Unsa ang Impluwensiya ni Jesu-Kristo Kanimo?

TUNGOD sa atong nahisgotan sa nag-unang artikulo, maduhaduhaan ba ang dako kaayong epekto sa mga pagtulon-an ni Jesus diha sa katawhan sa tibuok kalibotan? Apan ang hinungdanong pangutana mao, “Unsa ang impluwensiya sa mga pagtulon-an ni Jesus kanako sa personal?”

Ang mga pagtulon-an ni Jesus naglakip sa nagkadaiyang mga topiko. Ang matag bahin sa imong kinabuhi apektado sa maong bililhong mga pagtulon-an. Atong isentro ang pagtagad sa gitudlo ni Jesus bahin sa pagtino sa mga butang nga unahon sa kinabuhi, pagpakighigala sa Diyos, pag-ugmad ug maayong relasyon sa ubang mga tawo, pagsulbad sa mga suliran, ug paglikay sa mapintasong mga buhat.

Pagtino sa mga Butang nga Unahon sa Kinabuhi

Ang paspas-ug-lihok nga kinabuhi sa kalibotan karon makahurot sa atong daghang panahon ug kusog mao nga ang espirituwal nga kalihokan sagad ikapadaplin. Tagda ang kahimtang sa usa ka lalaki nga mga 20 anyos ang panuigon  nga si Jerry. Bisan pag si Jerry hilig nga mohisgot ug espirituwal nga mga butang ug mapabilhon kaayo sa iyang makat-onan gikan niana, siya nagmulo: “Wala akoy panahon sa paghimo niana kanunay. Nagtrabaho akog unom ka adlaw kada semana. Dominggo lang ako walay trabaho. Ug human ko maatiman ang angay nakong buhaton, ako kapoyon na kaayo.” Kon ang imong kahimtang susama niana, ikaw katabangan sa gitudlo ni Jesus diha sa Wali sa Bukid.

Giingnan ni Jesus ang panon sa katawhan nga nagkatigom sa pagpatalinghog kaniya: “Hunong na sa pagkabalaka bahin sa inyong mga kalag kon unsay inyong kan-on o kon unsay inyong imnon, o bahin sa inyong mga lawas kon unsay inyong isul-ob. Dili ba ang kalag labaw pa man kay sa pagkaon ug ang lawas kay sa besti? Panid-i pag-ayo ang mga langgam sa langit, tungod kay sila wala magapugas ug binhi o magaani o magatigom sa mga balay-tipiganan; sa gihapon ginapakaon sila sa ilang langitnong Amahan. Dili ba kamo labaw pa ug bili kay kanila? . . . Busa ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga. Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” (Mateo 6:25-33) Unsay atong makat-onan gikan niini?

Wala ipasabot ni Jesus nga dili na nato atimanon ang atong pisikal nga mga panginahanglan ug ang sa mga membro sa atong pamilya. “Kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay,” nag-ingon ang Bibliya, “siya naglimod sa pagtuo ug mas daotan pa kay sa tawong walay pagtuo.” (1 Timoteo 5:8) Ugaling lang, si Jesus nagsaad nga kon tinoon nato ang mga butang nga pagaunahon sa kinabuhi ug unahon pagtagad ang espirituwal nga mga butang, seguradong itagana sa Diyos ang ubang mga panginahanglan. Ang pagtulon-an dinhi mao ang pagtino sa mga butang nga unahon sa kinabuhi. Ang pagsunod niining tambaga motultol sa kalipay, kay “malipayon kadtong mahunahunaon sa ilang espirituwal nga panginahanglan.”—Mateo 5:3.

Pagpakighigala sa Diyos

Kadtong mahunahunaon sa ilang espirituwal nga panginahanglan nakasabot sa panginahanglan nga ugmaron ang maayong relasyon uban sa Diyos. Sa unsang paagi ugmaron nato ang maayong relasyon uban sa usa ka tawo? Dili ba maningkamot kita nga mas mailhan siya? Kinahanglang mogugol kitag panahon aron mahibaloan ang iyang mga panghunahuna, tinamdan, katakos, kalamposan, gusto, ug dili gusto. Matuod usab kana sa pagpakighigala sa Diyos. Gikinahanglan ang tukmang kahibalo bahin kaniya. Sa dihang nag-ampo sa Diyos mahitungod sa iyang mga tinun-an, si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Oo, kinahanglang mailhan nato ang Diyos aron kita masuod kaniya. Ang bugtong tinubdan sa maong kahibalo mao ang dinasig nga Pulong sa Diyos, ang Bibliya. (2 Timoteo 3:16) Kinahanglang mogahin kitag panahon sa pagtuon sa Kasulatan.

Ugaling lang, ang kahibalo mismo dili pa igo. Sa samang pag-ampo, si Jesus miingon: “Sila [iyang mga tinun-an] nagsunod sa imong pulong.” (Juan 17:6) Dili lang kita mokuha ug kahibalo bahin sa Diyos kondili molihok usab nga nahiuyon sa maong kahibalo. Kay aduna pa bay laing paagi nga kita mahimong higala sa Diyos? Makadahom ba gayod kita nga mas masuod kang bisan kinsa kon kita tinuyong molihok nga supak sa mga ideya ug mga prinsipyo sa maong tawo? Nan, ang tanan natong lakang sa kinabuhi  angayng giyahan sa mga panghunahuna ug mga prinsipyo sa Diyos. Tagda kon sa unsang paagi ang duha sa iyang mga prinsipyo mapadapat sa atong mga pakigrelasyon sa ubang mga tawo.

Ugmara ang Maayong Relasyon sa Ubang mga Tawo

Sa usa ka higayon, giasoy ni Jesus ang mubong sugilanon aron itudlo ang usa ka bililhong pagtulon-an bahin sa tawhanong mga relasyon. Siya miasoy bahin sa usa ka hari nga buot makighusay sa mga utang sa iyang mga sulugoon. Apan dako kaayo ang utang sa usa ka sulugoon ug wala siyay ikabayad. Gimando sa agalon nga siya, iyang asawa, ug iyang mga anak ibaligya aron may ikabayad. Ang nakautang mihapa ug nangaliyupo: “Angan-angana intawon ako ug bayran ko ra ikaw sa tanan.” Kay giabot ug kaluoy, gipapas sa agalon ang iyang utang. Dayon milakaw ang maong ulipon, nakasugat ug isigkaulipon nga nakautang kaniyag gamay nga kantidad sa salapi, ug siya naningil kaniya. Bisan pag nagpakiluoy ang iyang isigkaulipon, ang unang ulipon nagpabalhog kaniya sa bilanggoan hangtod nga makabayad siya sa tanan niyang utang. Sa pagkadungog sa hari bahin niini, siya nasuko. “Dili ba angay nga . . . maluoy ka sa imong isigkaulipon, ingon nga ako naluoy usab kanimo?” siya misukmat. Ug iyang gipabilanggo ang wala-maluoy nga ulipon hangtod nga iyang mabayran ang tanan niyang utang kaniya. Sa pagtudlo ug usa ka pagtulon-an gikan sa sugilanon, si Jesus miingon: “Sa samang paagi makiglabot usab kaninyo ang akong langitnong Amahan kon ang matag usa kaninyo dili magpasaylo sa iyang igsoon gikan sa inyong mga kasingkasing.”—Mateo 18:23-35.

Ingong dili-hingpit nga mga tawo, kita adunay daghang kahuyangan. Dili gayod kita makabayad sa Diyos sa dako kaayo natong utang tungod sa atong kalapasan batok kaniya. Ang ato lang mahimo mao ang pagpangayog pasaylo kaniya. Ug si Jehova nga Diyos andam nga mopasaylo sa tanan natong kahuyangan, sa kondisyong atong pasayloon ang atong mga igsoon tungod sa mga sala nga ilang nahimo batok kanato. Pagkaepektibo niana nga pagtulon-an! Gitudloan ni Jesus ang iyang mga sumusunod sa pag-ampo: “Pasayloa kami sa among mga utang, ingon nga kami nagapasaylo usab sa mga nakautang kanamo.”—Mateo 6:12.

Wagtanga ang Hinungdan Mismo sa Suliran Aron Kana Masulbad

Kon mahitungod sa pagsabot sa kinaiya sa tawo, si Jesus batid niana. Ang iyang tambag bahin sa pagsulbad sa mga suliran naglakip sa hinungdan mismo sa suliran. Tagda ang mosunod nga duha ka pananglitan.

“Nadungog ninyo nga kini giingon kanila sa kanhing panahon, ‘Dili ka magbuno; apan si bisan kinsa nga makabuno manubag ngadto sa korte sa hustisya,’” matod ni Jesus. “Bisan pa niana, ako magaingon kaninyo nga ang matag usa nga magpadayon sa pagkapungot sa iyang igsoon manubag sa korte sa hustisya.” (Mateo 5:21, 22) Gipakita dinhi ni Jesus nga ang hinungdan sa suliran sa pagbuno mas lalom pa kay sa mabangisong buhat mismo. Ang hinungdan niana mao ang tinamdan nga moturok diha sa kasingkasing sa mamumuno. Kon dili patuboon sa mga tawo ang pagbati sa kayugot o kasuko, mahanaw ra ang giplanong kabangisan. Malikayan gayod ang daghang pag-ulag dugo kon ipadapat kini nga pagtulon-an!

Matikdi nga gihisgotan ni Jesus ang hinungdan sa laing suliran nga makahatag ug dakong kagul-anan. Iyang giingnan ang panon sa katawhan: “Nadungog ninyo nga kini giingon, ‘Dili ka manapaw.’ Apan ako magaingon kaninyo nga ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing. Karon, kon kanang imong tuo nga mata nagapapandol kanimo, lusoka kini ug isalibay kini gikan kanimo.” (Mateo 5:27-29) Gitudlo ni Jesus nga ang suliran mas lalom pa kay sa imoral nga panggawi mismo. Ang hinungdan sa suliran mao ang butang nga nag-una niini—ang imoral nga pangibog. Kon dili palandongon sa usa ka tawo ang daotang mga pangandoy ug ‘isalibay kana’ o langkaton gikan sa iyang hunahuna, nan iyang mapukgo ang posible nga pagpanapaw.

“Ibalik ang Imong Espada sa Sakoban Niini”

Sa gabii sa pagbudhi ug pagdakop kang Jesus, usa sa iyang mga tinun-an mihulbot sa iyang espada aron panalipdan siya. Siya gimandoan ni Jesus: “Ibalik ang imong espada sa sakoban niini,  kay ang tanang mogamit sa espada mamatay pinaagi sa espada.” (Mateo 26:52) Sa pagkabuntag, si Jesus miingon kang Poncio Pilato: “Ang akong gingharian dili bahin niining kalibotana. Kon ang akong gingharian bahin pa niining kalibotana, ang akong mga alagad makig-away na unta aron dili ako ikatugyan ngadto sa mga Hudiyo. Apan, sa pagkatinuod, ang akong gingharian dili gikan niini nga tinubdan.” (Juan 18:36) Dili ba makataronganon ang maong pagtulon-an?

Unsa ang tinamdan sa unang mga Kristohanon bahin sa gitudlo ni Jesus nga dili magmabangison? Ang librong The Early Christian Attitude to War nag-ingon: ‘Sanglit ang mga pagtulon-an ni Jesus nag-isip nga pagkamalapason ang tanang pagkamabangison ug pagdaot sa uban, tin-awng gipasabot nga dili matarong ang pag-apil sa pakiggubat . . . Ang unang mga Kristohanon nagsunod sa gisulti ni Jesus, ug nakasabot sa iyang mga pagtulon-an bahin sa pagkamalumo ug pagkadili-masukolon sa literal nga diwa niana. Ilang gilambigit ang ilang relihiyon sa pakigdait; sila misupak pag-ayo sa gubat tungod sa nalangkit niini nga pag-ulag dugo.’ Pagkalahi unta ang dagan sa kasaysayan kon ang tanang nag-angkong Kristohanon nagsunod gayod sa maong pagtulon-an!

Ang Tanang Pagtulon-an ni Jesus Makahatag Kanimog Kaayohan

Ang mga pagtulon-an ni Jesus nga atong gihisgotan maoy nindot, yano, ug puwersado. Ang pagkahibalo sa iyang mga pagtulon-an ug pagpadapat niana makahatag ug kaayohan sa katawhan. a

Ang mga Saksi ni Jehova sa inyong dapit malipay nga motabang kanimo sa pagsabot kon sa unsang paagi makahatag kanimog kaayohan ang labing maalamong mga pagtulon-an nga gipahayag sukad sa usa ka tawo. Madasigon ka namong gidapit nga makigkita kanila o mosulat sa adres sa panid 2 niining magasina.

[Footnote]

[Hulagway sa panid 5]

“Ang inyong langitnong Amahan nagpakaon kanila”

[Hulagway sa panid 7]

Ang mga pagtulon-an ni Jesus mahimong adunay maayong impluwensiya sa imong kinabuhi