“Ang Akong Tabang Nagagikan Kang Jehova”

Ang mga Pamilya Napalig-on sa Kahibalo sa Diyos

ANG “Berlin Wall.” Mao kanay pagtawag sa usa ka magtiayon sa Argentina sa aktuwal nga bungbong nga ilang gitukod aron mabahin sa duha ang ilang balay! Sila dili gayod magkasinabot; sila nagdumot sa usag usa.

Makasubo, ang situwasyon nianang maong magtiayon komon. Daghang pamilya gihampak sa panag-away, pagluib, ug pagdumot. Makaguol kini tungod kay ang pamilya maoy usa ka institusyon nga ang Diyos mismo ang nagtukod. (Genesis 1:27, 28; 2:23, 24) Kini nga gasa nga gikan sa Diyos maoy maayo kaayong kahikayan sa pagpakitag lalom nga gugma. (Ruth 1:9) Pinaagi sa pagtuman sa ilang hinatag-sa-Diyos nga mga katungdanan, ang mga sakop sa pamilya makahatag ug kadungganan kang Jehova ug makapalipay sa usag usa. a

Kay ang Diyos man maoy nagtukod sa kahikayan sa pamilya, kinahanglang ipahiuyon sa iyang tinamdan ang atong pagsabot kon sa unsang paagi magalihok ang pamilya. Ang Iyang Pulong naghatag ug daghan kaayong praktikal nga mga tambag nga gidisenyo aron magmalamposon ang mga pamilya, ilabina kon may motunghang mga problema. Bahin sa papel sa mga bana, ang Bibliya nag-ingon: “Ang mga bana, angay nga maghigugma sa ilang mga asawa sama sa ilang kaugalingong mga lawas.” Kon sundon sa bana kining maong kinahanglanon, malipay ang iyang asawa sa pagpakitag “halawom nga pagtahod sa iyang bana.”— Efeso 5:25-29, 33.

Mahitungod sa relasyon sa mga ginikanan ug sa ilang mga anak, si apostol Pablo nagsulat: “Kamong mga amahan, ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.” (Efeso 6:4) Kini, sa baylo, makamugna ug mahigugmaon nga atmospera sa pamilya, nga magpasayon sa mga anak sa pagsugot sa ilang mga ginikanan.—Efeso 6:1.

Ang gihisgotang mga punto maoy mga pananglitan sa maayong tambag sa Bibliya bahin sa pamilyahanong kinabuhi. Pinaagi sa pagpadapat sa mga prinsipyo sa Diyos, daghang panimalay ang nagmalipayon. Tagda, pananglitan, ang magtiayon sa Argentina nga gihisgotan sa sinugdanan. Human nga sila nakatuon sa Bibliya uban sa mga Saksi ni Jehova sa tulo ka bulan, silang duha nagsugod sa pagpadapat sa maalamong tambag niini sa kaminyoon. Sila naningkamot pag-ayo sa pagpauswag sa ilang komunikasyon, sa pagpakitag empatiya sa usag usa, ug sa pagkahimong mapinasayloon. (Proverbio 15:22; 1 Pedro 3:7; 4:8) Sila nakakat-on sa pagpugong sa ilang kasuko ug sa pagpangayog tabang sa Diyos kon ang kahimtang daw malisod na. (Colosas 3:19) Sa wala madugay, ang “Berlin Wall” natumpag!

Ang Diyos Makapalig-on sa Pamilya

Ang pagkahibalo ug pagpadapat sa mga sukdanan sa Diyos makalig-on sa pamilya sa pagsagubang sa mga kalisod. Kini hinungdanon, kay gitagna na nga ang kahikayan sa pamilya makaagom ug mapintas nga pag-atake sa atong adlaw. Gitagna ni Pablo ang pagkabungkag sa moralidad ug sa tawhanong katilingban karon. Siya miingon nga “ang kataposang mga adlaw” timan-an sa pagkadili-maunongon, sa pagkawalay “kinaiyanhong pagbati,” ug pagkamasukihon sa mga ginikanan, bisan niadtong “nagbaton sa dagway sa diyosnong pagkamahinalaron.”—2 Timoteo 3:1-5.

 Ang pagpaningkamot sa pagpahimuot sa Diyos makatabang sa pagsumpo sa ingon niini nga makadaot nga mga epekto diha sa pamilya. Nakita sa daghang pamilya nga ang solusyon nga gikan sa Diyos gikinahanglan aron molampos sila sa pag-atubang sa ilang daghang problema. Kon tinguha sa mga sakop sa pamilya nga makabaton ug maayong relasyon sa Diyos, kinahanglang ipadapat nila labaw sa tanan ang mga prinsipyo sa Bibliya ug ilhon nga “gawas nga si Jehova ang magatukod sa balay, kawang lamang ang paghago sa mga magtutukod niini.” (Salmo 127:1) Ang pamilya ilabinang magmalipayon kon unahon nila ang Diyos diha sa ilang kinabuhi.—Efeso 3:14, 15.

Sa Hawaii usa ka tawo nga ginganlag Dennis nakakita nga tinuod gayod kini. Bisan tuod nangangkon nga usa ka Kristiyano, himalikas siya ug palaaway. Human sa pagserbisyo sa armi, siya nahimong mas mainiton ug dugo ug madumtanon. “Kanunay akong makakita ug away,” siya nahinumdom. “Wala ako mabalaka kon unsay mahitabo nako, ug dili ako mahadlok nga mamatay. Ang pagpamalikas ug pagpakig-away nagpadayon. Ang akong asawa, nga usa sa mga Saksi ni Jehova, nagdasig kanako sa pagtuon sa Bibliya.”

Si Dennis wala mosanong sa paningkamot sa iyang asawa. Apan, ang Kristohanong panggawi sa iyang asawa nakalukmay sa iyang negatibong tinamdan. Si Dennis sa ngadtongadto mitambong sa Kristohanong tigom uban sa iyang asawa ug mga anak. Human niadto, si Dennis gidumalahan ug pagtuon sa Bibliya, ug siya miuswag. Gihunong niya ang 28-ka-tuig nga bisyo nga pagpanabako ug wala na makighugoy-hugoy sa mga higala nga naghimo sa tanang butang nga iyang gipaningkamotang mabuntog. Mapasalamaton kang Jehova, si Dennis mikomento: “Ang akong pamilyahanong kinabuhi miarang-arang. Ang tibuok pamilya nag-usa sa pagtambong sa mga tigom ug sa pagsangyaw. Ang akong duha ka anak dili na mahadlok nako, kay nakakat-on ako sa pagpugong sa akong kasuko ug mihunong na sa pagpamalikas. Magkaestoryahanay na kami ug malipayong maghisgot bahin sa Bibliya. Kon dili pa sa kamatuoran sa Bibliya, wala unta ako dinhi karon; ako mainiton kaayo ug dugo kaniadto.”

Ang mga pamilya mahimong magmalipayon kon sila maningkamot sa pagtuman sa kabubut-on ni Jehova. Gipakita sa mga eksperyensiya nga bisag usa lang ka membro sa pamilya ang nagpadapat sa mga prinsipyo sa Bibliya, ang kahimtang mas maayo kay sa walay usa ang nagpadapat niini. Ang pagtukod ug Kristohanong pamilya nagkinahanglag dakong paningkamot, nga nagkinahanglag kahanas ug panahon. Apan ang mga sakop sa ingon niini nga pamilya makasalig nga gantihan ni Jehova ang ilang mga paningkamot ug kalamposan. Sila makaingon sama sa salmista: “Ang akong tabang nagagikan kang Jehova.”—Salmo 121:2.

[Footnote]

[Blurb sa panid 9]

Sa Diyos “utang sa tanang kabanayan sa langit ug sa yuta ang ngalan niini.”—EFESO 3:15

[Kahon sa panid 8]

GIPABILHAN PAG-AYO NI JEHOVA ANG KAHIKAYAN SA PAMILYA

“Ang Diyos nagpanalangin kanila ug ang Diyos miingon kanila: ‘Magmabungahon ug magdaghan kamo ug pun-a ang yuta.’”—Genesis 1:28.

“Malipayon ang matag usa nga nahadlok kang Jehova . . . Ang imong asawa mahisama sa nagapamunga nga paras sa kinasulorang mga bahin sa imong balay.”—Salmo 128:1, 3.