Pagkuhag Kahibalo—Karon ug sa Walay Kataposan

ANG Aleman nga doktor nga si Ulrich Strunz nagsulat ug seryal nga mga libro nga may ulohang Forever Young. Dinhi miingon siya nga ang pag-ehersisyo, nutrisyon, ug maayong estilo sa kinabuhi makapalambo sa maayong panglawas ug posibleng moresulta ug taas nga kinabuhi. Bisan pa niana, wala niya saari ang iyang mga magbabasa nga sila mabuhi gayod sa walay kataposan sa dihang ipadapat nila ang iyang tambag.

Apan, adunay usa ka matang sa kahibalo nga makahatag gayod ug kinabuhing walay kataposan. Sa laing bahin, kon ikaw mabuhi hangtod sa hangtod, ikaw makakuhag mapuslanong kahibalo hangtod sa hangtod. Si Jesus miingon diha sa iyang pag-ampo sa Diyos: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Una sa tanan, atong hubiton ang kahulogan sa terminong “kinabuhing walay kataposan” ug dayon atong hibaloon kon unsay nalakip nianang matanga sa kahibalo ug kon sa unsang paagi ikaw makabaton niana.

Sumala sa Bibliya, sa dili madugay himoon sa Maglalalang ang yuta nga usa ka literal nga paraiso, usa ka kahimtang nga paborable alang sa taas nga kinabuhi. Aron mapatungha ang Paraiso kinahanglan duna gayoy himoon nga dakong kalaglagan, sama nianang sa Lunop sa adlaw ni Noe. Gipakita diha sa Mateo kapitulo 24, mga bersikulo 37 hangtod 39, nga gitandi ni Jesus ang atong panahon “sa mga adlaw ni Noe,” diin ang mga tawo ‘wala magtagad’ sa ilang nameligrong kahimtang.  Gibalewala usab nila ang mensahe nga gisangyaw ni Noe. Dayon miabot ang “adlaw nga misulod si Noe sa arka” ug gilaglag sa Lunop ang tanan nga misalikway niana nga kahibalo. Si Noe ug ang iyang mga kauban sa arka naluwas.

Gipakita ni Jesus nga ang samang “adlaw” nagsingabot sa atong panahon. Kadtong magtuon ug magpadapat sa kahibalo maylabot niini nga hitabo may paglaom nga dili lamang maluwas kondili mabuhi usab sa walay kataposan. Dugang pa, ang mga patay nga anaa sa panumdoman sa Diyos pagabanhawon ug may paglaom nga dili na gayod mamatay pag-usab. (Juan 5:28, 29) Matikdi kon giunsa pagpahayag ni Jesus kining duha ka ideya. Sa dihang nakig-estorya kang Marta bahin sa pagkabanhaw sa mga patay, siya miingon: “Siya nga magpasundayag ug pagtuo kanako, bisan siya mamatay, siya mabuhi; ug ang matag usa nga buhi ug magpasundayag ug pagtuo kanako dili na gayod mamatay.” Ang tanang pamatuod nagpakita nga duol na kaayo kini nga “adlaw,” nga nagpasabot nga ikaw mahimong “dili na gayod mamatay.”—Juan 11:25-27.

Dayon gipangutana ni Jesus si Marta: “Motuo ka ba niini?” Siya mitubag: “Oo, Ginoo.” Pananglitan pangutan-on ka ni Jesus nianang pangutanaha karon, unsay imong itubag? Tingali dili ka makatuo sa posibilidad nga ikaw dili na gayod mamatay. Apan bisag mao kanay imong reaksiyon, sa walay duhaduha gusto nimo nga motuo niana. Hunahunaa kon unsa ka daghan ang imong makat-onan kon ikaw “dili na gayod mamatay”! Handurawa ang imong kaugalingon nga nalingaw sa paghimo sa tanang butang nga gusto nimong makat-onan ug himoon karon apan wala ka gayoy panahon sa paghimo. Ug hunahunaa lang nga makauban na nimo pag-usab ang imong mga minahal nga namatay! Unsa ang kahibalo nga magpahinabo niana, ug sa unsang paagi mabatonan nimo kana?

May Katakos Kita sa Pagbaton ug Nagahatag-Kinabuhi nga Kahibalo

Kita ba walay katakos sa pagkuhag kahibalo bahin sa Diyos ug kang Kristo? Aduna. Tinuod nga walay kinutoban ang kahibalo bahin sa mga binuhat sa Maglalalang. Apan, dili astronomiya o usa sa ubang mga siyensiya ang gipasabot ni Jesus sa dihang iyang gilangkit ang “kahibalo” ngadto sa “kinabuhing walay kataposan.” Gipakita sa Proverbio kapitulo 2, mga bersikulo 1 ug 5 nga ang “mga pulong” ug “mga sugo” nga makaplagan diha sa Bibliya maoy importanteng bahin sa “mismong kahibalo sa Diyos.” Ug gipakita sa Juan 20:30, 31 nga ang mga pulong nga gisulat bahin kang Jesus diha sa Bibliya igo na aron kita ‘makabaton ug kinabuhi.’

Busa, ang kahibalo bahin kang Jehova ug Jesu-Kristo nga makaplagan diha sa Bibliya igo na aron masayran nimo kon unsaon pagbaton ug kinabuhing walay kataposan. Ang Bibliya maoy usa ka talagsaong basahon. Ang Maglalalang malulotong nag-inspirar niini sa paagi nga bisan ang mga tawong dili edukado makakuhag igong kahibalo aron makabaton ug kinabuhing walay kataposan. Sa samang paagi, ang tawong abtik ug pangisip ug daghag panahon ug bahandi makakat-on gayod ug bag-ong butang gikan sa inspiradong Kasulatan. Ang imong pagbasa niini nga artikulo maoy pamatuod nga may katakos ka sa pagkat-on, apan unsaon man nimo paggamit ang maong katakos?

Sa tibuok kalibotan, gipakita sa kasinatian sa daghang tawo nga ang labing episyenteng paagi sa pagbaton niini nga kahibalo maoy pinaagi sa personal nga pagtuon sa Bibliya nga dumalahon sa usa nga nakasabot na niini. Maingon nga naningkamot si Noe sa pagpaambit ug kahibalo ngadto sa iyang mga katalirongan, ang mga Saksi ni Jehova andam sa pagduaw kanimo sa balay aron hisgotan ang Bibliya uban kanimo. Mahimong gamiton nila ang brosyur nga Unsay Gikinahanglan sa Diyos Kanato? o ang librong may haom nga ulohang Kahibalo nga Motultol sa Kinabuhing Walay  Kataposan. a Bisan pag para kanimo lisod tuohan nga sa yutan-ong Paraiso ang mga matinumanon “dili na gayod mamatay,” makakat-on ka sa pagsalig niini nga saad pinaagi niining maong mga panaghisgot sa Bibliya. Busa kon gusto ka nga mabuhi sa walay kataposan o gusto kang masayod kon makataronganon bang tuohan kini, unsay angay nimong buhaton? Dawata kini nga kahigayonan sa pagtuon sa Bibliya.

Unsa ka dugay ang maong pagtuon? Ang gihisgotang 32-panid nga brosyur, nga mabatonan sa gatosan ka pinulongan, dunay 16 lang ka mugbong mga leksiyon. O kaha kon makagahin ka ug mga usa ka oras kada semana, pipila lang ka bulan ang gikinahanglan aron imong matun-an ang hinungdanong mga ulohan sa Bibliya, ginamit ang librong Kahibalo nga Motultol sa Kinabuhing Walay Kataposan. Daghan na ang natabangan niini nga mga publikasyon sa pagbaton ug daghang kahibalo ug sa pag-ugmad ug lalom nga gugma alang sa Diyos. Ang Maglalalang magaganti sa mga tawong tinuod nga nahigugma kaniya, nga magtabang kanila nga makabaton ug kinabuhing walay kataposan.

Ang nagahatag-kinabuhi nga kahibalo posible gayod natong makab-ot, ug kini sayon nga mabatonan. Ang Bibliya, o labing menos ang pipila ka bahin niini, gihubad na sa kapin sa 2,000 ka pinulongan. Ang mga Saksi ni Jehova diha sa 235 ka kayutaan malipay sa pagtabang sa personal nga paagi ug sa paghatod ug binase-sa-Bibliya nga mga publikasyon aron madugangan pa nimo ang imong kahibalo.

Personal nga Pagtuon

Ang imong relasyon sa Diyos maoy usa ka personal nga butang tali nimo ug sa Maglalalang. Ikaw lamang ang makamentinar ug makapalig-on niini, ug siya lamang ang makahatag kanimo ug kinabuhing walay kataposan. Busa, kinahanglang magpadayon ka sa imong personal nga pagtuon sa iyang sinulat nga Pulong. Tingali mas sayon kanimo ang paggahin ug panahon sa pagtuon kon dunay regular nga moanha sa imong balay.

Sanglit ang Bibliya ug ang mga tabang sa pagtuon sa Bibliya naundan sa “mismong kahibalo sa Diyos,” angay gayod nga ampingan nimo kini. (Proverbio 2:5) Sa ingon, modurar kini sa daghang tuig. Kon ikaw nagpuyo sa usa ka kabos nga nasod, tingali wala ka makasulay paggamit ug daghang libro sa tunghaan, nga nagtuon lang pinaagi sa pagpamati ug pagpaniid. Pananglitan, sa Benin dunay kapin sa 50 ka pinulongan. Komon na nga makadungog ug mga tawo nga larinong mosulti ug upat o lima ka pinulongan, bisan pag wala gayod sila sukad makabaton ug mga libro niining maong mga pinulongan. Ang imong katakos sa pagkat-on pinaagi sa pagpamati, pagpaniid, ug paghatag ug bug-os nga pagtagad maoy usa ka gasa. Bisan pa niana, imong makita nga dakog ikatabang ang mga libro sa imong pagtuon.

Bisan ug gamay ang imong puy-anan, tagan-i ug maayong butanganan ang imong Bibliya ug binase-sa-Bibliya nga mga publikasyon. Ibutang kini sa dapit diin dali kining makuha ug diin dili kini madaot.

Pagtuon sa Pamilya

Kon ikaw usa ka ginikanan, angay usab nga interesado ka sa pagtabang sa imong mga anak nga makabaton sa kahibalo nga imong nabatonan. Sa kabos nga mga nasod, naandan na sa mga ginikanan ang pagtudlo sa ilang mga anak ug daghang hinungdanong mga katakos sa kinabuhi. Malagmit naglakip kini sa pagluto, pagpangahoy, pagkalos, pag-uma, pagpangisda, ug pagpakigbaylo diha sa merkado. Kini maoy edukasyon nga alang gayod sa atong ikabuhi. Ugaling lang, wala iapil sa daghang ginikanan sa paghatag sa maong edukasyon ang kahibalo nga motultol sa kinabuhing dayon.

Bisag unsay imong kahimtang sa kinabuhi, malagmit imong gibati nga kulang ang imong panahon. Ang Maglalalang nahibalo usab niana. Mahitungod sa paagi sa pagtudlo sa mga bata bahin sa iyang mga dalan, matikdi kon unsay iyang gisulti kaniadto: “Isilsil mo kini sa imong anak ug magsulti ka mahitungod niini sa maglingkod ikaw sa imong balay ug sa maglakaw ikaw sa dalan ug sa imong paghigda ug sa imong pagbangon.” (Deuteronomio 6:7) Base niini nga mga hunahuna, nganong dili nimo sulayan ang paghimog imong kaugalingong programa sa pagtudlo, sama sa mosunod:

1. “Sa maglingkod ikaw sa imong balay”: Paningkamot nga mahisgotan ang Bibliya sa regular nga paagi, tingali matag semana, uban sa imong  mga anak diha sa balay, sama sa gihimo tingali sa tawong nagdumala ug pagtuon kanimo. Ang mga Saksi ni Jehova nagtaganag binase-sa-Bibliya nga mga publikasyon nga maayong gamiton sa pagtudlo sa mga bata sa tanang pangedaron.

2. “Sa maglakaw ikaw sa dalan”: Paghisgot bahin kang Jehova uban sa imong mga anak sa di-pormal nga paagi, sama sa imong pagtudlo kanila bahin sa hinungdanong mga butang sa kinabuhi o paggiya kanila sa di-pormal nga paagi.

3. “Sa imong paghigda”: Pag-ampo uban sa imong mga anak matag gabii.

4. “Sa imong pagbangon”: Daghang pamilya ang nakatagamtam ug makapalipayng mga resulta tungod sa pagkonsiderar ug usa ka teksto sa Bibliya kada buntag. Ang mga Saksi ni Jehova naggamit sa pulyetong Pagsusi sa Kasulatan sa Adlaw-Adlaw b sa pagkonsiderar ug teksto.

Sa kabos nga mga nasod, daghang ginikanan mangamas munas ginhawa aron lang ang ilang mga anak makabaton ug maayong sekular nga edukasyon. Nianang paagiha maatiman sa anak ang ilang mga ginikanan sa dihang sila matigulang na. Apan, kon ikaw magtuon sa Bibliya ug tabangan ang tanan nimong anak sa pagtuon usab niana, makabaton ka ug kahibalo nga makahatag kanimo ug sa imong tibuok pamilya ug kinabuhing walay kataposan.

Moabot kaha ang panahon nga masayran na nato ang tanan? Dili. Maingon nga ang atong yuta nagpadayon sa paglakbay niini diha sa walay kinutbanang uniberso, kita magapadayon sa pagkuhag kahibalo. Sa pagkatinuod, ang Ecclesiastes 3:11 nag-ingon: ‘Ang tanang butang gihimo sa Diyos nga matahom sa panahon niini. Bisan ang panahong walay tino iyang gibutang sa ilang kasingkasing, aron ang tawo dili makatugkad sa buhat nga nahimo sa matuod nga Diyos sukad sa sinugdan hangtod sa kataposan.’ Ang pagkuhag kahibalo maoy usa ka makapalipayng buhat nga dili gayod matapos.

[Mga footnote]

[Blurb sa panid 5]

“Kini nagkahulogan ug kinabuhing walay kataposan, ang ilang pagkuha ug kahibalo . . .”

[Mga hulagway sa panid 7]

Tabangi ang imong pamilya sa pagkuhag kahibalo karon ug sa walay kataposan