Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Unsay katarongan nga gipili ang Disyembre 25 ingong petsa sa pagsaulog sa pagkatawo ni Jesus?

Ang Pulong sa Diyos wala maghatag ug petsa bahin sa pagkatawo ni Jesus. Ang Enciclopedia Hispánica nag-ingon: “Ang petsang Disyembre 25 alang sa pagsaulog sa Pasko wala ibase sa tukmang kalkulasyon sa pagkatawo ni Jesus, apan, hinunoa, maoy paghimong Kristohanon sa mga pangilin sa winter solstice.” Ang karaang mga Romano nagsaulog sa pagsilang sa adlaw sa langit panahon sa tingtugnaw pinaagi sa pagbangkete, hudyaka, ug pagbayloay ug mga regalo.—12/15, mga panid 4-5.

• Ang Buhat 7:59 nagpasabot ba nga si Esteban miampo kang Jesus?

Wala. Gipakita sa Bibliya nga ang pag-ampo angayng itumong lamang kang Jehova nga Diyos. Sa pagkakita kang Jesus diha sa panan-awon, lagmit gibati ni Esteban nga siya direktang makahangyo kaniya, nga miingon: “Ginoong Jesus, dawata ang akong espiritu.” Si Esteban nahibalo nga si Jesus gihatagan ug awtoridad sa pagbanhaw sa mga patay. (Juan 5:27-29) Busa si Esteban naghangyo, o nangaliyupo, kang Jesus nga panalipdan ang iyang puwersa sa kinabuhi hangtod sa pagkabanhaw.—1/1, panid 31.

• Nganong nahibalo kita nga ang dulnganan sa usa ka tawo wala daan ilatid?

Ang Diyos naghatag sa tawo ug kagawasan sa pagpili, nga magpahigawas sa predestinasyon o paglatid daan sa dulnganan. Si Jehova mahimong dili mahigugmaon ug dili makataronganon kon iyang ilatid daan ang dalan nga atong subayon ug unya papanubagon kita sa atong mga buhat. (Deuteronomio 32:4; 1 Juan 4:8)—1/15, mga panid 4-5.

• Nganong ang pag-ingon nga imposible ang mga milagro maoy pagkadili-makasaranganon?

Kay nakaamgo nga dili bug-os ang ilang kahibalo bahin sa siyentipikanhong kahibulongan nga nagpaluyo sa kalalangan sa Diyos, ang pipila ka siyentipiko nag-admitir nga sila dili makasulti sa tino nga imposible ang usa ka butang. Ang butang nga andam nilang isulti mao nga kini lagmit dili tinuod.—2/15, mga panid 5-6.

• Nganong si Maghuhukom Samson misulti sa iyang mga ginikanan nga gusto niyang mangasawa sa usa ka anak nga babaye sa mga Filistehanon? (Maghuhukom 14:2)

Supak sa balaod sa Diyos ang pagpakigminyog usa ka magsisimba ug bakak nga diyos. (Exodo 34:11-16) Bisan pa niana, ang Filistehanong babaye ‘lamang ang angayan’ sa panan-aw ni Samson. Si Samson ‘nangitag kahigayonan batok sa mga Filistehanon,’ ug ang babaye mao lamang ang angayan sa maong katuyoan. Ang Diyos nagpaluyo kang Samson pinaagi sa Iyang espiritu. (Maghuhukom 13:25; 14:3, 4, 6)—3/15, panid 26.

• Ang Kristohanon angay bang mohatag ug kuwarta o usa ka matang sa gasa sa usa ka empleyado sa gobyerno tungod sa iyang mga serbisyo?

Sayop ang paghiphip sa usa ka opisyal, nga hatagan siyag bililhong butang aron iyang buhaton ang butang nga dili legal, tuison ang hustisya, o mohatag ug pinalabing pagtagad. Apan dili panghiphip ang paghatag ug kuwarta o gasa sa usa ka empleyado sa gobyerno sa dihang iyang tumanon ang iyang katungdanan o aron mabatonan ang legal nga serbisyo o aron malikayan ang dili-makiangayong pagtagad.—4/1, panid 29.