Si Jehova Manalipod Niadtong Nagalaom Kaniya

“Tugoti nga ang imong mahigugmaong-kalulot ug ang imong kamatinud-anon manalipod kanunay kanako.”—SALMO 40:11.

1. Unsay gihangyo ni Haring David kang Jehova, ug sa unsang paagi kanang maong hangyo gihatag sa pagkakaron?

 SI Haring David sa karaang Israel “matinuoron nga naglaom kang Jehova” ug natukmod sa pag-ingon nga “gikiling [ni Jehova kaniya] ang iyang igdulungog ug gidungog ang [iyang] pagtuaw alang sa tabang.” (Salmo 40:1) Sublisubli niyang nakita mismo kon sa unsang paagi si Jehova nanalipod niadtong nahigugma Kaniya. Busa, si David nakahangyo nga kanunay unta siyang panalipdan ni Jehova. (Salmo 40:11) Giisip nga apil sa matinumanong mga lalaki ug babaye nga gisaaran ug “mas maayong pagkabanhaw,” si David sa pagkakaron seguradong anaa sa panumdoman ni Jehova ingong usa nga makadawat nianang maong ganti. (Hebreohanon 11:32-35) Busa ang iyang umaabot giseguro sa labing maayong paagi nga posible. Ang iyang ngalan nasulat diha sa “basahon sa handomanan” ni Jehova.—Malaquias 3:16.

2. Sa unsang paagi ang Kasulatan motabang kanato sa pagsabot kon unsay kahulogan sa pagkahimong gipanalipdan ni Jehova?

² Bisan tuod ang mga matinumanon nga gihisgotan sa Hebreohanon kapitulo 11 nabuhi una pa mabuhi si Jesu-Kristo sa yuta, sila nagkinabuhi nga kaharmonya sa gitudlo ni Jesus sa dihang siya miingon: “Siya nga magamahal sa iyang kalag magalaglag niini, apan siya nga magadumot sa iyang kalag niining kalibotana magatipig niini alang sa kinabuhing walay kataposan.” (Juan 12:25) Busa, ang pagkahimong gipanalipdan ni Jehova klarong wala magpasabot nga ang usa dili na mag-antos o lutoson. Kini nagpasabot nga ang usa mapanalipdan sa espirituwal nga paagi aron makahupot ug maayong baroganan atubangan sa Diyos.

3. Unsay atong pamatuod nga si Kristo Jesus gipanalipdan ni Jehova, ug unsay gisangpotan?

³ Si Jesus mismo nakaagom sa mabangis nga paglutos ug pasipala, ug sa kataposan ang iyang mga kaaway milampos ra sa pagpahamtang kaniya ug labing makauulaw ug masakit nga kamatayon. Bisan pa niana, wala kini magpasabot nga wala tumana sa Diyos ang iyang saad nga panalipdan ang Mesiyas. (Isaias 42:1-6) Ang pagkabanhaw ni Jesus sa ikatulo ka adlaw human sa iyang makauulaw nga kamatayon nagpamatuod nga si Jehova nakadungog sa iyang pagtuaw alang sa tabang—maingon nga nadungog ni Jehova ang pagtuaw ni David. Isip tubag, gipalig-on ni Jehova si Jesus sa paghupot sa iyang integridad. (Mateo 26:39) Tungod kay siya gipanalipdan, si Jesus nakabaton ug imortalidad didto sa mga langit, ug milyonmilyong mga tawo nga nagpasundayag ug pagtuo sa lukat ang adunay paglaom nga mabuhi sa walay kataposan.

4. Unsay gipasalig ngadto sa dinihogang mga Kristohanon ug sa “ubang mga karnero”?

⁴ Makasalig kita nga si Jehova andam ug  makahimo usab sa pagpanalipod sa iyang mga alagad karon sama sa iyang gibuhat sa mga adlaw nila ni David ug Jesus. (Santiago 1:17) Ang diyutay na lang nga nanghibiling dinihogan nga mga igsoon ni Jesus dinhi sa yuta makasalig sa saad ni Jehova: ‘Ang usa ka dili-madunoton ug wala-mahugawi ug dili-malawos nga panulondon itagana sa mga langit alang kaninyo, kinsa gipanalipdan sa gahom sa Diyos pinaagi sa pagtuo alang sa kaluwasan nga andam nang igapadayag sa kataposang yugto sa panahon.’ (1 Pedro 1:4, 5) Ang “ubang mga karnero,” nga adunay yutan-ong paglaom, makasalig usab sa Diyos ug sa iyang saad pinaagi sa salmista: “Oh higugmaa ninyo si Jehova, kamong tanan nga mga maunongon kaniya. Si Jehova magapanalipod sa mga matinumanon.”—Juan 10:16; Salmo 31:23.

Gipanalipdan sa Espirituwal nga Paagi

5, 6. (a) Sa unsang paagi ang katawhan sa Diyos gipanalipdan sa modernong panahon? (b) Unsay relasyon sa mga dinihogan kang Jehova, ug komosta kadtong adunay yutan-ong paglaom?

⁵ Sa modernong panahon, si Jehova naghimog mga kahikayan sa pagpanalipod sa iyang katawhan sa espirituwal nga paagi. Bisan tuod wala sila panalipdi batok sa paglutos o sa mga kalisdanan ug mga trahedya nga komon nga mahitabo, siya maunongong naghatag kanila sa tabang ug pagdasig nga gikinahanglan sa pagpanalipod sa ilang suod nga relasyon kaniya. Ang pundasyon niining maong relasyon mao ang ilang pagtuo sa mahigugmaong tagana sa Diyos sa lukat. Ang pipila niining matinumanong mga Kristohanon gidihogan sa balaang espiritu sa Diyos aron mahimong kaubang mga magmamando ni Kristo didto sa langit. Sila gipahayag nga matarong ingong espirituwal nga mga anak sa Diyos, ug ngadto kanila mapadapat kining mga pulonga: “Siya nagpagawas kanato gikan sa awtoridad sa kangitngit ug nagbalhin kanato ngadto sa gingharian sa Anak nga iyang gihigugma, nga pinaagi kaniya atong nabatonan ang kagawasan pinaagi sa lukat, ang kapasayloan sa atong mga sala.”—Colosas 1:13, 14.

⁶ Milyonmilyon pang matinumanon nga mga Kristohanon ang gipasaligan nga sila usab makabenepisyo gikan sa lukat nga gitagana sa Diyos. Atong mabasa: “Ang Anak sa tawo mianhi, dili aron pagaalagaran, kondili aron sa pag-alagad ug sa paghatag sa iyang kalag nga usa ka lukat baylo sa daghan.” (Marcos 10:45) Ang maong mga Kristohanon nagpaabot nga makatagamtam “sa mahimayaong kagawasan sa mga anak sa Diyos” sa takdang panahon. (Roma 8:21) Kasamtangan, ilang gipabilhan ang ilang personal nga relasyon uban sa Diyos ug sinsero silang naningkamot nga mapalig-on ang maong relasyon.

7. Pinaagi sa unsa nga si Jehova nanalipod karon sa espirituwal nga kaayohan sa iyang katawhan?

⁷ Ang usa ka paagi diin si Jehova nanalipod sa espirituwal nga kaayohan sa iyang katawhan maoy sa pagtagana ug programa sa progresibong pagbansay. Pinaagi niini makabaton sila ug mas tukmang kahibalo sa kamatuoran. Si Jehova nagtagana usab ug padayong giya pinaagi sa iyang Pulong, iyang organisasyon, ug sa iyang balaang espiritu. Ilalom sa pagtultol sa “matinumanon ug maalamong ulipon,” ang katawhan sa Diyos sa tibuok yuta nahisamag internasyonal nga pamilya. Ang ulipon nga matang nag-atiman sa espirituwal nga mga panginahanglan ug kon gikinahanglan bisan sa pisikal  nga mga panginahanglan sa pamilya sa mga alagad ni Jehova—bisan unsa pay ilang nasodnong kagikan o kahimtang sa katilingban.—Mateo 24:45.

8. Unsang pagsalig ang nabatonan ni Jehova sa iyang mga maunongon, nga nagpasalig kanila sa unsa?

⁸ Maingon nga wala panalipdi ni Jehova si Jesus sa pisikal nga paagi batok sa mga pag-atake sa iyang mga kaaway, wala usab Niya panalipdi ang mga Kristohanon nianang paagiha karon. Apan wala kini magpasabot nga nasuko ang Diyos. Wala gayod siya masuko! Hinunoa, kini nagpasiugda sa iyang pagsalig nga sila modapig kaniya sa dakong unibersohanon nga isyu. (Job 1:8-12; Proverbio 27:11) Dili gayod biyaan ni Jehova kadtong maunongon kaniya, “kay si Jehova mahigugmaon sa hustisya, ug dili niya pagabiyaan ang mga maunongon kaniya. Sila pagabantayan hangtod sa panahong walay tino.”—Salmo 37:28.

Gipanalipdan sa Mahigugmaong-Kalulot ug Kamatinud-anon

9, 10. (a) Sa unsang paagi ang pagkamatinud-anon ni Jehova nanalipod sa iyang katawhan? (b) Sa unsang paagi gipakita sa Bibliya nga si Jehova nanalipod sa mga maunongon kaniya pinaagi sa iyang mahigugmaong-kalulot?

⁹ Sa iyang pag-ampo nga nasulat sa Salmo 40, si David mihangyo nga unta panalipdan siya sa mahigugmaong-kalulot ug pagkamatinud-anon ni Jehova. Ang pagkamatinud-anon ni Jehova ug ang iyang gugma sa pagkamatarong nagkinahanglan nga tin-aw niyang ipahayag kon unsa ang iyang mga sukdanan. Kadtong nagkinabuhi sumala niining maong mga sukdanan mapanalipdan gayod batok sa mga kagul-anan, kahadlok, ug mga problema nga naagoman niadtong wala magpakabana niana. Pananglitan, mapanalipdan nato ang atong kaugalingon ug ang atong mga minahal batok sa daghang makapaguol nga mga problema kon atong likayan ang pag-abuso sa droga ug alkoholikong ilimnon, seksuwal nga pagkamahilayon, ug mapintas nga estilo sa kinabuhi. Ug bisan kadtong nahilayo sa dalan ni Jehova sa pagkamatinud-anon—sama sa gibuhat usahay ni David—makasalig nga ang Diyos usa gihapon ka “tagoanang dapit” alang sa mahinulsolong mga mamumuhat ug daotan. Kanang mga tawhana makasinggit nga malipayon: “Panalipdan mo ako gikan sa kasakitan.” (Salmo 32:7) Bililhon gayod kini nga pagpahayag sa mahigugmaong-kalulot sa Diyos!

¹⁰ Ang laing pananglitan sa mahigugmaong-kalulot sa Diyos mao nga siya nagpasidaan sa iyang mga alagad sa pagpabiling bulag sa daotang kalibotan, nga laglagon sa dili madugay. Atong mabasa: “Ayaw ninyo higugmaa ang kalibotan o ang mga butang nga anaa sa kalibotan. Kon adunay mahigugma sa kalibotan, ang gugma sa Amahan wala diha kaniya; tungod kay ang tanan nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa—wala magagikan sa Amahan, apan nagagikan sa kalibotan.” Pinaagi sa pagpatalinghog ug pagtuman nianang maong pasidaan, kita literal nga makapanalipod sa atong kinabuhi hangtod sa hangtod, kay ang teksto nagpadayon: “Dugang pa, ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:15-17.

Napanalipdan sa Katakos sa Panghunahuna, Pag-ila, ug Kaalam

11, 12. Ipatin-aw kon sa unsang paagi ang katakos sa panghunahuna, pag-ila, ug kaalam manalipod kanato.

¹¹ Alang niadtong naglaom nga makaangkon sa  pag-uyon sa Diyos, ang anak ni David nga si Solomon giinspirar sa pagsulat: “Ang katakos sa panghunahuna magabantay kanimo, ang katakos sa pag-ila magapanalipod kanimo.” Nag-awhag usab siya: “Batoni ang kaalam . . . Ayaw kini pagbiyai, ug kini magabantay kanimo. Higugmaa kini, ug kini magapanalipod kanimo.”—Proverbio 2:11; 4:5, 6.

¹² Atong gigamit ang katakos sa panghunahuna kon kita mamalandong sa atong makat-onan gikan sa Pulong sa Diyos. Sa pagbuhat niana mapauswag pa nato ang atong katakos sa pag-ila, sa ingon mahatagan natog prioridad ang mas hinungdanong mga butang. Hinungdanon kini, tungod kay ang kadaghanan kanato nahibalo—tingali pinaagi sa personal nga kasinatian—nga ang mga problema motungha sa dihang ang mga tawo tinuyo o dili-tinuyo nga nag-una sa mga butang nga dili angayng unahon. Ang kalibotan ni Satanas naghaylo kanato nga himoong tumong ang pagkab-ot ug materyal nga mga bahandi, pagkahimong inila, ug ang pagbaton ug gahom, samtang si Jehova nagdasig kanato nga isentro ang atong pagtagad sa mas hinungdanong espirituwal nga mga tumong. Kon dili nato unahon ang espirituwal nga mga butang, mahimong mabungkag ang mga pamilya ug mga panaghigalaay, ug mahanaw ang espirituwal nga mga tumong. Tungod niini, anihon sa usa ka tawo ang makapasubo nga kahimtang nga gipaila sa mga pulong ni Jesus: “Unsay kapuslanan sa usa ka tawo nga maangkon ang tibuok kalibotan ug mawad-an sa iyang kalag?” (Marcos 8:36) Maalamon nga magpatalinghog sa tambag ni Jesus: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.”—Mateo 6:33.

Ang Kapeligrohan sa Pagkahimong Makikaugalingon

13, 14. Unsay kahulogan sa pagkahimong makikaugalingon, ug nganong dili maalamon nga mahimong ingon niana?

¹³ Ang mga tawo kinaiyanhon nga mainteres sa kaugalingon. Apan, kon ang personal nga mga tinguha ug mga intereses mahimo nang labing hinungdanon sa kinabuhi, motungha ang mga problema. Busa, aron mapanalipdan ang atong pakighigalaay kaniya, gisugo kita ni Jehova nga likayan ang pagkahimong makikaugalingon. Kining terminoha nagpasabot ug “paghunahuna lamang sa kaugalingong mga tinguha, panginahanglan, o mga intereses.” Dili ba haom kana nga kahubitan sa daghang tawo karon? Makahuloganon nga ang Bibliya nagtagna nga “sa kataposang mga adlaw” sa daotang sistema ni Satanas, ‘ang mga tawo magmahigugmaon sa ilang kaugalingon,’ o mahimong makikaugalingon.—2 Timoteo 3:1, 2.

¹⁴ Nasabtan sa mga Kristohanon nga maalamon ang pagsunod sa sugo sa Bibliya nga magpakitag interes sa uban, nga higugmaon sila sama sa paghigugma sa kaugalingon. (Lucas 10:27; Filipos 2:4) Ang mga tawo sa katibuk-an maghunahuna tingali nga kini dili praktikal, apan hinungdanon kini aron matagamtam nato ang malamposong  mga kaminyoon, malipayong mga relasyon sa pamilya, ug makapatagbawng mga panaghigalaay. Busa, dili gayod tugotan sa matuod nga alagad ni Jehova nga ang kinaiyanhong interes sa kaugalingon mao nay magdominar sa iyang kinabuhi nga dili na hatagag pagtagad ang mas hinungdanong mga intereses. Labing hinungdanon, kini nagtumong sa mga intereses ni Jehova, ang Diyos nga iyang ginasimba.

15, 16. (a) Sa unsa mosangpot ang makikaugalingon nga tinamdan, nga giilustrar ni kinsa? (b) Sa pagkatinuod, unsay gibuhat sa usa ka tawo sa dihang mohukom dayon siya sa uban?

¹⁵ Ang makikaugalingon nga tinamdan mahimong mosangpot sa pagpakamatarong sa kaugalingon, nga, sa baylo, makapahimo sa usa ka tawo nga hiktin ug hunahuna, mapangahason. Haom ang giingon sa Bibliya: “Ikaw walay ikapangatarongan, Oh tawo, bisan kinsa ka pa, kon ikaw maghukom; kay sa butang nga imong gihukman ang lain, imong gihukman ang imong kaugalingon, sanglit ikaw nga naghukom nagbuhat man sa samang mga butang.” (Roma 2:1; 14:4, 10) Ang relihiyosong mga lider sa adlaw ni Jesus kombinsido kaayo sa ilang pagkamatarong nga gibati nila nga kuwalipikado silang mobadlong kang Jesus ug sa iyang mga sumusunod. Sa pagbuhat niana, ilang gibutang ang ilang kaugalingon sa posisyon sa mga maghuhukom. Tungod kay nagpakabuta sa ilang mga kasaypanan, sa pagkatinuod gihukman nila ang ilang kaugalingon.

¹⁶ Si Judas, ang sumusunod ni Jesus nga nagbudhi kaniya, nagtugot usab sa iyang kaugalingon nga mahimong maghuhukom sa uban. Sa usa ka higayon didto sa Betania sa dihang si Maria, ang igsoong babaye ni Lazaro, nagdihog kang Jesus ug mahumot nga lana, hugot nga mitutol si Judas. Iyang gipadayag ang iyang kapungot pinaagi sa pagpangatarongan: “Nganong wala man ibaligya kining pinahumotan nga lana sa tulo ka gatos ka denario ug ihatag sa mga tawong kabos?” Apan ang asoy nagpadayon agig pagpatin-aw: “Hinuon, kini iyang giingon dili tungod kay nahingawa siya sa mga kabos, kondili tungod kay siya kawatan ug naghupot sa kahon sa salapi ug tigkuha sa mga salapi nga gibutang niini.” (Juan 12:1-6) Hinaot nga dili kita mahisama kang Judas o sa relihiyosong mga lider, kinsa mihukom dayon sa uban, nga sa pagbuhat niana ilang gihukman ang ilang kaugalingon.

17. Iilustrar ang kapeligrohan sa pagkahimong mapagawalon o sa pagkahimong sobra ka masaligon sa kaugalingon.

¹⁷ Ikasubo, ang pipila ka unang mga Kristohanon, bisan tuod dili sila mga kawatan sama kang Judas, nabiktima sa garbo, nga nahimong magpagawal. Bahin kanila, misulat si Santiago: “Kamo nagpasigarbo sa inyong mapagawalong mga panghambog.” Dayon siya mipadayon: “Ang tanang pagpasigarbo nga ingon niana daotan.” (Santiago 4:16) Ang pagpanghambog sa atong nalampos o bahin sa atong mga pribilehiyo diha sa pag-alagad kang Jehova makadaot kanato. (Proverbio 14:16) Atong nahinumdoman kon unsay nahitabo kang apostol Pedro, kinsa sa usa ka yugto sa sobrang pagsalig sa kaugalingon nanghambog: “Bisan pag ang tanan mangapandol labot kanimo, ako dili gayod mapandol! . . . Bisan kon kinahanglang mamatay ako kauban nimo, dili ko gayod ikaw ilimod.” Sa pagkatinuod, wala kitay angayng ipanghambog sa atong kaugalingon. Ang tanan nga atong nabatonan nadawat nato tungod sa mahigugmaong-kalulot ni Jehova. Ang paghinumdom niini mopugong kanato sa pagkahimong mapagawalon.—Mateo 26:33-35, 69-75.

18. Unsay pagbati ni Jehova sa garbo?

¹⁸ Giingnan kita: “Ang garbo nagauna sa pagkahagsa, ug ang mapahitas-ong espiritu nagauna sa pagkapukan.” Ngano man? Si Jehova nagtubag: “Ang pagbayaw-sa-kaugalingon ug ang pagkagarboso . . . akong gidumtan.” (Proverbio 8:13; 16:18) Mao diay nga nasuko si Jehova sa “pagkamapalabilabihon sa kasingkasing sa hari sa Asirya ug tungod sa pagpadako-sa-kaugalingon sa iyang pagkamapahitas-on sa mga mata”! (Isaias 10:12) Gisilotan siya ni Jehova. Sa dili madugay  ang tibuok kalibotan ni Satanas, uban sa garboso, nagpaimportante-sa-kaugalingon nga mga lider, makita ug dili makita, pagasilotan usab. Hinaot nga dili nato sundogon ang mabuotbuotong tinamdan sa mga kaaway ni Jehova!

19. Sa unsang bahina nga ang katawhan sa Diyos mapasigarbohon apan mapainubsanon?

¹⁹ Ang matuod nga mga Kristohanon aduna gayoy rason nga magmapasigarbohon ingong mga alagad ni Jehova. (Jeremias 9:24) Sa samang higayon, sila aduna gayoy rason nga magpabiling mapainubsanon. Ngano? Tungod kay “ang tanan nakasala ug wala makaabot sa himaya sa Diyos.” (Roma 3:23) Busa aron mapanalipdan ang atong baroganan ingong mga alagad ni Jehova, kinahanglang mabatonan nato ang tinamdan ni apostol Pablo, kinsa miingon nga “si Kristo Jesus mianhi sa kalibotan aron sa pagluwas sa mga makasasala,” ug dayon midugang siya: “Niini nila ako maoy kinalabwan.”—1 Timoteo 1:15.

20. Sa unsang paagi nanalipod si Jehova sa iyang katawhan karon, ug sa unsang paagi panalipdan niya sila sa umaabot?

²⁰ Tungod kay ang katawhan ni Jehova andam nga mohiklin sa ilang personal nga mga intereses aron unahon ang mga intereses sa Diyos, makaseguro kita nga si Jehova magpadayon sa pagpanalipod kanila sa espirituwal nga paagi. Makaseguro usab kita nga sa dihang moabot na ang dakong kasakitan, panalipdan ni Jehova ang iyang katawhan dili lamang sa espirituwal nga paagi kondili sa pisikal usab. Sa pagsulod sa bag-ong kalibotan sa Diyos, sila makapatugbaw: “Tan-awa! Kini mao ang atong Diyos. Kita naglaom diha kaniya, ug siya magluwas kanato. Kini mao si Jehova. Kita naglaom diha kaniya. Magmalipayon kita ug magmaya diha sa iyang kaluwasan.”—Isaias 25:9.

Nahinumdom Ka Ba?

• Sa unsang paagi gipanalipdan sila si Haring David ug Jesu-Kristo?

• Sa unsang paagi ang katawhan ni Jehova karon gipanalipdan?

• Nganong angay natong likayan nga mapasiugda pag-ayo ang kaugalingon?

• Nganong kita mahimong mapasigarbohon apan mapainubsanon?

[Mga Pangutana sa Pagtuon]

[Mga hulagway sa panid 9]

Sa unsang paagi gipanalipdan ni Jehova si David ug si Jesus?

[Mga hulagway sa panid 10, 11]

Sa unsang mga paagi ang katawhan sa Diyos napanalipdan sa espirituwal nga paagi karon?

[Mga hulagway sa panid 12]

Bisan tuod mapasigarbohon kita nga nag-alagad kang Jehova, kita kinahanglan gayong magmapainubsanon