Diha sa Unsang Patukoranan Ikaw Nagatukod?

ANG kalig-on sa usa ka tinukod nag-agad sa dakong bahin sa kalig-on sa patukoranan niini. Usahay ang Bibliya naggamit niining prinsipyoha sa mahulagwayong paagi.

Ang manalagnang si Isaias, pananglitan, naghisgot kang Jehova nga Diyos ingong ang usa nga “nagpahaluna sa patukoranan sa yuta.” (Isaias 51:13) Kini nga patukoranan mao ang dili-mausab nga mga balaod sa Diyos nga nagkontrolar sa paglihok sa yuta ug nagpahinabo niini nga dili matarog sa nahimutangan niini. (Salmo 104:5) Ang Pulong sa Diyos, ang Bibliya, naghisgot usab bahin sa “mga patukoranan” sa tawhanong katilingban. Kini mao ang hustisya, balaod, ug kahusay. Sa dihang kini ‘lumpagon,’ o pahuyangon, pinaagi sa inhustisya, korapsiyon, ug kapintasan, ang kahusay sa katilingban mahugno.—Salmo 11:2-6; Proverbio 29:4.

Kining prinsipyoha mapadapat usab sa matag indibiduwal. Sa panghinapos sa iyang gibantog nga Wali sa Bukid, si Jesu-Kristo nag-ingon: “Ang matag usa nga magapatalinghog niining akong mga pulong ug magabuhat niini mahisama sa usa ka tawong maalamon, nga nagtukod sa iyang balay ibabaw sa dakong-bato. Ug mibundak ang ulan ug mibul-og ang baha ug mihuros ang hangin ug mihapak nianang balaya, apan kini wala mahugno, kay kini gitukod man ibabaw sa dakong-bato. Dugang pa, ang matag usa nga magapatalinghog niining akong mga pulong ug dili magabuhat niini mahisama sa usa ka tawong buangbuang, nga nagtukod sa iyang balay ibabaw sa balas. Ug mibundak ang ulan ug mibul-og ang baha ug mihuros ang hangin ug mihapak nianang balaya ug kini nahugno, ug dako gayod ang pagkahugno niini.”—Mateo 7:24-27.

Diha sa unsang patukoranan ginatukod nimo ang imong kinabuhi? Diha ba sa huyang nga pilosopiya sa mga tawong dili motuo sa Diyos, nga moresulta unya sa pagkahugno sa gambalay sa imong kinabuhi? O ikaw ba nagatukod diha sa malig-on nga pagkamasinugtanon sa mga pagtulon-an ni Jesu-Kristo, nga maoy motabang kanimo sa pagsagubang sa mahulagwayong mga unos sa kinabuhi?