Kon Unsaon Paghimong Mapuslanon ang Matag Adlaw

“IPAKITA kanamo kon unsaon pag-ihap ang among mga adlaw sa paagi nga makabaton kami ug kasingkasing nga manggialamon.” (Salmo 90:12) Mao kini ang mapainubsanong pag-ampo sa magsusulat sa Bibliya nga si Moises. Unsa ang espesipiko niyang gihangyo? Angay ba kitang mohimog samang matinahorong hangyo?

Sa bersikulo 10, si Moises nagmulo bahin sa kamubo sa kinabuhi sa tawo. Sa laing higayon, iyang gisulat ang mga pulong ni Job, kinsa miingon: “Ang tawo, nga natawo sa usa ka babaye, mubo ug kinabuhi ug tugob sa kasamok.” (Job 14:1) Dayag nga si Moises nasayod pag-ayo sa kamubo sa dili-hingpit nga kinabuhi sa tawo. Busa, iyang giisip ang matag adlaw sa kinabuhi ingong bililhong gasa. Niining iyang pangaliyupo nga gitumong sa Diyos, gipadayag ni Moises ang iyang tinguha sa paggugol sa nahibiling mga adlaw sa iyang kinabuhi sa maalamong paagi, sa paagi nga makapahimuot sa iyang Maglalalang. Dili ba angay nga gugolon usab nato ang matag adlaw sa atong kinabuhi sa makahuloganong paagi? Mao kanay atong paningkamotang buhaton kon buot nato nga uyonan kita sa Diyos karon.

Aduna pay laing butang nga nakapadasig kang Moises ug Job, nga angay usab nga makapadasig kanato. Kining duha ka diyosnong mga lalaki naglaom sa usa ka umaabot nga ganti—kinabuhi sa yuta ubos sa mas maayong mga kahimtang. (Job 14:14, 15; Hebreohanon 11:26) Nianang panahona, ang maayong mga buhat sa tawo dili na unya matapos tungod sa kamatayon. Katuyoan sa atong Maglalalang nga ang mga matinumanon magkinabuhi sa walay kataposan sa usa ka paraisong yuta. (Isaias 65:21-24; Pinadayag 21:3, 4) Makalaom ka usab niini kon imong ‘iphon ang imong mga adlaw sa paagi nga makabaton ka ug kasingkasing nga manggialamon.’