‘Sama sa Usa ka Bililhong Pulag-Bulok nga Bato’

SI APOSTOL Juan nakakitag panan-awon sa usa ka mahimayaong trono sa langit. Ang Usa nga naglingkod sa trono may panagway nga “sama sa usa ka batong haspe.” Siya sama usab sa “usa ka bililhong pulag-bulok nga bato.” (Pinadayag 4:2, 3) Unsa ba kining mga batoha?

Kini maoy sihag nga mga bato. Sa karaang mga panahon, ang Gregong pulong nga gihubad ug “haspe” gigamit aron sa pagpaila sa mga bato nga lainlain ug kolor, lakip na sa sihag nga mahalong mga mutya. Ang “batong haspe” sa Pinadayag 4:3 “dayag nga dili sama sa atong baratohong haspe karon,” nag-ingon si A. T. Robertson diha sa Word Pictures in the New Testament. Dugang pa, sa ulahing bahin sa librong Pinadayag, gihubit ni Juan ang langitnong siyudad, ang Jerusalem, nga nag-ingon: “Ang kasidlak niini ingon sa usa ka batong bililhon kaayo, ingon sa usa ka batong haspe nga naggilakgilak nga sama katin-aw sa kristal.” (Pinadayag 21:10, 11) Ang mga bato nga gitumong ni Juan lagmit sihag, diin ang kahayag makalapos niini.

Ang usa nga gihawasan ingong naglingkod sa trono diha sa panan-awon ni Juan mao ang labing mahimayaon nga Persona sa uniberso, si Jehova nga Diyos. Siya maoy putli ug balaan sa kinalabwang sukod. Uyon niana, si apostol Juan misulat: “Ang Diyos maoy kahayag ug diha kaniya wala gayoy kangitngit.” (1 Juan 1:5) Busa, giawhag ni Juan ang iyang mga isigkamagtutuo sa ‘pagputli sa ilang kaugalingon ingon nga si Jehova putli.’—1 Juan 3:3.

Unsay kinahanglan natong buhaton aron kita pagalantawon sa Diyos nga putli? Kinahanglan gayod kitang magpasundayag ug pagtuo sa giula nga dugo ni Kristo alang sa kapasayloan sa atong mga sala. Kita usab kinahanglang magpadayon sa ‘paglakaw diha sa kahayag’ pinaagi sa regular nga pagtuon sa Bibliya ug sa pagkinabuhi nga nahiuyon sa mga pagtulon-an niini.—1 Juan 1:7.