Ayaw Paghunong sa Pagbuhat ug Maayo

“HUPTI ninyo ang maayong panggawi taliwala sa mga nasod,” nag-awhag si apostol Pedro. (1 Pedro 2:12) Ang Gregong pulong nga gihubad ug ‘maayo’ nagtumong sa usa ka butang nga “matahom, dalayegon, dungganon, ekselente.” Karong panahona, morag dili gayod kita makadahom ug dalayegon o dungganon nga panggawi gikan sa mga tawo sa katibuk-an. Apan, ingong pundok, ang katawhan ni Jehova karon nagmalamposon sa pagsunod sa awhag ni Pedro. Gani, sila nailhan sa tibuok kalibotan tungod sa ilang maayong panggawi.

Talagsaon gayod kini kon atong hunahunaon ang mga pagsulay ug mga kalisdanan nga atong ginaatubang niining “makuyaw nga mga panahong lisod sagubangon.” (2 Timoteo 3:1) Ang mga pagsulay maoy bahin sa atong adlaw-adlaw nga pagkinabuhi, ug ang pagsupak sa Kristohanong paagi sa pagkinabuhi kasagaran na. Dugang pa, bisan tuod ang pipila ka pagsulay dali rang matapos, ang uban magpadayon nga way hunong, mograbe pa gani. Bisan pa niana, si apostol Pablo nagdasig: “Dili kita mohunong sa pagbuhat ug maayo, kay sa takdang panahon kita moani kon kita dili molunga.” (Galacia 6:9) Apan sa unsang paagi posible ang pagbuhat—ug pagbuhat kanunay—ug maayo samtang nag-atubang ug makapasubo nga mga pagsulay ug way-puas nga pagsupak?

Tabang sa Pagbuhat ug Maayo

Ang pagkahimong “dalayegon, dungganon, ug ekselente” klaro nga usa ka kahimtang sa pangsulod nga pagkatawo, usa ka hiyas sa kasingkasing. Busa, ang paghupot ug maayong panggawi bisan pa sa mga pagsulay ug mga kalisdanan dili usa ka hinanaling reaksiyon kondili maoy resulta sa adlaw-adlaw nga pagsunod ug pagpadapat sa mga prinsipyo sa Bibliya sa tanang bahin sa kinabuhi. Unsa ang pipila ka butang nga makatabang niining bahina? Tagda ang mosunod.

Ugmara ang tinamdan sa hunahuna ni Kristo. Gikinahanglan ang pagkamapainubsanon aron makalahutay sa daw dili-makataronganong kasinatian. Ang usa ka tawo nga taas ug paglantaw sa kaugalingon hayan dili makaagwanta sa pagdaogdaog. Apan, si Jesus “nagpaubos ug nagmasinugtanon hangtod sa kamatayon.” (Filipos 2:5, 8) Pinaagi sa pagsundog kaniya, kita dili “kapoyon ug mangaluya” diha sa atong balaang pag-alagad. (Hebreohanon 12:2, 3) Magmapainubsanon pinaagi sa kinabubut-ong pagpakigtambayayong niadtong nanguna diha sa inyong lokal nga kongregasyon. (Hebreohanon 13:17) Kat-oni ang paglantaw sa uban ingong “labaw” kanimo, nga mag-una sa ilang mga intereses inay ang imoha.—Filipos 2:3, 4.

Hinumdomi nga si Jehova nahigugma kanimo. Kinahanglang kombinsido kita nga si Jehova “mao ug nga siya maoy tigganti sa mga matinuorong nagapangita kaniya.” (Hebreohanon 11:6) Siya may pagtagad gayod kanato ug buot niya nga kita makabaton ug kinabuhing walay kataposan. (1 Timoteo 2:4; 1 Pedro 5:7) Ang paghinumdom nga walay bisan unsa nga makawagtang sa gugma sa Diyos alang kanato motabang kanato nga dili mohunong sa pagbuhat ug maayo bisan ilalom sa pagsulay.—Roma 8:38, 39.

Salig sa bug-os kang Jehova. Hinungdanon ang pagsalig kang Jehova, ilabina sa dihang ang mga pagsulay morag dili matapos o nagpameligro sa kinabuhi. Kita kinahanglang adunay bug-os nga pagsalig nga si Jehova dili motugot nga kita sulayan ‘nga labaw sa atong maantos,’ nga siya kanunayng “magtaganag kalingkawasan.” (1 Corinto  10:13) Maatubang pa gani nato nga maisogon bisan ang hulga sa kamatayon kon kita may pagsalig kang Jehova.—2 Corinto 1:8, 9.

Lahutay sa pag-ampo. Hinungdanon ang kinasingkasing nga pag-ampo. (Roma 12:12) Ang sinserong pag-ampo maoy usa sa mga paagi nga kita masuod kang Jehova. (Santiago 4:8) Pinaagi sa kaugalingong kasinatian, atong makat-onan nga “bisan unsay atong pangayoon . . . , siya magpatalinghog kanato.” (1 Juan 5:14) Kon itugot ni Jehova nga ang atong pagsulay magpadayon ingong pagsulay sa atong integridad, kita mag-ampo nga tabangan niya nga makalahutay. (Lucas 22:41-43) Ang pag-ampo magtudlo kanato nga kita wala mag-inusara, nga kon si Jehova anaa sa atong kiliran, kita kanunayng magmadaogon.—Roma 8:31, 37.

Maayong mga Buhat—‘Usa ka Hinungdan sa Pagdayeg ug Dungog’

Matag karon ug unya, ang tanang Kristohanon ‘maguol sa nagkadaiyang mga pagsulay.’ Bisan pa niana, kinahanglang “dili kita mohunong sa pagbuhat ug maayo.” Sa dihang makaagom sa kapit-os, pagbatog kusog gikan sa kahibalo nga ang imong pagkamatinumanon sa ngadtongadto mahimong “usa ka hinungdan sa pagdayeg ug himaya ug dungog.” (1 Pedro 1:6, 7) Pahimusli sa bug-os ang tanang espirituwal nga mga tagana gikan kang Jehova sa pagpalig-on kanimo. Kon nagkinahanglan kag personal nga atensiyon, duol niadtong nag-alagad ingong mga magbalantay, mga magtutudlo, ug mga magtatambag diha sa Kristohanong kongregasyon. (Buhat 20:28) Tambong kanunay sa tanang tigom sa kongregasyon, nga ‘magdasig kanato sa paghigugma ug sa maayong mga buhat.’ (Hebreohanon 10:24) Ang programa sa inadlaw nga pagbasa sa Bibliya ug personal nga pagtuon motabang kanimo nga magmaalisto ug magmalig-on kanunay sa espirituwal; mao man usab ang regular nga pagpakigbahin diha sa Kristohanong ministeryo.—Salmo 1:1-3; Mateo 24:14.

Kon mas masinati nimo ang gugma ug pag-atiman ni Jehova, mosamot ang imong tinguha nga mahimong “masiboton sa maayong mga buhat.” (Tito 2:14) Ayawg kalimti, “siya nga nakalahutay hangtod sa kataposan mao ang maluwas.” (Mateo 24:13) Oo, magmadeterminado nga ‘dili mohunong sa pagbuhat ug maayo’!

[Blurb sa panid 29]

Kita kinahanglang adunay bug-os nga pagsalig nga si Jehova dili motugot nga kita sulayan ‘nga labaw sa atong maantos,’ nga siya kanunayng “magtaganag kalingkawasan”

[Mga hulagway sa panid 30]

Ang pagkapuliki kanunay diha sa teokratikanhong mga kalihokan makatabang sa pag-andam kanato sa pag-atubang sa mga pagsulay