Pagsubida Ngadto sa Kinahiladman sa Saba

ANG gimandoan-sa-Olandes nga isla sa Saba nagsilbi kaniadto nga salipdanan sa mga pirata nga naglawig sa Caribbean Sea nga nangitag agawonon nga mga butang. Karon, kining gamay kaayong isla, nga nahimutang sa 240 kilometros sa sidlakan sa Puerto Rico, maoy puy-anan sa mga 1,600 ka molupyo, 5 kanila maoy mga Saksi ni Jehova. Apan, kining maisogong mga ministro nangitag butang nga labaw pag bili kay sa agawonon nga mga butang. Sila makugihong nangitag mga tawo nga “hustong nakiling alang sa kinabuhing walay kataposan.”—Buhat 13:48.

Ang maayong balita sa Gingharian sa Diyos unang nakaabot sa isla niadtong Hunyo 22, 1952, sa dihang ang 18-metros nga paraw nga Sibia, nga gigamit sa mga Saksi ni Jehova, midunggo sa baybayon sa Saba. (Mateo 24:14) Ang mga misyonaryo nga si Gust Maki ug Stanley Carter misaka sa Hagdan (The Ladder), usa ka agianan nga may kapin sa 500 ka ang-ang sa mga bato ngadto sa Kinahiladman (The Bottom), ang kaulohan sa Saba. a Sulod sa daghang siglo, kining hiktin nga agianan mao ray kaagian aron maabot ang mga molupyo sa isla.

Ang unang opisyal nga gipatik nga taho sa buluhaton sa Kristohanong mga Saksi sa Saba makita sa 1966 Yearbook of Jehovah’s Witnesses. Sumala sa maong taho, diha lamay usa ka aktibong Saksi sa isla. Sa ulahi, ang usa ka pamilya gikan sa Canada migugol ug daghang tuig sa pagsangyaw sa maayong balita didto. Di pa dugay, si Russel ug Kathy, usa ka retiradong magtiayon nga taga-Tinipong Bansa, miadto sa Saba ug nakigbahin  sa pagsangyaw didto. Matikdi ang ilang sugilanon.

Pagduaw sa Saba

Ang akong asawa ug ako miabot nga sakay sa ayroplano ingong mga bisita ni Ronald, nga mao ray Saksi sa isla sulod sa dakong bahin sa katuigang 1990. Iya kaming gihulat sa erport. Mapasalamaton siya sa among gigasa nga gamayng kahon sa mga utanon, kay wala may komersiyal nga pagpanguma nga gitikad sa isla. Sakay sa usa ka gamayng trak, hinayhinay namong gisubida ang naglikolikong kilid sa Mount Scenery ngadto sa tayuktok niining patay nga bolkan.

Mihunong kami sa balangay sa Hell’s Gate samtang gisusi ni Ronald ang bulletin board kon anaa pa ba ang imbitasyon sa pakigpulong publiko sa pagka-Dominggo. Nalipay kami sa pagkakita nga didto pa diay. Misakay siyag balik sa trak, ug mipadayon kami sa among pagsubida ngadto sa kinadak-ang balangay sa isla, ang Windwardside. Sama sa gipasabot sa ngalan niini, kining matahom nga balangay nahimutang sa hurosanag-hangin nga bahin sa isla, nga anaa sa mga 400 metros ibabaw sa lebel sa dagat. Sa nagsubay na kami sa karsada padulong sa balay ni Ron, among nakita ang mabulokong karatula sa atubang nga balkon nga nagpaila niini ingong Kingdom Hall of Jehovah’s Witnesses.

Samtang kami naniudto akong gisukna ang pangutana nga maoy hinungdan sa among pagduaw, “Sa unsang paagi ikaw nahimong magmamantala sa Gingharian dinhi sa Saba?”

“Sa pagkahuman sa konstruksiyon sa sangang buhatan sa mga Saksi ni Jehova sa Puerto Rico niadtong 1993,” matod ni Ron, “ang akong asawa ug ako gustong magpabilin sa usa ka langyaw nga asaynment. Una pa niini, nakaduaw na kami sa Saba uban sa laing magtiayong payunir ug among nahibaloan nga dunay 1,400 ka molupyo dinhi apan walay mga Saksi. Mao nga nakigsulti kami sa Komite sa Sanga sa Puerto Rico bahin sa among pagbalhin.

“Gipanalanginan ang among hangyo, ug sa kataposan kami gitugotan sa pagbalhin. Ikasubo, duha ka tuig sa ulahi nasakit ug grabe ang akong asawa, ug mipauli kami sa California. Sa pagkamatay niya, mibalik ako sa Saba. Abi ninyo, gusto nakong humanon kon unsay akong masugdan.”

Balaybalay nga Pagsangyaw sa Saba

Ang sala sa balay ni Ron nga gitukod usa ka gatos ka tuig na kanhi mao usab ang Kingdom Hall. b Samtang namahaw kami ug nag-andam sa pagsangyaw, ang ulan gikan sa milabay nga panganod nakabasa sa kosina sa gawas. Human sa pamahaw, mibiya kami nga nag-alindahaw nga namalaybalay sa pagsangyaw didto sa Kinahiladman. Sa matag balay, si Ron mitimbaya sa mga tagbalay nga nagsangpit sa ilang ngalan. Nasentro ang among panaghisgot sa di pa dugay nga panghitabo sa ilang lugar. Ang kadaghanang tawo pamilyar na kang Ron ug sa iyang ministeryo, ug daghan ang modawat dayon sa literatura sa Bibliya.

Lisod ang paghupot ug rekord niadtong nagpakitag interes sa mensahe sa Gingharian kon dili ka sinati sa mga taga-balangay. Ngano? Kay “ang balaod nag-ingon nga ang tanang pinuy-anan pintalan sa samang kolor,” matod pa ni Ron. Tuod man, giliraw ko ang akong mga mata ug akong nakita nga ang tanang balay sa Saba puti ug kolor nga may pulang mga atop.

Human sa among panaghisgot sa Bibliya, among gidapit ang tagbalay sa pagtambong sa pakigpulong publiko sa Bibliya nga himoon sa pagka-Dominggo didto sa Kingdom Hall. Kon si Ron anaa lang sa isla, siya ray magpakigpulong kada semana. Sa pagkakaron, adunay 17 ka pagtuon sa Bibliya nga ginadumala sa Saba. Bayente ka tawo ang mitambong sa Memoryal sa Kamatayon ni Kristo sa 2004. Ug bisan tuod kanang gidaghanona daw diyutay ra kaayo, kana maoy 1 ka porsiyento sa tibuok populasyon sa Saba!

Sa pagkatinuod, ang mga Saksi ni Jehova naningkamot gayod nga maabot ang daghang tawo kutob sa maarangan nga dala ang mensahe sa kaluwasan sa Diyos. Kana man usa ka gamay kaayong balangay sama sa Saba o usa ka tibuok kontinente, ang mga Saksi ni Jehova matinumanong nagtuman sa sugo sa “paghimog mga tinun-an sa katawhan sa tanang kanasoran.”—Mateo 28:19.

Ikasubo, natapos ang among pagduaw. Sa pagsakay namo sa ayroplano, kami nangamay agig panamilit. Dili namo malimtan ang among pagduaw sa Saba ug ang among pagsubida ngadto sa Kinahiladman!

[Mga footnote]

[Mga mapa sa panid 10]

(Alang sa aktuwal nga pagkahan-ay, tan-awa ang publikasyon)

PUERTO RICO

[Picture Credit Line sa panid 10]

Background: www.sabatourism.com