Hilabihan ra ba ka Daghan ang Kahibalo Karon?

Usa ka magtiayong misyonaryo nga naglingkod sa baybayon sa Kasadpang Aprika nagsud-ong sa dan-ag nga bulan sa ibabaw. “Unsa ka daghan ang nahibaloan sa tawo bahin sa bulan, ug unsa ka daghan ang kinahanglan pa niyang tun-an bahin niini?” nangutana ang bana.

Ang iyang asawa mitubag: “Handurawa nga atong makita ang yuta niining paagiha. Unsa na ka daghan ang kahibalo sa mga tawo nga nagpuyo sa yuta, ug unsa ka daghan ang kinahanglan pa niyang makat-onan? Ug hunahunaa lang! Ang yuta dili lamang nagatuyok libot sa adlaw kondili ang atong tibuok nga sistema sa adlaw nagabiyo usab. Kini nagpasabot nga lagmit dili na gayod kita makabalik pag-usab niini mismong dapita sa uniberso. Sa pagkatinuod, nahibalo lang kita sa atong nahimutangan karon tungod sa naandang mga timaan sa langit sama sa adlaw ug mga bituon. Daghan kaayo kitag nahibaloan bahin sa pipila ka mga butang, apan sa usa ka diwa, wala kita mahibalo sa atong eksaktong nahimutangan!”

GIPADAYAG sa maong panglantaw ang pipila ka hinungdanong katinuoran. Mopatim-aw nga daghan kaayong impormasyon ang puwedeng makat-onan. Siyempre, kitang tanan makakat-on ug bag-ong mga butang matag adlaw. Apan, bisag unsa pa ka daghan ang atong makat-onan, morag dili nato maato sa pagtuon ang tanan nga gusto natong mahibaloan.

Tinuod, gawas sa katakos sa pagkat-on ug bag-ong impormasyon, ang kapasidad sa pagtipig ug kahibalo midako usab pag-ayo. Pinaagi sa teknolohiya, daghan na kaayo ug natipigang kahibalo ang mga tawo. Ang mga kompiyuter karon dagko nag kapasidad sa pagtipig ug impormasyon nga gumikan niini naimbento ang bag-ong matematikal nga mga termino sa paghubit niana. Ang usa ka yanong CD-ROM makatipig ug hilabihan ka daghang impormasyon; ang kapasidad niini gihubit ingong 680 ka megabyte o kapin pa. Ang usa ka ordinaryong DVD makatipig ug halos pito ka pilo niana, ug ang uban nga mas dako pag kapasidad mabatonan na.

Ang mga paagi sa modernong tawo sa pagpasa ug impormasyon halos dili na nato matugkad. Ang mga imprentahan paspas kaayong moimprenta ug mga mantalaan, magasin, ug mga libro. Kon ang usa naggamit ug Internet, sayon ra kaayong makuha ang hilabihan ka daghang impormasyon diha sa kompiyuter. Tungod niini ug daghan pang uban nga mga paagi, ang pagpasa ug impormasyon mas kusog nga dili na maapas sa pagtuon. Kining maong gidaghanon sa impormasyon usahay gipakasama sa tubig sa dagat, nga daghan kaayo busa kinahanglang magtuon kita sa paglangoy niana apan maningkamot nga dili imnon kanang tanan. Tungod sa hilabihan ka daghang impormasyon, kita kinahanglang magmapilion.

 Ang laing rason kon nganong magmapilion mao nga daghang impormasyon ang dili gayod mapuslanon. Sa pagkatinuod, ang pipila niini dili maayo ug dili na angay pang mahibaloan. Hinumdomi nga ang kahibalo nagpasabot ug impormasyon—maayo man kini o makadaot, mapuslanon o walay pulos. Ang kahimtang mas makalibog pa tungod kay ang ubang impormasyon nga giisip sa daghang tawo nga tinuod, dili diay tinuod. Daghang higayon nga napamatud-an sa ulahi nga sayop, o dili tinuod, ang gipamulong sa tinamod nga mga awtoridad! Hunahunaa, pananglitan, ang bahin sa kalihim sa siyudad sa karaang Efeso, nga giisip gayod sa mga tawo didto ingong makinaadmanong opisyal. Siya miingon: “Kinsa ba gayod sa katawhan nga wala mahibalo nga ang siyudad sa mga taga-Efeso mao ang magbalantay sa templo sa bantogang Artemis ug sa larawan nga nahulog gikan sa langit?” (Buhat 19:35, 36) Bisan tuod daw nasayod na niini ang tanan—ug moingon pa gani ang uban nga kini dili malalis—dili tinuod nga ang larawan nahulog gikan sa langit. May maayong katarongan nga gipasidan-an sa Balaang Bibliya ang mga Kristohanon sa pagbantay batok “nianang bakak nga gitawag ug ‘kahibalo.’”—1 Timoteo 6:20.

Ang usa ka lig-ong katarongan kon nganong magmapilion bahin sa pagkuhag kahibalo mao nga ang atong presenteng kinabuhi mubo kaayo. Bisag unsa pay imong edad, walay duhaduha nga daghang matang sa kahibalo ang gusto nimong tukion, apan naamgohan nimo nga dili nimo kini mahimo tungod kay mubo lang ang imong kinabuhi.

Mausab pa kaha kining pangunang problema bahin sa pagkamubo sa kinabuhi? Mabatonan ba ang usa ka matang sa kahibalo nga makahatag ug taas kaayo, o walay kataposan pa gani, nga kinabuhi? Aduna bay ingon niini nga matang sa kahibalo? Kon mao, mabatonan kaha kini sa tanan? Moabot kaha ang panahon nga ang tanang kahibalo pulos na tinuod, nga maoy atong gidahom? Ang magtiayong misyonaryo nga gihisgotan sa ibabaw nakakaplag ug makapatagbawng mga tubag sa maong mga pangutana, ug makaplagan mo usab kini. Palihog basaha ang sunod nga artikulo, nga maghatag kanimog paglaom sa pagkuhag kahibalo sa walay kataposan.