Mga Ginikanan, Panalipdi ang Inyong Bililhong Panulondon

“Ang kaalam usa ka panalipod . . . [Kini] nagatipig nga buhi sa mga nanag-iya niini.”—ECCLESIASTES 7:12.

1. Nganong angayng isipon sa mga ginikanan ang ilang mga anak ingong mga gasa?

 ANG mga ginikanan maoy responsable sa pagkatawo sa usa ka bag-ong buhi nga persona kansang panagway ug mga kinaiya kaamgid sa ilaha. Ang Bibliya nagtawag sa mga anak ingong “panulondon gikan ni Jehova.” (Salmo 127:3) Tungod kay siya mao gayod ang Maghahatag-sa-Kinabuhi, sa pagkatinuod si Jehova nagpiyal sa mga ginikanan sa usa ka butang nga siya maoy tinuod nga tag-iya. (Salmo 36:9) Mga ginikanan, giunsa ninyo paglantaw ang inyong pagkadawat nianang bililhong gasa gikan sa Diyos?

2. Unsay reaksiyon ni Manoa sa pagkadungog nga siya mahimong amahan?

² Segurado nga ang maong gasa angayng dawaton uban ang pagpaubos ug apresasyon. Kapin sa 3,000 ka tuig kanhi, mao kanay reaksiyon sa Israelinhong si Manoa sa dihang gipahibalo sa usa ka manulonda ang iyang asawa nga makabaton kinig anak. Sa pagkadungog sa maayong balita gikan sa iyang asawa, si Manoa miampo: “Tabi, Jehova. Ang tawo sa matuod nga Diyos nga bag-o lang nimong gipadala, palihog, paanhia pag-usab kanamo ug tudloan kami kon unsay angay namong buhaton sa bata nga ipanganak.” (Maghuhukom 13:8) Mga ginikanan, unsay inyong makat-onan gikan sa panig-ingnan ni Manoa?

Kon Nganong Gikinahanglan ang Tabang sa Diyos

3. Nganong gikinahanglan gayod karon ang tabang sa Diyos sa pagmatuto sa mga anak?

³ Karon labaw kay kaniadto, ang mga ginikanan nagkinahanglan sa tabang ni Jehova sa pagmatuto sa ilang mga anak. Ngano man? Si Satanas nga Yawa  ug ang iyang mga manulonda gitambog na dinhi sa yuta. “Alaot ang yuta,” nagpasidaan ang Bibliya, “tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.” (Pinadayag 12:7-9, 12) “Sama sa usa ka leyon nga nagangulob,” nag-ingon ang Bibliya, si Satanas “nagapangitag matukob.” (1 Pedro 5:8) Ang mga leyon kasagarang motukob sa labing huyang, kasagaran sa gagmay pa nga mga hayop. Nan, maalamon nga ang Kristohanong mga ginikanan magpagiya kang Jehova aron mapanalipdan ang ilang mga anak. Unsa ka dako ang inyong paningkamot niining bahina?

4. (a) Unsay angayng reaksiyon sa mga ginikanan kon mahibaloan nila nga dunay leyon nga nakabuhi diha sa silinganan? (b) Unsay gikinahanglan sa mga anak aron mapanalipdan?

⁴ Kon nahibaloan ninyo nga adunay leyon nga nakabuhi diha sa silinganan, segurado nga panalipdan gayod ninyo ang inyong mga anak. Si Satanas usa ka manunukob. Naningkamot siya sa paghatag ug kadaot sa katawhan sa Diyos, sa ingon mahimo silang dili takos sa pag-uyon sa Diyos. (Job 2:1-7; 1 Juan 5:19) Ang mga bata dali rang maapektohan sa kadaot. Aron malikayan ang mga lit-ag sa Yawa, ang mga bata kinahanglang makaila ug mosugot kang Jehova. Ang kahibalo sa Bibliya hinungdanon. “Kini nagkahulogan ug kinabuhing walay kataposan,” miingon si Jesus, “ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Dugang pa, ang mga batan-on nagkinahanglan ug kaalam—ang katakos sa pagsabot ug pagpadapat sa ilang nakat-onan. Tungod kay ang “kaalam nagatipig nga buhi sa mga nanag-iya niini,” kamong mga ginikanan kinahanglang magsilsil sa kamatuoran diha sa kasingkasing sa inyong mga anak. (Ecclesiastes 7:12) Sa unsang paagi buhaton ninyo kini?

5. (a) Sa unsang paagi ikahatag ang kaalam? (b) Sa unsang paagi ang Proverbio naghubit sa bili sa kaalam?

⁵ Kamo makabasa ug angayng magbasa sa Pulong sa Diyos ngadto sa inyong mga anak. Apan ang pagtabang kanila sa paghigugma ug pagsugot kang Jehova nagkinahanglan ug labaw pa niana—kinahanglang masabtan nila kana. Sa pag-ilustrar: Ang usa ka bata sultian tingali nga sa dili pa motabok sa karsada kinahanglang motan-aw siya sa wala ug sa tuo. Bisan pa niana, ang ubang mga bata wala motuman. Ngano man? Ang mga sangpotanan kon mabanggaan sa awto ang usa ka tawo wala tingali isaysay kanunay o sa paagi nga masabtan sa bata kon unsay kapeligrohan niana, nga magsanta sa “binuang” nga mahimong mosangpot sa usa ka aksidente. Ang paghatag ug kaalam nagkinahanglag panahon ug pailob. Apan pagkabililhon sa kaalam! “Ang mga dalan niini maoy mga dalan sa kahimuot,” nag-ingon ang Bibliya, “ug ang tanang alagianan niini maoy pakigdait. Kini maoy kahoy sa kinabuhi niadtong mga nagakupot niini, ug kadtong mga nagahawid niini pagatawgong malipayon.”—Proverbio 3:13-18; 22:15.

Pagtudlo nga Naghatag ug Kaalam

6. (a) Nganong ang mga bata subsob molihok nga dili maalamon? (b) Unsang pakigbugno ang nagapadayon?

⁶ Kasagaran ang mga batan-on mobuhat ug sayop, dili tungod kay wala sila matudloi kon unsay husto, kondili tungod kay ang pagtudlo wala makatugkad sa ilang kasingkasing—ang ilang pangsulod nga pagkatawo. Ang Yawa nakigbisog nga makontrolar ang kasingkasing sa mga batan-on. Naghimo siyag mga paagi nga maladlad sila sa dili-diyosnong mga impluwensiya sa iyang kalibotan. Paningkamotan usab niya ang pagpahimulos sa ilang napanunod nga makasasalang hilig sa paghimog daotang mga butang. (Genesis 8:21; Salmo 51:5) Kinahanglang maamgohan sa mga ginikanan nga adunay padayong pakigbugno aron makontrolar ang kasingkasing sa ilang mga anak.

7. Nganong ang pagsulti sa usa ka bata kon unsay husto o sayop dili pa igo?

⁷ Kasagaran nga sultian sa mga ginikanan ang usa ka bata kon unsay husto ug sayop, nga nagtuo nga sila nakatudlo na kaniya ug usa ka moral nga prinsipyo. Moingon tingali sila sa bata nga sayop ang pagpamakak, pagpangawat, o ang pagpakigsekso kang bisan kinsa nga dili nimo kapikas sa kaminyoon. Apan ang bata nagkinahanglan ug mas kusganong panukmod sa pagsugot dili lamang tungod kay ang iyang mga ginikanan nagsulti niana. Kini maoy mga balaod ni Jehova. Angayng makat-onan sa bata nga ang dalan sa kaalam mao ang pagsugot sa mga sugo sa Diyos.—Proverbio 6:16-19; Hebreohanon 13:4.

8. Unsang matanga sa pagtudlo ang makatabang sa mga anak sa paglihok nga maalamon?

⁸ Ang pagkakomplikado sa uniberso, ang kadaiyahan sa buhing mga butang, ang pag-usab-usab sa panahon—kanang tanang butang makatabang sa bata sa pagsabot nga naglungtad ang usa ka maalamon-sa-tanan nga Maglalalang. (Roma 1:20; Hebreohanon  3:4) Dugang pa, ang bata angayng matudloan nga ang Diyos nahigugma kaniya ug naghimog tagana pinaagi sa halad sa Iyang Anak aron sa paghatag kaniyag kinabuhing dayon ug mapalipay niya ang Diyos pinaagi sa pagtuman sa Iyang gisulti. Unya ang bata lagmit nga modesisyon sa pag-alagad kang Jehova, bisan pa sa mga pagsulay sa Yawa sa pagpugong kaniya.—Proverbio 22:6; 27:11; Juan 3:16.

9. (a) Unsay gikinahanglan sa matang sa pagtudlo nga makaluwas ug kinabuhi? (b) Unsay gisugo sa mga amahan nga buhaton, ug unsay nalangkit niini?

⁹ Ang matang sa pagtudlo nga manalipod sa bata ug magtukmod kaniya sa pagbuhat kon unsay husto nagkinahanglan ug panahon, pagtagad, ug pagplano. Nagkinahanglan kana nga ang mga ginikanan modawat sa giya gikan sa Diyos. Ang Bibliya nag-ingon: “Kamong mga amahan, . . . magpadayon sa pagmatuto [sa inyong mga anak] sa disiplina ug sa pagdumala-sa-kaisipan ni Jehova.” (Efeso 6:4) Unsay buot ipasabot niana? Ang “pagdumala-sa-kaisipan,” sa orihinal nga Grego, naghatag ug ideya sa “pagbutang sa hunahuna.” Busa sa panguna ang mga amahan giawhag sa pagbutang sa hunahuna ni Jehova diha sa ilang mga anak. Dakong proteksiyon kana sa mga bata! Kon ang hunahuna sa Diyos, ang iyang paagi sa paghunahuna, masilsil diha sa hunahuna sa mga bata, sila mapanalipdan batok sa pagbuhat ug sayop.

Tinguha nga Gipalihok sa Gugma

10. Aron epektibong matudloan ang inyong mga anak, unsay hinungdanong mahibaloan nimo?

¹⁰ Aron matuman ninyo ang inyong tinguha nga matutuon ang inyong mga anak sa hustong paagi, ang inyong mga paningkamot kinahanglang gipalihok sa gugma. Ang usa ka hinungdanong punto mao ang maayong komunikasyon. Sayra kon unsay nagakahitabo sa kinabuhi sa inyong anak ug kon unsay iyang mga panglantaw. Sa relaks nga kahimtang, mataktikanhong dasiga ang inyong anak nga mosulti sa iyang gibati. Usahay, makurat tingali kamo sa iyang isulti. Pag-amping nga dili maghinobra ang inyong reaksiyon. Hinunoa, pamati uban ang simpatiya.

11. Sa unsang paagi ikabutang sa usa ka ginikanan ang hunahuna sa Diyos nganha sa usa ka bata?

¹¹ Tinuod, makadaghan na tingali ninyong gibasahan ang inyong anak gikan sa Bibliya bahin sa mga balaod sa Diyos nga nagdili sa seksuwal nga imoralidad. (1 Corinto 6:18; Efeso 5:5) Tungod niini, natisok tingali sa inyong mga anak kon unsay makapahimuot ug dili makapahimuot kang Jehova. Apan, ang pagbutang sa hunahuna ni Jehova nganha sa bata nagkinahanglan ug labaw pa niana. Ang mga anak nagkinahanglan ug tabang sa pagpangatarongan sa kahinungdanon sa mga balaod ni Jehova. Kinahanglang makombinsir sila nga ang iyang mga balaod husto ug mapuslanon ug ang pagsugot niana mao ang husto ug mahigugmaong butang nga buhaton. Pinaagi lamang sa pagpangatarongan uban sa inyong mga anak pinasukad sa Kasulatan aron dawaton nila ang panglantaw sa Diyos nga ikaingon nga inyong gibutang ang iyang hunahuna diha kanila.

12. Sa unsang paagi matabangan sa usa ka ginikanan ang iyang anak nga makabaton ug hustong panglantaw bahin sa seksuwal nga mga relasyon?

¹² Sa dihang maghisgot bahin sa sekso, mangutana ka tingali, “Nagtuo ka ba nga ang pagsugot sa balaod ni Jehova nga dili makigsekso sa dili pa magminyo maghikaw sa usa ka tawo sa kalipay?” Dasiga ang inyong anak sa pagpatin-aw sa iyang tubag. Human sublion ang kahibulongang tagana sa Diyos sa  pagpatungha ug anak, mangutana ka tingali: “Nagtuo ka ba nga ang atong mahigugmaong Diyos mohimog mga balaod nga maghikaw kanato sa kalipay sa kinabuhi? O naghunahuna ka ba nga ang iyang mga balaod gilatid aron sa paglipay ug pagpanalipod kanato?” (Salmo 119:1, 2; Isaias 48:17) Susiha kon unsay hunahuna sa inyong anak bahin niini. Unya makahatag kamo ug mga pananglitan kon sa unsang paagi ang seksuwal nga imoralidad misangpot sa kagul-anan ug kasamok. (2 Samuel 13:1-33) Pinaagi sa inyong pagpangatarongan uban sa inyong anak sa paagi nga siya makasabot ug modawat sa panglantaw sa Diyos, dako kamog mahimo sa pagbutang sa hunahuna sa Diyos diha kaniya. Apan, duna pa kamoy mabuhat.

13. Ang pagsabot sa unsa bahin kang Jehova ang ilabinang makatukmod sa usa ka anak sa pagtuman kang Jehova?

¹³ Sa kamaalamon, dili lamang ninyo tudloan ang inyong anak sa mga sangpotanan sa pagsupak kang Jehova kondili ipatin-aw usab ninyo kon sa unsang paagi si Jehova maapektahan mismo sa paagi sa atong pagkinabuhi. Ipakita sa imong anak gikan sa Bibliya nga atong mapasubo si Jehova sa dihang mapakyas kita sa pagtuman sa iyang kabubut-on. (Salmo 78:41) Mangutana ka tingali, “Nganong dili man nimo gustong pasakitan si Jehova?” ug ipatin-aw: “Ang kaaway sa Diyos nga si Satanas nag-ingon nga kita nag-alagad kang Jehova tungod sa hinakog nga mga katarongan ug dili tungod kay kita nahigugma kaniya.” Dayon ipatin-aw nga pinaagi sa paghupot ug integridad, gilipay ni Job ang kasingkasing sa Diyos, sa ingon naghatag ug tubag sa bakak nga sumbong ni Satanas. (Job 1:9-11; 27:5) Ang inyong anak kinahanglang makasabot nga depende sa iyang panggawi, siya makapasubo o makapalipay kang Jehova. (Proverbio 27:11) Kini ug ang daghang ubang hinungdanon nga mga leksiyon ikatudlo ngadto sa mga anak pinaagi sa paggamit sa librong Pagkakat-on Gikan sa Dakong Magtutudlo. a

Maayong mga Resulta

14, 15. (a) Unsang mga leksiyona sa librong Magtutudlo ang nagpalihok sa mga bata? (b) Unsay maayong mga resulta nga imong nasinati gumikan sa paggamit niining libroha? (Tan-awa ang kahon sa mga panid 18-19.)

¹⁴ Usa ka apohang lalaki sa Croatia nga nagbasa sa librong Magtutudlo ngadto sa iyang siyete-anyos nga apong lalaki misulat nga giingnan siya sa bata sa mosunod: “Dunay gipabuhat ni Mama nako, apan dili ko gustong mobuhat niana. Unya akong nahinumdoman ang kapitulong ‘Ang Pagkamasinugtanon Manalipod Kanimo,’ busa mibalik ko ug ako siyang giingnan nga magmasinugtanon ako kaniya. Mahitungod sa kapitulong “Kon Nganong Angayng Dili Kita Mamakak,” usa ka magtiayon sa Florida, T.B.A., miingon: “Kini nagsuknag mga pangutana nga nag-awhag sa mga bata sa pagsulti sa ilang gibati ug pagdawat sa mga sayop nga dili nila gustong angkonon.”

¹⁵ Ang librong Magtutudlo adunay kapin sa 230 ka hulagway, ug dunay kapsiyon, o kahubitan, alang sa matag hulagway o grupo sa mga hulagway. “Subsob nga ang akong anak nga lalaki magsigeg  tan-aw sa hulagway ug dili gustong paklion ang laing panid,” miingon ang usa ka mapasalamatong inahan. “Dili lang makapadani ang mga hulagway kondili nagtudlo usab kini ug mga leksiyon, o labing menos magpalihok sa mga bata sa pagsuknag mga pangutana. Mahitungod sa hulagway diin ang usa ka bata nagtan-aw ug telebisyon diha sa ngitngit nga lawak, ang akong anak nga lalaki nangutana, ‘Ma, unsa may gibuhat nianang bataa?’ sa tingog nga nagpaila nga iyang nahibaloan nga ang bata adunay gibuhat nga dili maayo.” Ang kapsiyon sa maong letrato nag-ingon: “Kinsay makakita sa tanan natong ginabuhat?”

Hinungdanong Edukasyon Karon

16. Unsay hinungdanong itudlo sa mga bata karon, ug ngano?

¹⁶ Ang mga bata kinahanglang mahibalo sa husto ug dili-husto nga paggamit sa ilang pribadong mga parte sa lawas. Bisan pa niana, ang paghisgot bahin niini dili gayod sayon. Usa ka kolumnista sa mantalaan nag-ingon nga siya nagdako sa panahon diin ang paglitok sa mga pulong nga nagtumong sa mga kinatawo giisip nga bastos. Mahitungod sa pagtudlo sa iyang mga anak, siya misulat: “Kinahanglang buntogon nako ang akong kaulaw.” Tinuod, sa dihang tungod sa kaulaw ang mga ginikanan dili maghisgot bahin sa sekso, dili mapanalipdan niini ang bata. Ang mga tig-among-among magpahimulos sa kawalay-alamag sa bata. Ang Pagkakat-on Gikan sa Dakong Magtutudlo nga libro naghisgot sa maong ulohan sa dili-hilas, maligdong nga paagi. Ang pagpahibalo sa mga bata bahin sa sekso dili magwagtang sa ilang pagkainosente, apan ang pagkapakyas sa pagpahibalo kanila motultol sa pagkawala sa ilang kaputli.

17. Sa unsang paagi ang librong Magtutudlo makatabang sa mga ginikanan sa pagtudlo sa ilang mga anak bahin sa sekso?

¹⁷ Sa kapitulo 10, sa dihang naghisgot bahin sa daotang mga manulonda nga mianhi sa yuta ug nagpatunghag mga anak, ang bata gipangutana, “Unsay nahibaloan mo bahin sa pagpakigsekso?” Ang libro naghatag ug yano, maligdong nga tubag. Unya, ang kapitulo 32 nagpatin-aw kon sa unsang paagi ang mga bata mapanalipdan gikan sa mga tig-among-among. Daghang sulat nga nadawat namo ang nag-ingon nga hinungdanon ang maong pagtudlo. Usa kanila ang miingon: “Sa miaging semana sa dihang ang akong anak nga lalaking si Javan miadto sa iyang doktora, ang doktora nangutana kon amo bang nahisgotan uban kaniya ang hustong paggamit sa pribadong mga parte  sa lawas. Nakadayeg siya nga amo na kining nahisgotan ginamit ang among bag-ong libro.”

18. Sa unsang paagi ang librong Magtutudlo naghisgot sa pagsimba sa nasodnong mga emblema?

¹⁸ Ang laing kapitulo naghisgot bahin sa asoy sa Bibliya sa tulo ka Hebreohanong mga batan-on nga sila si Sadrak, Mesak, ug Abednego, kinsa wala moyukbo sa imahen nga naghawas sa Estado sa Babilonya. (Daniel 3:1-30) Ang uban dili tingali makasabot sa kalabotan tali sa pagsimbag imahen ug sa pagsaludar sa bandera, ingon sa gipaila sa librong Magtutudlo. Apan, matikdi kon unsay giingon sa awtor nga si Edward Gaffney diha sa usa ka interbiyo nga gihimo sa magasing U.S. Catholic. Siya miingon nga sa dihang giingnan siya sa iyang anak nga babaye human sa iyang unang adlaw diha sa publikong tunghaan nga nakakat-on siya ug “bag-ong pag-ampo didto sa tunghaan,” iyang gipangutana ang iyang anak nga sublion kini kaniya. “Iyang gibutang ang iyang kamot duol sa iyang kasingkasing,” miingon si Gaffney, “ug mapasigarbohong miingon, ‘Ako mosaad nga magmaunongon sa bandera . . .’” Siya mipadayon: “Sa kalit lang, nasabtan nako ang usa ka butang. Husto diay ang mga Saksi ni Jehova. Adunay usa ka sa dagway sa pagsimba sa nasod nga gipasiugda diha sa atong mga tunghaan sukad sa una pa nga ang-ang—ang walay-pagduhaduha, walay-kinutoban nga pagkamaunongon.”

Takos Gayod sa Paningkamot

19. Unsay mga ganti sa pagtudlo sa mga anak?

¹⁹ Sa pagkatinuod, takos gayod ninyong paningkamotan ang pagtudlo sa inyong mga anak. Usa ka inahan sa Kansas, T.B.A., ang nakahilak sa dihang nakadawat ug sulat gikan sa iyang anak nga lalaki.  Siya misulat: “Bulahan gayod ako nga gimatuto ako sa paagi nga nakatabang kanako nga mahimong lig-on sa emosyon ug mahimong timbang. Ikaw ug si Papa takos gayod sa komendasyon.” (Proverbio 31:28) Ang Pagkakat-on Gikan sa Dakong Magtutudlo makatabang sa daghan pang mga ginikanan sa pagtudlo sa mga anak aron mapanalipdan kining bililhong panulondon.

20. Unsay kinahanglan gayong hinumdoman sa mga ginikanan, ug unsay angayng epekto niini nganha kanila?

²⁰ Ang atong mga anak takos sa tanang panahon, pagtagad, ug paningkamot nga atong ikahatag kanila. Kadiyot lang ang ilang pagkabatan-on. Pahimusli ang tanang kahigayonan nga makauban ug matabangan sila. Dili gayod kamo magmahay. Sila sa ngadtongadto mahigugma kaninyo. Hinumdomi gayod, ang inyong mga anak maoy gasa sa Diyos kaninyo. Sila maoy bililhong panulondon! (Salmo 127:3-5) Busa atimana sila, nga daw kamo ang manubag sa Diyos sa paagi sa inyong pagmatuto kanila tungod kay ang tinuod mao, kamo gayod ang manubag.

[Footnote]

Unsaon Nimo Pagtubag?

• Nganong ilabinang gikinahanglan karon nga panalipdan sa mga ginikanan ang ilang mga anak?

• Unsang matanga sa pagtudlo ang naghatag ug kaalam?

• Unsa ang hinungdanong mga isyu nga hisgotan uban sa inyong mga anak karon?

• Sa unsang paagi ang librong Magtutudlo nakatabang sa mga ginikanan sa pagtudlo sa ilang mga anak?

[Mga Pangutana sa Pagtuon]

[Kahon/Mga hulagway sa panid 18, 19]

Usa ka Basahon Alang sa Tanan

Ang Pagkakat-on Gikan sa Dakong Magtutudlo gidisenyo aron tabangan ang mga ginikanan ug ubang mga hamtong sa pagbasa ug paghisgot sa mga pagtulon-an ni Jesu-Kristo uban sa mga bata. Bisan pa niana, ang mga hamtong nga nakabasa na sa libro nagpahayag ug sinserong pasalamat sa mga butang nga ilang nakat-onan.

Usa ka tawo sa Texas, T.B.A., miingon: “Ang Pagkakat-on Gikan sa Dakong Magtutudlo dali kaayong masabtan, nga makapadasig sa tanan bisag unsay ilang pangedaron—bisan sa usa nga nag-edad ug 76, sama nako. Daghan kaayong salamat, gikan sa usa nga nag-alagad na kang Jehova sukad pa sa pagkabata.”

Usa ka magbabasa sa London, Inglaterra, misulat: “Ang nindot nga mga hulagway makadani gayod sa pagtagad sa mga ginikanan ug mga bata. Nindot kaayo ang mga pangutana ug ang pagkahan-ay niini, ug maayo kaayo ang pagkasaysay sa sensitibong mga isyu, sama nianang sa kapitulo 32, ‘Kon sa Unsang Paagi Gipanalipdan si Jesus.’” Siya mihinapos: “Bisan tuod kining libroha gidisenyo gayod alang sa mga anak sa mga Saksi ni Jehova, nasayod ako nga ang mga magtutudlo ug uban pa malipay usab nga makadawat ug kopya niini. Naglaom ko sa paggamit niini karon ug sa umaabot.”

Usa ka babaye sa Massachusetts, T.B.A., nagkomento bahin sa daghang “maayong-pagkalaraw nga mga hulagway.” Siya misulat: “Namatikdan nako nga bisan tuod ang libro gidisenyo alang sa mga bata, ang mga ulohan nga gihisgotan makatabang usab kanamong mga hamtong sa paghunahuna bahin sa among relasyon kang Jehova.”

“Waw! Pagkanindot nga libro!” matod sa usa ka babaye sa Maine, T.B.A. “Dili lang kini alang sa mga bata kondili alang kanatong tanan nga mga anak sa Diyos. Natandog gayod niini ang akong pagbati ug ako nadasig ug nahupay, busa karon aduna na akoy kalinaw sa hunahuna. Nasuod kaayo ako kang Jehova ingong akong Amahan. Giwagtang niya ang tanang kasakit nga akong gibati latas sa katuigan ug klaro niyang gipadayag ang iyang katuyoan.” Siya mihinapos: “Sultihan nako ang tanan, ‘Palihog basaha kini.’”

Usa ka babaye sa Kyoto, Japan, nagsulat nga sa dihang gibasa niya kini sa iyang mga apo, sila nagsuknag mga pangutana sama sa: ‘Unsay gihimo niining batang lalaki? Nganong gibadlong man kining batang babaye? Unsa may gihimo niining inahan? Unsay gihimo niining leyon?’ Nagtudlo kinig mga butang nga makaiikag kanato, busa mas ganahan ako niini kay sa bisan unsang libro diha sa librarya.”

Usa ka amahan sa Calgary, Canada, nag-ingon nga pagkadawat dayon niya sa libro, iya kining gibasa ngadto sa iyang sayis-anyos nga anak nga babaye ug nuybe-anyos nga anak nga lalaki. “Maayo kaayo ang ilang pagsanong niana,” siya misulat. “Namati pag-ayo ang akong mga anak ug kinasingkasing nga mitubag sa mga pangutana. Gibati nila nga aduna silay bahin sa pagtuon, ug nakahatag kini kanilag higayon sa pagpahayag sa ilang kaugalingon. Nadasig kaayo sila, ug ang akong anak nga babaye miingon nga gusto niyang tun-an ang bag-ong libro kada gabii.”

Human sa usa niana ka pagtuon, ang amahan miingon: “Kami sa akong anak nga lalaki nag-estoryahay sulod sa daghang oras bahin kang Jehova ug sa iyang mga katuyoan. Daghan kaayo siyag pangutana gikan sa libro. Nanglugmaw ang mga luha sa akong mga mata sa dihang ayha siya natulog, iya akong gipangutana: ‘Pa, puwede bang mag-estoryahanay na sab kita sa sunod? Daghan pa kog pangutana, ug gusto nakong masayran ang tanan bahin kang Jehova.’”

[Hulagway sa panid 15]

Mga ginikanan, unsay inyong makat-onan gikan sa panig-ingnan ni Manoa?

[Hulagway sa panid 16]

Mga batan-on, unsay inyong makat-onan gikan sa panig-ingnan sa tulo ka Hebreohanon?

[Mga hulagway sa panid 17]

Ang mga hulagway ug mga kapsiyon diha sa librong “Magtutudlo” maoy epektibong mga galamiton sa pagtudlo

Unsang bakak ang gisulti ni Ananias kang Pedro?

Kinsay makakita sa tanan natong ginabuhat?