Mga Magmamantala sa Gingharian Nagtaho

Pagpangita sa mga Takos Diha sa Hilit nga mga Dapit sa Australia

ANG pipila ka hilit nga mga dapit sa dakong interyor nga yuta sa Australia wala masangyawi sulod sa 12 ka tuig. Busa ang mga Saksi ni Jehova sa Darwin, ang kaulohang siyudad sa Northern Territory, nag-organisar ug mabug-osong siyam-ka-adlaw nga kampanya sa pagsangyaw aron sa pagpangita sa mga takos.—Mateo 10:11.

Ang maampingong pagplano nagsugod 12 ka bulan una pa sa kampanya, nga naglakip sa paghimog mga mapa alang sa luna nga kapin sa 800,000 ka kilometro kuwadrado—tulo ka pilo sa gidak-on sa New Zealand. Aron duna kitay ideya kon unsa ka dako kining hilit nga teritoryo, hunahunaa lang nga ang aberids nga dalan diha sa usa ka ranso sa mga baka mokabat ug 30 kilometros gikan sa ganghaan ngadto sa balay! Gawas pa niana, ang ubang mga ranso maoy 300 kilometros ang gilay-on sa usag usa o kapin pa.

Ang katibuk-ang gidaghanon nga 145 ka boluntaryong mga Saksi nakigbahin sa maong kampanya. Ang uban gikan pa sa Tasmania. Ang uban nangabot sakay sa four-wheel-drive nga mga sakyanan nga punog mga gamit sa pagkamping, mga piyesa nga pang-ilis, ug gasolina. Ang uban nagguyod sa ilang mga gamit diha sa mga treyler. Dugang pa, dunay duha ka bus nga tag-22 ka tawo ang makasakay nga giabangan para niadtong walay four-wheel-drive nga mga sakyanan nga haom sa maong dapit. Kadtong nagsakay sa bus maoy misangyaw sa mga molupyo sa gagmayng mga lungsod diha sa piniling teritoryo.

Sa wala pa mobiyahe, ang mga igsoong lalaki naghikay ug mga pakigpulong ug mga pasundayag nga naghatag ug giya kon unsaon pagpresentar ang maayong balita diha nianang talagsaong teritoryo. Pananglitan, aron epektibong masangyawan ang mga komunidad sa mga Nitibo kasagaran kinahanglang sundon ang pipila ka lagda sa maayong pamatasan ug kinahanglang magmabinantayon sa mga kostumbre sa mga Nitibo. Gihisgotan usab ang mga butang labot sa kalikopan aron mapanalipdan ang ihalas nga mga mananap.

Daghang talagsaong mga eksperyensiya ang nasinatian. Pananglitan, diha sa usa ka balangay sa mga Nitibo, ang mga igsoong lalaki mihikay nga mohatag ug pakigpulong publiko nga gipasukad  sa Bibliya. Ang dakodako nga babaye sa maong balangay maoy nangunay sa pagpahibalo sa mga tawo. Pagkahuman, 5 ka libro ug 41 ka brosyur ang napahimutang ngadto sa tanang nanambong. Sa lain pang balangay, usa ka Nitibo ang giduaw. Aduna pa gani siyay kaugalingong Bibliya, usa ka King James Version, apan karaan ug gision na kini. Sa dihang gipangutana siya kon nahibalo ba siya sa ngalan sa Diyos, mitando siya ug dayon mikuha ug karaang gula sa Ang Bantayanang Torre gikan sa bulsa sa iyang dyaket. Gibasa niya gikan sa magasin ang Marcos 12:30, nga nag-ingon: “Higugmaon mo si Jehova nga imong Diyos sa tibuok mong kasingkasing.” Matod niya, “Ganahan kaayo ko nianang tekstoha.” Human sa dugayng panaghisgot sa Bibliya, iyang gidawat ang usa ka bag-ong Bibliya ug uban pang literatura nga gibase sa Bibliya.

Duol sa Gulf of Carpentaria, ang kapatas sa 400,000 ka ektarya nga ranso sa mga baka nagpakitag diyutayng interes sa mensahe sa Gingharian. Sa dihang gipakita kaniya ang mga basahong Akong Basahon sa mga Estorya sa Bibliya ug Kahibalo nga Motultol sa Kinabuhing Walay Kataposan, a nangutana siya kon aduna bay basahon nga mabatonan sa Kriol nga pinulongan. Talagsaon kadtong hangyoa tungod kay bisan tuod daghang Nitibo ang nagsultig Kriol, diyutay lang ang makabasa niana. Apan sa ulahi ilang nahibaloan nga ang tanang 50 ka mamumuo nianang ransoha makabasa diay ug Kriol. Ang kapatas nalipay sa pagkabaton ug literatura sa Bibliya diha sa Kriol nga pinulongan, ug sa paghatag sa numero sa iyang telepono aron makontak siya.

Sulod sa siyam-ka-adlaw nga mabug-osong pagsangyaw, adunay total nga 120 Bibliya, 770 ka libro, 705 ka magasin, ug 1,965 ka brosyur ang napahimutang. Dugang pa, 720 ka balikduaw ang nahimo, ug 215 ka pagtuon sa Bibliya ang nasugdan.

Sa pagkatinuod, natagbaw gayod ang espirituwal nga kagutom sa daghang takos nga mga tawo nga nakatag niining dakong yuta.—Mateo 5:6.

[Footnote]

[Mapa sa panid 30]

(Alang sa aktuwal nga pagkahan-ay, tan-awa ang publikasyon)

AUSTRALIA

NORTHERN TERRITORY

Darwin

Gulf of Carpentaria

Sydney

TASMANIA