Mga Pangutana Gikan sa mga Magbabasa

Nganong misulat man si Pablo bahin sa Kristohanong asawa: “Siya pagaampingang luwas pinaagi sa pagpanganak”?—1 Timoteo 2:15.

Unsay gipadayag sa konteksto niining bersikuloha bahin sa buot ipasabot ni Pablo? Ubos sa pagtultol sa balaang espiritu, siya naghatag ug tambag bahin sa papel sa Kristohanong babaye diha sa kongregasyon. Siya misulat: “Gitinguha ko nga ang mga babaye magdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna, dili pinaagi sa mga estilo sa pagsalapid sa buhok ug sa bulawan o sa mga perlas o sa mahalon kaayong sapot, kondili sa paagi nga nahiangay sa mga babaye nga nagpaila nga masimbahon sa Diyos, sa ato pa, pinaagi sa maayong mga buhat.” (1 Timoteo 2:9, 10) Si Pablo nag-awhag sa iyang Kristohanong igsoong mga babaye nga magmakasaranganon, magmatimbang bahin sa personal nga pamostura, ug “magdayandayan” sa ilang kaugalingon pinaagig maayong mga buhat.

Dayon, gisaysay ni Pablo ang kahikayan sa pagkaulo sa kongregasyon, nga nag-ingon: “Dili ako motugot sa usa ka babaye nga magtudlo, o magbuot sa lalaki, kondili magpakahilom lamang siya.” (1 Timoteo 2:12; 1 Corinto 11:3) Iyang gipatin-aw ang basehan niini nga kahikayan pinaagi sa pagpakita nga samtang si Adan wala malimbongi ni Satanas, si Eva “bug-os nga nalimbongan ug nahimong malinapason.” Sa unsang paagi mapanalipdan ang usa ka Kristohanong babaye batok sa sala ni Eva? Si Pablo mitubag: “Bisan pa niana, siya pagaampingang luwas pinaagi sa pagpanganak, basta sila magpadayon diha sa pagtuo ug sa gugma ug sa pagkabalaan uban ang maayong panghunahuna.” (1 Timoteo 2:14, 15) Unsay buot ipasabot ni Pablo niining mga pulonga?

Daw gustong ipasabot sa ubang mga maghuhubad nga ang kaluwasan sa babaye nagdepende sa pagbaton niya ug mga anak. Pananglitan, ang Today’s English Version nag-ingon: “Ang usa ka babaye maluwas pinaagi sa pagbaton ug mga anak.” Hinunoa, dili kini tukma nga pagsabot sa giingon ni Pablo. Daghang teksto ang nagpakita nga aron maluwas, ang usa ka tawo kinahanglang makaila kang Jehova, motuo kang Jesus, ug magpasundayag ug pagtuo, nga ipakita ang maong pagtuo pinaagi sa mga buhat. (Juan 17:3; Buhat 16:30, 31; Roma 10:10; Santiago 2:26) Dugang pa, wala ipasabot ni Pablo nga ang magtutuong kababayen-an gigarantiyahan ug luwas nga pagpanganak. Daghang babaye ang luwas nga nanganak, sila man mga magtutuo o dili. Ug ikasubo, ang uban namatay sa pagpanganak, sila man mga magtutuo o dili.—Genesis 35:16-18.

Ang lain pang tambag ni Pablo bahin sa kababayen-an sa ulahing bahin niining mao rang sulat makatabang kanato sa pagsabot kon unsay iyang buot ipasabot. Siya nagpasidaan bahin sa pipila ka batan-ong mga balo nga ‘walay-ginabuhat, nanumbalay; oo, dili lamang walay ginabuhat, kondili usab mga tabian ug hilabtanon sa mga kalihokan sa ubang mga tawo, nga manulti sa mga butang nga dili nila angayng isulti.’ Unsay tambag ni Pablo? Siya mipadayon: “Busa buot ko nga ang mga batan-ong babayeng balo magminyo, manganak, magdumalag panimalay, nga dili maghatag ug hinungdan sa magsusupak sa pagpasipala.”—1 Timoteo 5:13, 14.

Gipasiugda ni Pablo ang mapuslanong papel sa kababayen-an diha sa kahikayan sa pamilya. Sanglit okupado sa mga kalihokan sama sa ‘pagpanganak ug pagdumalag panimalay,’ ang usa ka babaye nga nagpadayon “diha sa pagtuo ug sa gugma ug sa pagkabalaan uban ang maayong panghunahuna” dili madaldal sa dili-maayong panggawi. Ang iyang espirituwalidad matipigan, o ‘maampingan.’ (1 Timoteo 2:15) Ang pagbuhat niana makatabang sa daghang batan-ong mga babaye sa paglikay sa mga bitik ni Satanas.

Ang gisulti ni Pablo kang Timoteo nagpahinumdom kanatong tanan, mga lalaki ug mga babaye, sa pagkahimong puliki sa mapuslanong paagi. Ang Pulong sa Diyos nagtambag sa tanang Kristohanon: “Pagbantay pag-ayo nga ang inyong paglakaw dili ingon sa dili-maalamon kondili ingon sa maalamon nga mga tawo.”—Efeso 5:15.