maoy mga indibiduwal kinsa “pinaagi sa paggamit nakabansay sa ilang mga gahom sa pagsabot aron sa pag-ila sa maayo ug sa daotan.” (Hebreohanon 5:14) Kita maoy “mga magbabanwag sa kalibotan.” (Filipos 2:15) Kita naningkamot nga ‘huptan ang atong maayong panggawi taliwala sa mga nasod.’—1 Pedro 2:12; 2 Pedro 3:11, 14.

4. Sa unsang paagi matino sa usa ka magsisimba ni Jehova kon unsay dili niya kahubitan?

⁴ Ang matuod nga mga magsisimba ni Jehova nahibalo usab kon unsay dili nila kahubitan. “Sila dili bahin sa kalibotan,” maingon nga ang ilang Pangulo, si Jesu-Kristo, dili bahin sa kalibotan. (Juan 17:16) Sila nagpabiling bulag gikan sa “kanasoran,” nga “anaa sa kangitngit sa kaisipan, ug nahimulag sa kinabuhi nga iya sa Diyos.” (Efeso 4:17, 18) Tungod niini, ang mga sumusunod ni Jesus ‘nagsalikway sa pagkadili-diyosnon ug sa kalibotanong mga tinguha ug nagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.’—Tito 2:12.

5. Unsay gipasabot sa pagdasig nga ‘pagpanghambog diha kang Jehova’?

 ⁵ Ang atong klarong pagsabot kon kinsa kita ug ang atong relasyon sa Soberanong Magmamando sa uniberso magtukmod kanato sa ‘pagpanghambog diha kang Jehova.’ (1 Corinto 1:31) Unsang matanga kana sa pagpanghambog? Ingong tinuod nga mga Kristohanon, kita mapasigarbohon nga ang atong Diyos mao si Jehova. Atong gisunod ang tambag: “Siya nga nagapanghambog papanghamboga tungod niining butanga mismo, ang pagkabaton ug hait nga salabotan ug ang pagkabaton ug kahibalo kanako, nga ako si Jehova, ang Usa nga nagapakita ug mahigugmaong-kalulot, hustisya ug pagkamatarong diha sa yuta.” (Jeremias 9:24) Kita ‘manghambog’ sa pribilehiyo nga nakaila sa Diyos ug gihimo niyang kasangkapan sa pagtabang sa uban.

Ang Kalisod

6. Nganong ang uban nalisdan sa paghupot ug hait nga pagsabot sa ilang pagka-Kristohanon?

⁶ Tinuod, ang paghupot ug hait nga pagsabot sa atong pagka-Kristohanon dili gayod sayon. Usa ka batan-ong lalaki nga gimatuto ingong Kristohanon nahinumdom nga sa makadiyot naluya siya sa espirituwal: “Usahay, maghunahuna ko nga wala ko mahibalo kon nganong ako usa sa mga Saksi ni Jehova. Natudloan ako sa kamatuoran sukad pa sa pagkamasuso. Usahay ako maghunahuna nga kini maoy laing matang lamang sa establisado, dinawat nga relihiyon.” Nagpaimpluwensiya sila sa kalibotan sa kalingawan, sa sistema sa komunikasyon sa masa, ug sa presenteng dili-diyosnon nga tinamdan sa kinabuhi. (Efeso 2:2, 3) Usahay ang ubang mga Kristohanon magduhaduha ug magtimbangtimbang pag-usab sa ilang mga prinsipyo ug mga tumong.

7. (a) Unsang matanga sa pagsusi sa kaugalingon ang haom alang sa mga alagad sa Diyos? (b) Diin nagpahipi ang kapeligrohan?

⁷ Sayop ba nga mainampingong susihon nato pag-usab ang atong kaugalingon matag karon ug unya? Dili. Mahinumdoman tingali nimo nga gidasig ni apostol Pablo ang mga Kristohanon nga padayong susihon ang ilang kaugalingon: “Padayong sulayi kon kamo anaa ba sa pagtuo, padayong pamatud-i kon unsa kamo sa inyong kaugalingon.” (2 Corinto 13:5) Ang apostol nagdasig dinhi ug maayong matang sa pagpaningkamot nga mamatikdan ang bisan unsang espirituwal nga mga kahuyangon nga mahimong motungha, sa tuyo nga mohimog kinahanglanong mga lakang sa pagtul-id niana. Sa pagsulay kon anaa pa siya sa pagtuo, angayng tinoon sa usa ka Kristohanon kon ang iyang mga pulong ug mga binuhatan kaharmonya ba sa iyang gituohan. Apan, kon himoon sa sayop nga paagi, ang pagsusi sa kaugalingon nga motukmod kanato sa pagtino kon kinsa kita ingong indibiduwal o ang pagpangita sa mga tubag nga walay kalabotan sa atong relasyon kang Jehova o sa Kristohanong kongregasyon mahimong walay kapuslanan ug makadaot sa espirituwalidad. a Dili gayod nato gusto nga ‘makasinatig pagkalunod labot sa atong pagtuo’!—1 Timoteo 1:19.

Kita Mapakyas Gihapon

8, 9. (a) Sa unsang paagi gipahayag ni Moises ang iyang kawalay-pagsalig sa kaugalingon? (b) Unsay reaksiyon ni Jehova sa mga pagduhaduha ni Moises? (c) Sa unsang paagi ikaw naapektahan sa mga pasalig ni Jehova?

⁸ Ang mga Kristohanon ba nga makasinati usahay ug pagduhaduha angayng mobati nga sila napakyas? Siyempre dili! Sa pagkatinuod mahupayan sila sa pagkahibalo nga ang maong mga kapakyasan nahitabo na kaniadto. Ang matinumanong mga saksi sa Diyos sa karaang mga panahon nakasinati niana. Tagda pananglitan si Moises, kinsa nagpasundayag ug talagsaong pagtuo, pagkamaunongon, ug debosyon. Sa dihang gihatagan ug morag bug-at nga trabaho, si Moises maduhaduhaong nangutana: “Kinsa ba ako?” (Exodo 3:11) Dayag nga ang tubag nga anaa sa iyang hunahuna mao, ‘Ako dili importante!’ o ‘Dili ko angay niana!’ Ubay-ubayng bahin sa kaagi ni Moises ang lagmit nakapabati kaniya nga dili takos: Sakop siya sa nasod sa mga ulipon. Gisalikway siya sa mga Israelinhon. Dili siya larinong manulti. (Exodo 1:13, 14; 2:11-14; 4:10) Usa siya ka magbalantay sa karnero, trabaho nga giayran sa mga Ehiptohanon. (Genesis 46:34) Mao diay nga mibati siyang dili haom nga mohatag ug kagawasan sa naulipon nga katawhan sa Diyos!

 ⁹ Gipasaligan ni Jehova si Moises pinaagi sa paghatag kaniya ug duha ka makapatandog nga mga saad: “Ako magauban kanimo, ug kini ang ilhanan alang kanimo nga ako ang nagpadala kanimo: Human nimo mapagawas ang katawhan gikan sa Ehipto, kamo magaalagad sa matuod nga Diyos dinhi niining bukira.” (Exodo 3:12) Giingnan sa Diyos ang iyang nag-ukon-ukon nga alagad nga Siya kanunayng magauban kaniya. Gawas pa, miingon si Jehova nga sa walay pakyas iyang luwason ang iyang katawhan. Latas sa kasiglohan, ang Diyos nanaad gihapon nga motabang sa iyang katawhan. Pananglitan, pinaagi kang Moises siya miingon sa nasod sa Israel sa dihang hapit na silang mosulod sa Yutang Saad: “Magmaisogon ug magmakusganon kamo. . . . Si Jehova nga imong Diyos mao ang magauban kanimo. Dili ka niya talikdan ni biyaan sa bug-os.” (Deuteronomio 31:6) Gipasaligan usab ni Jehova si Josue: “Walay makabarog nga lig-on sa imong atubangan sa tanang adlaw sa imong kinabuhi. . . . Ako magauban kanimo. Dili ko ikaw talikdan ni biyaan sa bug-os.” (Josue 1:5) Ug iyang gisaaran ang mga Kristohanon: “Dili ko gayod [kamo] pagabiyaan ni sa bisan unsang paagi pagatalikdan.” (Hebreohanon 13:5) Tungod kay nabatonan nato ang maong tabang, angay natong ipasigarbo nga kita mga Kristohanon!

10, 11. Sa unsang paagi natabangan ang Levihanon nga si Asap sa paghupot ug hustong panglantaw sa kahinungdanon sa iyang pag-alagad kang Jehova?

¹⁰ Mga lima ka siglo human kang Moises, usa ka matinumanong Levihanon nga ginganlag Asap prangkang misulat bahin sa iyang mga pagduhaduha labot sa kahinungdanon sa pagpangagpas sa matul-id nga dalan. Samtang siya nanglimbasog sa pag-alagad sa Diyos bisan pa sa mga pagsulay ug mga tentasyon, nakita ni Asap nga ang pipila ka tawo nga nagtamay sa Diyos nahimong mas gamhanan ug mauswagon. Sa unsang paagi naapektahan si Asap? “Kon bahin kanako, hapit na gayong matipas ang akong mga tiil,” siya miangkon. “Diriyot nang maligas ang akong mga lakang. Kay nasina ako sa mga hambogiro, sa dihang nakita ko ang kalinaw sa mga tawong daotan.” Misugod siya sa pagduhaduha sa kahinungdanon sa pagkahimong magsisimba ni Jehova. “Kawang lamang gayod nga gihinloan ko ang akong kasingkasing ug gihunawan ko ang akong mga kamot sa pagkainosente,” naghunahuna si Asap. “Ug ako gihampak sa tibuok nga adlaw.”—Salmo 73:2, 3, 13, 14.

¹¹ Sa unsang paagi gibuntog ni Asap kining makapatugawng pagbati? Gilimod ba niya kini? Wala. Gipahayag niya kini pinaagi sa pag-ampo ngadto sa Diyos, ingon sa atong makita diha sa ika-73 nga Salmo. Nausab ang tinamdan ni Asap sa dihang miadto siya sa sangtuwaryo sa templo. Samtang didto siya, iyang naamgohan nga ang paghupot ug debosyon ngadto sa Diyos mao gihapon ang kinamaayohang dalan. Human mapasig-uli ang iyang apresasyon sa espirituwal nga mga butang, iyang nasabtan nga gidumtan ni Jehova ang pagkadaotan ug sa takdang panahon ang mga daotan pagasilotan. (Salmo 73:17-19) Sa ingon, napalig-on ni Asap ang iyang kaamgohan kon kinsa siya, usa ka alagad ni Jehova nga nakabaton ug daghang pribilehiyo. Siya miingon sa Diyos: “Ako nagauban kanunay kanimo; gikuptan mo ang akong tuong kamot. Pinaagi sa imong tambag pagatultolan mo ako, ug  sa ulahi dad-on mo ako sa himaya.” (Salmo 73:23, 24) Gipasigarbo na usab ni Asap ang iyang Diyos.—Salmo 34:2.

Nakaamgo Gayod Sila Kon Kinsa Sila

12, 13. Paghatag ug mga pananglitan sa mga karakter diha sa Bibliya nga nagpasigarbo sa ilang relasyon sa Diyos.

¹² Ang usa ka paagi nga mapalig-on nato ang atong kaamgohan sa atong pagka-Kristohanon mao ang pagsusi ug pagsundog sa pagtuo sa maunongong mga magsisimba, kinsa bisan pa sa kalisdanan nagpasigarbo sa ilang relasyon sa Diyos. Tagda si Jose, nga anak ni Jacob. Sa linghod nga panuigon, siya mabudhiong gibaligya ingong ulipon ug gidala ngadto sa Ehipto, gatosan ka kilometros gikan sa iyang mahinadlokon-sa-Diyos nga amahan ug halayo gikan sa mainiton, matinabangon nga atmospera sa iyang panimalay. Samtang didto sa Ehipto, walay tawo nga kapangayoan ni Jose ug diyosnong tambag, ug kinahanglang sagubangon niya ang malisod nga mga situwasyon nga nagsulay sa iyang moralidad ug pagsalig sa Diyos. Apan, klaro nga naningkamot gayod siya nga magpabilin ang iyang dulot nga kaamgohan nga siya alagad sa Diyos, ug siya nagmatinumanon sa kon unsay iyang nahibaloan nga husto. Siya mapasigarbohon nga siya usa ka magsisimba ni Jehova bisan diha sa dili-mahigalaong palibot, ug wala siya magpanuko sa pagpahayag sa iyang gibati.—Genesis 39:7-10.

¹³ Walo ka siglo sa ulahi, ang usa ka binihag nga Israelinhong dalagita nga nahimong ulipon sa Siryanong heneral nga si Naaman wala malimot nga siya usa ka magsisimba ni Jehova. Sa dihang mitungha ang kahigayonan, siya maisogong naghatag ug maayong pagpamatuod bahin kang Jehova sa dihang iyang gipaila si Eliseo ingong manalagna sa matuod nga Diyos. (2 Hari 5:1-19) Daghang tuig human niana, ang batan-on nga si Haring Josias, bisan pag anaa sa daotang palibot, nagpatuman ug layog-abot nga  relihiyosong mga reporma, nag-ayo sa templo sa Diyos, ug nanguna sa pagpasig-uli sa nasod ngadto kang Jehova. Gipasigarbo niya ang iyang pagtuo ug pagsimba. (2 Cronicas, mga kapitulo 34, 35) Si Daniel ug ang iyang tulo ka Hebreohanong mga kauban sa Babilonya wala gayod malimot nga sila mga alagad ni Jehova, ug bisan ilalom sa pagpit-os ug tentasyon, ilang gihuptan ang ilang integridad. Klaro nga mapasigarbohon sila nga sila mga alagad ni Jehova.—Daniel 1:8-20.

Ipasigarbo Kon Kinsa Ka

14, 15. Unsay nalangkit sa pagpasigarbo sa atong pagka-Kristohanon?

¹⁴ Kining maong mga alagad sa Diyos nagmalamposon tungod kay ilang giugmad ang maayong matang sa pagpasigarbo sa ilang baroganan atubangan sa Diyos. Komosta kita karon? Unsay nalangkit sa pagpasigarbo sa atong pagka-Kristohanon?

¹⁵ Sa panguna, naglakip kini ug halalom nga apresasyon nga kita nahilakip sa katawhan nga gitawag ni Jehova sa iyang ngalan, nga nakabaton sa iyang panalangin ug pag-uyon. Wala magduhaduha ang Diyos kon kinsay iyaha. Si apostol Pablo, kinsa nagkinabuhi sa panahon diin daghan ang naglibog maylabot sa relihiyon, misulat: “Si Jehova nakaila sa mga iyaha.” (2 Timoteo 2:19; Numeros 16:5) Si Jehova mapasigarbohon niadtong “mga iyaha.” Siya miingon: “Siya nga nagahilabot kaninyo nagahilabot sa kalimutaw sa akong mata.” (Zacarias 2:8) Klaro nga si Jehova nahigugma kanato. Sa baylo ang atong relasyon kaniya kinahanglang ipasukad sa halalom nga gugma alang kaniya. Si Pablo miingon: “Kon ang usa ka tawo nahigugma sa Diyos, kini siya nailhan niya.”—1 Corinto 8:3.

16, 17. Nganong ang mga Kristohanon, bata ug tigulang, makapasigarbo sa ilang espirituwal nga panulondon?

¹⁶ Angayng susihon sa mga batan-on nga gimatuto ingong mga Saksi ni Jehova kon ang ilang pagka-Kristohanon nag-anam ba ka lig-on tungod sa mas suod nga relasyon sa Diyos. Dili sila angayng magsalig lamang sa pagtuo sa ilang mga ginikanan. Mahitungod sa matag alagad sa Diyos, si Pablo misulat: “Ngadto sa iyang kaugalingong agalon siya mobarog o mapukan.” Busa si Pablo nagpadayon: “Ang matag usa kanato manubag alang sa iyang kaugalingon ngadto sa Diyos.” (Roma 14:4, 12) Dayag nga ang dili-kinasingkasing nga pagpadayon sa tradisyon sa pamilya dili makapatunhay sa suod, layog-abot nga relasyon kang Jehova.

¹⁷ Sa tibuok kasaysayan, adunay laray sa mga saksi ni Jehova. Kini nagsukad sa matinumanong tawo nga si Abel—mga 60 ka siglo kanhi—hangtod sa “dakong panon” sa modernong mga Saksi ug ngadto usab sa dakong pundok sa mga magsisimba ni Jehova nga makatagamtam ug walay-kataposang kaugmaon. (Pinadayag 7:9; Hebreohanon 11:4) Kita mao ang kinabag-ohang grupo niining taas nga laray sa matinumanong mga magsisimba. Pagkanindot sa atong espirituwal nga panulondon!

18. Sa unsang paagi ang atong mga prinsipyo ug mga sukdanan naghimo kanatong lahi sa kalibotan?

¹⁸ Ang atong ilhanan ingong Kristohanon naglakip usab sa hugpong sa mga prinsipyo, hiyas, sukdanan, ug mga kinaiya nga nagpaila kanato ingong mga Kristohanon. Kana mao ang “Dalan,” ang bugtong malamposon nga paagi sa pagkinabuhi ug sa pagpahimuot sa Diyos. (Buhat 9:2; Efeso 4:22-24) Ang mga Kristohanon ‘nagtino sa tanang butang’ ug ‘nangupot pag-ayo sa maayo’! (1 Tesalonica 5:21) Nasabtan nato pag-ayo ang dako nga kalainan tali sa Kristiyanidad ug sa kalibotan nga nahimulag sa Diyos. Gitin-aw ni Jehova ang kalainan tali sa matuod nga pagsimba ug sa bakak. Pinaagi sa iyang manalagna nga si Malaquias, siya miingon: “Kamo makakita gayod pag-usab sa kalainan tali sa usa nga matarong ug sa usa nga daotan, tali sa usa  nga nagaalagad sa Diyos ug sa usa nga wala mag-alagad kaniya.”—Malaquias 3:18.

19. Unsay dili gayod mahitabo sa tinuod nga mga Kristohanon?

¹⁹ Tungod kay ang pagpanghambog diha kang Jehova hinungdanon kaayo niining nalibog nga kalibotan, unsay makatabang kanato sa paghupot ug maayong matang sa pagpasigarbo sa atong Diyos ug sa dulot nga kaamgohan sa atong pagka-Kristohanon? Makita sa sunod nga artikulo ang makatabang nga mga sugyot. Samtang nagkonsiderar niini, makaseguro ka niini: Ang tinuod nga mga Kristohanon dili gayod mawad-an ug interes sa relihiyon.

[Footnote]

Nahinumdom Ka Ba?

• Sa unsang paagi ang mga Kristohanon ‘manghambog diha kang Jehova’?

• Unsay imong nakat-onan gikan sa mga panig-ingnan ni Moises ug Asap?

• Kinsa nga mga karakter sa Bibliya ang mapasigarbohon sa ilang pag-alagad sa Diyos?

• Unsay nalangkit sa atong pagpasigarbo sa atong pagka-Kristohanon?

[Mga Pangutana sa Pagtuon]

[Hulagway sa panid 14]

Dihay panahon nga si Moises walay pagsalig sa iyang kaugalingon

[Mga hulagway sa panid 15]

Daghang karaan nga mga alagad ni Jehova ang nagpasigarbo kon kinsa sila