“Ang Akong Tabang Nagagikan Kang Jehova”

Ang mga Batan-on nga Nagdayeg Kang Jehova Nagpauswag sa Kalidad sa Ilang Kinabuhi

“GUSTO nakong maangkon ang kinamaayohang mga butang sa kinabuhi!” Mao kanay pangandoy sa usa ka bayongbayong. Apan sa unsang paagi maangkon sa usa ka batan-on ang kinamaayohang mga butang sa kinabuhi? Ang Bibliya naghatag ug laktod nga tubag: “Hinumdomi ang imong Maglalalang samtang bata ka pa!”—Ecclesiastes 12:1, Contemporary English Version.

Dili lang kay ang mga hamtong ra ang angayng modayeg ug moalagad kang Jehova. Si Samuel, nga anak ni Elkana ug Ana, bata pa kaayo sa dihang nag-alagad siya kang Jehova didto sa tabernakulo. (1 Samuel 1:19, 20, 24; 2:11) Ang usa ka Hebreohanon nga dalagita nagpakitag bug-os nga pagtuo kang Jehova sa dihang gisugyotan niya ang pangulo sa Siryanhong kasundalohan nga si Naaman sa pag-adto kang manalagnang Eliseo aron maayo ang iyang sanla. (2 Hari 5:2, 3) Sa Salmo 148:7, 12, ang mga batang lalaki ug babaye gisugo sa pagdayeg kang Jehova. a Sa dihang 12 anyos pa siya, si Jesus nagpakitag dulot nga interes sa pag-alagad sa iyang Amahan. (Lucas 2:41-49) Tungod sa pagbansay kanila pinasukad sa Kasulatan, ang ubang mga batang lalaki nga nakakita kang Jesus didto sa templo misinggit: “Luwasa, kami nagaampo, ang Anak ni David!”—Mateo 21:15, 16.

Pagdayeg Kang Jehova Karon

Karon, daghang batan-ong mga Saksi ni Jehova ang mapasigarbohon sa ilang pagtuo ug maisogong nagsulti sa uban bahin niini diha sa eskuylahan ug sa ubang mga dapit. Tagda ang duha ka pananglitan.

Sa Britanya, ang klase sa 18-anyos nga si Stephanie naghisgot bahin sa aborsiyon ug sa uban pang mga isyu labot sa moralidad. Miinsistir ang maestro nga ang aborsiyon dinawat na karon sa katilingban ug walay katarongan si bisan kinsang babaye nga mosupak niini nga pamaagi. Sa dihang miuyon ang tanan sa klase niining maong panghunahuna, gibati ni Stephanie nga kinahanglang depensahan niya ang iyang gipasukad-sa-Bibliya nga baroganan. Nakahigayon si Stephanie sa dihang gipangutana siya sa iyang maestro kon unsay iyang hunahuna bahin niana. Bisan tuod gikulbaan siya sa sinugdan, gigamit ni Stephanie ang maong kahigayonan sa pagsulti kon unsay panglantaw sa Kasulatan. Gisaysay ni Stephanie ang Exodo 21:22-24 ug gipatin-aw nga kon sayop ang paghimog kadaot sa bata nga gisabak, nan ang aborsiyon dayag nga supak sa kabubut-on sa Diyos.

Ang maestro, nga usa ka membro sa klero, wala pa gayod makabasa niadtong mga bersikuloha. Ang maisogong pagpamatuod ni Stephanie mitultol ngadto sa daghang makaiikag nga mga panaghisgot uban sa iyang mga klasmet bahin sa nagkalainlaing mga ulohan. Usa ka klasmet ni Stephanie nga babaye regular na karong nagdawat sa kinaulahiang mga kopya sa Ang Bantayanang Torre ug Pagmata!, ug ang duha pa niya ka klasmet mitambong sa distritong kombensiyon sa mga Saksi ni Jehova aron makakita kang Stephanie nga magpabawtismo ingong simbolo sa iyang pagpahinungod ngadto sa Diyos.

Gipahimuslan sa sayis-anyos nga si Vareta, nga taga-Suriname, Amerika del Sur, ang kahigayonan sa pagdayeg sa Diyos sa dihang ang iyang maestra nanginahanglag paghupay gikan sa Kasulatan. Sa paghiuli human sa tulo-ka-adlaw nga pagpalta, gipangutana sa maestra ang iyang mga estudyante kon nahibalo ba sila kon nganong milakaw siya. Sila mitubag,  “Nasakit ka, di ba?” “Wala,” mitubag ang magtutudlo. “Namatay ang akong magulang nga babaye, ug naguol gayod ako. Busa ayaw mo paglangas.”

Nianang hapona samtang mitagpilaw ang iyang inahan, si Vareta napuliki sa pag-ukay sa daandaang mga magasin, nga nagbasa sa mga ulohan. Iyang nakit-an ang Hulyo 15, 2001 nga Ang Bantayanang Torre, nga may ulohang “Aduna bay Kinabuhi Human sa Kamatayon?” Kay naghinamhinam na kaayo, gipukaw niya ang iyang inahan ug miingon, “Ma, Ma, tan-awa! Nakakita ko ug magasin bahin sa kamatayon para sa akong maestra!” Gipadala ang magasin ngadto sa maestra uban sa usa ka sulat gikan kang Vareta. Siya misulat: “Alang gayod kini kanimo. Sa Paraiso imong makita pag-usab ang imong magulang nga babaye tungod kay si Jehova dili gayod mamakak. Siya nagsaad nga iyang ipahinabo ang paraiso, dili sa langit, kondili dinhi sa yuta.” Gipasalamatan gayod sa maestra ang maong binase-sa-Bibliya nga paghupay nga gihatag sa maong mga artikulo.

Pagpangandam Alang sa Kaugmaon

Si Jehova maoy “malipayong Diyos,” ug gusto niyang magmalipayon ang mga batan-on. (1 Timoteo 1:11) Ang iya mismong Pulong nag-ingon: “Pahimusli ang imong pagkabatan-on. Magmalipayon samtang ikaw batan-on pa.” (Ecclesiastes 11:9, Today’s English Version) Si Jehova makakita sa unahan ug makahibalo sa sangpotan unya sa maayo ug daotang mga binuhatan. Kanay hinungdan kon nganong ang iyang Pulong nagtambag sa mga batan-on: “Hinumdomi, karon, ang imong Dakong Maglalalang sa mga adlaw sa imong pagkabatan-on, sa dili pa moabot ang malisod nga mga adlaw, o modangat ang mga tuig sa dihang ikaw moingon: ‘Ako walay kalipay niini.’”—Ecclesiastes 12:1.

Oo, gusto ni Jehova nga mapahimuslan gayod sa mga batan-on ang bililhong gasa sa kinabuhi. Pinaagi sa paghinumdom ug pagdayeg sa Diyos, ang mga batan-on mahimong makabaton ug makahuloganon, magantihon nga kinabuhi. Bisan pag mag-atubang ug mga suliran, sila masaligong makaingon: “Ang akong tabang nagagikan kang Jehova.”—Salmo 121:2.

[Footnote]

[Blurb sa panid 9]

“Dayega ninyo si Jehova gikan sa yuta, . . . kamong mga batan-ong lalaki ug kamong mga ulay usab.”—SALMO 148:7, 12

[Kahon sa panid 8]

SI JEHOVA NAGPALUYO SA MGA BATAN-ON

“Ikaw mao ang akong paglaom, Oh Soberanong Ginoong Jehova, ang akong pagsalig sukad sa akong pagkabatan-on.”—Salmo 71:5.

“[Ang Diyos] nagatagbaw sa tibuok nimong kinabuhi pinaagi sa maayong butang; ang imong pagkabatan-on nagpadayon sa pagbag-o ingon gayod nianang sa usa ka agila.”—Salmo 103:5.