Mga Pangutana Gikan sa mga Magbabasa

Nganong si David ug Bat-seba wala siloti ug kamatayon sa dihang sila nanapaw, apan ang ilang anak nga lalaki nga bag-ong natawo mao na hinuoy namatay?

Ang Moisesnong Balaod nag-ingon: “Kon ang usa ka lalaki makaplagan nga nakigdulog sa usa ka babaye nga gipanag-iya sa usa ka tag-iya, silang duha kinahanglang mamatay, ang lalaki nga nakigdulog sa babaye ug ang babaye. Sa ingon imong pagakuhaon ang daotan gikan sa Israel.” (Deuteronomio 22:22) Kon gitugotan ni Jehova nga Diyos ang tawhanong mga hukom ubos sa Balaod nga maoy maghukom sa hudisyal nga kaso sa sala ni David ug Bat-seba, silang duha nga nanapaw pagasilotan gayod ug kamatayon. Sanglit ang tawhanong mga hukom dili man makabasa sa kasingkasing, sila kinahanglang maghukom pinasukad sa panggawi sa mga nakasala sumala sa gipamatud-an sa nahitabo. Ang silot sa pagpanapaw maoy kamatayon. Ang Israelinhong mga hukom walay katungod sa pagpasaylo sa maong sala.

Sa laing bahin, ang matuod nga Diyos makabasa sa kasingkasing ug makapasaylo sa mga sala kon siya adunay makita nga basehanan sa pagpasaylo niana. Sanglit ang maong kaso naglangkit kang David, nga kaniya Siya nakigsaad sa Gingharian, si Jehova mihimog eksepsiyon pinaagi sa pagdesisyon nga siya maoy maghukom sa kaso. (2 Samuel 7:12-16) “Ang Maghuhukom sa tibuok yuta” dunay katungod sa paghimo niana nga desisyon.—Genesis 18:25.

Unsay nakita ni Jehova sa iyang pagsusi sa kasingkasing ni David? Ang superskripsiyon sa Salmo 51 nag-ingon nga gipadayag niini nga salmo ang pagbati ni David “sa dihang ang manalagnang si Natan miadto kaniya human siya makigdulog kang Bat-seba.” Ang Salmo 51:1-4 nag-ingon: “Pakitai ako ug kaluoy, Oh Diyos, sumala sa imong mahigugmaong-kalulot. Sumala sa kadagaya sa imong mga kaluoy palaa ang akong mga kalapasan. Hugasi ako sa bug-os gikan sa akong kasaypanan, ug hinloi ako gikan mismo sa akong sala. Kay nahibalo ako sa akong mga kalapasan, ug ang akong sala anaa kanunay sa akong atubangan. Nakasala ako batok kanimo, kanimo lamang, ug nakabuhat ako sa butang nga daotan sa imong mga mata.” Tino nga gilantaw ni Jehova kining kinasingkasing nga pagbasol ni David ingong pamatuod sa iyang tinuod nga paghinulsol ug mihukom nga may basehanan siya aron kaluy-an ang mga nakasala. Dugang pa, maluluy-on nga tawo si David, ug si Jehova magpakitag kaluoy sa mga maluluy-on. (1 Samuel 24:4-7; Mateo 5:7; Santiago 2:13) Busa, sa dihang giangkon ni David ang iyang sala, gisultihan siya ni Natan: “Si Jehova, sa baylo, nagpasaylo sa imong sala. Ikaw dili mamatay.”—2 Samuel 12:13.

Si David ug Bat-seba wala makalingkawas sa tanang sangpotanan sa ilang sala. “Sanglit ikaw wala gayod magtahod kang Jehova niining butanga,” gisultihan ni Natan si David, “ang batang lalaki usab, nga mao pay pagkatawo alang kanimo, mamatay gayod.” Ang bata nasakit ug namatay bisan pa sa pagpuasa ug pagbangotan ni David sa pito ka adlaw.—2 Samuel 12:14-18.

Ang uban maglisod sa pagsabot kon nganong kinahanglang mamatay ang batang lalaki, sanglit ang Deuteronomio 24:16 nag-ingon: “Ang mga anak dili pagapatyon tungod sa mga amahan.” Apan angay natong hinumdoman nga kon ang tawhanong mga hukom maoy mihukom sa maong kaso, mamatay gayod unta ang mga ginikanan maingon man ang bata diha sa tagoangkan. Ang kamatayon sa bata mahimong nakatabang usab kang David nga klarong maamgohan nga wala gayod mahimuot si Jehova sa ilang pagpakasala ni Bat-seba. Makasalig kita nga gihukman niya ang maong kaso sa makataronganong paagi, tungod kay “hingpit ang iyang dalan.”—2 Samuel 22:31.

[Hulagway sa panid 31]

Gipasundayag ni David ang kinasingkasing nga paghinulsol