Madaogon sa Talagsaong Paagi

GILUTOS ka ba tungod sa imong pagtuo—tingali sa trabahoan, sa tunghaan, diha sa pamilya, o tungod sa mga pagdili nga gipahamtang sa kagamhanan? Ayawg kaluya. Daghang Saksi ni Jehova ang nakaatubang ug samang mga pagsulay, apan sila nagmadaogon. Tagda ang panig-ingnan ni Erna Ludolph.

Si Erna natawo sa Lübeck, Alemanya, sa 1908. Siya lang ang membro sa iyang pamilya nga nag-alagad kang Jehova. Sa dihang nagsugod pagmando ang rehimen ni Hitler sa 1933, lisod ang kinabuhi sa mga Saksi ni Jehova. Ang mga kauban ni Erna sa trabaho nagsaway kaniya kay dili siya mosaludo kang Hitler, ug tungod niini gidakop siya sa mga Nazi. Nabilanggo siya ug walo ka tuig sa nagkalainlaing mga prisohan ug mga kampo konsentrasyon sa Hamburg-Fuhlsbüttel, Moringen, Lichtenburg, ug Ravensbrück. Samtang didto si Erna sa Ravensbrück, dihay nahitabo nga mitultol sa iyang kadaogan.

Talagsaon nga Sinaligan sa Balay

Si propesor Friedrich Holtz ug ang iyang asawa, si Alice, nagpuyo sa Berlin. Sila dili membro sa partidong Nazi ug wala magpaluyo sa ideolohiya niini. Apan, paryente nila ang usa ka superyor nga opisyal sa SS nga maoy nagdumala sa partikular nga mga piniriso sa kampo konsentrasyon. Busa sa dihang ang propesor ug ang iyang asawa nangitag sinaligan sa balay, gipapili sila niining SS nga opisyal ug usa ka babayeng piniriso. Busa, niadtong Marso 1943, si Alice miadto sa Ravensbrück sa pagpili ug sinaligan sa balay. Kinsay iyang gipili? Si Erna Ludolph. Si Erna nagpuyo uban sa pamilyang Holtz, kinsa nagtratar ug maayo kaniya. Human sa gubat, miuban siya niining pamilyaha sa Halle sa Saale. Didto, si Erna gilutos na usab, niining higayona sa Sosyalistang mga awtoridad sa Sidlakang Alemanya. Sa 1957 ang pamilya gihinginlan ngadto sa Kasadpang Alemanya, ug si Erna mikuyog kanila. Sa kataposan, si Erna libre na sa pagbuhat sa mga tulumanon sa iyang tinuohan.

Sa unsang paagi nagmadaogon si Erna sa talagsaong paagi? Tungod sa maayong panggawi ug binatid nga pagsangyaw ni Erna sa mensahe sa Bibliya, si Alice Holtz ug ang iyang lima ka anak nahimong bawtismadong mga Saksi ni Jehova. Dugang pa, 11 sa mga apo ni Alice mga Saksi usab. Duha kanila ang nag-alagad karon sa sangang buhatan sa mga Saksi ni Jehova sa Selters, Alemanya. “Ang pangunang rason nga nakadangat sa kamatuoran ang among pamilya mao ang panig-ingnan ni Erna,” matod ni Susanne, usa sa mga anak ni Alice. Ang pagkamalahutayon ni Erna dagayang gigantihan. Komosta ang imong kahimtang? Ang imong matinumanong paglahutay ilalom sa malisod nga mga kahimtang mahimong gantihan ug samang makapalipay nga mga resulta. Oo, ang maayong panggawi ug binatid nga pagsangyaw lagmit makatabang kanimo nga magmadaogon sa talagsaong paagi. a

[Footnote]

[Hulagway sa panid 31]

Si Erna Ludolph (naglingkod) uban sa mga membro sa pamilyang Holtz