Pag-amping sa Atong Ilhanan Ingong Kristohanon

“‘Kamo mao ang akong mga saksi,’ mao ang giingon ni Jehova.”—ISAIAS 43:10.

1. Unsang matanga sa mga tawo ang ginakabig ni Jehova?

 KON naa ka sa Kingdom Hall, tan-awag maayo ang imong palibot. Kinsay imong nakita niining maong dapit sa pagsimba? Tingali makita nimo ang sinserong mga batan-on nga naminaw pag-ayo sa kaalam gikan sa Kasulatan. (Salmo 148:12, 13) Lagmit maobserbahan usab nimo ang mga ulo sa pamilya nga naningkamot sa pagpahimuot sa Diyos samtang nagkinabuhi sa usa ka kalibotan nga walay pagpabili sa pamilyahanong kinabuhi. Tingali makakita ka ug minahal nga mga tigulang, nga matinumanong nagtuman sa ilang pahinungod kang Jehova bisan pa sa mga balatian. (Proverbio 16:31) Ang tanan nahigugma gayod kang Jehova. Ug nakita niya nga takos silang kabigon ug masuod kaniya. “Walay usa nga makaari kanako,” miingon ang Anak sa Diyos, “gawas kon ang Amahan, kinsa nagpadala kanako, magkabig kaniya.”—Juan 6:37, 44, 65.

2, 3. Nganong malisod ang paghupot ug dulot nga kaamgohan sa atong pagka-Kristohanon?

² Wala ba kita malipay nga nahilakip sa katawhan nga giuyonan ug gipanalanginan ni Jehova? Bisan pa niana, malisod ang paghupot ug dulot nga kaamgohan sa atong pagka-Kristohanon niining “makuyaw nga mga panahong lisod sagubangon.” (2 Timoteo 3:1) Tinuod kini ilabina sa mga batan-on nga gimatuto diha sa Kristohanong mga pamilya. “Bisan tuod ako tigtambongan sa Kristohanong mga tigom,” miangkon ang usa nianang  maong mga batan-on, “ako walay klarong espirituwal nga mga tumong ug, sa tinuoray lang, wala nako maugmad ang tinguha nga moalagad kang Jehova.”

³ Ang uban, bisan tuod sinserong nagtinguha sa pag-alagad kang Jehova, malinga tingali tungod sa grabeng pagpit-os sa isigkaingon, sa kalibotanong mga impluwensiya, ug sa makasasalang mga hilig. Sa dihang mailalom kita sa pagpit-os, mahimong anam-anam nga mawala ang atong ilhanan ingong Kristohanon. Pananglitan, daghan sa kalibotan karon ang naghunahuna nga ang mga sukdanan sa Bibliya labot sa moralidad kinaraan na o dili makataronganon sa atong modernong kalibotan. (1 Pedro 4:4) Gibati sa uban nga dili hinungdanon ang pagsimba sa Diyos sa paagi nga iyang gisugo. (Juan 4:24) Sa iyang sulat ngadto sa mga taga-Efeso, miingon si Pablo nga ang kalibotan adunay “espiritu,” o nagpatigbabaw nga tinamdan. (Efeso 2:2) Ang maong espiritu nagpugos sa mga tawo sa pagpahiuyon sa panghunahuna sa katilingban nga wala makaila kang Jehova.

4. Sa unsang paagi gipasiugda ni Jesus nga kinahanglang ampingan nato ang atong klarong ilhanan ingong mga Kristohanon?

⁴ Apan, ingong dedikado nga mga alagad ni Jehova, kita nakaamgo nga makapasubo gayod kon adunay si bisan kinsa kanato—bata o tigulang—nga mawad-an sa atong ilhanan ingong Kristohanon. Ang hustong panglantaw sa atong ilhanan ingong Kristohanon kinahanglang ipasukad sa mga sukdanan ni Jehova ug sa iyang gidahom kanato. Makataronganon kini tungod kay gilalang kita sumala sa iyang larawan. (Genesis 1:26; Miqueas 6:8) Gipakasama sa Bibliya ang atong klarong ilhanan ingong mga Kristohanon ngadto sa panggawas nga mga besti, nga makita sa tanan. Mahitungod sa atong kapanahonan, si Jesus nagpasidaan: “Tan-awa! Ako moabot ingon sa usa ka kawatan. Malipayon ang usa nga pabiling magatukaw ug magabantay sa iyang panggawas nga mga besti, aron dili siya maglakaw nga hubo ug ang mga tawo magtan-aw sa iyang kaulawan.” a (Pinadayag 16:15) Dili nato gustong huboon ang atong Kristohanong mga hiyas ug mga sukdanan sa panggawi ug tugotan ang kalibotan ni Satanas nga moumol kanato. Kon mahitabo kana, mawad-an kita niining “panggawas nga mga besti.” Ang maong situwasyon makapaguol ug makauulaw.

5, 6. Nganong hinungdanon ang espirituwal nga kalig-on?

⁵ Ang dulot nga kaamgohan sa pagka-Kristohanon makaapektar gayod sa paagi sa pagkinabuhi sa usa. Sa unsang paagi? Kon ang usa ka magsisimba ni Jehova dili na makaamgo kon kinsa siya, siya mahimong malinga, nga wala nay klarong direksiyon o mga tumong. Ang Bibliya sublisubling nagpasidaan batok nianang maong pagkamaduhaduhaon. “Siya nga nagduhaduha,” nagpasidaan ang disipulo nga si Santiago, “maoy sama sa balod sa dagat nga ginakusokuso ug ginapadpad sa hangin. Sa pagkatinuod, dili angay nga maghunahuna kanang tawhana nga siya adunay madawat gikan kang Jehova; siya usa ka tawong maduhaduhaon, mabalhinon sa tanan niyang mga dalan.”—Santiago 1:6-8; Efeso 4:14; Hebreohanon 13:9.

⁶ Sa unsang paagi maampingan nato ang atong pagka-Kristohanon? Unsay makatabang kanato sa pagpauswag sa atong kaamgohan sa atong dakong pribilehiyo nga mahimong mga magsisimba sa Labing Hataas? Palihog tagda ang mosunod nga mga paagi.

 Pamatud-i sa Imong Kaugalingon ang Imong Pagka-Kristohanon

7. Nganong mapuslanon man ang pagpangaliyupo kang Jehova nga susihon kita?

⁷ Padayong palig-ona ang imong relasyon kang Jehova. Ang labing bililhong butang nga nabatonan sa usa ka Kristohanon mao ang iyang personal nga relasyon sa Diyos. (Salmo 25:14; Proverbio 3:32) Kon magsugod na kita sa pagduhaduha sa atong pagka-Kristohanon, panahon na nga susihon pag-ayo ang kalidad ug giladmon niining maong relasyon. Ang salmista haom nga nangaliyupo: “Susiha ako, Oh Jehova, ug sulayi ako; dalisaya ang akong mga rinyon ug ang akong kasingkasing.” (Salmo 26:2) Nganong hinungdanon man ang maong pagsusi? Tungod kay dili kasaligan kon kita maoy pahukmon sa atong kinailadmang mga motibo ug kinasulorang mga hilig. Si Jehova lamang ang makasabot sa atong pagkatawo sa sulod—sa atong mga motibo, hunahuna, ug mga pagbati.—Jeremias 17:9, 10.

8. (a) Sa unsang paagi ang pagsusi ni Jehova makabenepisyo kanato? (b) Sa unsang paagi natabangan ka sa pag-uswag ingong Kristohanon?

⁸ Pinaagi sa paghangyo kang Jehova nga susihon kita, giawhag nato siya nga sulayan kita. Mahimong tugotan niya nga motungha ang mga situwasyon nga magpadayag sa atong tinuod nga mga motibo ug kahimtang sa kasingkasing. (Hebreohanon 4:12, 13; Santiago 1:22-25) Angay natong dawaton ang maong mga pagsulay tungod kay naghatag kana kanato ug kahigayonan sa pagpasundayag sa giladmon sa atong pagkamaunongon kang Jehova. Ang maong pagsulay magpakita kon kita ba “bug-os ug maayo sa tanang bahin, nga dili makulangan sa bisan unsa.” (Santiago 1:2-4) Ug sa ingon, kita mouswag sa espirituwal.—Efeso 4:22-24.

9. Ang pagpamatuod ba sa kamatuoran sa Bibliya sa atong kaugalingon kinahanglang buhaton o dili? Ipatin-aw.

⁹ Pamatud-i ang kamatuoran sa Bibliya sa imong kaugalingon. Ang atong kaamgohan nga kita mga alagad ni Jehova mahimong mohuyang kon kana dili lig-ong gipasukad sa kahibalo sa Kasulatan. (Filipos 1:9, 10) Kinahanglang pamatud-an sa matag Kristohanon—bata o tigulang—hangtod nga makombinsir siya nga ang iyang gituohan mao gayod ang kamatuoran nga makaplagan diha sa Bibliya. Giawhag ni Pablo ang mga isigkamagtutuo: “Tinoa ang tanang butang; pangupti pag-ayo ang maayo.” (1 Tesalonica 5:21) Angayng masabtan sa batan-ong mga Kristohanon nga sakop sa mahinadlokon-sa-Diyos nga mga pamilya nga ang pagkahimong matuod nga Kristohanon wala lamang mag-agad sa pagtuo sa ilang mga ginikanan. Ang amahan ni Solomon nga si David nagtambag kaniya nga “ilha ang Diyos sa imong amahan ug alagara siya uban ang bug-os nga kasingkasing.” (1 Cronicas 28:9) Dili pa igo nga ang batan-ong si Solomon magtan-aw lang kon sa unsang paagi gipalig-on sa iyang amahan ang iyang pagtuo kang Jehova. Kinahanglang makaila siya mismo kang Jehova, ug mao kanay iyang gibuhat. Siya mihangyo sa Diyos: “Hatagi ako karon ug kaalam ug kahibalo aron ako mogula ug mosulod sa atubangan niini nga katawhan.”—2 Cronicas 1:10.

10. Nganong dili sayop ang pagsuknag sinserong mga pangutana uban ang hustong motibo?

¹⁰ Ang lig-on nga pagtuo gipasukad sa kahibalo. “Ang pagtuo mosunod sa butang nga nadungog,” nag-ingon si Pablo. (Roma 10:17) Unsay iyang gipasabot niana? Iyang gipasabot nga pinaagi sa pagbasa sa Pulong sa Diyos, atong mapalig-on ang atong pagtuo ug pagsalig kang Jehova, sa iyang mga saad, ug sa iyang organisasyon. Kon mosukna kitag sinserong mga pangutana bahin sa Bibliya, madawat nato ang mga tubag nga makapalig-on sa atong pagsalig. Dugang pa, sa Roma 12:2, atong makaplagan ang tambag ni Pablo: ‘Pamatud-i sa inyong kaugalingon ang maayo ug dalawaton ug hingpit nga kabubut-on sa Diyos.’ Sa unsang paagi mahimo nato kana? Pinaagi sa pagbaton ug “tukmang kahibalo sa kamatuoran.” (Tito 1:1) Ang espiritu ni Jehova makatabang kanato sa pagsabot bisan sa malisod nga mga ulohan. (1 Corinto 2:11, 12) Kinahanglang mangayo kitag tabang sa Diyos pinaagi sa pag-ampo kon malisdan kita sa pagsabot sa usa ka butang. (Salmo 119:10, 11, 27) Gusto ni Jehova nga kita makasabot sa iyang Pulong, motuo niana, ug motuman niana. Iyang patalinghogan ang sinserong mga pangutana nga gisukna uban ang hustong motibo.

Magmadeterminado nga Pahimut-an ang Diyos

11. (a) Unsang natural nga tinguha ang makalit-ag kanato? (b) Sa unsang paagi kita makabaton ug kaisog sa pagbarog batok sa pagpit-os sa katalirongan?

¹¹ Pahimut-i ang Diyos, dili ang tawo. Natural lamang nga sa usa ka sukod gusto natong mailhan kon kinsa kita pinaagi sa pagpasakop sa usa ka grupo. Ang tanan nagkinahanglan ug mga higala, ug  kon kita dawaton sa maong grupo kita malipay. Sa panahon sa pagkabatan-on—maingon man sa pagkahamtong—ang pagpit-os sa katalirongan mahimong puwersado kaayo, nga magpatungha ug dakong tinguha nga mosundog o mopahimuot sa uban. Apan ang mga higala ug mga katalirongan dili kanunayng maghunahuna sa atong kaayohan. Usahay gusto lamang nilag kauban sa pagbuhat ug daotan. (Proverbio 1:11-19) Sa dihang ang usa ka Kristohanon madaog sa dili maayong matang sa pagpit-os sa katalirongan, kasagarang itago niya kon kinsa siya. (Salmo 26:4) “Ayaw pagpahiuyon sa panggawi sa kalibotan sa imong palibot,” nagpasidaan si apostol Pablo. (Roma 12:2, The Jerusalem Bible) Si Jehova naghatag kanato ug pangsulod nga kalig-on nga atong gikinahanglan aron makasukol sa bisan unsang pagpit-os sa uban nga mopahiuyon.—Hebreohanon 13:6.

12. Unsang prinsipyo ug unsang pananglitan ang makatabang kanato sa pagbarog nga malig-on sa dihang nalangkit ang atong pagsalig sa Diyos?

¹² Sa dihang ang pagpit-os gikan sa uban magpameligro sa atong kaamgohan sa atong pagka-Kristohanon, maayong hinumdoman nato nga ang atong pagkamaunongon sa Diyos mas hinungdanon kay sa hunahuna sa mga tawo o sa kiling sa mayoriya. Ang giingon diha sa Exodo 23:2 maoy maayong prinsipyo: “Dili ka mosunod sa panon sa katawhan alang sa daotang katuyoan.” Sa dihang ang mayoriya sa mga isigka-Israelinhon nagduhaduha sa katakos ni Jehova nga tumanon ang Iyang mga saad, si Caleb hugot nga midumili sa pagpasignunot sa mayoriya. Segurado siya nga ang mga saad sa Diyos kasaligan, ug siya dagayang gigantihan tungod sa iyang pagbarog nga lig-on. (Numeros 13:30; Josue 14:6-11) Andam ka ba usab nga makigbisog sa pagpit-os nga mopahiuyon sa hunahuna sa kadaghanan aron mapanalipdan ang imong relasyon sa Diyos?

13. Nganong maalamong dalan ang pagpahibalo nga kita mga Kristohanon?

¹³ Ipaila nga ikaw usa ka Kristohanon. Ang panultihon nga ang kinamaayohang depensa mao ang maayong pag-atake haom gayod samtang atong gidepensahan ang atong pagka-Kristohanon. Sa dihang gilutos sila tungod sa ilang pagtuman sa kabubut-on ni Jehova sa mga adlaw ni Esdras, ang matinumanong mga Israelinhon miingon: “Kami mga alagad sa Diyos sa mga langit ug sa yuta.” (Esdras 5:11) Kon kita maimpluwensiyahan sa mga reaksiyon ug pagsaway gikan sa mabatokong mga tawo, basin madaog kita sa kahadlok. Kon gusto natong pahimut-an kanunay ang tanan, mamenosan ang atong pagkaepektibo. Busa ayaw pagpadaog sa kahadlok. Maayo gayong mahibaloan sa uban nga ikaw usa sa mga Saksi ni Jehova. Sa matinahoron apan seryoso nga paagi, ikapatin-aw nimo ang imong mga prinsipyo, pagtuo, ug imong baroganan ingong Kristohanon. Pahibaloa ang uban nga determinado kang huptan ang taas nga mga sukdanan ni Jehova sa mga isyu labot sa moralidad. Ipatin-aw kanila nga dili nimo ikompromiso ang imong Kristohanong integridad. Ipakita nga ikaw mapasigarbohon sa imong moral nga mga sukdanan. (Salmo 64:10) Ang pagkahimong lahi ingong maunongong Kristohanon makapalig-on kanimo, makapanalipod kanimo, ug makapalihok pa gani sa uban sa pagsusi bahin kang Jehova ug sa iyang katawhan.

14. Angay ba kitang mahigawad sa pagbugalbugal o pagsupaksupak? Ipatin-aw.

¹⁴ Oo, ang uban tingali magbugalbugal o magsupaksupak kanimo. (Judas 18) Kon ang uban dili  maayog pagsanong sa imong mga paningkamot sa pagpatin-aw sa imong mga prinsipyo ngadto kanila, ayaw kahigawad. (Ezequiel 3:7, 8) Bisag determinado ka pa kaayo, dili gayod nimo makombinsir ang mga tawo nga dili gustong makombinsir. Hinumdomi si Paraon. Ang hampak o milagro—bisan gani ang pagkamatay sa iyang panganayng anak—wala makakombinsir kang Paraon nga si Moises nagsulti isip hawas ni Jehova. Busa, ayaw pagpadaog sa kahadlok sa tawo. Ang pagsalig ug pagtuo sa Diyos makatabang kanato sa pagbuntog sa kahadlok.—Proverbio 3:5, 6; 29:25.

Pagkat-on Gikan sa Nangagi, Pagpangandam Alang sa Umaabot

15, 16. (a) Unsa ang atong espirituwal nga panulondon? (b) Sa unsang paagi makabenepisyo kita sa pagpamalandong sa atong espirituwal nga panulondon ginamit ang Pulong sa Diyos?

¹⁵ Pabilhi ang imong espirituwal nga panulondon. Ginamit ang Pulong sa Diyos, ang mga Kristohanon makabaton ug kaayohan sa pagpamalandong sa ilang dagayang espirituwal nga panulondon. Kining maong panulondon naglakip sa kamatuoran sa Pulong ni Jehova, paglaom sa kinabuhing walay kataposan, ug sa kadungganan nga maghawas sa Diyos ingong mga magmamantala sa maayong balita. Makita ba nimo ang imong dapit taliwala sa iyang mga Saksi, diha sa bulahan nga grupo sa mga tawo nga gihatagan sa makaluwas-ug-kinabuhi nga buluhaton nga mao ang pagsangyaw sa Gingharian? Hinumdomi, si Jehova mismo ang nagpasalig: “Kamo mao ang akong mga saksi.”—Isaias 43:10.

¹⁶ Mahimo nimong suknaon ang imong kaugalingon sa mga pangutanang sama sa: ‘Unsa ka bililhon kining espirituwal nga panulondon alang kanako? Igo ba ang akong pagpabili niini nga sa  ingon gihimo nakong panguna sa akong kinabuhi ang pagtuman sa kabubut-on sa Diyos? Ang ako bang pagpabili niini igong makapalig-on kanako sa pagpakigbisog sa bisan unsang tentasyon nga mahimong motultol sa pagkawala niini?’ Ang atong espirituwal nga panulondon makahatag usab kanato ug dulot nga kaamgohan sa atong espirituwal nga kasegurohan nga matagamtam lamang sulod sa organisasyon ni Jehova. (Salmo 91:1, 2) Ang pagsubli sa talagsaong mga hitabo gikan sa modernong-adlaw nga kasaysayan sa organisasyon ni Jehova makapakombinsir kanato nga walay tawo o butang nga makapapha sa katawhan ni Jehova gikan sa nawong sa yuta.—Isaias 54:17; Jeremias 1:19.

17. Unsa pay gikinahanglan gawas sa pagdepende lamang sa atong espirituwal nga panulondon?

¹⁷ Siyempre, dili maayo nga magdepende na lang kita sa atong espirituwal nga panulondon. Ang matag usa kanato kinahanglang mag-ugmad ug suod nga relasyon sa Diyos. Human maghago si Pablo sa pagpalig-on sa pagtuo sa mga Kristohanon sa Filipos, siya misulat kanila: “Tungod niana, akong mga hinigugma, sa paagi nga kamo kanunay nga nagmasinugtanon, dili lamang sa panahon nga ako anaa diha, kondili labi pa gayod karon sa panahon nga ako wala diha, magpadayon kamo sa pagpanlimbasog sa inyong kaugalingong kaluwasan uban ang kahadlok ug pagpangurog.” (Filipos 2:12) Ang atong kaluwasan wala magdepende sa uban.

18. Sa unsang paagi ang Kristohanong mga kalihokan makapalalom sa atong kaamgohan sa atong pagka-Kristohanon?

¹⁸ Magmapuliki sa Kristohanong mga kalihokan. Giingon nga “ang buluhaton dakog impluwensiya sa personalidad.” Ang mga Kristohanon karon gisugo sa paghimo sa hinungdanong buluhaton nga pagsangyaw sa maayong balita sa natukod nang Gingharian sa Diyos. Si Pablo nag-ingon: “Sanglit ako, sa pagkatinuod, usa ka apostol alang sa kanasoran, akong gihimaya ang akong ministeryo.” (Roma 11:13) Ang atong buluhatong pagsangyaw magpaila nga kita lahi sa kalibotan, ug ang atong pagpakigbahin niana labi pang magpaila nga kita mga Kristohanon. Ang pagkapuliki diha sa ubang teokratikanhong mga kalihokan, sama sa Kristohanong mga tigom, mga programa sa pagtukod ug mga dapit sa pagsimba, mga paningkamot sa pagtabang niadtong nanginahanglan, ug ang susama niana, makapalalom sa atong kaamgohan sa atong pagka-Kristohanon.—Galacia 6:9, 10; Hebreohanon 10:23, 24.

Klarong Ilhanan, Tinuod nga mga Panalangin

19, 20. (a) Unsang mga kaayohan ang imong natagamtam tungod sa pagkahimong Kristohanon? (b) Sa unsa nag-agad ang atong tinuod nga pagkatawo?

¹⁹ Paggahin ug panahon sa pagpamalandong sa daghang benepisyo ug mga bentaha nga atong natagamtam tungod kay kita maoy tinuod nga mga Kristohanon. Atong pribilehiyo nga mailhan mismo ni Jehova. Ang manalagnang si Malaquias miingon: “Kadtong mga nahadlok kang Jehova nagsultihanay sa usag usa, ang matag usa sa iyang isigkaingon, ug si Jehova nagpadayon sa pagtagad ug sa pagpamati. Ug usa ka basahon sa handomanan gisulat sa iyang atubangan alang kanila nga nahadlok kang Jehova ug kanila nga nagapalandong sa iyang ngalan.” (Malaquias 3:16) Mahimo kitang isipon sa Diyos ingong iyang mga higala. (Santiago 2:23) Ang atong kinabuhi gipatahom sa klaro nga kaamgohan sa katuyoan, dulot nga kahulogan, ug sa maayo, mabungahon nga mga tumong. Ug gihatagan kitag paglaom nga makabaton ug walay-kataposang kaugmaon.—Salmo 37:9.

²⁰ Hinumdomi nga ang imong tinuod nga pagkatawo ug bili ingong tawo nag-agad sa kon unsay hunahuna sa Diyos kanimo, dili sa kon unsay hunahuna sa mga tawo kanimo. Ang uban mohukom tingali kanato sumala sa dili-hingpit nga mga sukdanan sa tawo. Apan ang gugma ug personal nga interes sa Diyos maoy tinuod nga basehanan sa atong bili—kita iyaha. (Mateo10:29-31) Sa baylo, ang atong gugma sa Diyos makapalalom pag-ayo sa atong kaamgohan kon kinsa kita ug makahatag kanato ug klaro kaayo nga direksiyon sa atong kinabuhi. “Kon ang usa ka tawo nahigugma sa Diyos, kini siya nailhan niya.”—1 Corinto 8:3.

[Footnote]

Nahinumdom Ka Ba?

• Nganong hinungdanon nga ampingan sa mga Kristohanon ang ilang espirituwal nga ilhanan?

• Sa unsang paagi mapalig-on nato ang atong pagka-Kristohanon?

• Sa dihang nag-atubang sa pangutana kon kinsay pahimut-an, unsay makatabang kanato sa paghimo sa hustong desisyon?

• Sa unsang paagi ang dulot nga kaamgohan kon kinsa kita makaimpluwensiya sa atong kaugmaon ingong mga Kristohanon?

[Mga Pangutana sa Pagtuon]

[Mga hulagway sa panid 21]

Ang pagkapuliki nato diha sa Kristohanong mga kalihokan labi pang magpaila nga kita mga Kristohanon