Kaisog Atubangan sa Pagsupak

SI Gayo ug Aristarko, ang duha ka kauban ni apostol Pablo, gipugos sa panon sa magubtanong mga tawo sa pagsulod sa teatro sa Efeso. Didto, ang nasuko nga panon misinggit sulod sa duha ka oras: “Bantogan si Artemis sa mga taga-Efeso!” (Buhat 19:28, 29, 34) Mibarog ba nga malig-on ang mga kauban ni Pablo atubangan niini nga pagsupak? Unsa ang hinungdan niini nga kahimtang?

Milampos si Pablo sa pagsangyaw sa siyudad sa Efeso sulod sa mga tulo ka tuig. Tungod niini, daghang taga-Efeso ang mihunong na sa pagsimba ug mga idolo. (Buhat 19:26; 20:31) Ang kasagarang idolo sa Efeso maoy usa ka gamayng plata nga hulad sa templo ni Artemis, ang diyosa sa pagkamasanayon, kansang dako nga templo nagbantaaw diha sa siyudad. Kining gagmayng mga hulad sa templo gisul-ob ingong mga anting-anting o gidayandayan diha sa mga balay. Siyempre, ang mga Kristohanon dili mopalit niining mga idoloha.—1 Juan 5:21.

Si Demetrio, ang usa sa mga platero, nagtuo nga ang ilang dakog-kita nga negosyo nameligro tungod sa ministeryo ni Pablo. Pinaagi sa dili pagsulti sa tanang kamatuoran ug pagpasobra, iyang gikombinsir ang kauban niyang mga artesano nga ang mga tawo sa tibuok Asia Minor mohunong na unya sa pagsimba kang Artemis. Sa dihang ang mga platero nga nasuko nagsugod sa pagsinggit ug mga pagdayeg kang Artemis, dihay nahitabong kagubot ug ang tibuok siyudad nagkaguliyang.—Buhat 19:24-29.

Libolibo ka tawo ang nagtigom diha sa teatro, nga kalingkoran ug 25,000 ka tumatan-aw. Mihangyo si Pablo sa pagpakigsulti sa panon sa magubtanong mga tawo, apan gikombinsir siya sa mahigalaong mga opisyales nga dili makigsulti kanila. Sa ulahi, napakalma sa kalihim sa siyudad ang mga tawo, ug si Gayo ug Aristarko nakaikyas nga wala maunsa.—Buhat 19:35-41.

Karon, ang katawhan sa Diyos mahimong makasugamak usab ug mga pagsupak ug bisan kagubot samtang sila magpadayon sa ilang pagministeryo. Sila kasagarang mosangyaw sa maayong balita diha sa mga siyudad diin naglabi ang atmospera sa idolatriya, imoralidad, ug pagkadelingkuwente. Bisan pa niana, sila maisogong nagsundog kang apostol Pablo, kinsa ‘wala magpugong sa pagtudlo sa publiko ug sa balay ug balay’ diha sa siyudad sa Efeso. (Buhat 20:20) Ug sila usab malipay sa dihang ilang makita nga “ang pulong ni Jehova padayong mikaylap ug nagmadaogon.”—Buhat 19:20.

[Hulagway sa panid 30]

Kagun-oban sa teatro sa Efeso