Sugilanon sa Kinabuhi

Among Gigamit ang Nag-usab-usab Namong mga Kahimtang sa Pagsangyaw sa Lagyong mga Dapit

SUMALA SA GIASOY NI RICARDO MALICSI

Sa dihang nawad-an akog trabaho tungod sa akong baroganan sa Kristohanong neyutralidad, ang akong pamilya ug ako miampo kang Jehova sa pagtabang kanamo sa pagplano sa among umaabot. Sa among pag-ampo, gipahayag namo ang among tinguha sa pagpalapad sa among ministeryo. Wala madugay human niadto, kami misugod sa pagkinabuhi nga nagbalhinbalhin pagpuyo diha sa walo ka langyawng mga nasod sa duha ka kontinente. Ingong sangpotanan, nakatuman kami sa among ministeryo diha sa lagyong mga dapit.

AKO natawo sa Pilipinas niadtong 1933 sa usa ka pamilya nga sakop sa Philippine Independent Church o Pilipinista. Nahisakop sa maong relihiyon ang tanang 14 ka membro sa among pamilya. Sa hapit na ako mag-edad ug 12, nag-ampo ako sa Diyos sa pagtultol kanako ngadto sa matuod nga relihiyon. Usa sa akong mga magtutudlo naglista kanako sa usa ka klase bahin sa relihiyon, ug ako nahimong debotadong Katoliko. Wala koy sipyat sa pagkompisal inigka-Sabado o sa Misa inigka-Dominggo. Ugaling lang, mibati akog pagduhaduha ug pagkadili-tagbaw. Nalibog ako sa mga pangutana bahin sa kon unsay mahitabo sa mga tawo inigkamatay ug bahin sa impiyernong kalayo ug Trinidad. Ang mga tubag sa relihiyosong mga lider walay unod ug di-makapatagbaw.

Pagbatog Makapatagbaw nga mga Tubag

Samtang nagtungha sa kolehiyo, miapil ako sa usa ka kapunongan nga naglangkit kanako sa panag-away, panugal, panigarilyo, ug ubang  di-maayong mga kalihokan. Usa ka gabii niana, nahimamat nako ang inahan sa usa sa akong mga klasmet. Usa siya sa mga Saksi ni Jehova. Akong gipresentar kaniya ang samang mga pangutana nga akong gisukot sa akong mga magtutudlo sa relihiyon. Gitubag niya ang tanan nakong pangutana pinasukad sa Bibliya, ug ako nakombinsir nga ang iyang gisulti maoy kamatuoran.

Mipalit ako ug Bibliya ug misugod sa pagtuon niana uban sa mga Saksi. Sa wala madugay ako nagtambongan na sa tanang tigom sa mga Saksi ni Jehova. Isip pagsunod sa maalamong tambag sa Bibliya nga “ang daotang pakig-uban makadaot sa mapuslanong pamatasan,” mihunong ako pagpakig-uban sa akong imoral nga mga higala. (1 Corinto 15:33) Nakatabang kadto kanako sa pag-uswag sa akong pagtuon sa Bibliya ug sa ulahi sa akong pagpahinungod kang Jehova. Human sa akong bawtismo niadtong 1951, ako nag-alagad sa makadiyot ingong bug-os-panahong ministro (payunir). Dayon niadtong Disyembre 1953, ako naminyo kang Aurea Mendoza Cruz, nga nahimo nakong tibuok-kinabuhi nga kauban ug matinumanong isigkamagbubuhat sa ministeryo.

Tubag sa Among mga Pag-ampo

Gusto kaayo namong magpayunir. Ugaling lang, ang among tinguha sa pag-alagad kang Jehova sa mas bug-os pa wala dayon matuman. Bisan pa niana, wala kami mohunong sa pag-ampo kang Jehova sa pagbukas ug mga kahigayonan sa pag-alagad kaniya. Apan lisod ang among panginabuhi. Sa gihapon, wala namo kalimti ang among espirituwal nga mga tumong, ug sa nag-25 anyos na ako, natudlo ako nga alagad sa kongregasyon, ang nagadumalang magtatan-aw sa usa ka kongregasyon sa mga Saksi ni Jehova.

Samtang miuswag ang akong kahibalo sa Bibliya ug mas nakasabot sa mga prinsipyo ni Jehova, akong naamgohan nga ang akong trabaho nahisupak diay sa akong matul-id nga baroganan ingong neyutral nga Kristohanon. (Isaias 2:2-4) Nakahukom ako sa paghunong. Kadto maoy usa ka tigi sa among pagtuo. Unsaon man nako pagtagana ang mga panginahanglan sa akong pamilya? Nag-ampo na usab kami kang Jehova nga Diyos. (Salmo 65:2) Gibubo namo kaniya ang among mga kabalaka ug mga kahadlok, apan gipadayag usab namo kaniya ang among tinguha sa pag-alagad diin mas dako ang panginahanglan sa mga magsasangyaw sa Gingharian. (Filipos 4:6, 7) Wala namo damha nga ang nagkalainlaing kahigayonan mabuksan alang kanamo!

Ang Pagsugod sa Among Panaw

Niadtong Abril 1965, akong gidawat ang trabaho ingong superbisor sa pagluwas sa mahagsa ug masunog nga eroplano didto sa Vientiane International Airport sa Laos, ug kami namalhin didto. Sa siyudad sa Vientiane, didtoy 24 ka Saksi, ug nalingaw kami sa pagsangyaw uban sa mga misyonaryo ug sa pipila ka igsoon sa maong lugar. Sa ulahi, ako gibalhin ngadto sa Udon Thani Airport, Thailand. Walay laing Saksi sa Udon Thani. Ingong usa ka pamilya, gidumala namo mismo ang tanang senemanang mga tigom. Kami nagbalaybalay, nagbalikduaw, ug nagsugod ug mga pagtuon sa Bibliya.

Among nahinumdoman ang tambag ni Jesus sa iyang mga tinun-an nga sila kinahanglang “magpadayon sa pagpamungag daghan.” (Juan 15:8) Busa naningkamot kami sa pagsunod sa ilang panig-ingnan ug nagpadayon sa pagwali sa maayong balita. Sa wala madugay nakita namo ang mga sangpotanan. Usa ka Thai nga dalagita midawat sa kamatuoran ug nahimo namong espirituwal nga sister. Duha ka Amerikano nga taga-Amerika del Norte midawat sa kamatuoran ug sa ulahi nahimong Kristohanong mga ansiyano. Nagpadayon kami sa pagsangyaw sa maayong balita sulod sa kapig napulo ka tuig sa amihanang Thailand. Pagkamalipayon namo sa pagkahibalo nga karon aduna nay usa ka kongregasyon sa Udon Thani! Ang ubang mga binhi sa kamatuoran nga among gipugas nagapamunga pa gihapon.

Apan, ikasubo nga kinahanglan na usab kaming mobiya, ug kami nag-ampo sa “Agalon sa pagpangani” sa pagtabang kanamo sa pagpadayon nga makapakigbahin sa pagsangyaw. (Mateo 9:38) Kami gibalhin ngadto sa Tehran, ang kaulohan sa Iran. Panahon kadto sa pagmando sa Shah.

Pagsangyaw sa Lisod nga mga Teritoryo

Sa among pag-abot sa Tehran, nakaplagan dayon namo ang among espirituwal nga mga igsoon. Nakig-uban kami sa gamayng grupo sa mga Saksi nga gilangkoban sa 13 ka nagkalainlaing nasyonalidad. Kinahanglang magpasibo kami  aron makasangyaw sa maayong balita sa Iran. Bisan tuod wala kami supaka sa bug-os, angay kaming magmabinantayon.

Tungod sa eskedyul sa trabaho sa mga interesado, usahay magdumala kami ug mga pagtuon sa Bibliya sa tungang gabii o hangtod sa kaadlawon. Apan nalipay gayod kami sa pagkakita sa bunga sa maong mga paghago! Daghang Pilipino ug Koreanong mga pamilya midawat sa kamatuoran ug nagpahinungod kang Jehova.

Ang sunod nakong asaynment sa trabaho mao ang Dhaka, Bangladesh. Miabot kami didto niadtong Disyembre 1977. Kini maoy lain pang nasod diin ang among pagsangyaw lisod. Apan, kanunay namong gihinumdoman nga kinahanglan kaming magmaaktibo kanunay. Tungod sa paggiya sa espiritu ni Jehova, nakakaplag kamig daghang pamilya nga nag-angkong mga Kristohanon. Ang uban kanila giuhaw sa makapalagsik nga mga tubig sa kamatuoran nga anaa sa Balaang Kasulatan. (Isaias 55:1) Tungod niadto, nakasugod kamig daghang pagtuon sa Bibliya.

Among gitiman-an nga kabubut-on sa Diyos nga ang “tanang matang sa mga tawo mangaluwas.” (1 Timoteo 2:4) Ikalipay, walay nagsurangsurang kanamo. Aron mabuntog ang bisan unsang pagkamapihigon, among gitino nga magmahigalaon kaayo sa among pagduol. Sama kang apostol Pablo, naningkamot kami nga ‘mahimong tanang butang ngadto sa tanang matang sa katawhan.’ (1 Corinto 9:22) Sa dihang suknaon kami kon nganong kami miduaw, maluloton namo kining ipatin-aw, ug among nakaplagan nga ang kadaghanan mahigalaon kaayo.

Sa Dhaka nakakaplag kamig usa ka lokal nga Saksi ug gidasig namo ang sister sa pagduyog kanamo sa Kristohanong mga tigom ug sa ulahi sa pagsangyaw. Dayon, ang akong asawa nagtuon sa Bibliya uban sa usa ka pamilya ug nagdapit kanila sa pagtambong sa mga tigom. Tungod sa mahigugmaong kalulot ni Jehova, ang tibuok pamilya nakadangat sa kamatuoran. Sa ulahi, ang ilang duha ka anak nga babaye nakatabang sa paghubad sa literatura sa Bibliya ngadto sa Bengali nga pinulongan, ug daghan sa ilang mga paryente nakaila na usab kang Jehova. Daghan pang mga estudyante sa Bibliya ang midawat sa kamatuoran. Kadaghanan kanila nag-alagad karon ingong mga ansiyano o mga payunir.

Sanglit daghan kaayog tawo ang siyudad sa Dhaka, among gidapit ang pipila ka membro sa among pamilya sa pagtabang kanamo sa pagsangyaw. Daghan ang misanong ug miduyog kanamo sa Bangladesh. Pagkamalipayon ug pagkamapasalamaton namo kang Jehova tungod sa kahigayonan nga among nabatonan sa pagpakig-ambit sa pagsangyaw sa maayong balita sa maong nasod! Gikan sa gamay kaayong sinugdanan nga usa lamang ka tawo, karon aduna nay duha ka kongregasyon sa Bangladesh.

Niadtong Hulyo 1982, kinahanglan na usab kaming mamutos ug mobiya sa Bangladesh. Kami masulub-ong mibiya sa among mga igsoon. Wala madugay human niadto, nakadawat akog trabaho sa Entebbe International Airport, sa Uganda, diin kami mopuyo sa upat ka tuig ug pito ka bulan. Unsay sarang namong mahimo sa pagbalaan sa bantogang ngalan ni Jehova niining nasora?

Pag-alagad Kang Jehova sa Sidlakang Aprika

Sa pag-abot namo sa Entebbe International Airport, usa ka drayber ang misugat ug nagdala nako ug sa akong asawa ngadto sa among sak-anan. Sa pagbiya namo sa erport, gisangyawan dayon nako ang drayber bahin sa Gingharian sa Diyos. Iya akong gipangutana: “Usa ka ba sa mga Saksi ni Jehova?” Sa mitubag akog oo, ang drayber miingon: “Usa sa inyong mga igsoon nagtrabaho sa control tower.” Dihadiha ako siyang gihangyo nga dalhon kami didto. Nahimamat namo ang igsoon nga nalipay pag-ayo sa pagkakita kanamo ug among gihikay ang mga tigom ug pag-alagad sa kanataran.

 Aduna lamay 228 ka magmamantala sa Gingharian sa Uganda niadtong panahona. Uban sa duha ka igsoong lalaki sa Entebbe, gigugol namo ang among unang tuig sa pagpugas sa mga binhi sa kamatuoran. Sanglit ang mga tawo didto ganahan mang mobasa, nakapahiluna kamig daghang literatura, lakip na ang gatosan ka magasin. Gidapit namo ang mga igsoon sa Kampala, ang kaulohan, sa pagtabang kanamo sa pagsangyaw sa teritoryo sa Entebbe sa mga hinapos sa semana. Sa akong unang pakigpulong publiko, lima ang mitambong—lakip na ako.

Sa misunod nga tulo ka tuig, nasinati namo ang pipila sa labing malipayong mga gutlo sa among kinabuhi, nga makita kadtong among gitudloan nga misanong ug kusog nga miuswag. (3 Juan 4) Sa usa ka sirkitong asembliya, unom sa among mga estudyante sa Bibliya ang nabawtismohan. Daghan kanila miingon nga sila nadasig sa pagsulod sa bug-os-panahong pag-alagad kay ila kaming nakita nga nagpayunir, bisan pag duna kamiy bug-os-panahong mga trabaho.

Naamgohan namo nga ang among trabahoan mahimong magmabungahon usab. Sa usa ka okasyon, akong giduol ang usa ka bombero sa erport ug gipaambit kaniya ang paglaom nga gipasukad sa Bibliya bahin sa kinabuhi sa paraisong yuta. Akong gipakita kaniya gikan sa iyang Bibliya nga ang masinundanong katawhan magpuyo sa pakigdait ug panaghiusa, nga dili na mag-antos sa kakabos, kawalay puy-anan, sakit, o kamatayon. (Salmo 46:9; Isaias 33:24; 65:21, 22; Pinadayag 21:3, 4) Ang pagbasa niini diha sa iyang Bibliya mismo nakapukaw sa iyang interes. Nasugdan dayon ang pagtuon sa Bibliya. Mitambong siya sa tanang tigom. Sa wala madugay siya nagpahinungod kang Jehova ug nabawtismohan. Sa ulahi siya miduyog kanamo sa bug-os-panahong pag-alagad.

Duha ka beses nga miulbo ang gubat sibil sa Uganda samtang didto kami, apan wala kana makapahunong sa among espirituwal nga mga kalihokan. Ang mga membro sa pamilya niadtong nagtrabaho alang sa internasyonal nga mga ahensiya gibakwet ngadto sa Nairobi, Kenya, sulod sa unom ka bulan. Kaming nahibilin sa Uganda nagpadayon sa among Kristohanong mga tigom ug pagsangyaw, bisan tuod kinahanglan kaming magmaalamon ug magmabinantayon.

Niadtong Abril 1988, nahuman na ang akong asaynment sa trabaho ug namalhin na usab kami. Mibiya kami sa Kongregasyon sa Entebbe uban ang dulot nga katagbawan tungod sa espirituwal nga mga pag-uswag didto. Niadtong Hulyo 1997, nakahigayon kami sa pagduaw pag-usab sa Entebbe. Niadtong panahona, ang uban sa among mga estudyante sa Bibliya kanhi maoy mga ansiyano na. Nahinam gayod kami sa pagkakita sa 106 nga mitambong sa Pakigpulong Publiko!

Pagbalhin Ngadto sa Wala pa Matandog nga Teritoryo

Makapahimulos kaha kami ug bag-ong mga kahigayonan? Oo, ang akong sunod nga asaynment sa trabaho mao ang Mogadishu International Airport, sa Somalia. Determinado kami nga pahimuslan ug maayo kining bag-ong kahigayonan sa pag-alagad diha sa wala pa matandog nga teritoryo.

Ang among pagsangyaw kasagarang gihimo diha lamang sa mga kawani sa embahada, sa Pilipinong mga nagtrabaho, ug sa ubang mga langyaw. Sagad namo silang mahimamat sa tiyanggihan. Giduaw usab namo sila sa ilang mga balay aron makighigala. Pinaagi sa paggamit sa kabatid, kamamugnaon, kamaalamon, ug bug-os nga pagsalig kang Jehova, nakapaambit kami sa mga kamatuoran sa Bibliya ngadto sa uban, ug kadto namunga taliwala sa mga tawo nga may nagkalainlaing nasyonalidad. Paglabay sa duha ka tuig,  mibiya kami sa Mogadishu—sa wala pa mosilaob ang gubat didto.

Dayon ang International Civil Aviation Organization nag-asayn kanako ngadto sa Yangon, Myanmar. Nabuksan na usab ang maayong mga kahigayonan alang kanamo aron makatabang sa matinud-anog-kasingkasing nga mga tawo nga makakat-on bahin sa mga katuyoan sa Diyos. Human sa Myanmar, kami giasayn sa Dar es Salaam, Tanzania. Ang pagsangyaw sa maayong balita sa balaybalay sa Dar es Salaam mas sayon kay dihay Ingles ug sinultihan nga komunidad.

Sa tanang nasod nga among gitrabahoan, diyutay ra ang mga suliran sa pagtuman sa among ministeryo, bisan tuod sa daghang kahimtang, dihay mga pagdili sa buluhaton sa mga Saksi ni Jehova. Tungod sa kahimtang sa akong trabaho, nga sagad nalangkit sa kagamhanan o sa internasyonal nga mga ahensiya, ang mga tawo wala mokuwestiyon sa among mga kalihokan.

Tungod sa akong sekular nga pangempleyo, ang akong asawa ug ako nagbalhinbalhin ug puyo sulod sa tulo ka dekada. Bisan pa niana, giisip namo ang akong trabaho ingong paagi sa pagkab-ot sa usa ka tumong. Ang una namong tumong mao kanunay ang pagpalambo sa intereses sa Gingharian sa Diyos. Mapasalamaton kami kang Jehova tungod sa pagtabang kanamo sa pagpahimulos sa among nag-usab-usab nga mga kahimtang ug sa pagtagamtam sa talagsaong pribilehiyo sa pagpakaylap sa maayong balita ngadto sa lagyong mga dapit.

Balik sa Among Gigikanan

Sa edad nga 58, nakahukom ako sa pagretiro ug sayo ug sa pagbalik sa Pilipinas. Sa among pagbalik, kami nag-ampo kang Jehova sa pagtultol sa among mga lakang. Misugod kami sa pag-alagad uban sa usa ka kongregasyon sa Trece Martires City, sa lalawigan sa Cavite. Sa una namong pag-abot, diha lamay 19 ka magmamantala sa Gingharian sa Diyos. Giorganisar namo ang adlaw-adlaw nga pagsangyaw, ug daghang pagtuon sa Bibliya ang nasugdan. Misugod pag-uswag ang kongregasyon. Sa usa ka higayon, ang akong asawa may 19 ka pagtuon sa Bibliya, ug ako may 14.

Wala madugay naghuot na kami sa Kingdom Hall. Nag-ampo kami kang Jehova bahin niini. Usa ka espirituwal nga igsoon ug ang iyang asawa mihukom sa pagdonar ug lote, ug gipahulam kamig salapi sa sangang buhatan aron sa pagtukod ug bag-ong Kingdom Hall. Ang bag-ong tinukod dako ug epekto diha sa pagsangyaw ug ang tigtambongan miuswag kada semana. Sa pagkakaron, mobiyahe kami ug kapin sa duha ka oras idabuwelta aron sa pagtabang sa laing kongregasyon nga may 17 ka magmamantala.

Ang akong asawa ug ako nagpabili sa pribilehiyo nga among napahimuslan sa pag-alagad sa daghang nagkalainlaing nasod. Sa paghinumdom sa among kinabuhi nga nagsigeg balhinbalhin, kami dulot nga nagmatagbawon sa pagkahibalo nga kini gigamit sa labing maayong paagi—sa pagtabang sa uban sa pagkakat-on bahin kang Jehova!

[Mapa sa panid 24, 25]

(Alang sa aktuwal nga pagkahan-ay, tan-awa ang publikasyon)

TANZANIA

UGANDA

SOMALIA

IRAN

BANGLADESH

MYANMAR

LAOS

THAILAND

PILIPINAS

[Hulagway sa panid 23]

Uban sa akong asawa, si Aurea