Ang Impluwensiya ni Jesus sa Katawhan sa Tibuok Kalibotan

“ANG tanan nga gitaho sa mga ebanghelyo bahin sa gisulti ni Jesus, sa pribado ug publiko, ikasulti niyag duha ra ka oras,” misulat ang maghuhubad sa Bibliya nga si Edgar Goodspeed. “Apan bisan ang diyutay niyang gitudlo maoy makapadasig, makapatandog, ug makapahinuklog kaayo nga daghan ang mouyon nga walay laing tawo ang nakaimpluwensiya ug dako kaayo sa kalibotan.”

Sa dihang natapos ni Jesu-Kristo ang iyang ministeryo sa yuta sa tuig 33 K.P., labing menos mga 120 ka lalaki ug babaye lang ang iyang mga sumusunod. (Buhat 1:15) Karong adlawa, kapin ug duha ka bilyong tawo ang nag-angkong Kristohanon. Giila sa gatosan ka milyones pa nga si Jesus maoy manalagna. Talagsaon gayod ang impluwensiya sa iyang mga pagtulon-an diha sa katawhan.

Giila bisan sa dili-Kristohanong mga lider ang impluwensiya ni Jesus sa katawhan sa tibuok kalibotan. Pananglitan, ang Hudiyong rabbi nga si Hyman Enelow misulat: “Si Jesus nahimong labing popular, labing gitun-an, labing impluwensiyadong persona sa relihiyosong kasaysayan sa katawhan.” Si Enelow miingon usab: “Kinsay makabanabana sa tanang impluwensiya ni Jesus sa katawhan? Ang gugma nga iyang nainspirar, ang kahupayan nga iyang nahatag, ang maayong mga buhat nga iyang nahimo, ang paglaom ug kalipay nga iyang napukaw—kanang tanan wala hitupngi sa kasaysayan sa tawo. Taliwala sa bantogan ug maayong mga tawo nga nabuhi sukad, walay ikatandi sa impluwensiya ug gahom nga naangkon ni Jesus. Siya nahimong labing makaiikag nga persona sa kasaysayan.”  Ug ang Hindu nga lider nga si Mohandas K. Gandhi miingon: “Wala akoy nailhang tawo nga nakahimog mas dakong kaayohan alang sa katawhan kay kang Jesus. Sa pagkatinuod, maayo man ang Kristiyanidad.” Bisan pa niana, siya midugang: “Kamo nga mga Kristohanon mao ang suliran. Wala ninyo tumana ang inyong mga pagtulon-an.”

Hataas ang rekord sa Kakristiyanohan bahin sa kapakyasan sa pagtuman sa mga pagtulon-an ni Jesus. Si Cecil John Cadoux, historyano sa Kristiyanidad, miingon nga “ang inanay ug nagpadayong pag-uswag sa pagkadili-estrikto sa moralidad sa tibuok nga Iglesya namatikdan na sa Kristohanong mga lider ingon ka sayo sa . . . 140 A.D.” Siya miingon: “Kining pag-us-os sa pagkaestrikto sa moralidad sa sayong yugto kinaiyanhong motultol ngadto sa pagpahiuyon sa mga paagi sa kalibotan.”

Ang pag-us-os sa moralidad migrabe sa ikaupat nga siglo, sa dihang nakabig ang Romanong Emperador Constantino sa Kristiyanidad. “Ang mga historyano nakamatikod gayod, ug sa pipila ka kaso nasubo pag-ayo,” misulat si Cadoux, “sa grabeng pakigkompromiso sa Iglesya tungod sa pakig-alyansa niini kang Constantino.” Sulod sa daghang siglo sukad niadto, gihimo sa nag-angkong mga Kristohanon ang daghang makauulawng mga buhat nga nakadaot sa ngalan ni Kristo.

Busa ang mga pangutana nga atong gikabalak-an mao: Unsa ba gayod ang gitudlo ni Jesus? Ug unsay angay nga impluwensiya sa iyang mga pagtulon-an kanato?

[Hulagway sa panid 3]

“Wala akoy nailhang tawo nga nakahimog mas dakong kaayohan alang sa katawhan kay kang Jesus.”—Mohandas K. Gandhi

[Hulagway sa panid 3]

“Walay laing tawo ang nakaimpluwensiya ug dako kaayo sa kalibotan.”—Edgar Goodspeed

[Credit Line]

Culver Pictures