Maalamong Giya Para sa mga Magtiayon

“Ang mga asawa kinahanglang magpasakop sa ilang mga bana ingon nga sa Ginoo. Mga bana, magpadayon sa paghigugma sa inyong mga asawa.”—EFESO 5:22, 25.

1. Unsa ang hustong panglantaw sa kaminyoon?

 SI Jesus miingon nga ang kaminyoon maoy pagyugo sa Diyos sa lalaki ug babaye aron mahimong “usa ka unod.” (Mateo 19:5, 6) Kini naglangkit sa duha ka tawo nga dili parehas ug mga personalidad nga nagtuon sa pag-ugmad ug samang interes ug naningkamot sa pagkab-ot sa samang mga tumong. Ang kaminyoon maoy tibuok-kinabuhi nga pag-inunongay, dili ordinaryong kasabotan nga mahimong talikdan ra dayon. Sa daghang nasod, dili lisod ang pagdiborsiyo, apan sa panglantaw sa usa ka Kristohanon, ang kaminyoon sagrado. Matapos lamang kini tungod sa bug-at kaayong hinungdan.—Mateo 19:9.

2. (a) Unsang tabang ang mabatonan sa mga magtiayon? (b) Nganong hinungdanon nga paningkamotang molampos ang kaminyoon?

² Usa ka tigtambag labot sa kaminyoon miingon: “Ang usa ka malamposong kaminyoon maoy proseso sa padayong kausaban samtang kini nagpadayag ug bag-ong mga isyu, nagsagubang sa mga problema nga motungha, ug naggamit sa mga kahinguhaan nga mabatonan sa matag hugna sa kinabuhi.” Alang sa Kristohanong mga magtiayon, ang maong mga kahinguhaan naglakip sa maalamong tambag gikan sa Bibliya, pagpaluyo gikan sa mga isigka-Kristohanon, ug sa suod nga relasyon kang Jehova pinaagi sa pag-ampo. Ang malamposong kaminyoon molahutay, ug latas sa  katuigan, kini makahatag ug kalipay ug katagbawan sa bana ug asawa. Labawng hinungdanon, kini maghatag ug kadungganan kang Jehova nga Diyos, ang Tagmugna sa kaminyoon.—Genesis 2:18, 21-24; 1 Corinto 10:31; Efeso 3:15; 1 Tesalonica 5:17.

Sundoga si Jesus ug ang Iyang Kongregasyon

3. (a) Sumaryoha ang tambag ni Pablo ngadto sa mga magtiayon. (b) Unsang maayong panig-ingnan ang gihatag ni Jesus?

³ Duha ka libo ka tuig kanhi, si apostol Pablo mihatag ug maalamong tambag ngadto sa Kristohanong mga magtiayon sa dihang siya misulat: “Ingon nga ang kongregasyon nagapasakop kang Kristo, mao man usab ang mga asawa angay nga magpasakop sa ilang mga bana sa tanang butang. Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efeso 5:24, 25) Pagkanindot nga pagtandi ang gipahayag dinhi! Ang Kristohanong mga asawa nga mapainubsanong nagpasakop sa ilang mga bana nagsundog sa kongregasyon sa pag-ila ug pagtuman sa prinsipyo sa pagkaulo. Ang magtutuong mga bana nga nagpadayon sa paghigugma sa ilang mga asawa, sa maayo o sa malisod nga mga panahon, nagpasundayag nga sila nagsunod gayod sa panig-ingnan ni Kristo sa paghigugma sa kongregasyon ug pag-atiman niana.

4. Sa unsang paagi ang mga bana makasundog sa panig-ingnan ni Jesus?

⁴ Ang Kristohanong mga bana mao ang mga ulo sa ilang mga pamilya, apan sila usab adunay ulo, si Jesus. (1 Corinto 11:3) Busa, maingon nga si Jesus nag-atiman sa iyang kongregasyon, ang mga bana usab mahigugmaong nag-atiman sa ilang mga pamilya sa espirituwal ug pisikal nga paagi, bisan pag nagkinahanglan kanag personal nga sakripisyo. Ilang giuna ang kaayohan sa ilang mga pamilya imbes ang ilang mga tinguha ug mga kagustohan. Si Jesus miingon: “Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mateo 7:12) Kanang prinsipyoha mapadapat ilabina diha sa kaminyoon. Gipakita kini ni Pablo sa dihang siya miingon: “Ang mga bana angay nga maghigugma sa ilang mga asawa sama sa ilang kaugalingong mga lawas. . . . Wala gayoy tawo nga nagdumot sa iyang kaugalingong unod; kondili nagapakaon ug nagapangga niini.” (Efeso 5:28, 29) Ang lalaki angayng magpakaon ug magpangga sa iyang asawa sa samang kasibot nga siya nagpakaon ug nag-atiman sa iyang kaugalingon.

5. Sa unsang paagi ang mga asawa makasundog sa Kristohanong kongregasyon?

⁵ Ang diyosnong mga asawa nag-isip sa Kristohanong kongregasyon ingong modelo. Sa dinhi pa si Jesus sa yuta, ang iyang mga sumusunod kinabubut-ong mibiya sa ilang kanhing mga trabaho ug misunod kaniya. Human sa iyang kamatayon, sila nagpadayon sa pagpasakop kaniya, ug sa milabayng duolan sa 2,000 ka tuig, ang matuod nga Kristohanong kongregasyon nagpasakop gihapon kang Jesus ug nagsunod sa iyang pagpangulo sa tanang butang. Sa samang paagi ang Kristohanong mga asawa dili magtamay sa ilang mga bana o magpakamenos sa Kasulatanhong kahikayan sa pagkaulo diha sa kaminyoon. Hinunoa, sila nagtabang ug nagpasakop sa ilang mga bana, nga nakigtambayayong kanila, ug sa ingon nagdasig kanila. Sa dihang ang bana ug asawa molihok sa mahigugmaong paagi, ang ilang kaminyoon magmalamposon ug silang duha magmalipayon sa ilang relasyon.

 Magpadayon sa Pagpuyo Uban Kanila

6. Unsang tambag ang gihatag ni Pedro sa mga bana, ug nganong hinungdanon kini?

⁶ May tambag usab si apostol Pedro sa mga magtiayon, ug ang iyang gisulti ngadto sa mga bana prangka kaayo. Siya miingon: “Magpadayon sa pagpuyo sa samang paagi uban [sa inyong mga asawa] sumala sa kahibalo, nga maghatag kanila ug kadungganan samag ngadto sa usa ka sudlanan nga mas mahuyang, ang babaye, sanglit kamo mga manununod man usab uban kanila sa dili-takos nga pabor sa kinabuhi, aron nga dili mababagan ang inyong mga pag-ampo.” (1 Pedro 3:7) Ang pagkaugdang sa tambag ni Pedro gipatin-aw diha sa kataposang mga pulong nianang bersikuloha. Kon ang bana dili magpasidungog sa iyang asawa, ang iyang relasyon kang Jehova maapektahan. Ang iyang mga pag-ampo mababagan.

7. Sa unsang paagi pasidunggan sa bana ang iyang asawa?

⁷ Nan, sa unsang paagi ang mga bana makahatag ug kadungganan sa ilang mga asawa? Ang pagpasidungog sa asawa nagpasabot nga trataron siya sa mahigugmaong paagi, uban ang pagtahod ug dignidad. Kanang malulotong pagtratar sa asawa morag talagsaon para sa daghang tawo. Usa ka Gregong eskolar misulat: “Ilalom sa Romanhong balaod ang babaye walay katungod. Sa balaod ang iyang katungod magpabiling sama sa iya sa bata. . . . Siya bug-os nga magpasakop sa iyang bana, ug kontrolado gayod sa iyang bana.” Pagkalahi gayod niini kon itandi sa Kristohanong mga pagtulon-an! Ang Kristohanong bana magpasidungog sa iyang asawa. Ang iyang mga pakiglabot kaniya gigamhan sa Kristohanong mga prinsipyo, dili sa personal nga kapritso. Dugang pa, ang bana mahunahunaon sa iyang asawa “sumala sa kahibalo,” nga maghunahuna nga siya usa ka sudlanan nga mas huyang.

“Usa ka Sudlanan nga Mas Mahuyang” sa Unsang Paagi?

8, 9. Sa unsang mga paagi nga ang mga babaye sama sa mga lalaki?

⁸ Sa pag-ingon nga ang babaye “usa ka sudlanan nga mas mahuyang,” wala magpasabot si Pedro nga ang mga babaye mas huyang sa mga lalaki sa kinaadman o sa espirituwalidad. Tinuod, daghang Kristohanong mga lalaki ang adunay mga pribilehiyo diha sa kongregasyon nga wala hunahunaa sa mga babaye nga ilang mabatonan, ug diha sa pamilya ang mga babaye magpasakop sa ilang  mga bana. (1 Corinto 14:35; 1 Timoteo 2:12) Bisan pa niana, ang samang pagtuo, paglahutay, ug taas nga moral nga mga sukdanan gikinahanglan sa tanan, mga lalaki ug babaye. Ug sumala sa giingon ni Pedro, ang bana ug asawa maoy “mga manununod . . . sa dili takos nga pabor sa kinabuhi.” Mahitungod sa kaluwasan, sila adunay samang baroganan atubangan kang Jehova nga Diyos. (Galacia 3:28) Si Pedro nagsulat sa dinihogang mga Kristohanon sa unang siglo. Busa, ang iyang mga pulong nagpahinumdom sa Kristohanong mga bana nga ingong “kaubang mga manununod ni Kristo,” sila ug ang ilang mga asawa adunay susamang langitnong paglaom. (Roma 8:17) Moabot ang panahon nga sila mag-alagad ingong mga saserdote ug mga hari didto sa langitnong Gingharian sa Diyos!—Pinadayag 5:10.

⁹ Ang dinihogang Kristohanong mga asawa dili gayod ubos sa ilang dinihogang Kristohanong mga bana. Ug sa prinsipyo, mao usab kanay kahimtang niadtong adunay yutan-ong paglaom. Ang mga lalaki ug babaye sa “dakong panon” naglaba sa ilang hatag-as nga mga besti ug nagpaputi niana sa dugo sa Kordero. Ang mga lalaki ug babaye nakigbahin “adlaw ug gabii” sa tibuok-kalibotang pagsinggit ug pagdayeg kang Jehova. (Pinadayag 7:9, 10, 14, 15) Ang mga lalaki ug babaye nagpaabot nga makatagamtam “sa mahimayaong kagawasan sa mga anak sa Diyos,” sa dihang sila magkalipay sa “tinuod nga kinabuhi.” (Roma 8:21; 1 Timoteo 6:19) Sakop man sa dinihogan o sa ubang mga karnero, ang tanang Kristohanon duyog nga nag-alagad kang Jehova ingong “usa ka panon” ilalom sa “usa ka magbalantay.” (Juan 10:16) Usa gayod kini ka makapakombinsir nga rason nga ang Kristohanong bana ug asawa magpakitag angayng pasidungog sa usag usa!

10. Sa unsang diwa nga ang mga babaye ‘mga sudlanan nga mas mahuyang’?

¹⁰ Nan, sa unsang paagi nga ang mga babaye maoy “mga sudlanan nga mas mahuyang”? Tingali ang gitumong dinhi ni Pedro mao ang kamatuoran nga, kasagaran, ang mga babaye mas gamay ug lawas ug menos ug kusog kon itandi sa mga lalaki. Gawas pa, sa atong dili-hingpit nga kahimtang, ang talagsaong pribilehiyo nga manganak makaapektar sa panglawas sa mga babaye. Ang mga babaye nga anaa sa panuigon nga puwedeng manganak mahimong magluya tungod sa ilang binulan nga sakit. Nagkinahanglan gayod sila ug linaing pag-atiman ug pagtagad nianang panahona o sa dihang lapoy kaayo sila tungod sa pagsabak ug pagpanganak. Ang bana nga maghatag ug kadungganan sa iyang asawa, nga nakaamgo sa pagpaluyo nga iyang gikinahanglan, makatabang ug dako sa kalamposan sa kaminyoon.

Diha sa Panimalay nga Nabahin Tungod sa Relihiyon

11. Sa unsang diwa nga ang kaminyoon mahimong molampos gihapon bisan pag ang bana ug asawa dili parehas ug mga relihiyon?

¹¹ Apan, komosta kon ang mga magtiayon dili parehas ug relihiyosong panglantaw tungod kay ang usa kanila midawat sa Kristohanong kamatuoran human sila maminyo ug ang lain wala? Molampos ba ang maong kaminyoon? Daghang ingon niana nga mga kaminyoon ang milampos usab. Ang bana ug asawa nga dili parehas ug relihiyosong mga panglantaw makabaton gihapon ug malamposong kaminyoon sa diwa nga kana motunhay ug maghatag  ug kalipay nilang duha. Gawas pa, ang kaminyoon balido gihapon sa mga mata ni Jehova; sila “usa ka unod” gihapon. Busa, ang Kristohanong mga kapikas gitambagan nga magpabilin uban sa dili-magtutuong kapikas kon mouyon siya. Kon dunay mga anak, sila makabenepisyo gikan sa pagkamatinumanon sa Kristohanong ginikanan.—1 Corinto 7:12-14.

12, 13. Agig pagsundog sa tambag ni Pedro, sa unsang paagi ang Kristohanong mga asawa makatabang sa dili-magtutuong mga bana?

¹² Si Pedro naghatag ug malulotong tambag ngadto sa Kristohanong mga babaye nga nagpuyo diha sa mga panimalay nga nabahin tungod sa relihiyon. Ang prinsipyo sa iyang gisulti ikapadapat usab sa Kristohanong mga bana nga anaa sa mao gihapong situwasyon. Si Pedro misulat: “Kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.”—1 Pedro 3:1, 2.

¹³ Kon ang asawa mataktikanhong makapatin-aw sa iyang pagtuo ngadto sa iyang bana, dalayegon kana. Apan, komosta kon dili siya mamati? Mao kanay iyang gusto. Bisan pa niana, dili gihapon angay nga mawad-an ug paglaom, tungod kay ang Kristohanong panggawi makahatag usab ug puwersadong pamatuod. Daghang bana nga sa sinugdan dili interesado o supak gani sa pagtuo sa ilang mga asawa ang nahimong “hustong nakiling alang sa kinabuhing walay kataposan” human makakita sa maayong panggawi sa ilang mga asawa. (Buhat 13:48) Bisan pag ang bana dili modawat sa Kristohanong kamatuoran, siya tingali makadayeg gihapon sa panggawi sa iyang asawa, sa ingon makapalig-on sa kaminyoon. Usa ka bana kansang asawa Saksi ni Jehova miangkon nga siya dili gayod makakab-ot sa ilang hataas nga mga sukdanan. Bisan pa niana, iyang gitawag ang iyang kaugalingon ingong “malipayong bana sa usa ka makabibihag nga asawa” ug sinserong nagdayeg sa iyang asawa ug sa mga Saksi diha sa sulat nga iyang gipadala sa usa ka mantalaan.

14. Sa unsang paagi ang mga bana makatabang sa dili-magtutuong mga asawa?

¹⁴ Ang Kristohanong mga bana nga nagpadapat sa mga prinsipyo sa gisulti ni Pedro sa samang paagi nagkabig sa ilang mga asawa tungod sa ilang panggawi. Ang dili-magtutuong mga asawa nakamatikod nga ang ilang mga bana nahimong responsable, nga wala na mag-usik-usik sa kuwarta diha sa pagpanigarilyo, pag-inom, ug pagsugal ug wala na mamalikas. Ang uban nianang maong mga kapikas nakahimamat sa ubang mga membro sa Kristohanong kongregasyon. Sila nakadayeg sa mahigugmaong Kristohanong panag-igsoonay, ug ang ilang naobserbahan sa mga igsoon nakapadani kanila kang Jehova.—Juan 13:34, 35.

Ang “Natago nga Pagkatawo sa Kasingkasing”

15, 16. Unsang matanga sa panggawi sa Kristohanong asawa ang mahimong magkabig sa dili-magtutuong bana?

¹⁵ Unsang matanga sa panggawi ang makakabig sa bana? Sa pagkatinuod, kana mao ang matang sa panggawi nga kinaiyanhong giugmad sa Kristohanong mga babaye. Si Pedro miingon: “Himoa nga ang inyong dayandayan dili anha sa panggawas nga pagsalapid sa buhok ug sa pagsul-ob ug mga pahiyas nga bulawan o sa pagsul-ob ug panggawas nga mga besti, kondili diha sa natago nga pagkatawo sa kasingkasing pinaagi sa dili-madunot nga sapot sa malinawon ug malumong espiritu, nga dakog bili sa mga mata sa Diyos. Kay sa ingon, usab, ang balaang mga babaye kanhi nga nanaglaom sa Diyos nagdayandayan sa ilang kaugalingon, nga nagpasakop sa ilang mga bana, ingon nga si Sara nagmasinugtanon kang Abraham, nga nagtawag kaniya nga ‘ginoo.’ Ug kamo mahimong iyang mga anak, kon kamo magpadayon sa pagbuhat ug maayo ug dili mahadlok sa bisan unsang hinungdan sa kalisang.”—1 Pedro 3:3-6.

¹⁶ Gitambagan ni Pedro ang Kristohanong babaye nga dili magsalig sa panggawas nga panagway. Hinunoa, pasagdan niya nga ang iyang bana ang makakita sa epekto sa mga pagtulon-an sa Bibliya diha sa iyang bag-ong personalidad o sa iyang sulod nga pagkatawo. Kinahanglang masaksihan sa bana nga gipadapat sa iyang asawa ang bag-ong personalidad. Tingali itandi niya kana sa daang personalidad nga nabatonan kanhi sa iyang asawa. (Efeso 4:22-24) Seguradong ang “malinawon ug malumong espiritu” makapalagsik ug makapadani. Dili lang kay ang maong espiritu makapahimuot sa bana kondili kini “dakog bili sa mga mata sa Diyos.”—Colosas 3:12.

17. Sa unsang paagi si Sara usa ka maayong panig-ingnan alang sa Kristohanong mga asawa?

¹⁷ Gihisgotan si Sara ingong sumbanan, ug siya takos nga sundogon sa Kristohanong mga asawa  magtutuo man o dili ang ilang mga bana. Sa walay duhaduha giisip ni Sara si Abraham nga iyang ulo. Bisan sa iyang kasingkasing, iyang gitawag si Abraham nga iyang “ginoo.” (Genesis 18:12) Bisan pa niana, wala kana magpamenos sa iyang dignidad. Klaro nga siya usa ka babaye nga lig-on sa espirituwal ug adunay hugot nga pagtuo kang Jehova. Sa pagkatinuod, siya bahin sa ‘bagang panganod sa mga saksi’ kansang panig-ingnan sa pagtuo angayng magpalihok kanato nga ‘daganon ang lumba nga gibutang sa atong atubangan.’ (Hebreohanon 11:11; 12:1) Dili makapamenos sa dignidad sa usa ka Kristohanong asawa nga mahisama kang Sara.

18. Unsang mga prinsipyo ang kinahanglang hinumdoman diha sa panimalay nga nabahin tungod sa relihiyon?

¹⁸ Diha sa panimalay nga nabahin tungod sa relihiyon, ang bana mao gihapon ang ulo. Kon siya magtutuo, siya magmahunahunaon sa mga pagtuo sa iyang asawa apan sa samang paagi dili mokompromiso sa iyang kaugalingong pagtuo. Kon ang asawa mao ang magtutuo, dili usab siya mokompromiso sa iyang pagtuo. (Buhat 5:29) Bisan pa niana, dili niya hagiton ang pagkaulo sa iyang bana. Pasidunggan sa asawa ang posisyon sa iyang bana ug magpabilin siya ilalom “sa balaod sa iyang bana.”—Roma 7:2.

Ang Maalamong Giya sa Bibliya

19. Unsa ang pipila ka mga butang nga makahatag ug kapit-os sa kaminyoon, apan sa unsang paagi mapakigbisogan ang maong mga kapit-os?

¹⁹ Karon, daghang butang ang makahatag ug kapit-os sa kaminyoon. Ang ubang mga lalaki wala motuman sa ilang mga responsibilidad. Ang ubang mga babaye dili modawat sa pagkaulo sa ilang mga bana. Diha sa pipila ka kaminyoon, ang usa giabusohan sa kapikas. Alang sa mga Kristohanon, ang mga kapit-os sa ekonomiya, pagkadili-hingpit sa tawo, ug ang espiritu sa kalibotan uban ang imoralidad ug hiwi nga mga prinsipyo niini makasulay sa pagkamaunongon sa usa. Bisan pa niana, ang Kristohanong mga lalaki ug babaye nga nagsunod sa mga prinsipyo sa Bibliya, bisan unsay ilang situwasyon, makadawat sa panalangin ni Jehova. Bisan pag usa lamang ka kapikas sa kaminyoon ang nagpadapat sa mga prinsipyo sa Bibliya, ang situwasyon mas maayo kay sa ang duha wala magpadapat sa mga prinsipyo. Dugang pa, si Jehova nahigugma ug nagtabang sa iyang mga alagad nga nagmaunongon sa ilang mga panumpa sa kaminyoon bisan sa malisod nga mga situwasyon. Dili niya makalimtan ang ilang pagkamaunongon.—Salmo 18:25; Hebreohanon 6:10; 1 Pedro 3:12.

20. Unsay tambag ni Pedro sa tanang Kristohanon?

²⁰ Human tambagi ang minyong mga lalaki ug babaye, si apostol Pedro mihinapos pinaagig mainitong mga pulong sa pagdasig. Siya miingon: “Sa kataposan, kamong tanan magbaton ug samang panghunahuna, nga magpakitag pagbati alang sa isigkaingon, nga magbaton ug inigsoong pagbati, magmabination uban ang kalumo, magmapainubsanon sa hunahuna, nga dili magabalos ug kadaot sa kadaot o magasultig pasipala sa pasipala, kondili, sa kasukwahi, manghinaot ug kaayohan, tungod kay kamo gitawag alang niini nga dalan, aron kamo makapanunod sa panalangin.” (1 Pedro 3:8, 9) Kini maoy maalamon gayod nga tambag alang sa tanan, ilabina sa mga magtiayon!

Nahinumdom Ka Ba?

• Sa unsang paagi masundog sa Kristohanong mga bana si Jesus?

• Sa unsang paagi masundog sa Kristohanong mga asawa ang kongregasyon?

• Sa unsang paagi ang mga bana magpasidungog sa ilang mga asawa?

• Unsa ang kinamaayohang dalan nga subayon sa Kristohanong asawa kansang bana dili magtutuo?

[Mga Pangutana sa Pagtuon]

[Hulagway sa panid 16]

Ang Kristohanong bana maghigugma ug mag-atiman sa iyang asawa

Ang Kristohanong asawa magtahod ug magpasidungog sa iyang bana

[Hulagway sa panid 17]

Dili sama sa Romanhong balaod, ang Kristohanong mga pagtulon-an nagbaod sa bana sa pagpasidungog sa iyang asawa

[Hulagway sa panid 18]

Ang mga lalaki ug babaye sa “dakong panon” nagpaabot sa walay-kataposang kinabuhi sa Paraiso

[Hulagway sa panid 20]

Giisip ni Sara si Abraham nga iyang ginoo