Ang Imo Bang Pagtuo Nagtukmod Kanimo sa Pagbuhat?

ANG opisyal sa kasundalohan kombinsido nga maayo ni Jesus ang paralisis sa ulipon sa opisyal. Apan ang opisyal sa kasundalohan wala magdapit kang Jesus sa iyang balay, tingali tungod kay mibati siyang dili-takos o tungod kay siya usa ka Hentil. Hinunoa, gisugo sa opisyal ang pipila ka edarang Hudiyong mga lalaki sa pag-adto ug pag-ingon kang Jesus: “Senyor, dili ako takos nga tawo aron magpadayon kanimo ilalom sa akong bubong, apan isulti lang ang pulong ug mamaayo ang akong sulugoong lalaki.” Sanglit nakamatikod nga ang opisyal sa kasundalohan nagtuo nga si Jesus makaayo bisan sa halayo, giingnan ni Jesus ang panon sa katawhan nga nagsunod kaniya: “Sultihan ko kamo sa tinuod, Walay usa sa Israel nga akong nakaplagan nga adunay ingon kadako gayod nga pagtuo.”—Mateo 8:5-10; Lucas 7:1-10.

Kining maong kasinatian makatabang kanato sa paghatag ug pagtagad sa usa ka hinungdanong kamatuoran bahin sa pagtuo. Ang tinuod nga pagtuo gipaluyohan ug mga buhat. Ang magsusulat sa Bibliya nga si Santiago nag-ingon: “Ang pagtuo patay, kon kini walay binuhatan.” (Santiago 2:17) Mas masabtan pa nato kining kamatuorana kon tagdon nato ang usa ka tinuod nga pananglitan kon unsay mahitabo sa dihang ang pagtuo walay binuhatan.

Sa 1513 W.K.P., ang nasod sa Israel nahiusa kang Jehova nga Diyos pinaagi sa pakigsaad sa  Balaod. Ingong tigpataliwala nianang maong pakigsaad, gisulti ni Moises kon unsay giingon sa Diyos ngadto sa mga anak sa Israel: “Kon kamo hugot nga magasugot sa akong tingog ug magatuman gayod sa akong pakigsaad, nan kamo tinong mahimong . . . usa ka balaan nga nasod.” (Exodo 19:3-6) Oo, ang pagkabalaan sa Israel nagdepende sa ilang pagkamasinugtanon.

Daghang siglo sa ulahi, ang mga Hudiyo nagsugod sa paghatag ug mas dakong importansiya sa pagtuon sa Balaod kay sa pagpadapat sa mga prinsipyo niini. Sa iyang libro nga The Life and Times of Jesus the Messiah, si Alfred Edersheim misulat: “Ang [mga rabbi]—ang ‘mga bantogan sa kalibotan’ dugay nang nakahukom niini, nga ang pagtuon mas hinungdanon kay sa binuhatan.”

Tinuod nga ang karaang mga Israelinhon gisugo sa pagtuon pag-ayo sa mga kinahanglanon sa Diyos. Ang Diyos mismo nag-ingon: “Kining mga pulonga nga akong gisugo kanimo niining adlawa kinahanglan nga maanaa sa imong kasingkasing; ug isilsil mo kini sa imong anak ug magsulti ka mahitungod niini sa maglingkod ikaw sa imong balay ug sa maglakaw ikaw sa dalan ug sa imong paghigda ug sa imong pagbangon.” (Deuteronomio 6:6, 7) Apan gipasabot ba gayod ni Jehova nga ang pagtuon sa Balaod mas hinungdanon pa kay sa pagbuhat kaharmonya niana o sumala niana? Susihon nato.

Matukiong mga Pagtuon

Ang paghatag ug dako kaayong importansiya sa pagtuon sa Balaod giisip sa mga Israelinhon nga makataronganon, sanglit adunay Hudiyohanong tradisyon nga nagpatuo nga ang Diyos mismo naggugol ug tulo ka oras kada adlaw sa pagtuon sa Balaod. Masabtan nimo kon nganong ang pipila ka Hudiyo basin mangatarongan, ‘Kon ang Diyos regular ganing nagtuon sa Balaod, dili ba angay nga ang iyang yutan-ong mga linalang mogugol usab ug dakong panahon sa paghimo niana?’

Sa unang siglo, K.P., ang pagkalinga sa mga rabbi sa pag-analisar ug pagsabot sa Balaod bug-os nga nagtuis sa ilang panghunahuna. “Ang mga eskriba ug ang mga Pariseo . . . mosulti apan dili mobuhat,” matod ni Jesus. “Sila magbugkos  ug bug-at nga mga luwan ug magbutang niini diha sa mga abaga sa mga tawo, apan sila dili buot motarog niini pinaagi sa ilang tudlo.” (Mateo 23:2-4) Gipabug-atan niadtong relihiyosong mga lider ang ordinaryong mga tawo pinaagi sa dili-maihap nga mga lagda ug tulumanon, apan sila mismo salingkapawng nangitag mga paagi aron mapahigawas sila sa pagsunod sa maong mga balaod. Dugang pa, kadtong mga tawo nga nalinga sa matukiong mga pagtuon ‘wala magtagad sa mas bug-at nga mga butang sa Balaod, nga mao, ang hustisya ug ang kaluoy ug ang pagkamatinumanon.’—Mateo 23:16-24.

Pagkabaligho nga tungod sa tinguha nga ipasiugda ang ilang kaugalingong pagkamatarong, gilapas na hinuon sa mga eskriba ug mga Pariseo ang mismong Balaod nga ilang giangkon nga gituboy! Ang daghang siglo nga mga panaglantugi bahin sa mga pulong ug ubang ginagmayng detalye sa Balaod wala magpasuod kanila sa Diyos. Ang epekto niini maoy sama sa pagtipas nga gipahinabo sa gitawag ni apostol Pablo nga “mga sulting walay-pulos,” “mga pagsumpakiay,” ug bakak nga “kahibalo.” (1 Timoteo 6:20, 21) Hinunoa, ang lain pang seryosong problema mao ang epekto sa walay-hunong nga pagdukiduki diha kanila. Wala nila mabatoni ang matang sa pagtuo nga magtukmod kanila sa hustong binuhatan.

Punog-Kahibalo nga mga Hunahuna, Walay-Pagtuo nga mga Kasingkasing

Ang panghunahuna sa Hudiyong relihiyosong mga lider lahi gayod kay nianang iya sa Diyos! Wala madugay una pa nakaabot ang mga Israelinhon sa Yutang Saad, si Moises miingon kanila: “Ibutang ninyo ang inyong mga kasingkasing sa tanang pulong nga akong gisulti sa pagpasidaan kaninyo niining adlawa, aron sa pagsugo sa inyong mga anak nga magmatngon sa pagbuhat sa tanang pulong niini nga balaod.” (Deuteronomio 32:46) Tin-aw nga ang katawhan sa Diyos dili lang kay seryosong mga estudyante sa Balaod kondili mga tigtuman usab sa Balaod.

Ugaling lang, subsob nga ang nasod sa Israel wala magmatinumanon kang Jehova. Inay sa paghimo sa hustong matang sa mga binuhatan, ang mga anak sa Israel “wala magpasundayag ug pagtuo kaniya ug wala mamati sa iyang tingog.” (Deuteronomio 9:23; Maghuhukom 2:15, 16; 2 Cronicas 24:18, 19; Jeremias 25:4-7) Sa kataposan, ang mga Hudiyo nakahimo sa kinagrabehan nilang buhat sa pagkadili-matinumanon sa dihang gisalikway nila si Jesus ingong Mesiyas. (Juan 19:14-16) Ingong resulta, gisalikway ni Jehova nga Diyos ang Israel ug gitumong ang iyang pagtagad sa kanasoran.—Buhat 13:46.

Kinahanglan gayod kitang mag-amping nga dili mahulog sa samang bitik—nga maghunahuna nga mahimo natong simbahon ang Diyos uban ang punog-kahibalo nga mga hunahuna apan walay-pagtuo nga mga kasingkasing. Sa laing pagkasulti, ang atong pagtuon sa Bibliya kinahanglang labaw pa kay sa pagkuha lang ug kahibalo. Ang tukmang kahibalo kinahanglang makaabot sa atong kasingkasing aron kini makahatag ug kaayohan sa atong kinabuhi. Makataronganon ba ang pagtuon kon unsaon pagtanom ug mga utanon apan dili gayod motanom ug mga binhi? Tinuod nga makabaton tingali kitag daghang kahibalo kon unsaon pagkultibar ug hardin, apan dili gayod kita makaani ug mga abot! Sa susama, ang mga tawo nga nagtuon sa mga kinahanglanon sa Diyos pinaagig pagtuon sa Bibliya kinahanglang motugot sa mga binhi sa kamatuoran sa pag-abot sa ilang kasingkasing aron ang maong mga binhi motubo ug motukmod kanila sa pagbuhat.—Mateo 13:3-9, 19-23.

“Mahimong mga Magtutuman sa Pulong”

Si apostol Pablo miingon nga “ang pagtuo mosunod sa butang nga nadungog.” (Roma 10:17) Kining kinaiyanhong pag-uswag gikan sa pagkadungog sa Pulong sa Diyos ngadto sa pagpasundayag ug pagtuo sa iyang Anak, si Jesu-Kristo, naghatag kanato ug palaaboton nga kinabuhing walay kataposan. Oo, labaw pa ang gikinahanglan kay sa pag-ingon lang, ‘Ako nagtuo sa Diyos ug kang Kristo.’

Gidasig ni Jesus ang iyang mga sumusunod sa pagbaton sa matang sa pagtuo nga motukmod kanila sa pagbuhat: “Ang akong Amahan mahimaya niini, nga kamo magpadayon sa pagpamungag daghan ug magpamatuod nga akong mga tinun-an.” (Juan 15:8) Sa ulahi, ang igsoon ni Jesus sa inahan nga si Santiago misulat: “Mahimong mga magtutuman sa pulong, ug dili tigpaminaw lamang.” (Santiago 1:22) Apan, unsaon nato pagkahibalo kon unsay himoon? Pinaagi sa  iyang giingon ug gibuhat, gipaila ni Jesus kon unsay angay natong himoon aron pahimut-an ang Diyos.

Samtang dinhi sa yuta, si Jesus nagkugi sa pagpalambo sa intereses sa Gingharian ug sa paghimaya sa ngalan sa iyang Amahan. (Juan 17:4-8) Sa unsang paagi? Daghang tawo ang mahinumdom tingali sa mga milagro ni Jesus sa pag-ayo sa masakiton ug baldado. Apan gipatin-aw sa Ebanghelyo ni Mateo ang kinadak-ang paagi: “Migikan si Jesus aron sa paglibot sa tanang siyudad ug mga balangay, nga nagtudlo diha sa ilang mga sinagoga ug nagwali sa maayong balita sa gingharian.” Dayag kaayo nga si Jesus wala lang maglimite sa iyang ministeryo sa impormal nga pagwali ngadto sa pipila ka mga higala ug mga kaila o ngadto sa mga tawong nahibalag niya diha sa kasilinganan. Siya nagkugi gayod sa pagwali, nga naggamit sa bisan unsang paagi nga mabatonan niya sa pagduaw sa mga tawo “lukop sa tibuok Galilea.”—Mateo 4:23, 24; 9:35.

Gisugo usab ni Jesus ang iyang mga sumusunod sa pagpakig-ambit sa buluhaton sa paghimog tinun-an. Sa pagkatinuod, nagtagana siyag hingpit nga panig-ingnan nga sundon nila. (1 Pedro 2:21) Giingnan ni Jesus ang iyang matinumanong mga tinun-an: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.”—Mateo 28:19, 20.

Tinuod, ang pagpakig-ambit sa buluhatong pagsangyaw maoy usa gayod ka hagit. Si Jesus mismo miingon: “Tan-awa! Ipadala ko kamo ingon nga mga nating karnero taliwala sa mga lobo.” (Lucas 10:3) Sa dihang kita makaagom ug pagsupak, ang atong kinaiyanhong kiling mao ang pagsibog aron malikayan ang wala-kinahanglanang kaguol o kabalaka. Mao kanay nahitabo sa gabii nga gidakop si Jesus. Ang mga apostoles mikalagiw tungod sa tumang kahadlok. Sa ulahi nianang gabhiona, tulo ka higayon nga gilimod ni Pedro ang pagkaila kang Jesus.—Mateo 26:56, 69-75.

Dugang pa, basin mahibulong ka sa pagkasayod nga bisan si apostol Pablo miingon nga siya nakigbisog sa pagsangyaw sa maayong balita. Siya misulat sa kongregasyon sa Tesalonica: “Kami nakabaton ug kaisog pinaagi sa atong Diyos nga isulti kaninyo ang maayong balita sa Diyos uban ang hilabihang pakigbisog.”—1 Tesalonica 2:1, 2.

Nabuntog ni Pablo ug sa iyang mga isigkaapostoles ang bisan unsang kahadlok sa pagsulti sa uban bahin sa Gingharian sa Diyos, ug mahimo usab nimo kana. Sa unsang paagi? Ang labing hinungdanong paagi mao ang pagsalig kang Jehova. Kon bug-os kitang motuo kang Jehova, kanang maong pagtuo motukmod kanato sa pagbuhat, ug kita makaarang sa pagbuhat sa iyang kabubut-on.—Buhat 4:17-20; 5:18, 27-29.

Adunay Ganti Alang sa Imong Binuhatan

Si Jehova nasayod pag-ayo sa atong mga paningkamot sa pag-alagad kaniya. Pananglitan, nasayod siya kon kita nasakit o naluya. Nasayod siya sa atong gibating kawalay-pagsalig sa kaugalingon. Sa dihang kita nabug-atan tungod sa pinansiyal nga mga suliran o sa dihang nabalaka kita tungod sa atong panglawas o emosyon, si Jehova nasayod gayod sa atong kahimtang.—2 Cronicas 16:9; 1 Pedro 3:12.

Malipay gayod si Jehova sa dihang bisan pa sa atong pagkadili-hingpit ug mga kalisdanan, ang atong pagtuo motukmod kanato sa pagbuhat! Ang malumong pagbati ni Jehova alang sa iyang matinumanong mga alagad dili lang kay usa ka wala-ipadayag nga pagbati—kini iyang gipaluyohan sa usa ka saad. Ubos sa paggiya sa Diyos, si apostol Pablo misulat: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad.”—Hebreohanon 6:10.

Makasalig ka sa kahubitan sa Bibliya bahin kang Jehova ingong “usa ka Diyos sa pagkamatinumanon, nga kaniya walay inhustisya,” ug ingong “tigganti sa mga matinuorong nagapangita kaniya.” (Deuteronomio 32:4; Hebreohanon 11:6) Pananglitan, usa ka babaye sa California, T.B.A., nahinumdom: “Ang akong amahan nag-alagad ingong bug-os-panahong ministro sa napulo ka tuig una siya nagpamilya. Nalingaw ako sa iyang mga sugilanon kon sa unsang paagi gitabangan  siya ni Jehova sa iyang ministeryo. Daghang higayon nga ang nahibilin niyang kuwarta gipalit niyag gasolina aron makasangyaw. Sa dihang mouli siya gikan sa pagsangyaw, kasagarang adunay wala-damhang mga suplay sa pagkaon nga naghulat kaniya diha sa iyang pultahan.”

Gawas pa sa materyal nga suporta, “ang Amahan sa malumong mga kaluoy ug ang Diyos sa tanang paghupay” mohatag kanatog emosyonal ug espirituwal nga suporta. (2 Corinto 1:3) “Ang pagsalig kang Jehova maoy matagbawon nga pagbati,” matod sa usa ka Saksi nga nakasugamak ug daghang pagsulay latas sa katuigan. “Makahatag kini kanimo ug higayon sa pagsalig kang Jehova ug sa pagkakita kon unsaon ka niya pagtabang.” Mahimo kang moduol nga mapainubsanon sa “Tigpatalinghog sa pag-ampo,” nga nakaseguro nga hatagan niyag pagtagad ang imong mga kabalaka.—Salmo 65:2.

Daghang panalangin ug ganti ang madawat sa espirituwal nga mga mag-aani. (Mateo 9:37, 38) Ang pagpakig-ambit sa publikong ministeryo nakahatag ug kaayohan sa panglawas sa daghan, ug basin makaayo usab kini kanimo. Apan labawng hinungdanon, ang pagwali ngadto sa uban motabang kanato sa pagpalig-on sa atong maayong relasyon sa Diyos.—Santiago 2:23.

Padayon sa Paghimog Maayo

Sayop gayod alang sa usa ka alagad sa Diyos nga mohinapos nga si Jehova mahigawad kon ang kaluyahon o katigulangon medyo mopugong na kaniya sa pagbuhat sa tanan nga gusto unta niyang himoon sa ministeryo. Tinuod usab kana alang niadtong nalimitehan sa dili maayong panglawas, mga responsabilidad sa pamilya, o ubang mga kahimtang.

Hinumdomi nga sa dihang si apostol Pablo mibating nalimitehan tungod sa usa ka sakit o kakulian, siya ‘tulo ka higayon nga nangaliyupo sa Ginoo nga unta kini mobiya’ kaniya. Inay ayohon si Pablo aron mas daghan siyag mahimo sa pag-alagad kang Jehova, ang Diyos miingon: “Ang akong dili-takos nga kalulot igo na alang kanimo; kay ang akong gahom ginahingpit diha sa kaluyahon.” (2 Corinto 12:7-10) Busa, bisan unsa pa ka lisod ang mga kahimtang nga imong ginaantos, magmasaligon nga ang imong langitnong Amahan nagpabili sa bisan unsa nga maarangan nimo paghimo sa pagpalambo sa iyang intereses.—Hebreohanon 13:15, 16.

Ang atong mahigugmaong Maglalalang dili mangayog labaw kay sa atong maarangan. Siya nanginahanglan lang nga batonan nato ang matang sa pagtuo nga motukmod kanato sa pagbuhat.

[Hulagway sa panid 26]

Igo na ba ang pagtuon sa Balaod?

[Mga hulagway sa panid 29]

Ang atong pagtuo kinahanglang paluyohan ug mga buhat