Ang Maayong Panggawi ‘Magdayandayan sa Pagtulon-an sa Diyos’

ANG batan-ong si Maria nga taga-Kransnoyarsk, Rusya, maayo kaayong mokanta nga gipaapil siya sa iyang maestra sa koro sa eskuylahan. Sa wala madugay human niana, matinahorong giduol ni Maria ang usa sa iyang mga maestra aron sa pagpatin-aw nga dili siya makakanta sa pipila ka awit. Ngano man? Tungod kay ang pagkanta ug mga awit nga dunay relihiyosong mga kahulogan supak sa iyang gipasukad-sa-Bibliyang mga pagtuo. Kay nakalitan, nangutana ang maestra, ‘Unsa may sayop sa paghimaya sa Diyos diha sa usa ka awit?’

Aron ipakita kon nganong dili niya awiton ang usa ka awit bahin sa Trinidad nga Diyos, giablihan ni Maria ang iyang Bibliya ug gipatin-aw nga ang Diyos ug si Jesu-Kristo dili usa ka Diyos ug ang balaang espiritu mao ang aktibong puwersa sa Diyos. (Mateo 26:39; Juan 14:28; Buhat 4:31) Miingon si Maria: “Wala maapektahi ang akong relasyon sa maestra. Sa katibuk-an, aduna kamiy maayo kaayong mga magtutudlo sa among eskuylahan. Gusto nilang magmatinud-anon kami.”

Sa tibuok tuig sa pagtungha, gitahod sa mga magtutudlo ug sa mga klasmet usab ni Maria ang iyang baroganan. Si Maria miingon: “Ang mga prinsipyo sa Bibliya nakatabang sa akong kinabuhi. Sa kataposan sa tuig sa pag-eskuyla, nakadawat akog ganti alang sa pagkamatinud-anon ug kahapsay, samtang ang akong mga ginikanan nakadawat ug opisyal nga sulat gikan sa eskuylahan nga nagpasalamat sa ilang maayong pagmatuto sa ilang anak nga babaye.”

Si Maria nabawtismohan niadtong Agosto 18, 2001. Matod niya: “Nalipay ako nga makaalagad sa kahibulongang Diyos nga si Jehova!” Ang mga batan-ong Saksi ni Jehova sa tibuok kalibotan nagtuman sa mga pulong sa Tito 2:​10, diin atong mabasa: ‘Dayandayani ang pagtulon-an sa atong Manluluwas, ang Diyos, sa tanang butang.’

[Hulagway sa panid 32]

Sulat agig pasalamat ug sertipiko sa pasidungog

[Hulagway sa panid 32]

Si Maria ug ang iyang mga ginikanan human sa iyang bawtismo