Naluwas, Dili Tungod sa mga Buhat Lamang, Kondili Pinaagi sa Dili-Takos nga Kalulot

“Kamo giluwas pinaagi sa pagtuo . . . Dili kini tungod sa mga buhat, aron walay tawo nga may pasukaranan sa pagpanghambog.”—EFESO 2:8, 9.

1. Sa unsang paagi lahi ang mga Kristohanon kon itandi sa katawhan sa katibuk-an may labot sa personal nga mga kalamposan, ug ngano?

 ANG mga tawo karon mapasigarbohon kaayo sa ilang personal nga mga kalamposan, ug sila subsob nga manghambog dayon bahin niana. Lahi ang mga Kristohanon. Ilang gilikayan ang pagpasiugda pag-ayo sa ilang mga kalamposan, bisan kadtong adunay kalabotan sa matuod nga pagsimba. Bisan tuod nagmaya sila tungod sa nalampos sa katawhan ni Jehova sa katibuk-an, wala nila ipasiugda ang ilang natampo mismo sa maong mga kalamposan. Ilang naamgohan nga sa pag-alagad kang Jehova, ang hustong mga motibo mao ang mas hinungdanon kay sa personal nga mga kalamposan. Si bisan kinsa nga sa ngadtongadto mahatagan sa gasa sa kinabuhing dayon makabaton niana, dili tungod sa personal nga mga kalamposan, kondili pinaagi sa pagtuo ug sa dili-takos nga kalulot sa Diyos.—Lucas 17:10; Juan 3:16.

2, 3. Sa unsa nga si Pablo nanghambog, ug ngano?

² Si apostol Pablo nahibalo gayod niining kamatuorana. Human mag-ampo ug tulo ka beses aron unta mahupayan sa usa ka “tunok sa unod,” iyang nadawat ang tubag ni Jehova: “Ang akong dili-takos nga kalulot igo na alang kanimo; kay  ang akong gahom ginahingpit diha sa kaluyahon.” Si Pablo mapainubsanong midawat sa desisyon ni Jehova ug miingon: “Busa, sa tumang kalipay ako manghambog hinuon bahin sa akong mga kaluyahon, aron ang gahom ni Kristo mahimong samag tolda nga magpabilin ibabaw kanako.” Angay natong sundogon ang mapainubsanong tinamdan ni Pablo.—2 Corinto 12:7-9.

³ Bisan tuod nagmalamposon gayod si Pablo sa Kristohanong mga buluhaton, iyang giila nga ang iyang kalamposan dili tungod sa bisan unsang partikular nga mga abilidad niya. Uban ang pagkamakasaranganon, siya miingon: “Nganhi kanako, usa ka tawong ubos pa kay sa labing ubos sa tanang balaan, kining dili-takos nga kalulot gihatag, aron ipahayag ko ngadto sa kanasoran ang maayong balita bahin sa dili-matugkad nga bahandi ni Kristo.” (Efeso 3:8) Ang mga pulong ni Pablo wala magpakita nga siya hambogiro ni siya nagpakamatarong sa iyang kaugalingon. “Ang Diyos magabatok sa mga mapahitas-on, apan siya magahatag ug dili-takos nga kalulot sa mga mapainubsanon.” (Santiago 4:6; 1 Pedro 5:5) Gisundog ba nato ang panig-ingnan ni Pablo, nga mapainubsanong nag-isip sa atong kaugalingon nga mas ubos pa kay sa kinaubsan sa atong mga igsoon?

“Magaisip nga ang Uban Labaw”

4. Nganong malisdan usahay kita sa pag-isip nga ang uban labaw kanato?

⁴ Si apostol Pablo nagtambag sa mga Kristohanon: ‘Ayaw pagbuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kaninyo.’ (Filipos 2:3) Lisod tingali kini, ilabina kon kita adunay katungdanan. Tingali nalisdan kita tungod kay kita naimpluwensiyahan, sa usa ka sukod, sa maindigong tinamdan nga kaylap kaayo sa kalibotan karon. Posible nga sa mga bata pa, kita gitudloan sa pagpakig-indig, kaha sa atong mga igsoon diha sa balay o sa atong mga klasmet didto sa eskuylahan. Basin giawhag kita kanunay sa pagpaningkamot nga mahimong sikat nga atleta o kinahaworang estudyante sa eskuylahan. Siyempre, dalayegon ang paghimo sa atong kinamaayohan diha sa bisan unsang maayong buluhaton. Apan, ang mga Kristohanon naghimo niana, dili aron makadani ug dili-angayng pagtagad sa ilang kaugalingon, kondili aron bug-os nga makabenepisyo gikan sa maong kalihokan ug tingali aron makahatag usab ug kaayohan sa uban. Apan, ang kanunayng pagtinguha nga dayegon ingong kinamaayohan mahimong peligroso. Sa unsang paagi?

5. Kon dili mapugngan, unsay sangpotan sa maindigong tinamdan?

⁵ Kon dili mapugngan, ang maindigon o mahunahunaon lamang sa kaugalingon nga tinamdan makapahimo sa usa ka tawo nga dili matinahoron ug hambogiro. Basin masina siya sa mga katakos ug mga pribilehiyo sa uban. Ang Proverbio 28:22 nag-ingon: “Ang usa ka tawong masinahon ug mata nagaaghat sa iyang kaugalingon sa pagtinguha sa bililhong mga butang, apan wala siya mahibalo nga ang kawalad-on modangat kaniya.” Tingali mangahas pa gani siya sa pagkab-ot sa mga posisyon nga dili angay kaniya. Aron pakamatarongon ang iyang gibuhat, basin magsugod siya sa pagbagulbol o pagpanaway sa uban—mga kiling nga angayng likayan sa mga Kristohanon. (Santiago 3:14-16) Bisan unsa pa man, siya nameligrong makaugmad ug ako-una nga tinamdan.

6. Sa unsang paagi ang Bibliya nagpasidaan batok sa maindigong tinamdan?

 ⁶ Busa, ang Bibliya nag-awhag sa mga Kristohanon: “Dili kita magpaimportante sa kaugalingon, nga mag-aghat ug pag-indigay sa usag usa, nga magsinahay sa usag usa.” (Galacia 5:26) Si apostol Juan naghisgot bahin sa usa ka isigka-Kristohanon nga dayag nga nabiktima niining matanga sa tinamdan. “May gisulat ako sa kongregasyon,” miingon si Juan, “apan si Diotrefes, nga gustong makabaton sa unang dapit taliwala kanila, wala modawat sa bisan unsa gikan kanamo nga may pagtahod. Busa, kon ako makaanha na, hinumdoman ko ra unya ang iyang mga buhat nga padayon niyang ginabuhat, nga nagayawit bahin kanamo pinaagi sa daotang mga pulong.” Makapasubo kaayo kon mahitabo kana sa usa ka Kristohanon!—3 Juan 9, 10.

7. Unsay buot likayan sa usa ka Kristohanon diha sa maindigong trabahoan karon?

⁷ Siyempre, dili makataronganon ang paghunahuna nga ang usa ka Kristohanon bug-os nga makalikay sa tanang maindigong mga pangagpas. Pananglitan, ang iyang sekular nga trabaho maglangkit tingali ug pakig-indig sa ubang mga tawo o sa ubang mga negosyo nga naggama ug susamang mga produkto o nagtanyag ug susamang mga serbisyo. Apan, bisan sa maong mga kahimtang buot sa usa ka Kristohanon nga himoon ang iyang trabaho uban ang pagtahod, gugma, ug konsiderasyon. Isalikway niya ang ilegal o dili-Kristohanong mga batasan ug ang maindigon, mabangis ug makikaugalingon nga tinamdan. Dili niya bation nga ang pagkahimong numero uno—sa bisan unsang pangagpas—mao ang labing hinungdanong butang sa kinabuhi. Kon tinuod kana sa sekular nga mga pangagpas, mas hinungdanon nga mabatonan ang maong tinamdan diha sa pagsimba!

“Dili sa Pagtandi sa Laing Tawo”

8, 9. (a) Nganong ang Kristohanong mga ansiyano walay rason nga mag-indigay sa usag usa? (b) Nganong ang 1 Pedro 4:10 mapadapat sa tanang alagad sa Diyos?

⁸ Ang tinamdan nga angayng batonan sa mga Kristohanon diha sa ilang pagsimba gihubit niining inspiradong mga pulong: “Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.” (Galacia 6:4) Kay nahibalo nga dili sila angayng mag-indigay, ang mga ansiyano sa kongregasyon magtinabangay ug magtambayayongay ingong usa ka lawas. Sila malipay sa tabang nga mahatag sa matag usa alang sa kaayohan sa tibuok kongregasyon. Busa ilang likayan ang makapabungkag nga pag-indigay ug magpakita sila ug maayong panig-ingnan sa panaghiusa alang sa tibuok kongregasyon.

⁹ Tungod sa edad, kasinatian, o kinaiyanhong mga katakos, ang ubang mga ansiyano mas episyente tingali kay sa uban, o sila aduna tingaliy mas hait nga panabot. Tungod niini, ang mga ansiyano adunay lainlaing responsibilidad diha sa organisasyon ni Jehova. Imbes magtandi-tandi, ilang hinumdoman ang tambag: “Sumala sa nadawat nga gasa sa matag usa, gamita kini sa pag-alagad sa usag usa ingon nga maayong mga piniyalan sa dili-takos nga kalulot sa Diyos nga gipahayag sa nagkadaiyang paagi.” (1 Pedro 4:10) Sa pagkatinuod, kining tekstoha mapadapat sa tanang alagad ni Jehova, kay sa usa ka sukod ang tanan nakadawat sa gasa sa tukmang kahibalo ug  ang tanan nakatagamtam sa pribilehiyo sa pagpakig-ambit diha sa Kristohanong ministeryo.

10. Sa unsang paagi lamang nga ang atong sagradong pag-alagad mahimong dawaton ni Jehova?

¹⁰ Ang atong sagradong pag-alagad makapahimuot lamang kang Jehova kon kini gihimo tungod sa gugma ug debosyon, dili aron ituboy ang atong kaugalingon ibabaw sa uban. Busa kinahanglang makabaton kita ug timbang nga panglantaw sa atong kalihokan nga nagpaluyo sa matuod nga pagsimba. Bisan tuod walay bisan usa nga tukmang makahukom sa mga motibo sa uban, si Jehova “nagatimbang sa mga kasingkasing.” (Proverbio 24:12; 1 Samuel 16:7) Busa, maayong pangutan-on nato ang atong kaugalingon matag karon ug unya, ‘Unsay akong motibo sa paghimog mga buhat sa pagtuo?’—Salmo 24:3, 4; Mateo 5:8.

Hustong Panglantaw sa Atong mga Buhat

11. Unsang mga pangutana bahin sa atong kalihokan diha sa ministeryo ang makataronganong tagdon?

¹¹ Kon ang motibo hinungdanon kaayo sa pag-angkon sa pag-uyon ni Jehova, nan sa unsang gilapdon nga kita magmahunahunaon sa atong mga buhat sa pagtuo? Kon gihimo nato ang atong ministeryo uban ang hustong motibo, kinahanglan ba gayod nga maghimog talaan sa kon unsay atong ginahimo o kon unsa kana ka dako? Kini maoy makataronganong mga pangutana, tungod kay dili nato gusto nga ang estadistika mahimo na hinuong mas hinungdanon kay sa mga buhat sa pagtuo o ang pagkabaton ug maayong taho mao na hinuoy hatagan ug dako kaayong pagtagad diha sa atong Kristohanong kalihokan.

12, 13. (a) Unsa ang pipila ka katarongan kon nganong magtipig kita ug talaan sa atong pag-alagad sa kanataran? (b) Nganong malipay man kita sa dihang motan-aw sa katibuk-ang taho sa atong kalihokan sa pagsangyaw?

¹² Matikdi kon unsay giingon sa librong Organisado Aron Buhaton ang Kabubut-on ni Jehova: “Ang unang mga sumusunod ni Jesu-Kristo naikag sa mga taho bahin sa pag-uswag sa buluhatong pagwali. (Mar. 6:30) Ang basahon sa Bibliya sa Mga Buhat nagsulti kanato nga mga 120 ka tawo ang presente sa dihang gibubo ang balaang espiritu sa mga tinun-an sa Pentekostes. Sa wala madugay ang gidaghanon sa mga tinun-an miuswag ngadto sa 3,000 ug dayon ngadto sa 5,000. . . . (Buh. 1:15; 2:5-11, 41, 47; 4:4; 6:7) Ang balita bahin sa maong mga pag-uswag seguradong nakapadasig kaayo sa mga tinun-an!” Sa samang katarongan, ang mga Saksi ni Jehova karon naningkamot sa pagtipig ug tukmang mga talaan sa kon unsay nalampos sa tibuok kalibotan agig katumanan sa giingon ni Jesus: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo  24:14) Ang maong mga taho nagpakita ug realistikanhong hulagway kon unsa nay nalampos sa tibuok kalibotan. Gipakita niini kon diin gikinahanglan ang tabang ug kon unsang matanga sa literatura ug kon unsa ka daghan niana ang gikinahanglan aron sa pagpauswag sa buluhatong pagsangyaw.

¹³ Busa, ang pagtaho sa atong kalihokan sa pagsangyaw makapaarang kanato sa pagtuman sa gisugo kanato nga pagsangyaw sa maayong balita sa Gingharian sa mas epektibong paagi. Gawas pa, wala ba kita madasig sa dihang nabalitaan nato ang ginahimo sa atong mga igsoon sa ubang mga dapit sa kalibotan? Ang mga balita bahin sa pag-uswag ug pagkaylap sa buluhaton sa tibuok yuta makapalipay kanato, makapalihok kanato nga mohimo ug labaw pa, ug magpasalig kanato sa panalangin ni Jehova. Ug makapatagbaw gayod ang pagkahibalo nga ang atong personal nga taho nalakip nianang tibuok-kalibotang taho! Ang atong taho gamay ra kon itandi sa katibuk-ang ihap, apan namatikdan kana ni Jehova. (Marcos 12:42, 43) Hinumdomi, kon wala ang imong taho, ang katibuk-ang taho dili kompleto.

14. Gawas pa sa pagsangyaw ug pagpanudlo, unsay nalakip sa atong pagsimba kang Jehova?

¹⁴ Siyempre, kadaghanan sa nahimo sa matag usa ka Saksi sa pagtuman sa iyang responsibilidad ingong dedikado nga alagad ni Jehova dili makita sa iyang taho. Pananglitan, ang taho wala maglakip sa regular nga personal nga pagtuon sa Bibliya, pagtambong ug pagpakig-ambit sa Kristohanong mga tigom, pag-abaga sa mga katungdanan diha sa kongregasyon, pagtabang sa mga isigkamagtutuo nga nanginahanglan, paghatag ug pinansiyal nga tabang sa tibuok-kalibotang buluhaton sa Gingharian, ug uban pa. Busa, bisan tuod ang atong taho sa pag-alagad sa kanataran hinungdanon, nga nagtabang kanato nga magpadayon ang atong kasibot diha sa pagsangyaw ug malikayan ang paghinayhinay, kinahanglang lantawon nato kini sa hustong paagi. Dili kita angayng maghunahuna nga kita takos nga makadawat ug kinabuhing dayon tungod sa atong maayong taho diha sa kanataran.

“Masiboton Alang sa Maayong mga Buhat”

15. Nganong hinungdanon ang mga buhat bisan tuod dili lamang kini ang basehanan nga kita maluwas?

¹⁵ Klaro nga hinungdanon ang mga buhat bisan tuod dili lamang kini ang basehanan nga kita maluwas. Mao kanay hinungdan kon nganong ang mga Kristohanon gitawag ug “usa ka katawhan nga iyaha lamang gayod, nga masiboton sa maayong mga buhat” ug kon nganong gidasig sila nga ‘magmahunahunaon sa usag usa aron sa pagdasig ngadto sa paghigugma ug sa maayong mga buhat.’ (Tito 2:14; Hebreohanon 10:24) Ang laing magsusulat sa Bibliya, si Santiago, mas pintok nga miingon: “Sa pagkatinuod, maingon nga patay ang lawas nga walay espiritu, sa ingon usab patay ang pagtuo nga walay binuhatan.”—Santiago 2:26.

16. Unsay mas hinungdanon pa kay sa mga buhat, apan unsay angay natong bantayan?

¹⁶ Bisan tuod mahinungdanon ang maayong mga buhat, ang mga motibo sa pagbuhat niana mas mahinungdanon. Busa maalamon nga susihon nato ang atong mga motibo matag karon ug unya. Apan, tungod kay walay tawo nga tukmang mahibalo sa mga motibo sa uban, kinahanglang magbantay kita nga dili manghukom sa uban. “Kinsa man ikaw nga mohukom sa sulugoon sa balay nga iya sa lain?” kita gisukna, uban ang klarong tubag: “Ngadto sa iyang kaugalingong agalon siya mobarog o mapukan.” (Roma 14:4) Si  Jehova, ang Agalon sa tanan, ug ang iyang tinudlong Maghuhukom, si Kristo Jesus, maghukom kanato, dili lamang pinasukad sa atong mga buhat kondili pinasukad usab sa atong mga motibo, kahigayonan, gugma, ug sa atong debosyon. Si Jehova ug Kristo Jesus lamang ang tukmang makahukom kon ato bang nabuhat ang giawhag nga buhaton sa mga Kristohanon, sumala ni apostol Pablo: “Buhata ang kutob sa imong maarangan nga itanyag ang imong kaugalingon sa Diyos ingong inuyonan, usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.”—2 Timoteo 2:15; 2 Pedro 1:10; 3:14.

17. Samtang naningkamot sa pagbuhat sa atong kinamaayohan, nganong angay natong hinumdoman ang Santiago 3:17?

¹⁷ Si Jehova makataronganon sa iyang gidahom kanato. Sumala sa Santiago 3:17, “ang kaalam nga gikan sa itaas,” lakip sa ubang mga butang, “makataronganon.” Dili ba maalamong dalan, ug tinuod usab nga kalamposan, kon sundogon nato si Jehova niining bahina? Busa, dili nato sulayan nga mohimo ug dili-makataronganon ug dili-makab-ot nga mga panahom alang sa atong kaugalingon o sa atong mga igsoon.

18. Unsay atong mapaabot sa dihang kita adunay timbang nga panglantaw sa atong mga buhat ug sa dili-takos nga kalulot ni Jehova?

¹⁸ Basta huptan nato ang timbang nga panglantaw sa atong mga buhat sa pagtuo ug sa dili-takos nga kalulot ni Jehova, kanunay natong bation ang kalipay nga maoy timailhan sa matuod nga mga alagad ni Jehova. (Isaias 65:13, 14) Magmaya kita sa mga panalangin nga ginabubo ni Jehova sa iyang katawhan sa katibuk-an, bisan kon unsa pay maarangan sa matag usa kanato. Sa atong padayon nga ‘pag-ampo ug pagpangamuyo uban ang pagpasalamat,’ mohangyo kita sa Diyos nga tabangan kita sa pagbuhat sa atong kinamaayohan. Dayon, sa walay duhaduha, “ang kalinaw sa Diyos nga labaw sa tanang panghunahuna magbantay sa [atong] mga kasingkasing ug [atong] mga gahom sa pangisip pinaagi kang Kristo Jesus.” (Filipos 4:4-7) Oo, kita mahupayan ug madasig sa pagkahibalo nga kita maluwas, dili lamang pinaagi sa mga buhat, kondili pinaagi usab sa dili-takos nga kalulot ni Jehova!

Nganong ang mga Kristohanon

• maglikay sa pagpanghambog bahin sa personal nga mga kalamposan?

• maglikay sa pagpakita ug maindigong tinamdan?

• magtaho sa ilang Kristohanong kalihokan diha sa ministeryo sa kanataran?

• maglikay sa paghukom sa mga isigka-Kristohanon?

[Mga Pangutana sa Pagtuon]

[Hulagway sa panid 15]

“Ang akong dili-takos nga kalulot igo na alang kanimo”

[Mga hulagway sa panid 16, 17]

Ang mga ansiyano malipay sa tabang nga mahatag sa matag usa alang sa kaayohan sa kongregasyon

[Mga hulagway sa panid 18, 19]

Kon wala ang imong taho, ang katibuk-ang taho dili kompleto