Nakig-estorya Ka ba sa Imong mga Minahal?
Nakig-estorya Ka ba sa Imong mga Minahal?
“ANG atong katakos sa pagpakigkomunikar sa atong mga minahal kusog kaayong mius-os,” nagtaho ang senemanang basahon sa Polandia nga Polityka. Sa Tinipong Bansa, gibanabana nga ang mga magtiayon mogahin lamang ug sayis minutos kada adlaw sa pagpakig-estorya sa usag usa sa makahuloganong paagi. Nagtuo ang ubang mga awtoridad nga kining maong pag-us-os maoy nakaingon sa katunga sa tanang panagbulag ug mga diborsiyo.
Komosta ang panag-estoryahay tali sa mga ginikanan ug mga anak? Sa daghang kahimtang, “kini dili panag-estoryahay, kondili pagsukitsukit: Unsay nahitabo sa eskuylahan? Komosta ang imong mga higala?” matod pa sa taho sa ibabaw. “Sa unsang paagi makakat-on ang atong mga anak sa pag-ugmad ug emosyonal nga relasyon?” kini nangutana.
Sanglit ang maayong mga katakos sa pagpakigkomunikar dili awtomatikong mabatonan, sa unsang paagi atong mapauswag ang atong katakos sa pagpakig-estorya? Ang Kristohanong tinun-an nga si Santiago naghatag kanato niining hinungdanong tambag: “Ang matag usa kinahanglang magmaabtik sa pagpaminaw, magmahinay sa pagsulti, magmahinay sa pagkapungot.” (Santiago 1:19) Oo, aron mabatonan ang makapalig-ong panag-estoryahay, kita kinahanglang mamati pag-ayo ug dili mosagbat dayon o mohimog hinanaling mga konklusyon. Ayaw pagpanaway tungod kay kini daling makapukgo sa panag-estorya. Dugang pa, si Jesus naggamit ug mataktikanhong mga pangutana, dili aron manukitsukit, kondili aron mapagawas kon unsay anaa sa kasingkasing sa iyang tigpaminaw ug aron mapalig-on ang bugkos tali kanila.—Proverbio 20:5; Mateo 16:13-17; 17:24-27.
Sa pagpadapat sa maayong mga prinsipyo nga makaplagan diha sa Bibliya, manguna sa pagpakig-estorya ug pagpakigkomunikar sa imong mga minahal. Kana mahimong moresulta sa suod nga relasyon nga pabilhan sa daghang katuigan—bisan sa tibuok kinabuhi.