Tugoti ang Pulong sa Diyos nga Maglamdag sa Imong Alagianan
Tugoti ang Pulong sa Diyos nga Maglamdag sa Imong Alagianan
“Ang imong pulong maoy . . . kahayag sa akong alagianan.”—SALMO 119:105.
1, 2. Ilalom sa unsang mga sirkumstansiya nga ang pulong ni Jehova maglamdag sa atong alagianan?
ANG pulong ni Jehova maglamdag sa atong alagianan kon tugotan nato kana nga mahitabo. Aron makabenepisyo gikan nianang espirituwal nga kahayag, kita kinahanglang mahimong makugihon nga mga estudyante sa sinulat nga Pulong sa Diyos ug magpadapat sa tambag niana. Sa pagbuhat lamang niana nga bation nato ang gibati sa salmista: “Ang imong pulong maoy lampara sa akong tiil, ug kahayag sa akong alagianan.”—Salmo 119:105.
2 Konsiderahon nato karon ang Salmo 119:89-176. Pagkadaghang impormasyon ang anaa niining mga bersikuloha, nga gihan-ay sa 11 ka estansa! Kini makatabang kanato sa pagpabilin diha sa dalan padulong sa kinabuhing walay kataposan.—Mateo 7:13, 14.
Nganong Angayng Kalipayan ang Pulong sa Diyos?
3. Sa unsang paagi ang Salmo 119:89, 90 nagpakita nga makasalig kita sa pulong sa Diyos?
3 Ang pagkalipay alang sa pulong ni Jehova moresulta sa kalig-on sa espirituwal. (Salmo 119:89-96) Ang salmista miawit: “Hangtod sa panahong walay tino, Oh Jehova, ang imong pulong nahimutang sa kalangitan. . . . Ikaw lig-ong nagpahimutang sa yuta, aron kini magpadayon.” (Salmo 119:89, 90) Pinaagi sa pulong sa Diyos—iyang “mga lagda sa kalangitan”—ang mga butang sa langit hapsay nga nagabiyo diha sa ilang mga orbito ug ang yuta lig-ong gipahimutang hangtod sa hangtod. (Job 38:31-33; Salmo 104:5) Makasalig kita sa matag pulong nga magagula sa baba ni Jehova; ang giingon sa Diyos “tinong molampos” sa pagtuman sa iyang katuyoan.—Isaias 55:8-11.
4. Unsay epekto sa pagkalipay alang sa pulong sa Diyos diha sa iyang mga alagad nga nag-antos sa kasakit?
4 Ang salmista ‘mahanaw na unta tungod sa iyang kasakitan kon wala pa niya kalipayi ang balaod sa Diyos.’ (Salmo 119:92) Wala siya sakita sa mga langyaw; ang Israelinhong mga malinapason sa balaod mao ang nagdumot kaniya. (Levitico 19:17) Apan wala siya malumsi sa kaguol, kay siya nahigugma sa balaod sa Diyos nga nagpalig-on kaniya. Sa Corinto, si apostol Pablo ‘nameligro taliwala sa mini nga mga igsoon,’ tingali naglakip sa “maayong-laki nga mga apostoles” nga nangitag ikasumbong batok kaniya. (2 Corinto 11:5, 12-14, 26) Bisan pa niana, si Pablo nakalahutay sa espirituwal tungod kay gikalipayan niya ang pulong sa Diyos. Tungod kay gikalipayan nato ang sinulat nga Pulong ni Jehova ug gipadapat ang gisulti niana, atong gihigugma ang atong mga igsoon. (1 Juan 3:15) Bisan ang pagdumot sa kalibotan kanato dili makapakalimot kanato sa bisan hain sa mga instruksiyon sa Diyos. Padayon natong ginatuman ang iyang kabubut-on diha sa mahigugmaong panaghiusa uban sa atong mga igsoon samtang kita naglantaw sa unahan sa walay kataposang malipayon nga pag-alagad kang Jehova.—Salmo 119:93.
5. Sa unsang paagi si Haring Asa nangita kang Jehova?
5 Sa pagpahayag sa atong debosyon kang Jehova, kita makaampo ug sama niini: “Imo ako. Oh luwasa ako, tungod kay gipangita ko ang imong mga sugo.” (Salmo 119:94) Si Haring Asa nangita sa Diyos ug nagpapha sa apostasya diha sa Juda. Sa dakong panagkatigom sa ika-15 ka tuig nga pagmando ni Asa (963 W.K.P.), ang mga molupyo sa Juda “misulod sa usa ka pakigsaad sa pagpangita kang Jehova nga Diyos.” “Gitugotan [sa Diyos] nga siya makaplagan nila” ug siya “nagpadayon sa paghatag kanila ug pahulay sa tibuok palibot.” (2 Cronicas 15:10-15) Kining maong panig-ingnan angayng magdasig ni bisan kinsa nga nahilayo sa Kristohanong kongregasyon nga mangita pag-usab sa Diyos. Iyang panalanginan ug panalipdan kadtong makig-uban pag-usab sa iyang katawhan.
6. Unsang dalan ang manalipod kanato batok sa espirituwal nga kadaot?
6 Ang pulong ni Jehova maghatag ug kaalam nga makapanalipod kanato batok sa espirituwal nga kadaot. (Salmo 119:97-104) Ang mga sugo sa Diyos makapahimo kanatong mas maalamon kay sa atong mga kaaway. Ang pagsunod sa iyang mga pahinumdom maghatag kanato ug hait nga panabot, ug ‘ang pagtuman sa iyang mga sugo makapaarang kanato sa paggawi nga labi pang masinaboton kay sa mga tigulang.’ (Salmo 119:98-100) Kon ang mga pulong ni Jehova ‘lalim diha sa atong alingagngag nga labaw pa kay sa dugos sa atong baba,’ atong dumtan ug likayan “ang tanang bakak nga alagianan.” (Salmo 119:103, 104) Kini magsilbing panalipod batok sa espirituwal nga kadaot samtang atong atubangon ang mapahitas-on, bangis, dili-diyosnon nga mga tawo niining kataposang mga adlaw.—2 Timoteo 3:1-5.
Usa ka Lampara sa Akong Tiil
7, 8. Sa pagpahiuyon sa Salmo 119:105, unsay kinahanglan natong buhaton?
7 Ang pulong sa Diyos maoy tuboran sa kasaligang espirituwal nga kahayag. (Salmo 119:105-112) Kita man sakop sa dinihogang mga Kristohanon o kita maoy ilang mga kauban sa “ubang mga karnero,” kita moingon: “Ang imong pulong maoy lampara sa akong tiil, ug kahayag sa akong alagianan.” (Juan 10:16; Salmo 119:105) Ang pulong sa Diyos samag lampara nga maglamdag sa atong dalan, aron dili kita mapandol ug matumba sa espirituwal. (Proverbio 6:23) Bisan pa niana, kinahanglang tugotan sa matag usa kanato ang pulong ni Jehova nga mahimong lampara sa atong tiil.
8 Kita kinahanglang magmalig-on sama sa tagsulat sa Salmo 119. Determinado siya nga dili motipas gikan sa mga sugo sa Diyos. “Ako nakahimog gipanumpaang pahayag,” siya miingon, “ug pagatumanon ko kini, aron sa pagtuman sa imong [kang Jehova] matarong nga hudisyal nga mga hukom.” (Salmo 119:106) Dili gayod nato pakamenoson ang regular nga pagtuon sa Bibliya ug pagpakigbahin sa Kristohanong mga tigom.
9, 10. Sa unsang paagi mahibaloan nato nga ang mga tawo nga dedikado kang Jehova posibleng ‘motipas gikan sa iyang mga sugo,’ apan sa unsang paagi malikayan kini?
9 Ang salmista wala ‘motipas gikan sa mga sugo sa Diyos,’ apan mahimong mahitabo kana sa usa ka tawo nga dedikado kang Jehova. (Salmo 119:110) Si Haring Solomon mitipas, bisan tuod membro siya sa nasod nga dedikado kang Jehova ug sa sinugdan milihok nga kaharmonya sa hinatag-sa-Diyos nga kaalam. “Bisan pa niana ang langyawng mga asawa nagpahinabo kaniya nga makasala” pinaagi sa pag-aghat kaniya sa pagsimba sa bakak nga mga diyos.—Nehemias 13:26; 1 Hari 11:1-6.
10 Ang “tiglit-ag ug langgam,” si Satanas, nagbutang ug daghang lit-ag. (Salmo 91:3) Pananglitan, usa ka kanhing isigkamagsisimba ang mosulay tingali sa pag-aghat kanato sa pagtipas gikan sa dalan sa espirituwal nga kahayag ug pagsubay sa dalan sa kangitngit sa apostasya. Taliwala sa mga Kristohanon sa Tiatira, dihay “babaye nga si Jezebel,” posible usa ka grupo sa mga babaye nga nagtudlo sa uban sa pagbuhat ug idolatriya ug pakighilawas. Wala konsentiha ni Jesus ang maong mga pagkadaotan, ug mao man usab kita. (Pinadayag 2:18-22; Judas 3, 4) Busa mag-ampo kita alang sa tabang ni Jehova aron dili kita motipas gikan sa iyang mga sugo kondili magpabilin diha sa kahayag sa Diyos.—Salmo 119:111, 112.
Gipalig-on sa Pulong sa Diyos
11. Sumala sa Salmo 119:119, sa unsang paagi isipon sa Diyos ang mga daotan?
11 Kon dili gayod kita motipas gikan sa iyang mga regulasyon, palig-onon kita sa Diyos. (Salmo 119:113-120) Dili kita mouyon sa mga tawong “dili-bug-os ug kasingkasing,” maingon nga si Jesus wala mouyon sa dagaang nga nag-angkong mga Kristohanon karon. (Salmo 119:113; Pinadayag 3:16) Tungod kay kita tibuok-kasingkasing nga nag-alagad kang Jehova, siya mao ang ‘atong tagoanang dapit’ ug magpalig-on kanato. Iyang ‘isalikway kadtong tanan nga mitipas sa iyang mga regulasyon’ pinaagi sa panglingla ug pagpamakak. (Salmo 119:114, 117, 118; Proverbio 3:32) Iyang isipon kanang maong mga daotan ingong “naglutawng yamukmok”—mga hugaw nga makuha gikan sa bililhong mga metal sama sa plata ug bulawan. (Salmo 119:119; Proverbio 17:3) Hinaot nga ipasundayag nato kanunay ang gugma alang sa mga pahinumdom sa Diyos, kay dili gayod nato gusto nga malaglag duyog sa mga daotan!
12. Nganong hinungdanon ang kahadlok kang Jehova?
12 “Ang akong unod nangurog gumikan sa kahadlok kanimo [Jehova],” miingon ang salmista. (Salmo 119:120) Ang atong pagbaton ug maayong matang sa kahadlok sa Diyos, nga gipasundayag pinaagi sa paglikay kon unsay wala niya uyoni, hinungdanon aron mapalig-on niya kita ingong iyang mga alagad. Tungod sa matahaong kahadlok kang Jehova si Job nagkinabuhi nga matarong. (Job 1:1; 23:15) Ang diyosnong kahadlok makapaarang kanato sa paglahutay diha sa dalan nga gipaboran sa Diyos bisan unsa pay atong antoson. Apan, aron makalahutay gikinahanglan ang kinasingkasing nga mga pag-ampo nga gilitok nga may pagtuo.—Santiago 5:15.
Pag-ampo nga Masaligon
13-15. (a) Nganong makasalig kita nga tubagon ang atong mga pag-ampo? (b) Unsay mahitabo kon dili kita mahibalo kon unsay atong isulti diha sa pag-ampo? (c) Iilustrar kon sa unsang paagi ang Salmo 119:121-128 mahimong ilangkit sa atong “mga pag-agulong wala mabungat” diha sa pag-ampo.
13 Makaampo kita nga masaligon nga ang Diyos molihok alang kanato. (Salmo 119:121-128) Sama sa salmista, makaseguro kita nga ang atong mga pag-ampo pagatubagon. Ngano? Tungod kay kita nahigugma sa mga sugo sa Diyos “labaw pa kay sa bulawan, sa dinalisayng bulawan.” Dugang pa, ‘giisip nato nga matul-id ang tanang sugo sa Diyos mahitungod sa tanang butang.’—Salmo 119:127, 128.
14 Si Jehova mamati sa atong mga pangamuyo tungod kay kita nag-ampo nga masaligon ug mainampingon usab nga nagsunod sa iyang mga sugo. (Salmo 65:2) Apan komosta kon usahay aduna kitay makapalibog nga mga problema nga dili kita mahibalo kon unsay atong isulti diha sa pag-ampo? Nan “ang espiritu mangamuyo alang kanato uban ang mga pag-agulong wala mabungat.” (Roma 8:26, 27) Nianang mga panahona, ang Diyos mamati sa mga pag-ampo nga makaplagan diha sa iyang Pulong nga naghisgot sa atong mga panginahanglan.
15 Ang Kasulatan adunay daghang pag-ampo ug mga hunahuna nga ikalangkit nato sa atong “mga pag-agulong wala mabungat.” Pananglitan, konsideraha ang Salmo 119:121-128. Ang pagkapahayag sa pag-ampo dinhi mohaom tingali sa atong mga sirkumstansiya. Pananglitan, kon kita mahadlok nga matikasan, makapangayo kita sa tabang sa Diyos sama sa gibuhat sa salmista. (Mga bersikulo 121-123) Ibutang ta nga kinahanglan kitang mohimog lisod kaayo nga desisyon. Nan makaampo kita nga ang espiritu ni Jehova motabang kanato sa paghinumdom ug pagpadapat sa iyang mga pahinumdom. (Mga bersikulo 124, 125) Bisan tuod ‘gidumtan nato ang tanang bakak nga alagianan,’ kinahanglan tingali kitang mohangyo sa Diyos nga tabangan kita aron dili kita madala sa tentasyon nga molapas sa iyang balaod. (Mga bersikulo 126-128) Kon basahon nato ang Bibliya adlaw-adlaw, ang maong makatabang nga mga teksto mahimong mahinumdoman nato sa dihang mangamuyo kita kang Jehova.
Natabangan sa mga Pahinumdom ni Jehova
16, 17. (a) Nganong gikinahanglan nato ang mga pahinumdom sa Diyos, ug sa unsang paagi lantawon nato kini? (b) Unsa tingaliy panglantaw sa uban kanato, apan unsay tinuod nga hinungdanon?
16 Aron dunggon ang atong pag-ampo ug matagamtam ang pabor sa Diyos, kinahanglan tumanon nato ang mga pahinumdom sa Diyos. (Salmo 119:129-136) Tungod kay kita malimtanon, kita kinahanglang pahinumdoman ni Jehova sa iyang instruksiyon ug mga sugo. Siyempre, giapresyar nato ang espirituwal nga kahayag diha sa matag bag-ong pagsabot sa mga pulong sa Diyos. (Salmo 119:129, 130) Mapasalamaton usab kita nga si Jehova ‘nagpasidlak sa iyang nawong ibabaw kanato’ agig pag-uyon, bisan tuod ang ‘mga inagay sa tubig nanaligdig gikan sa atong mga mata’ tungod kay ang uban naglapas sa iyang balaod.—Salmo 119:135, 136; Numeros 6:25.
17 Makaseguro kita nga mabatonan nato kanunay ang pabor sa Diyos kon kita mopahiuyon sa iyang matarong nga mga pahinumdom. (Salmo 119:137-144) Ingong mga alagad ni Jehova, atong giila nga may katungod siyang ipatagad kanato ang iyang matarong nga mga pahinumdom ug dahomon niya nga tumanon nato kining maong mga sugo. (Salmo 119:138) Sanglit ang salmista mituman sa mga sugo sa Diyos, nganong miingon man siya: “Ako walay-bili ug talamayon”? (Salmo 119:141) Dayag nga ang iyang gitumong mao ang panglantaw sa iyang mga kaaway kaniya. Kon dili nato ikompromiso ang atong baroganan alang sa pagkamatarong, ang uban motamay tingali kanato. Apan, ang tinuod nga hinungdanon mao nga uyonan kita ni Jehova tungod kay kita nagkinabuhi sumala sa iyang matarong nga mga pahinumdom.
Luwas ug Anaa sa Kalinaw
18, 19. Unsay moresulta sa atong pagtuman sa mga pahinumdom sa Diyos?
18 Ang pagtuman sa mga pahinumdom sa Diyos makapasuod nato kaniya. (Salmo 119:145-152) Tungod kay kita nagpatalinghog sa mga pahinumdom ni Jehova, kita dili magpanuko sa pagsangpit kaniya uban sa tibuok natong kasingkasing, ug makadahom kita nga iyang dunggon. Tingali mobangon kita ug ‘sayo sa pagbanagbanag sa kabuntagon’ ug motuaw alang sa tabang. Maayo kaayo kining panahon sa pag-ampo! (Salmo 119:145-147) Ang Diyos duol usab kanato tungod kay kita naglikay sa luag nga panggawi ug naglantaw sa iyang pulong ingong kamatuoran, sama sa panglantaw ni Jesus. (Salmo 119:150, 151; Juan 17:17) Ang atong relasyon uban kang Jehova magpalig-on kanato niining gubot nga kalibotan ug latas sa dakong gubat sa Armagedon.—Pinadayag 7:9, 14; 16:13-16.
19 Tungod sa atong halalom nga pagtahod sa pulong sa Diyos, atong matagamtam ang tinuod nga kasegurohan. (Salmo 119:153-160) Dili sama sa mga daotan, kita ‘wala motipas gikan sa mga pahinumdom ni Jehova.’ Atong gihigugma ang mga sugo sa Diyos ug busa kita luwas diha sa iyang mahigugmaong-kalulot. (Salmo 119:157-159) Ang mga pahinumdom ni Jehova magpukaw sa atong panumdoman aron atong mahinumdoman kon unsay iyang gikinahanglan kanato sa espesipikong mga situwasyon. Sa laing bahin, ang mga sugo sa Diyos maoy mga direktiba, ug giila gayod nato ang katungod sa atong Maglalalang nga motultol kanato. Tungod kay kita nakaamgo nga ‘ang diwa sa pulong sa Diyos maoy kamatuoran’ ug dili kita makahimo sa pagtultol sa atong kaugalingong mga lakang nga kitakita lang, andam kitang modawat sa pagtultol sa Diyos.—Salmo 119:160; Jeremias 10:23.
20. Nganong kita adunay “dagayang pakigdait”?
20 Ang atong gugma sa balaod ni Jehova maghatag kanato ug dagayang pakigdait. (Salmo 119:161-168) Ang paglutos dili maghikaw kanato sa walay-ikatandi nga “kalinaw sa Diyos.” (Filipos 4:6, 7) Gipabilhan gayod nato ang hudisyal nga mga desisyon ni Jehova nga subsob nato siyang dayegon tungod niana—“makapito sa usa ka adlaw.” (Salmo 119:161-164) “Ang dagayang pakigdait iya niadtong nahigugma sa imong balaod,” miawit ang salmista, “ug alang kanila walay kapandolan.” (Salmo 119:165) Kon kita ingong mga indibiduwal mahigugma ug motuman sa balaod ni Jehova, dili gayod kita mapandol sa espirituwal tungod sa gibuhat sa usa o tungod sa bisan unsang butang.
21. Unsang Kasulatanhong mga pananglitan ang nagpakita nga kita dili angayng mapandol kon motungha ang mga problema diha sa kongregasyon?
21 Daghang indibiduwal nga gihisgotan diha sa Bibliya ang wala magtugot sa bisan unsa nga mahimong dumalayong kapandolan alang kanila. Pananglitan, ang Kristohanong lalaki nga si Gayo wala mapandol kondili “nagpadayon sa paglakaw diha sa kamatuoran” bisan pa sa dili diyosnong panggawi ni Diotrefes. (3 Juan 1-3, 9, 10) Gitambagan ni Pablo ang Kristohanong mga babaye nga sila si Euodia ug Sintique “sa pagbaton sa samang kaisipan diha sa Ginoo,” tungod kay lagmit dihay problema nga mitungha tali kanila. Dayag nga sila natabangan sa pagsulbad sa ilang problema, ug sila nagpadayon sa pag-alagad kang Jehova nga matinumanon. (Filipos 4:2, 3) Busa dili kita angayng mapandol kon motungha ang usa ka problema diha sa kongregasyon. Isentro nato ang atong pagtagad sa pagtuman sa mga sugo ni Jehova, nga hinumdoman nga ‘ang tanan natong mga dalan anaa sa iyang atubangan.’ (Salmo 119:168; Proverbio 15:3) Unya walay bisan unsa nga dumalayong maghikaw kanato sa “dagayang pakigdait.”
22. (a) Kon tumanon nato ang Diyos, unsang pribilehiyo ang atong matagamtam? (b) Sa unsang paagi lantawon nato ang pipila nga mibiya sa Kristohanong kongregasyon?
22 Kon kanunay kitang motuman kang Jehova, makapribilehiyo kita sa pagpadayon sa pagdayeg kaniya. (Salmo 119:169-176) Pinaagi sa pagkinabuhi nga kaharmonya sa mga regulasyon sa Diyos, dili lang kay matagamtam nato ang espirituwal nga kasegurohan kondili ‘ang atong mga ngabil magpadayon sa pagpahayag ug pagdayeg kang Jehova.’ (Salmo 119:169-171, 174) Mao kini ang kinadak-ang pribilehiyo nga atong mabatonan niining kataposang mga adlaw. Buot sa salmista nga magpadayon sa pagkinabuhi ug pagdayeg kang Jehova, apan sa wala gibutyag nga paagi, siya ‘nahisalaag sama sa usa ka nawala nga karnero.’ (Salmo 119:175, 176) Ang uban nga mibiya sa Kristohanong kongregasyon nahigugma gihapon tingali sa Diyos ug buot tingaling modayeg kaniya. Busa buhaton nato ang tanan nga atong maarangan sa pagtabang kanila aron sila makabaton pag-usab ug espirituwal nga kasegurohan ug makatagamtam sa kalipay sa pagdayeg kang Jehova uban sa iyang katawhan.—Hebreohanon 13:15; 1 Pedro 5:6, 7.
Dumalayong Kahayag Alang sa Atong Alagianan
23, 24. Unsang mga benepisyo ang imong madawat gikan sa Salmo 119?
23 Daghan ang mga benepisyo nga atong madawat gikan sa Salmo 119. Pananglitan, kini makapahimo kanatong mas masaligon sa Diyos, kay gipakita niini nga ang tinuod nga kalipay moresulta gumikan sa ‘pagsubay sa balaod ni Jehova.’ (Salmo 119:1) Gipahinumdoman kita sa salmista nga ‘ang diwa sa pulong sa Diyos mao ang kamatuoran.’ (Salmo 119:160) Angayng pauswagon niini ang atong apresasyon sa enterong sinulat nga Pulong sa Diyos. Ang pagpamalandong sa Salmo 119 angayng magtukmod kanato sa pagkugi sa pagtuon sa Kasulatan. Ang salmista sublisubling mihangyo sa Diyos: “Tudloi ako sa imong mga regulasyon.” (Salmo 119:12, 68, 135) Mihangyo usab siya: “Tudloi ako sa pagkamaayo, pagkamay-salabotan ug kahibalo, kay ako nagpasundayag ug pagtuo sa imong kasugoan.” (Salmo 119:66) Angay kitang moampo sa susamang paagi.
24 Tungod sa balaang pagpanudlo makabaton kita ug suod nga relasyon kang Jehova. Ang salmista sublisubling nagtawag sa iyang kaugalingon nga alagad sa Diyos. Gani, iyang gisangpit si Jehova pinaagi sa makapatandog nga mga pulong: “Imo ako.” (Salmo 119:17, 65, 94, 122, 125; Roma 14:8) Pagkadakong pribilehiyo nga mag-alagad ug magdayeg kang Jehova ingong usa sa iyang mga Saksi! (Salmo 119:7) Ikaw ba nag-alagad sa Diyos nga malipayon ingong magmamantala sa Gingharian? Kon mao, makaseguro ka nga si Jehova magpadayon sa pagpalig-on ug pagpanalangin kanimo niining bulahang buluhaton kon kanunay kang mosalig sa iyang pulong ug tugotan kana nga modan-ag sa imong alagianan.
Unsaon Nimo Pagtubag?
• Nganong angay natong kalipayan ang pulong sa Diyos?
• Sa unsang paagi kita napalig-on sa pulong sa Diyos?
• Sa unsang mga paagi kita matabangan sa mga pahinumdom ni Jehova?
• Nganong ang katawhan ni Jehova luwas ug anaa sa kalinaw?
[Mga Pangutana sa Pagtuon]
[Hulagway sa panid 16]
Ang pulong sa Diyos maoy tuboran sa espirituwal nga kahayag
[Hulagway sa panid 17]
Kon atong gihigugma ang mga pahinumdom ni Jehova, dili gayod niya kita isipon ingong “naglutawng yamukmok”
[Mga hulagway sa panid 18]
Kon basahon nato ang Bibliya adlaw-adlaw, dali ra natong mahinumdoman ang makatabang nga mga teksto sa dihang kita mag-ampo