“Matinumanon Ilalom sa mga Pagsulay”

SAYO sa Abril 1951, kalit nga giatake sa gamhanang gobyerno sa Sobyet ang inosenteng grupo sa mga Kristohanon sa kasadpang Unyon Sobyet—ang mga Saksi ni Jehova. Libolibo ka pamilya—nga naglakip sa gagmayng mga bata, mabdos nga mga babaye, ug mga tigulang—ang gipasakay sa mga bagon ug nag-antos sa kapoy kaayong 20-ka-adlaw nga biyahe sa tren paingon sa Siberia. Gisentensiyahan sila ug permanenteng pagkadestiyero sa ngil-ad, malisod nga mga kahimtang.

Niadtong Abril 2001, ang ika-50 nga kasumaran niining makasaysayanhong hitabo gisaulog didto sa Moscow uban sa pagluwat sa usa ka video nga nagpamatuod sa 50-ka-tuig nga pagpanglupig sa mga Saksi ni Jehova sa kanhing Unyon Sobyet. Diha sa maong dokumentaryo, ang mga historyano ug ang mga nakasaksi nag-asoy kon sa unsang paagi ang mga Saksi nakalahutay ug midaghan pa gani bisan sa grabeng mga kapit-os.

Kini nga dokumentaryo, Faithful Under Trials—Jehovah’s Witnesses in the Soviet Union, nakita na sa milyonmilyong tawo sa Rusya ug sa uban pang mga dapit ug gidayeg pag-ayo sa publiko sa katibuk-an ug sa mga historyano. Ang mosunod mao ang duha ka komento sa mga eskolar nga Ruso nga nagpuyo sa dapit diin gidestiyero ang kadaghanan sa mga pamilyang Saksi:

“Nalingaw gayod ako niining pelikulaha. Nakaangay gayod ako sa mga hawas sa inyong relihiyon, apan human makita kining salidaha, mas nakadayeg ako kaninyo. Maayo kaayong pagkahimo kining pelikulaha! Ilabinang nagustohan nako ang paagi sa inyong pagpresentar sa matag tawo ingong indibiduwal. Bisan tuod ako usa ka Ortodokso ug walay tuyo nga usbon ang akong relihiyon, nalipay ako sa mga Saksi. Gusto nakong makabaton ug kopya niining pelikulaha ang among pakultad. Ang akong mga kauban ug ako nakahukom sa pagpasalida niana ngadto sa among mga estudyante ug sa paglakip niana sa kurikulum.”—Propesor Sergei Nikolayevich Rubtsov, dekano sa pakultad sa history sa State Pedagogical University, Irkutsk, Rusya.

“Nalipay ko sa pag-abot niining pelikulaha. Kon adunay mohimog pelikula bahin sa pagsumpo sa usa ka relihiyon, subsob nga lisod kaayo ang pagtagik sa sugilanon sa lohikal nga paagi. Apan nahimo ninyo kana. Palihog padad-i kog dugang pa ninyong mga pelikula.”—Propesor Sergei Ilyich Kuznetsov, dekano sa pakultad sa history sa Irkutsk State University, Rusya.

Ang mga Saksi ni Jehova nga nagpuyo sa Siberia nalingaw usab sa maong dokumentaryo. Ang mosunod mao ang pipila sa ilang mga reaksiyon:

“Sa dihang nahitabo ang mga panghitabo nga gipakita niining pelikulaha, daghan didto sa Rusya ang nakadawat ug sayop nga impormasyon bahin sa mga kalihokan sa mga Saksi ni Jehova. Apan human makita ang maong pelikula, ilang nahibaloan nga ang atong organisasyon dili lamang usa ka sekta, sumala sa ilang gituohan kaniadto. Ang uban nga di pa dugayng nahimong mga Saksi miingon: ‘Wala gayod namo damha nga kami nagpuyo ug nagtrabaho diay kauban sa  Kristohanong mga igsoon nga nag-antos pag-ayo kaniadto!’ Human makita ang maong pelikula, usa ka Saksi ang miingon nga gusto niyang mahimong bug-os-panahong ministro.”—Anna Vovchuk, gidistiyero sa Siberia.

“Nangurog ko sa dihang nakita nako sa salida ang mga sekreta nga nanuktok sa pultahan sa balay sa Saksi. Nagpahinumdom kini kanako sa dihang ang mga polis nanuktok sa among pultahan, ug nahinumdoman nako nga si Mama miingon: ‘Tingali dunay sunog sa laing lugar.’ Apan ang maong salida nagpahinumdom usab kanako nga daghang Saksi ang mas daghan pag giantos kay kanako. Kining tanang impormasyon makahatag kanatog mas dakong kalig-on ug kadasig sa pagpadayon sa pag-alagad kang Jehova.”—Stepan Vovchuk, gidistiyero sa Siberia.

“Anak ako sa gidistiyero nga mga Saksi. Busa, nagtuo ko nga daghan na kog nabatian bahin niadtong mga panahona. Apan human makakita niining salidaha, akong naamgohan nga wala pa gyod diay koy nahibaloan. Samtang gipaminaw nako ang mga interbiyo, nanglugmaw ang mga luha sa akong mga mata. Karon ang mga kasinatian dili lang mga sugilanon alang nako kondili buhi gayod. Ang maong pelikula nakapalig-on sa akong relasyon sa Diyos ug nakatabang sa pag-andam kanako sa pag-antos sa tanang umaabot nga mga kalisdanan.”—Vladimir Kovash, Irkutsk.

“Alang nako, kining pelikulaha mas dakog impluwensiya kay sa sinulat nga asoy. Sa dihang akong nakita ug nadungog ang pag-interbiyo sa mga igsoon, gibati nako nga morag akong nasinatian usab ang tanan nilang grabeng mga pagsulay. Ang panig-ingnan sa usa ka igsoong lalaki nga nagdrowing ug mga postkard para sa iyang gagmayng mga anak nga babaye samtang didto siya sa bilanggoan nagtukmod kanako sa pagtugkad sa kasingkasing sa akong mga anak pinaagi sa mga kamatuoran sa Bibliya. Salamat! Tungod niining pelikulaha gibati gayod sa mga Saksi ni Jehova sa Rusya nga sila bahin sa tibuok-kalibotang organisasyon ni Jehova.”—Tatyana Kalina, Irkutsk.

“Ang panultihong, ‘Ang pagkakita bisag kausa lang mas maayo pa kay sa pagkadungog ug usa ka gatos ka higayon’ mapadapat gayod niining pelikulaha. Kini buhi ug tinuod kaayo, nga naglangkit gayod kanato! Human makakita niini, kinahanglan kong mogahin ug daghang panahon sa pagpamalandong. Pinaagi niining pelikulaha nasusi nako pag-ayo ang kinabuhi niadtong gidistiyero nga mga Saksi. Karon sa dihang itandi nako ang akong mga kahimtang sa ilaha, natabangan ako sa pagbaton ug lahi nga panglantaw sa atong mga problema karong adlawa.”—Lidia Beda, Irkutsk.

Sa pagkakaron, ang Faithful Under Trials giluwatan na diha sa 25 ka pinulongan ug gidawat pag-ayo sa tibuok kalibotan. a Ang tibuok dokumentaryo gipasalida diha sa mga estasyon sa telebisyon sa St. Petersburg, Omsk, ug uban pang mga siyudad sa Rusya, maingon man didto sa mga siyudad sa Ukraine nga Vynnytsya, Kerch, Melitopol ug sa Lviv. Nakadawat usab kinig mga pasidungog gikan sa internasyonal nga mga hunta nga tigsubli ug mga pelikula.

Ang gahom sa mensahe niining dokumentaryoha makita diha sa mga panig-ingnan sa libolibo ka ordinaryong mga tawo nga nagpakitag talagsaong kaisog ug espirituwal nga kalig-on latas sa daghang katuigan sa paglutos. Gipamatud-an gayod sa mga Saksi ni Jehova sa Unyon Sobyet nga sila matinumanon ilalom sa mga pagsulay. Kon gusto nimong makita kini nga dokumentaryo, ang mga Saksi ni Jehova malipay sa pagtagana niini kanimo. Palihog kontaka ang usa kanila diha sa inyong dapit.

[Footnote]

[Picture Credit Line sa panid 8]

Stalin: U.S. Army photo

[Picture Credit Line sa panid 9]

Stalin: U.S. Army photo